Dah đei jet khan lơliơ gơh đei hơmet ăn ‘lơ̆ng hloh lăm tơdrong arih, rŏlăng rim ‘nu bơngai gô đei nơ̆r tơl phara băl. Đei bơngai hơmet ăn kơ tơdrong bơ̆jang, đei bơngai chă mŭk tơmam, đei bơngai ‘măn đĭ đăng tơmam wă hơmet ăn kơ kon hơ’lơ̆p tơ anăp. Dôm tơdrong noh gĭt ngăl tơpă, mă-lei truh tơ minh năr ayơ noh, dôm lu tơmam noh gô tôch lăm tơdrong arih tơ ala teh âu. Lăp đei minh tơdrong hơmet ăn ưh kơ đei layơ hiong tơdrong gĭt kăl, ‘noh jơ̆ dôm lu tơmam pơyơ̆r ăn kơ dêh char ‘Bok Kei-Dei.

Năr ‘nâu, ‘năr 05/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai CHĂ MONG ĂN KƠ TƠDRONG ARIH KHŎM KHŎM

“Iĕm ‘nĕ chă mong mŭk tơmam dah jên tơ teh âu lơ, yua kơ tơ teh âu đei sang-sa, mua reh, hăm hli kơ đe iŏk tơtông mơ̆n.  Iĕm athei chă mong mŭk tơmam tơ plĕnh ti đĕch huay kơ đei sang-sa, mua reh, hăm ưh kơ đei bu gơh iŏk tơtông.” (Mathiơ 6:19-20)

“Đunh ‘biơ̆ đơ̆ng noh Yêsu năm tơ lơ pơlei chă bơtho đe tơdrong ‘Bok Kei-Dei wă pơgơ̆r kon bơngai. Lu mơjĭt-‘bar ‘nu bơngai pơhrăm păng Sư kư̆m năm kiơ̆ Sư mơ̆n. Na kư̆m đei lu drŏ-kăn năm hơdai lu sư mơ̆n. Lu drŏ-kăn noh sơ̆ đơ̆ng đêl Yêsu pơklaih lơ tơdrong jĭ lu sư, kư̆m đei pơpuh lu yang kơnê̆ đơ̆ng lu sư mơ̆n. Lu đe noh anăn lu sư: Mari đơ̆ng Pơlei Mađơla. Bơngai noh sơ̆ Yêsu pơpuh tơpơh tŏ yang kơnê̆ đơ̆ng sư. Yă Jôanna akăn Chusa. Chusa noh sư wei-lăng tơmam pơtao Hêrôt. Yă Susana păng kư̆m đei lơ drŏ-kăn nai dơ̆ng kiơ̆ hơdai Yêsu. Lu sư tơgŭm Yêsu păng lu bơngai pơhrăm păng Sư bơ̆n tơmam, bơ̆n jên.” (Luka 8:1-3)

“Oh gơh năm tơ anih jang wă jang thim dơ̆ng lăm năr mă ‘bar lăm giĕng âu gơh ưh? Đei lơ bơngai jĭ wă ‘maih tơ’bơ̆p oh.” – Nơ̆r athei đơ̆ng drŏ kăn pơgơ̆r anih jang pơm ăn kơ jơhngơ̆m đon inh ưh kơbăt pơm thoi yơ, yua kơ, ‘nguaih kơ năr Tơpơh ‘măn jơ wă kơkuh kơ Kră Yang, inh kư̆m đei ‘măn jơ lăm năr mă ‘bar lăm giĕng năm ngôi păng bơwei bơngai lui, tơ’bôh nơ̆r ‘Bok Kei-Dei, jang tơgŭm, păng tơ’bơ̆p dôm lu bơngai akăn, bơngai mĕ oei lăm tơdrong ơh sơ’ngon, hli tơrơ, păng kăl kơ đei Nơ̆r ‘Bok Kei-Dei bơtho tơ’bôh. Đei đunh kơ sơnăm, inh arih lăm tơdrong pŭn hiôk hơdai păng Kră Yang lăm năr pơdơh âu, mă-lei kư̆m oei đei jơhngơ̆m đon inh pơjăng băl hăm dôm nơ̆r chih khan đơ̆ng anih inh bơ̆jang thoi noh.

