Kơplah iung pơgê rim năr, đei layơ ih ‘mơn jơhngơ̆m ih nhen minh ‘nu bơngai pơm pơdah oei pŭ iŏk tơdrong jang mă bơngai tơpôl đei pơjao ăn ưh? Bơ̆n pơm nhen thoi minh ‘nu bơngai bơ̆jang ‘lơ̆ng, minh ‘nu kon hơ ‘lơ̆p chu yom, chhơ̆ minh tơdrong arih pŭn hiôk tôm mah. Lu bơ̆n hơtol măt brêm keh đang ‘lơ̆ng yua kơ dah plôh lê̆ dôm măt brêm ‘noh, teh đak âu gô ‘bôh minh ‘nu kon bơngai rơhông tơpă, ưh pă băt pơm thoi yơ, păng… ưh kơ đei tơdrong gĭt kăl ôh. Mă-lei đei Kră Yang ‘lăng ‘bôh ih adrol kơ ih hơtol măt brêm noh. Sư băt rơđah kơ ih jrŭ lăm jơhngơ̆m, đơ̆ng adrol hloh, păng Sư oei ling-lang gĭt kăl kơ ih.

Năr ‘nâu, ‘năr 06/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang đơ̆ng bơngai chih Jonathan Macnab hăm kơ̆l ‘bai ADROL KƠ TƠPŬ KƠ IH

“Inh băt kơ ih adrol kơ Inh pơjing ih lăm klak mĕ ih; adrol kơ đe tơpŭ kơ ih, Inh rơih iŏk ih, Inh wă ăn kơ ih jing bơngai khan lê̆ adrol kơ jơ̆p teh đak.” (Jêrêmi 1:5)

Kơplah inh 16 sơnăm, inh đei tơ’bơ̆p Kră Yang Yêsu. Noh jơ̆ kơplah Sư mơ̆t lăm tơdrong arih inh, dui inh lĕch hlôi đơ̆ng sơnăm oei ‘lơ̆p păng đơ̆ng dôm tơlei glang tơdrong yoch oei chô̆ pơgơ̆r inh. Đơ̆ng năr đei Kră Yang tơplih jing ‘nao, inh ling-lang mơn tơdrong arih đơ̆ng bơngai khan lê̆ adrol Jêrêmi đei pơma trŏ kơ inh. Tơdrong arih đơ̆ng bơngai đĭch đam noh hơtŭt ‘bơm lăm jơhngơ̆m inh jrŭ hlơp, tơgŭm ăn kơ inh pơgơ̆p kơjăp hơdai păng Kră Yang lơ hloh.

Tôm tơdrong đei đơ̆ng chăl blŭng a, kơplah ‘Bok Kei-Dei năm tơ Jêrêmi. Athei ‘lăng hơlen tơdrong ‘nâu, yua kơ ‘nâu jơ̆ minh tơdrong tơpă gĭt kăl tơpă: sĭt Kră Yang jơ̆ Tơ’ngla pơjing blŭng a pơgơ̆p kon bơngai hăm Sư truh tơ tơdrong jrŭ hlơp, ưh kơ đơ̆ng tơdrong adrin kơdih Jêrêmi đĕch ôh. Truh tơ dang ei, Sư oei ling-lang krao bơ̆n yak hơdai păng Sư… Ih hăm đei mơ̆ng kơtơ̆ng nơ̆r Sư krao ưh?
‘Bok Kei-Dei đơ̆ng bơ̆n sĭt ‘mêm mơnat păng pơm ‘lơ̆ng tơpă. Kơplah krao iŏk, Sư ling-lang mơ̆ng hlôh tơdrong tơyơ mă sĭt tơiung păng đei tơdrong gĭt kăl ăn kơ bơhngol bơ̆n. Hăm inh, minh lăm dôm nơ̆r rơngơp hloh mă Sư hlôi khan đei chih lăm dôm nơ̆r ‘Bok Kei-Dei blŭng a ‘nâu: “Inh băt kơ ih adrol kơ Inh pơjing ih lăm klak mĕ ih…”

Đơ̆ng nơ̆r khan noh, inh mơn đei tơdrong pơgơ̆p hiôk ‘lơ̆ng, păng minh tơdrong kơnhăm tơ plĕnh ti đei pơkă ‘măn ăn kơ tơdrong arih inh. ‘Bă tơ plĕnh ti băt rơđah đĭ-đăng tơdrong gah lu bơ̆n, hơpơi đơ̆ng lăm jơhngơ̆m, dôm tơdrong tơchĕng phara băl, truh kơ jơhngơ̆m ơh sơ’ngon păng lăm anih jrŭ lăm bơhngol bơ̆n. Sư băt kơ bơ̆n đơ̆ng adrol kơ pơjing bơ̆n, păng Sư hiôk kơplah ‘bôh bơ̆n đei tơ ala teh âu. Bơ̆n jơ̆ lăm Sư. Kră Yang pơjing Jêrêmi, kư̆m thoi Sư pơjing ih păng inh, jơ̆ đei kơnhăm tơ plĕnh ti. Lu bơ̆n ưh kơ pơm ngôi đĕch “đơ̆ng Tơ’ngla pơjing” ôh.

