Lu bơ̆n ngăl bơwei dôm lu tơmam hưch wă đơ̆ng bơ̆n kơdih, bơwei lu sư wă kơ ling lang ‘nao păng rơgoh ‘lơ̆ng. Mălei đei minh sơ̆p hla bơar rai “so sĕnh” mă rai gĭt kăl. ‘Noh jơ̆ Sơ̆p hla bơar ‘Bok Kei-Dei – anih wei răk trong yak năm kiơ̆ Kră Yang đơ̆ng rim ‘nu lu bơ̆n. Sơ̆p hla bơar ‘Bok Kei-Dei ih đei dôm kơtrong chrek jơ̆ng ưh kơ tơpăt, dôm nơ̆r chih hăt hot ‘bơ̆t chĕng sơ̆p hla bơar, dah đêl đak măt lĕch ro kơtoh kơplah ih brơ̆k kơ jơhngơ̆m apinh Kră Yang? Dah hla bơar noh oei tơproh ‘lơ̆ng đĕch, ‘bâu phu hla bơar ‘nao đơ̆ng anih ‘măn sư yua ưh kơ đei pơih lăng đŏk?

Năr ‘nâu, ‘năr 09/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang đơ̆ng bơngai chih Diane Pearson hăm kơ̆l ‘bai SƠ̆P HLA BƠAR ‘BOK KEI-DEI SO BƠIH

“Pŭn dêh kơ bơngai bu… chơt hiôk lăm tơdrong juăt Kră Yang, păng tơchĕng tơdrong juăt ei măng năr.” (Hơriso 1:1-2)

‘Bok bơtho Kevin jơ̆ mĭnh ‘nu buăl inh lăm Khŭl Tơdrong ‘Nao ‘Lơ̆ng Bloomfield. Sư kư̆m ngăl gưih ăn kơ inh dôm lu ‘bai krao khan rim giĕng. Sư chih thoi âu:

“Năr tơdrâu giĕng adrol noh, yă Pat Miller, mĭnh ‘nu bơngai lui ‘mêm kơ Kră Yang lăm Hnam Akŭm lu nhôn, sư lôch kơplah sư tơ hngam jĭt puăn sơnăm. Sư jơ̆ bơngai bơ̆jang pơnam, bơ̆jang thĕng hreh đĕch păng ling-lang tơpăt. Kơplah oei chih ‘bai bơtho phĕt gah tơdrong lôch yă âu, inh pơih Sơ̆p hla bơar ‘Bok Kei-Dei sư na lăng, tơpă boih noh jơ̆ tơmam gĭt kăl dêh. Rim kơ hlak hla bơar chih kiĕr ‘bĕr nơ̆r krao khan, păng hơ’mon, na dôm lu trong lăm Sơ̆p hla bơar ‘Bok Kei-Dei sư oei đŏk tơnăp rim pơge.”

‘Bok bơtho Kevin chih iŏk nơ̆r krao khan mă yă Pat đei chih: “Tơdrong kơnhăm lăm Hnam Akŭm hmă đĕch: kơkuh mĭnh ‘nu ‘Bok Kei-Dei thoi đei tơ’bôh lăm Sơ̆p hla bơar ‘Bok Kei-Dei, pôk pơ-ư kơ Kon Sư jơ̆ Yang Yêsu, păng tơ’bôh tơdrong ‘mêm mơnat Sư ăn kơ lu bơngai năm kơkuh hăm lu bơ̆n. Hơpơi kơ bơngai lui rai lơ hloh, păng rim ‘nu bơngai lui gô jing tơmam ‘mêm mơnat đơ̆ng Sư. A-men.”

Sơ̆p hla bơar đơ̆ng yă Pat jơ̆ nhen thoi tơ’bôh tơdrong arih đon lui đơ̆ng sư: sơ̆p hla bơar oei hơdai rim khei sơnăm, chi răk chăl arih hlôi mơn đei nơ̆r ‘Bok Kei-Dei rim năr, păng dôm lu nơ̆r krao khan kơ Khŭl Bơngai lui păng lu bơngai ưh tam mă lui.

Tơdrong hơ’mon đơ̆ng ‘Bok bơtho Kevin tơ‘blŏk kơ inh gah Louise, yă tơ oei ‘bơ̆t cheng inh lăm hnam akŭm wă truh tơ 40 sơnăm adrol ki, kơplah đon lui inh oei ưh tam mă hlôh wao. Louise ling lang chĕp ba Sơ̆p hla bơar ‘Bok Kei-Dei. Na inh? Inh ưh kơ đei la yơ chĕp ba ôh, tă kơ iŏk dôm lu sơ̆p hla bơar đei dan lê̆ bơih lăm hnam akŭm. Rim wơ̆t ‘bok bơtho đŏk trong ayơ, sư pơih trŏ hloi kơ chăl noh, mă-lei inh ưh kơ wă pơm thoi noh ôh. Sư băt tơpă chăl noh ‘bơ̆t anih ayơ mă ưh kơ lăng pah dơhlâu chă – tơdrong noh pơm ăn kơ inh hơ iă dêh tơpă. Sư kư̆m chih hloi lăm Sơ̆p hla bơar ‘Bok Kei-Dei, na inh hlôi đei bơtho khan ưh kơ gơh chih tơ lăm hla bơar noh ôh, mă loi Sơ̆p hla bơar ‘Bok Kei-Dei.

