Mă băt khan tơdrong arih ling lang đei tơdrong truh păng pơlong lăng, mălei lu bơ̆n oei hli tơrơ kơ wă tơ’bơ̆p lu tơdrong noh. Jĭ jăn, hiong tơdrong jang tơdah mă tơdrong tơplih blư truh hloi ling lang pơm ăn kơ lu bơ̆n ưh kơ băt wă pơm thoi yơ dơ̆ng tơ anăp. Kơnhăm dôm lu ơh sơ’ngon truh kơ tơdrong arih lu bơngai lui kơ Kră Yang noh kiơ? Wă tơmôck lu bơ̆n, tơdah pơjuăt lu bơ̆n wă kơ lu bơ̆n wơ̆ ‘lŏ lăm tơdrong lui? Bơnê kơ Kră Yang yua kơ lu bơ̆n gơh chă nơ̆r tơl tơ anih Tơ’ngla Wei Triu ‘lơ̆ng rŏ, Tơ’ngla oei yak hơdai lu bơ̆n mă khan hlôi kơ “thŭng yơ̆p tơdrong lôch”.

Năr ‘nâu, ‘năr 07/08/2026, tơdrong tơdă Amăn Jơ Krao Khan Rim Năr apinh wơ̆n đĭ đăng bơngai mơ̆ng wang pơwao hơdai Nơ̆r Kră Yang hăm bơngai chih Linda Vulcano hlôi kơ̆l ‘bai: LĂM THŬNG YƠ̆P TƠDRONG LÔCH

“Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.” (Hơriso 23:4)

Brei mơsơ̆ ‘nâu, inh đei pơhrăm hơdai mĭnh năr gah Sơ̆p Hla bơ-ar Nơ̆r ‘Bok Kei-Dei lăm Hơriso 23. ‘Băt rŏlăng đĭ đăng lu bơ̆n juăt dêh bơih hăm trong blŭng-a lăm sơ̆p Hơriso âu: “Kră Yang Tơ’ngla wei-lăng inh.” Đơ̆ng ki sơ̆ truh tơ hrei ‘nâu, rim ‘măng đŏk lăm trong noh, inh ling lang tơchĕng ‘bôh rup mĭnh ‘nu bơngai wei triu ‘mêm, đĭ jơhngơ̆m kơ khŭl triu sư. Mălei lăm năr pơhrăm ei, inh băt thim kơplah kơmăng, bơngai wei triu ‘bĭch kơtă ‘bơ̆t ‘măng hơdrong triu wă wei lăng triu, găn wă huay kơ đei lu sem bri păng lu bơngai tơtông mơ̆t.

Hơriso 23:4 chih: “Mă inh năm lăm thŭng yơ̆p tơdrong lôch, inh ưh kơ hli kơ răm, yua kơ Kră Yang oei hăm inh; ‘long băl hăm ‘long jra Ih pơlung inh.” Nơ̆r Kră Yang âu ưh kơ đei pơma khan lu bơngai lui kơ Kră Yang gô ưh kơ layơ tơ’bơ̆p tơdrong hli krê tơdah anat anot ôh. Mă pơlơ̆k khan, Nơ̆r Kră Yang ăn kơ lu bơ̆n băt khan lu bơ̆n khŏm yak hlôi “thŭng yơ̆p tơdrong lôch”. Hăm Đawit, “thŭng yơ̆p tơdrong lôch” mă sư tơ’bơ̆p noh jơ̆ lu khei năr mă lu ayăt druh tơblah sư, tơdrong arih sư ling lang đei hli krê. Hăm lu bơ̆n dang ei, “thŭng yơ̆p tơdrong lôch” jơ̆ lu jĭ jăn, hiong hiach, pơ̆k huŏng, kơ’bah kơ’bôch, tơdah mă rim tơdrong pơm kơ lu bơ̆n hli hlơt păng ưh kơ băt tơdrong kiơ oei răp gô lu bơ̆n tơ anăp.