‘Lăng tơ chăl ‘nâu, đei minh tơdrong tơpă pơm ăn kơ bơ̆n ‘bôh hlĭch: ‘Bok Kei-Dei đei pơkă rơđah dôm lu tơdrong mă Sư wă kơ Jêrêmi pơm, đơ̆ng adrol kơ sư tơpŭ, kơplah sư tam mă đei hlôh wao dah tơdrong hlôi mơn wă jang ăn kơ Sư. Sư đei ‘măn jơ, păng wei-lăng trong yak năm tơdrong arih Jêrêmi. Tơpă, noh jơ̆ tơdrong ‘mêm mơnat. Lu bơ̆n ngăl kơnhăm kơ jơhngơ̆m đon lăm dôm tơdrong mă bơ̆n gĭt kăl, păng Kră Yang kư̆m thoi noh, Sư gĭt kăl kơ bơ̆n dêh. Tơdrong tơpă ‘nâu đei tơdrong pơklaih pran kơtang păng pơklaih gah bơhngol tih tơpă, tơgŭm ăn kơ bơ̆n đei jơhngơ̆m pơ̆n nuih ‘lăng kơ kơdih bơ̆n păng pơma khan: “Inh jơ̆ bơngai gĭt kăl.”

Minh lăm dôm tơdrong tơblah ling lang lăm đon tơchĕng inh, noh jơ̆ tơdrong năm chă nơ̆r tơblăng ăn kơ nơ̆r jet: “Inh trŏ kơ gĭt kăl ưh? Rŏlăng dah inh dă ‘biơ̆ kơ răm, dah inh đei pơm minh tơdrong kiơ tih, dah đei hơtŭt ‘bơm bơngai đe ư- ang hnhoi lăng, na tơdrong arih inh đei tơdrong gĭt kăl.” Noh jơ̆ dôm nơ̆r khan hrĕp hreh bĕnh kơ chhŭr nuih oei kăp sơnĕnh lăm jơhngơ̆m đon inh, đunh sơnăm wơ̆ ‘lŏ mă ưh kơ đei tơdrong ‘mêm đơ̆ng ‘bă tơ teh âu. Mă-lei, lăm tơ kơmăng mu kơnê̆ ‘noh, Kră Yang oei ling-lang hrĕp hreh proh hơmet adrol minh tơdrong wă pơklaih inh. Sư pơgơ̆r lăm dôm tơdrong arih wă hnhoi lăng đon tơchĕng inh, pơ’lơ̆ng pơma khan: “Kon jơ̆ gĭt kăl tih ‘bơ̆t anăp Inh.”

Păng kơplah tơ’bơ̆p Sư, inh mơn băt kơdih inh ưh kơ lăp minh ‘nu kon hơ’lơ̆p mă ‘mêm mơnat, mă Sư đei pơjing inh ăn kơ minh tơdrong tơdă tih! Nơ̆r krao đơ̆ng Kră Yang ăn kơ Jêrêmi sĭt pơm ăn kơ đe ‘bôh hlĭch, yua kơ dôm tơdrong mă Kră Yang wă kơ sư pơm hloh kơ tơdrong tơchĕng kon bơngai. Noh kư̆m đơ̆ng jơhngơ̆m ‘maih wă inh kơplah đei mơn băt tơdrong tơdă đơ̆ng ‘Bă tơ plĕnh ti ăn kơ tơdrong arih inh.

Kư̆m đei inh apinh Sư: “Ơ Kră Yang, kon ưh kơ gơh pơm ôh. Thoi yơ kon gơh yua anăn Kră Yang wă pơma ‘bơ̆t anăp lơ bơngai thoi âu? Kon ưh kơ gơh pŭ iŏk dôm tơdrong jang ‘nao, păng hloh kơ inh gơh pơm.” Mă-lei kơplah Jêrêmi hli tơrơ tơl khan: “Ơ Kră Yang! Inh ưh kơ băt wă pơma kiơ, yua kơ inh oei ‘lơ̆p.” (Jêrêmi 1:6), Kră Yang tơl tơwih thoi yơ?

