Đei dôm kơ lu jĭ rơka hlôi hloh đơ̆ng sơ̆ truh kơ lăp hơtŭt ‘bơm ‘biơ̆ đĕch kư̆m pơm ăn kơ lu bơ̆n hli tơtơ̆. Đei layơ ih oei kăp sơnĕnh kơdih lăm dôm lu tơdrong pơm yoch, oei hli krê ling-lang kơ dôm sơnăm wơ̆l jrok? Ih păng inh ‘bônh kơ hiơt, kơdih bơ̆n ưh kơ gơh wă khan yua kơ tơdrong yoch so ôh, mă-lei yua kơ tơdrong ‘mêm mơnat đơ̆ng Tơ’ngla huai iŏk bơ̆n. Mă khan lu bơ̆n yak ataih truh tơ dang yơ, Sư oei ling-lang oei tơ noh, krao anăn bơ̆n wih brŏk tơ Sư.

Năr ‘nâu, ‘năr 08/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang đơ̆ng bơngai chih Carolyn Fraiser hăm kơ̆l ‘bai ĐEI HUAI IŎK YUA KƠ TƠDRONG ‘MÊM MƠNAT

“Dang ei Kră Yang khan thoi âu: Ơ Jakôp Sư Tơ’ngla pơjing iĕm, ơ Isơrael! Sư bơih Tơ’ngla pơjing iĕm, ‘nĕ kơ hli yua kơ Inh huai iŏk iĕm bơih. Inh bơih krao iĕm hăm anăn iĕm păng iĕm gah Inh.” (Êsai 43:1)

Kơplah oei sơtơ̆p kŭl tăng đei Kră Yang oei hơdai, inh nhơ̆m, đak măt lĕch nhen ơh đunh sơnăm bơih. Đơ̆ng rŏng kơ lơ sơnăm adrin kơdih bơwei tôm tơdrong, tuch luch inh mơn băt khan trong mă kơdih rơih năm ba tơ tơdrong tôch. Inh achăng lê̆, chu yom tôm tơdrong ‘bơ̆t anăp tơdrong ‘mêm mơnat đơ̆ng Yang Yêsu. Mă-lei, jơhngơ̆m mơlâu đơ̆ng tơdrong yoch oei ling-lang wăr tăp dăr kơ inh. Inh wơ̆l jrok, jơhngơ̆m arăng, truh kơ đei ngĭl ngŭl kơ tơdrong ‘mêm đơ̆ng Kră Yang, păng ưh kơ đei tŏ sĕt inh hil kơ đe păng blĕk ‘bơ̆t anăp Kră Yang.

Inh hli tơtơ̆ kơplah hơdơ̆r ‘blŏk dôm tơdrong pơhrăm Sơ̆p Hla Bơar ‘Bok Kei-Dei kơplah oei ‘lơ̆p. Inh mơn băt kơdih jơ̆ mĭnh ‘nu bơngai răm bơih kơplah hiơt lê̆ lơ sơnăm wơ̆l jrok lăm tơdrong pơm ưh kơ trŏ. Lăm jơhngơ̆m đon inh kơplah noh, Kră Yang rŏlăng sơ’ngon kơ inh dêh, păng inh ưh kơ băt wă pơm thoi yơ wă hơmet dơ̆ng. Inh mơn băt kơdih jơ̆ mĭnh ‘nu bơngai răm bơih. Liơ Kră Yang đei sơng iŏk inh wih brŏk dơ̆ng lăm hnam dơnŏ Sư? Liơ Sư gơh yua mĭnh ‘nu bơngai đei tơdrong yoch thoi kơ inh? Jơhngơ̆m đon inh, păng tơdrong pơgơ̆p inh păng Kră Yang, kăl kơ tơdrong pơklaih hloh kơ đĭ đăng.

Truh kơ mĭnh năr, inh ‘bôh nơ̆r lăm Sơ̆p Hla Bơar ‘Bok Kei-Dei đei tơplih đĭ đon tơchĕng inh gah tơdrong dŏng pơklaih: “Sư… dŏng inh, yua kơ Sư hiôk kơ inh.” (Hơriso 18:19)

Lăm blŭng a, đon tơchĕng ưh kơ tôm mah đơ̆ng inh tơnat kơ wă lui khan Tơ’ngla pơjing mơsêh mơyang “hiôk kơ” mĭnh ‘nu bơngai yoch thoi inh. Mă-lei, Yang Bơhngol ‘Lơ̆ng đei pơchrang ăn kơ inh ‘bôh tơdrong tơpă: tơdrong ‘mêm đơ̆ng Sư jơ̆ tơmam apah đơ̆ng rŏng kơ inh đei pơklaih, dah kơplah inh bơ̆jang kơ Sư. Sư pơklaih inh, yua kơ Sư ‘mêm kơ inh đĕch. Ưh kơ đơ̆ng tơdrong lơ̆ng dah adrin kơdih kiơ gơh “răt iŏk” tơdrong ‘mêm noh ôh, yua kơ tơdrong ‘mêm mơnat Sư đei tơ noh đơ̆ng adrol kơ blŭng a. Tơdrong mơn băt noh boih jing ‘long khoă pơih tơnang ‘măng tơdrong rơngei tơpă ăn kơ bơhngol inh.