Đawit ưh kơ khan ‘Bok Kei-Dei gô chông ba sư wer kơ dôm lu “thŭng yơ̆p tơdrong lôch”, mălei sư khan: “inh ưh kơ hli kơ răm, yua kơ Kră Yang oei hăm inh.” Đơ̆ng noh, lu bơ̆n ‘bôh tơdrong chơ̆n hơđơ̆ng bơngai lui kơ Kră Yang đei mơn đơ̆ng Tơ’ngla Wei Triu. Kơplah lu bơ̆n lui ngeh khan Sư ưh kơ layơ achăng lê̆ bơ̆n, lu bơ̆n gô yak năm tơ anăp, mă khan trong bơ̆n năm thŭng thong, anat kơ yak. Tơpă kơplah yak hlôi đơ̆ng thŭng yơ̆p tơdrong lôch păng pơmat, lu bơ̆n gơh pơhrăm iŏk tơdrong ‘lơ̆ng rŏ, mơsêh mơyang, tơdrong ‘mêm ‘Bok Kei-Dei jrŭ să păng tơpă hloh.

Kơplah mơ̆ng bơngai bơtho klah asong gah Hơriso 23, inh ‘blŏk a-lơ̆k băt dôm ‘măng Kră Yang wei lăng inh, păng inh pơtơm chih tơlĕch lu dôm tơdrong noh. Lăp tŏ sĕt phŭt đĕch, inh đĭ ‘blŏk truh kơ mơjĭt ‘măng, păng kơsô̆ noh oei pơtrơp hơtŏk dơ̆ng. Lăm lu tơdrong noh, đĕi mĭnh tơdrong mă inh ưh kơ layơ hiơt.

Năr noh, inh hơmet wă wơ̆r gre ba mĭnh grŭp khŭl hơ’lơ̆p mơlôh năm akŭm tơ hnam akŭm. Kơplah oei tuh đak dâu, inh ‘brĕng mơn đei mĭnh tơdrong pơtrŭt lăm jơhngơ̆m inh khan kăl kơ krao khan apinh Kră Yang wei lăng trong năm lu nhôn noh. ‘Blŏk kơ lu bơngai hơ’lơ̆p mă inh wă chơ lăm kơmăng noh, inh apinh Kră Yang hăm đĭ jơhngơ̆m wei lăng đĭ đăng lu nhôn.

Kơmăng noh, kơplah gre wă jê̆ truh tơ anih, inh lăng ‘bôh lu jơngơ̆l đe pơtăm rok trong gre. Yua kơ ưh kơ đei ŭnh kơđeng rok trong thoi noh na trong năm noh măng mu dêh. Plĭnh, đei mĭnh pôm gre đơ̆ng tŏk bŏk lu jơngơ̆l ei lĕch păng găn hloi ‘bơ̆t anăp kơ̆l gre inh. Tơdrong noh truh hrĕnh dêh, pơm kơ inh ưh kơ tam juă phren gre. Gre noh brih tơ jê̆ pơm kơ inh mơn thoi lĕ ‘bar tŏ gre đĭ hơtŭt tơ’bơm băl bơih.

Truh tơ dang ei, inh oei ưh kơ pơ̆n tơchĕng tơdrong kiơ gô truh tơdah gre inh tơ̆m hloi tơklă gre noh mă jăng dang noh. Rim wơ̆t ‘blŏk, jơhngơ̆m inh oei bơnê kơ Kră Yang đĕch.

Lơ sơnăm đơ̆ng rŏng, inh jet kơdih khan yua kơ kiơ Kră Yang pơtrŭt inh krao khan ‘mơ̆i adrol kơ yak năm năr noh. Sư lăp kăl kơ wei lăng lu nhôn đĕch huay bơih? Păng inh hlôh khan tơdah ưh kơ kăl kơ krao khan, băt inh gô tơchĕng khan noh tơdrong pŭn đĕch, inh gô ‘bônh kơ hiơt kơ tơdrong bơwei đơ̆ng Kră Yang. Rim kơplah đei tơdrong truh, ‘Bok Kei-Dei bơtho kơ inh băt gơnang kơ Sư păng ăn kơ inh băt tơdrong ‘lơ̆ng rŏ Sư đơ̆ng tơdrong krao khan. Tơdrong noh ưh kơ sĭ khan kư̆ kơ krao khan na lu bơn gô gơh wer kơ dôm tơdrong truh ôh, mălei tơ’blŏk kơ lu bơ̆n khan Kră Yang ling lang oei hơdai hăm lu kon Sư, mă khan thoi yơ.