Hlôi bơih dôm năr gleh glăn chă tơdrong jang, dang ei tơdrong tơblah rim năr đơ̆ng inh jơ̆ dôm lu nơ̆r chih khan ‘bĕnh tơdrong pơhlŭ đơ̆ng anih inh bơ̆jang. Trong iĕ inh hlôi rơih yak hơdai păng Kră Yang ‘bĕnh tơdrong pŭn hiôk yua kơ Kră Yang oei hơdai. Tơdrong mơn băt Kră Yang hơmet kơ’bang sŏng sa ăn kơ inh ‘bơ̆t anăp lu bơngai ayăt pơm ăn jơhngơ̆m đon inh bĕnh tơdrong bơnê kơ ‘Bă. Inh hơpơi wă kơ arih tơ ala teh âu kiơ̆ tơdrong tơdă đơ̆ng Kră Yang kơplah Sư rơih iŏk inh.

Bơnê kơ Kră Yang, Sư ưh kơ ăn tơdrong pơhlŭ kiơ hloh kơ jơhngơ̆m inh kĕ. Nơ̆r Kră Yang pơ ‘lơ̆ng tơ’blŏk ăn kơ inh tơdrong arih minh ‘nu bơngai drŏ kăn mă đe chih lăm Sơ̆p hla bơar ‘Bok Kei-Dei.

Kơplah lơ bơngai mă đe krao khan lăm dôm Sơ̆p hla bơar Tơdrong ‘Nao ‘Lơ̆ng, yă Jôanna ‘bôh lăp ‘băr pêng wơ̆t hăm dôm nơ̆r chih kơđeh đĕch. Mă-lei, rim wơ̆t Sơ̆p hla bơar ‘Bok Kei-Dei pơma ‘bơm sư đĭ-đăng jing minh tơdrong tơm gĭt kăl tơpă lăm tơdrong jang đơ̆ng Kră Yang Yêsu.

Luka 8:3 roi tơbăt yă âu jơ̆ “Jôana akăn Chusa, sư wei lăng tơm pơtao Hêrôt…”
Tơdrong âu tơ’bôh khan sư lĕch đơ̆ng hnam dơnŏ mơdrŏng đei anăn. Klo sư jơ̆ bơngai wei-lăng tơmam pơtao Hêrôt, anih jang gĭt kăl lăm hnam pơtao. Dah lăng kiơ̆ kơ bơngai ala teh âu, yă Jôanna đei hiôk hian lăm tơdrong arih mơdrŏng, kơjăp păng đei đe pôk pơ ư. Mă-lei, sư hlôi rơih iŏk minh tơdrong hơmet ăn phara tơpă. Luka roi khan sư păng lơ bơngai drŏ kăn nai dơ̆ng “yua tơmam, jên tơgŭm Yêsu păng lu bơngai pơhrăm păng Sư.”

Tơdrong âu ưh kơ lăp dôm mŭk pơyơ̆r iĕ đĕch dah tơgŭm lăm kơplah jơ ayơ noh đĕch. Tơdrong jang Kră Yang Yêsu đei lơ sơnăm, yak năm đơ̆ng pơlei âu truh tơ pơlei nai. Lu bơngai pơhrăm achăng lê̆ tơdrong bơ̆jang lu sư na kiơ̆ Kră Yang. Đơ̆ng rŏng kơ rim nơ̆r bơtho, lơ tơdrong mơsêh hlĭch, rim wơ̆t yak năm noh jơ̆ lơ kơ tơdrong kăl tơpă gah tơmam sŏng sa, anih oei păng dôm tơdrong yua lăm tơdrong arih rim năr.