‘Bok Pôl kư̆m pơsĭt kơ tơdrong tơpă ‘nâu lăm Rôm 5:8 khan: “Na kơplah bơ̆n oei pơm yoch, lăp minh ‘nu Yêsu Krist đĕch lôch tang bơ̆n. ‘Noh boih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă.” Kră Yang ‘mêm kơ ih păng inh lăm tơdrong arih bơ̆n dang ei. Tơpă boih, Kră Yang ling-lang krao iŏk bơ̆n yak kiơ̆ Sư păng rim năr rai hlôh băt kơ Sư lơ hloh, mă-lei noh jơ̆ trong yak năm wă ăn kơ jơhngơ̆m đon lu bơ̆n ‘mêm kơ Kră Yang jrŭ să hloh. Mă tơdrong ‘mêm mơnat đơ̆ng Sư ăn kơ lu bơ̆n noh đei tôm mah hloh boih đơ̆ng adrol, păng tơdrong noh ưh kơ layơ tơplih ôh.

Chăl 43 lăm Sơ̆p Hla Bơar Êsai nhen “hla bơar chih tơdrong hưch wă” ‘lơ̆ng rơgoh mă ‘Bok Kei-Dei hlôi gưih ăn kơ kon pơlei Isơrael chăl sơ̆, păng kư̆m gưih ăn kơ đĭ đăng bơ̆n – jơ̆ lu bơngai oei yak kiơ̆ Yang Yêsu dang ei. Noh jơ̆ nơ̆r pơkă kơjăp kơ tơdrong Sư oei hơdai păng wei lăng lăm tơdrong arih bơ̆n, mă khan dang ei bơ̆n oei oei yak hlôi kơ đak glung tơglăk ayơ.

“Tơdah iĕm tŏk kơ đak, inh gô oei hơdai iĕm, tơdah iĕm glơi tŏk kơ đak glung, iĕm huay kơ glơ̆k ôh, tơdah iĕm yak lăm ŭnh iĕm huay kơ pơtŏk, pla ŭnh ưh kơ sa iĕm. Yua kơ Inh Kră Yang ‘Bok Kei-Dei iĕm, Tơ’ngla ‘lơ̆ng rơgoh Isơrael, Tơ’ngla dŏng pơklaih iĕm.” (Êsai 43:2-3)

Kră Yang gô ưh kơ đei layơ achăng lê̆ bơ̆n. Mă khan lu bơ̆n wơ̆l jrok, pơ̆k huŏng. Đon lui đei ngĭl ngŭl, jơhngơ̆m đon kon bơngai đei blĕk păng ‘maih hil, mă-lei tơdrong ‘mêm Sư ăn kơ lu bơ̆n ưh kơ layơ tơplih, yua kơ lu bơ̆n jơ̆ mŭk gĭt ‘bơ̆t anăp Sư. Noh jơ̆ nơ̆r pơkă kơjăp mă lu bơ̆n lui gơnang tôm tơdrong.

Apĭnh đĭ đăng krao khan hơdai: Kơkuh kơ ‘Bă, kon bơnê kơ Kră Yang yua kơ tơdrong ‘mêm Ih đei khŏm khŏm ưh kơ đei layơ đĭ nơ̆r pơma. Apinh Kră Yang tơgŭm ăn kơ kon băt sơng iŏk tơdrong ‘mêm noh, hlôh băt khan kon jơ̆ mŭk gĭt kơ ‘Bă lơ tơpă. Kon ưh kơ đei adrin kơdih wă kơ đei trŏ hăm tơdrong ‘mêm Ih ôh, păng kư̆m ưh kơ đei tơdrong ayơ gơh sơlah lê̆ kon đơ̆ng tơdrong ‘mêm noh. Hơpơi kơ kon arih pơdah tơdrong ‘mêm mơnat ‘nâu truh kơ lu bơngai kon đei tơ’bơ̆p lăm tơdrong arih ‘nâu. Kon kŭp kơ̆l krao khan lăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, apinh ling lang wei răk tơdrong tơpă ‘nâu: Kră Yang ‘mêm kơ ih yua kơ ih jơ̆ kon mă Sư ‘mêm kơ eng. Dôm tơdrong pơ̆k huŏng ưh kơ đei wă khan thoi yơ ăn kơ ih, păng ưh kơ đei pơm kơ tơdrong ‘mêm mơnat Kră Yang rai tŏ sĕt kơ ih ôh. ‘Noh boih, huay kơ ơh kơdih akâu ôh. Athei pơih jơhngơ̆m sơng iŏk tơdrong ‘mêm đơ̆ng Kră Yang, na Sư pơklaih jơhngơ̆m ih. Tơdrong ‘mêm Sư tih hlohkơ tơdrong yoch ih pơm, păng rơka so ‘noh gô jing pơsĭt ăn kơ chăl arih đei tơplih yua kơ tơdrong ‘mêm mơnat.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.