Inh ‘blŏk mĭnh ‘măng ‘bok bơtho lu nhôn đei roi gah năr mă kon adruh sư đei tơdrong truh tơjĭl gre. Sư khan tơdah gơh, sư ‘maih pơm tôm tơdrong wă gơh truh tơ kon sư păng dŏng tơgŭm kon sư. Kơplah kơtơ̆ng tơdrong noh, inh tơchĕng tơdah mĭnh ‘nu bơngai ‘bă tơ ala teh âu ‘mêm kơ kon sư lơ dang noh, lei tơdrong ‘mêm ‘Bok Kei-Dei ‘măn kơ lu bơ̆n rai tih hloh kơ noh tơpă.

Hơriso 23 tơ’blŏk lu bơ̆n Tơ’ngla Wei Triu oei hơdai lu bơ̆n tơ anih ‘nhĕt dreng ‘lơ̆ng mă khan lăm “thŭng yơ̆p tơdrong lôch”. Tơdrong arih bơngai lui kơ Kră Yang ưh kơ gơh wer kơ tơdrong hli krê ôh, mălei lu bơ̆n ling lang đei tơdrong pơkă khan Sư ưh kơ layơ achăng lu bơ̆n. Kăl kơ lu bơ̆n băt Tơ’ngla Wei Triu oei hơdai bơ̆n, lu bơ̆n gơh yak năm chơ̆n hơđơ̆ng.

Apĭnh đĭ đăng krao khan hơdai: Kơkuh kơ Kră Yang mă Tơ’ngla Wei Triu ‘lơ̆ng rŏ kon. Kon bơnê kơ Ih yua kơ đei kơplah Ih chông anhăk ba kon truh tơ anih ‘nhĕt ‘lơ̆ng, tu đak rơ ngơp, mălei kư̆m đei kon yak năm lăm thŭng yơ̆p tơdrong pơlong lăng păng pơmat tat. Apinh Ih mơnat yua đei lơ wơ̆t kon hiơt lê̆ kơ Ih lăm lu anih măng mu noh. Ơ Kră Yang, apinh bơtho kon băt lui kơjăp lăm tơdrong chông anhăk Ih. Kon lui ngeh lăm thŭng yơ̆p tơdrong lôch lăm chăl arih, Ih ưh kơ layơ achăng lê̆ kon, mă rai tơgŭm kon hlôh băt kơ Ih hloh hăm tơdrong ‘nao plơ̆ng.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, kơplah tơ’bơ̆p “thŭng yơ̆p tơdrong lôch” lăm chăl arih, lu bơ̆n juăt kơ hơmĕng tơdrong noh tĕnh jah hlôi, mălei đei mĭnh tơdrong mă Kră Yang wă tơ’blŏk ăn kơ bơ̆n adrol hloh noh jơ̆ tơdrong oei hơdai Sư. Năr âu, athei jô̆ bĕ dôm tơdrong pŭn hiôk mă Kră Yang đei ăn kơ ih, rim wơ̆t Kră Yang wei lăng ih păng dŏng tơgŭm ih hlôi đơ̆ng “thŭng yơ̆p tơdrong lôch”. Tơdah jơ ‘nâu ih oei yak năm lăm “thŭng yơ̆p tơdrong lôch”, athei ăn kơ Nơ̆r Kră Yang pơm ming ‘nao păng pơtrŭt jơhngơ̆m ih. Athei krao khan bĕ, adrin lui gơnang păng yak năm, yua kơ Tơ’ngla Wei Triu oei hơdai ih lăm rim trong yak năm lăm chăl arih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.