Yă Jôanna ‘bôh tơdrong gĭt kăl đơ̆ng tơdrong jang ‘Bok Kei-Dei oei pơm păng sư đei jơhngơ̆m hiôk yua mŭk tơmam, jên sư đei wă tơgŭm lăm tơdrong noh. Rŏlăng sư ưh kơ bơngai bơtho ‘bơ̆t anăp lơ bơngai, sư kư̆m ưh kơ pơm dôm lu tơdrong hlĭch. Mă-lei sĭt đơ̆ng jơhngơ̆m đon hơpơi wă jing bơngai jang tơgŭm ăn kơ tơdrong jang tơ ala teh Kră Yang Yêsu pơm ăn kơ sư đei jơhngơ̆m đon tơgŭm pơyơ̆r ăn jên tơmam. Jrŭ să hloh, jơ̆ tơdrong kơdih sư mơn băt kơ Kră Yang Yêsu, ‘bôh păng măt rim tơdrong hlĭch Kră Yang pơm, tơchĕng pơwao lu nơ̆r pơtih gia, lu nơ̆r bơtho đơ̆ng Kră Yang, ‘bôh tơdrong ‘mêm mơnat đơ̆ng Kră Yang ăn kơ lơ bơngai, hăm lu bơngai dơnuh hin. Păng kăl ‘noh jơ̆ đon lui sư kơ Kră Yang Yêsu, Sư jơ̆ “trong năm, tơdrong tơpă, păng tơdrong arih”… đĭ-đăng dôm lu tơdrong ‘nâu ba yă Jôanna năm truh tơ Kră Yang păng lăp đon pơyơ̆r đĭ jơhngơ̆m.

Sơ̆p hla bơar ‘Bok Kei-Dei ưh kơ chih kơsô̆ jên sư pơyơ̆r, mă-lei chih rơđah anăn sư păng tơdrong sư hlôi pơm, jơhngơ̆m dan adrol hloh noh kơ dêh char Kră Yang, yă Jôanna gô ling-lang đei đe pơma bơm.

Trong yak năm kiơ̆ Kră Yang đơ̆ng yă Jôanna ưh kơ lăp pơkeh kơ tơdrong pơyơ̆r đĕch ôh. Kơplah Kră Yang Yêsu đei dôm năr hơtuch oei tơ ala teh âu, lơ bơngai đêl pơ-ư kơ Sư đei tơwih rŏng weh ngăl bơih. Mă dôm lu bơngai pơhrăm păng Sư kư̆m hli tơrơ tơklah tơklang. Mă-lei Luka 23:27 roi khan “lu kon pơlei pơla lơ tơpă kiơ̆ lăng Yêsu. Kư̆m đei lơ drŏ kăn mơ̆n, sư ơh sơ’ngon rah” lơ hla bơar chih khan yă Jôanna kư̆m đei lăm khŭl lu drŏ kăn ‘nâu mơ̆n. Sư lăm khŭl drŏ kăn yak kiơ̆ Kră Yang truh kơ tôch, ‘bôh dôm tơdrong ơh sơ’ngon tơ ‘long pơglang păng ưh kơ achăng lê̆ Kră Yang, mă khan tôm tơdrong chang hơmĕng pă đei boih. Tơdrong noh tơ’bôh đon lui tơpă ưh kơ lăp đei tơ’bôh lăm dôm năr chơt hiôk kơplah ‘bôh lơ tơdrong hlĭch đei pơm, lăm kơplah đe pơ-ư kơplah Kră Yang mơ̆t lăm Pơlei Jêrusalem ôh, mă đon lui kư̆m đei pơlong lăng lăm dôm tơdrong gleh glăn dêh, ơh sơ’ngon hloh. Yak kiơ̆ Kră Yang kơplah lơ bơngai pơ-ư ‘noh ‘bônh đĕch. Mă-lei oei kơjăp kơplah đei đak măt păng ‘long pơglang noh jơ̆ gĭt kăl dêh. Rŏlăng đơ̆ng dôm tơdrong noh pơm kơ tơdrong ‘măn ăn kơ dêh char tơ plĕnh ti đơ̆ng yă Jôanna jing jrŭ să hloh. Sư ưh kơ lăp pơyơ̆r mŭk tơmam đĕch ôh, mă-lei sư pơyơ̆r jơhngơ̆m đon kơjăp truh tơ tuch luch hăm ‘Bok Thây, hăm Kră Yang pơklaih sư. Tơdrong sư oei hơdai lăm dôm năr ơh sơ’ngon noh jing nơ̆r tơbăt khan tơdrong ‘mêm ăn kơ Kră Yang ưh kơ kiơ̆ kơ tơdrong arih hiôk ‘lơ̆ng dah ưh kơ thoi bơ̆n wă.