‘Bôh Louise hăm Sơ̆p hla bơar ‘Bok Kei-Dei jơ̆ mĭnh tơdrong ưh kơ đei layơ hiong lơ̆m jơhngơ̆m inh. ‘Noh jơ̆ Sơ̆p hla bơar ‘Bok Kei-Dei tơpu hơkar găm, tih să, đei chih đơ̆ng adrol sơ̆. Kơplah sư đoh măt kơmĭl kră păng pơih rim hlak hla bơar, inh băt kơ sư kơnhăm dêh bơih kơ lăm Sơ̆p hla bơar noh. Sơ̆p hla bơar hiăh so sĕnh, dôm ku lu mum đĭ kơprĕnh, păng dôm lu trong đei rek jơ̆ng, păng dôm lu chih nơ̆r wă kơrăk hăm đak mư̆k dreng brĕu phara dih. Trŏ tơpă bơih Sơ̆p hla bơar ‘Bok Kei-Dei sư yua lơ tơpă, păng inh ‘bôh tơdrong ‘lơ̆ng hơ iă noh kơplah sư yak năm hăm Kră Yang.

Inh pơma tơpă, inh đei klai gar kơ Louise, hăm Sơ̆p hla bơar ‘Bok Kei-Dei so sĕnh păng hăm đon lui kơjăp sư. Inh ‘maih wă đei đon lui ‘lơ̆ng nhen thoi sư, mă-lei ưh kơ wă ‘măn jơ wă pơm. Kư̆m đei, Kră Yang yua ‘bôh Louise nhen thoi hơtŭt hơdar ‘bơm inh, tơ‘blŏk kơ inh: Athei ‘măn jơ lơ hloh lăm Nơ̆r Kră Yang!

Truh tơ năr Louise lôch brŏk tơ Kră Yang, ‘bok bơtho gô chih ‘bai bơtho ‘lơ̆ng tơpă đơ̆ng Sơ̆p hla bơar ‘Bok Kei-Dei so sĕnh hăm lơ nơ̆r chih wă kơ răk ‘bĕnh kơ tơdrong ‘mêm ‘noh. Yua kơ, sư đei arih mĭnh chăl arih iŏk Nơ̆r Kră Yang pơm hơnă kơjăp.

Apĭnh đĭ đăng krao khan hơdai: Kơkuh kơ ‘Bă tơ kơpal plĕnh ti! bơnê kơ Ih, yua kơ dôm lu bơngai ‘mêm kơ Ih păng Nơ̆r Ih. Apinh Ih tơ’blŏk kơ kon rim năr thoi âu: tơ’ngla đei Sơ̆p hla bơar ‘Bok Kei-Dei so sĕnh, jơ̆ minh ‘nu bơngai lui kơjăp hloh. Noh jơ̆ bơngai chu yom, tơpăt hăm Kră Yang. Apinh Ih bơtho kon băt kơ gĭt kăl kơ Nơ̆r Ih, păng rai jê̆ Nơ̆r Ih lăm dôm lu năr tơ anăp. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, păng ih thoi yơ boih? Sơ̆p hla bơar ‘Bok Kei-Dei ih đei pơma tơ’bôh tơdrong kiơ kơ ih? Rŏlăng truh tơ năr ih lôch brŏk tơ Kră Yang, ‘bok bơtho gô chă ‘bôh kiơ lăm Sơ̆p hla bơar ‘Bok Kei-Dei ih wă răroi trong yak năm đon lui ih dah ưh? Hơpơi đơ̆ng năr ‘nâu, Sơ̆p hla bơar ‘Bok Kei-Dei ih ưh kơ sĭ kơ tơmam pơgong wă kơ ‘lơ̆ng đĕch tơ anih ‘măn sơ̆p hla bơar, mă gô hơdai hăm ih lăm rim trong yak năm, gô jing anih wei răk dôm lu trong ih yak năm hơdai hăm Kră Yang. Na ding truh tơ năr ih lôch, dôm hlak hla bơar so hiah ‘noh gô jing tơdrong kơdranh ‘lơ̆ng hloh đei chăl arih ‘mêm kơ Kră Yang tôm tơdrong.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.