Kră Yang khan kơ sư: “’Nĕ pơma khan inh oei ‘lơ̆p; yua kơ ih gô năm tơ jơ̆p-jang anih mă Inh wơh ih, ih gô pơma roi dôm nơ̆r mă Inh đei tơbăt ăn kơ ih pơma… yua kơ Inh oei hơdai ih wă dŏng pơklaih ih.” (Jêrêmi 1:7-8)

Kră Yang băt rơđah kơ Jêrêmi đơ̆ng adrol, noh ưh kơ đei tơdrong hli tơrơ dah ưh kơ hơđơ̆ng pơm ăn kơ Kră Yang ‘bôh hlich ôh. Păng yua kơ tơdrong mơsêh tih đơ̆ng Sư, dôm tơdrong rơdu lăm Jêrêmi kư̆m ưh kơ gơh pơgăn tơdrong tơdă đơ̆ng plĕnh ti.

Mă tơpă, tơdrong ‘nâu đơ̆ng chăl blŭng a ưh kơ pơma gah Jêrêmi ôh, mă sư đei hơdai lăm tơdrong tơdă tih yua kơ Kră Yang pơgơ̆r păng rơih iŏk sư. Gah ih păng inh kư̆m thoi noh. Lu bơ̆n ưh kơ đei kơdih wă chih tơdrong arih kơdih bơ̆n – păng pơma tơpă, dah oei adrin pơm thoi noh, lu bơ̆n gô jing bơngai lăng mơnat dêh. Lu bơ̆n đei krao iŏk vă yak hơdai păng Pơtao tơ plĕnh teh. Sư oei krao iŏk lu bơ̆n mơ̆t lăm trong yak năm hơdah hloh kơ tơdrong hơpơi lu bơ̆n, thoi yơ wă kơ lu bơ̆n lui ngeh kơ Sư oei hơdai păng tơdrong mơsêh mơyang Sư. Tơdrong arih ‘nâu tam mă đei layơ khan yua kơ lu bơ̆n, tôm tơdrong jơ̆ yua kơ Sư păng tơdrong ư-ang kơ Sư.

Apĭnh đĭ đăng krao khan hơdai: Kơkuh kơ ‘Bă tơ plĕnh ti, kon bơnê kơ Ih yua kơ Ih ling-lang gĭt kăl kơ kon. Apinh huay kơ jô̆ yo kơ kon yua kơ kon ngăl chih tơdrong arih kiơ̆ kơ kơdih na truh tơ ưh kơ băt wă pơm thoi yơ, jơhngơ̆m ơh sơ’ngon. Bơnê kơ Kră Yang yua kơ Ih đei pơklaih kon lĕch đơ̆ng bơngai so, păng ăn kơ kon đei hơdai lăm tơdrong tơdă ‘lơ̆ng đơ̆ng Ih. Ơ Kră Yang, ‘bơ̆t anăp dôm tơdrong plơ̆ng pơm ăn kơ kon hli tơrơ, apinh tơ’blŏk ăn kơ kon ưh kơ kăl yak hăm jơhngơ̆m kơdih, mă yua kơ jơhngơ̆m pran kơtang păng mơsêh mơyang đơ̆ng Ih. Apinh ăn kơ kon jơhngơ̆m đon lui kơjăp wă đei jơhngơ̆m pơ̆n nuih yak hơdai păng ‘Bă lăm năr ‘nao ‘nâu. Kon kŭp kơ̆l krao khan hăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, trong yak năm tơ anăp ih noh kiơ? Rŏlăng ‘bơ̆t anăp ih jơ̆ đei nơ̆r krao iŏk ‘bĕnh kơ tơdrong pơlong lăng, dah trong tơklah pơm kơ ih hli tơrơ nhen bơngai khan lê̆ adrol Jêrêmi chăl noh sơ̆. Mă-lei ‘ngoaih kơ tơdrong pơlong lăng noh mă khan tih dang yơ, athei kkư̆ kơ yak năm tơ anăp. Yua kơ ‘Bok Kei-Dei lu bơ̆n jơ̆ Tơ’ngla đei ling-lang, Sư mơsêh mơyang. Sư wei kơjăp tôm tơdrong arih ih lăm tơpang ti Sư, păng Sư gô yak năm hơdai păng ih lăm rim anih tơ anăp.

(Krao wơ̆n lu bơngai mơ̆ng jơ̆ lu bơngai lui kơ ‘Bok Kei-Dei đơ̆ng rŏng kơ mơ̆ng ‘bai krao khan rim năr ‘nâu, athei gưih lu anăn bơngai ih wă pơm kơdranh gah tơdrong jang Oneway, wă kơ lu nhôn krao khan ăn kơ ih păng buăl ih.)

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.