Na đơ̆ng noh, tơmam apah ăn kơ jơhngơ̆m đon ‘lơ̆ng tơpăt noh truh kơ sư ưh kơ đei tơchĕng truh. Lăp ‘brưch hơdah til pơgê năr mônh, yă Jôanna hơdai păng lu drŏ kăn nai dơ̆ng chĕp ba pơgang ‘bâu phu năm tơ bơsat wă pik tơ akâu Kră Yang (Luka 24:1-10). Lu sư ưh kơ năm wă chă ‘Bok iung arih đơ̆ng lôch ôh. Lu sư wă pơm pơkeh tơdrong jang tuch luch ăn kơ ‘Bok Thây sư hăm jơhngơ̆m đon ‘mêm ưh kơ đei layơ tôch. Mă-lei, đơ̆ng lăm tơdrong pơm hăm ‘mêm păng jơhngơ̆m đon ‘lơ̆ng tơpăt noh, lu sư hlôi jing dôm lu bơngai adrol hloh sơng iŏk nơ̆r hiôk ‘lơ̆ng tih đơ̆ng sơ̆ truh dang ei:

“Yua kơ kiơ iĕm chă bơngai arih tơ anih đe lôch? Sư ưh pă oei tơ âu bơih!” (Luka 24:5-6)

Mơsêh mơyang tơpă! Minh ‘nu drŏ kăn yua mŭk tơmam tơgŭm Kră Yang, đei jơhngơ̆m đon ‘lơ̆ng tơpăt yak kiơ̆ Sư kơplah ơh sơ’ngon, dang ei dơ̆ng đei ‘Bok Kei-Dei ăn tơdrong ‘mêm mơnat jing minh ‘nu lăm lu bơngai adrol hloh tơ’bôh tơdrong Kră Yang iung arih đơ̆ng lôch. Noh jing tơdrong ưh kơ đei layơ hơmet lê̆ adrol tơ ala teh mă đei ôh.

Lăng ming tơdrong arih yă Jôanna, inh mơn băt sư đei hơmet adrol lăm pêng tơdrong gĭt kăl ling-lang:

– Sư hơmet ăn dôm mŭk tơmam jên mŭk sư đei ăn kơ tơdrong jang ‘Bok Kei-Dei.

– Sư hơmet jơhngơ̆m đon ‘lơ̆ng tơpăt kơplah trong yak kiơ̆ Kră Yang bĕnh kơ tơdrong pơlong lăng.

– Păng tuch luch, sư đei tơmam apah, tơdrong pŭn hiôk đơ̆ng dôm tơdrong sư đei, ‘noh jơ̆ tơdrong chơt hiôk tih: đei ‘bôh tơdrong mơsêh iung arih đơ̆ng lôch đơ̆ng Kră Yang Krist.

Dang ei, bơ̆n kư̆m oei hơmet rim năr. Bơ̆n hơmet jơ năr, jên, mŭk drăm lăm lơ tơdrong. Tơdrong tơm ưh kơ sĭ bơ̆n đei dah ưh, mă-lei jơ̆ bơ̆n oei hơmet ăn kơ tơdrong kiơ. Dôm tơdrong yua lăm teh đak âu gô hiong đĭ. Mă-lei dôm tơdrong pơyơ̆r ăn kơ ‘Bok Kei-Dei gô đei tơdrong gĭt kăl ling-lang thoi Nơ̆r Kră Yang bơtho:

“Iĕm ‘nĕ chă mong mŭk tơmam dah jên tơ teh âu lơ, yua kơ tơ teh âu đei sang-sa, mua reh, hăm hli kơ đe iŏk tơtông mơ̆n.  Iĕm athei chă mong mŭk tơmam tơ plĕnh ti đĕch huay kơ đei sang-sa, mua reh, hăm ưh kơ đei bu gơh iŏk tơtông.” (Mathiơ 6:19-20)

Lăm tơdrong hơdah Nơ̆r Kră Yang, inh mơlâu kơ tơdrong tơchĕng kiơ̆ kơ kơdih, tơdrong đei lăm đon tơchĕng inh, mă-lei lăm jơhngơ̆m đon inh đei tơ’blŏk đơ̆ng Kră Yang. Đon tơchĕng khan: jang thim minh năr dơ̆ng wă kơ đei jên tơgŭm lu bơngai nai kăl noh kư̆m tơdrong arih ăn kơ Kră Yang. Yua kơ inh mơn băt noh jơ̆ nơ̆r pơma pơdŏng kơ jơhngơ̆m oei đei ‘mêm kơ tơdrong ala teh, lăng ming tơ lăm jơhngơ̆m kơdih. Mah khan lăm đon tơchĕng, inh ăn jơhngơ̆m hưch wă kơ jên hloh kơ tơdrong gĭt kăl ling-lang kơ ‘Bok Kei-Dei, ‘noh jơ̆ bơhngol kon bơngai.

Ôi, inh ưh kơ achăng lê̆ tơdrong pŭn hiôk đơ̆ng năr pơdơh ‘lơ̆ng rơgoh ‘nâu ôh. Inh gĭt kăl păng ‘maih wă ‘bôh jơhngơ̆m ơh sơ’ngon đei pơklaih păng ‘bâu phu ăn kơ tơdrong kơnhăm đơ̆ng blŭng a mă ‘Bok Kei-Dei dan ăn bơih đơ̆ng Kră Yang Yêsu, Kon Sư.

Pơdrơ̆ng mă tĕnh hloi, inh chih khan: “Oh ưh kơ jang thim năr dơ̆ng, mŏ hŏ.” Păng inh băt, mă pơma thoi noh ră lu sư gô oei pơm ưh kơ băt; kơplah đe tơmoi truh lơ, lu sư gô jet dơ̆ng. Thoi noh, tơdrong tơblah lăm đon tơchĕng inh nhen ưh kơ đei pơkeh. Mă-lei bơnê kơ Kră Yang mơnat tơ’blŏk ăn kơ inh păng hơdai inh tơblah hăm tơdrong noh.

Apĭnh đĭ đăng krao khan hơdai: Kơkuh kơ Kră Yang ‘mêm mơnat, kon bơnê kơ Ih yua kơ đei ăn kơ kon ‘bôh tơdrong gĭt kăl khŏm khŏm đơ̆ng tơdrong arih păng jang bơwih bơwăn kơ Ih. Apinh Kră Yang huay kơ jô̆ yo kơ kon kơplah lơ wơ̆t kon chă mŭk tơmam ăn kơ tơdrong arih dang ei mă hiơt kơ mong hơmet ăn tơ dêh char Ih, ăn kơ tơdrong jang Ih đei pơjao, ăn kơ dôm lu bơngai tam mă băt kơ Ih kăl kơ đei mơ̆ng Tơdrong ‘Nao ‘Lơ̆ng Kră Yang. Apinh Kră Yang bơtho ăn kơ kon băt yua jơnăr, tơdrong gơh hơgei, mŭk tơmam păng đĭ đăng tơdrong arih kon wă tơgŭm lăm tơdrong jang Ih. Hơpơi kơ kon ling-lang đei jơhngơ̆m đon ‘lơ̆ng tơpăt yak kiơ̆ Kră Yang lăm tơdrong arih hiôk ‘lơ̆ng dah ưh kơ thoi kon wă, wă kơ tơdrong arih kon jing mŭk tơmam pơyơ̆r kơ Ih na Ih lăp đon. Kon kŭp kơ̆l krao khan hăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, rim năr đei hlôi hloh jơ̆ minh tơdrong trŏ kơ ih hơmet ăn kơ tơdrong gô đei ling-lang. Ih athei jet kơdih dang ei ih oei ‘măn jơ năr lơ hloh, jơhngơ̆m păng mŭk tơmam kơdih ăn kơ tơdrong kiơ. ‘Nguaih kơ dôm tơdrong hiơ̆k kơ tơdrong arih, ‘nĕ kơ hiơt kơ tơdrong ‘lơ̆ng hloh ăn kơ tơdrong jang kơ ‘Bok Kei-Dei: minh nơ̆r klah song Tơdrong ‘Nao ‘Lơ̆ng, minh tơdrong pơyơ̆r, minh nơ̆r krao khan dah đei pơm ‘lơ̆ng ăn kơ bơngai nai. Rŏlăng dôm tơdrong noh lăng iĕ đĕch ‘bơ̆t anăp măt kon bơngai, mă-lei lăm dêh char ‘Bok Kei-Dei, ‘noh jơ̆ dôm lu adrĕch gô đei plei ăn kơ tơdrong arih ling-lang. Athei hơmet ăn kơ dôm tơdrong mă plei ‘lơ̆ng gô wei răk khŏm khŏm.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.