Lăm chăl arih, khôi juăt păng dôm nơ̆r pơkă đei dan ăn wă kơ bơwei kon pơlei pơla đei hrĕp hreh păng hơđơ̆ng. Kư̆m thoi noh mơ̆n, hăm lu bơngai lui kơ ‘Bok Kei-Dei, Nơ̆r Kră Yang jơ̆ dơhlâu trŏ wă bơtho tơ’bôh kơ lu bơ̆n arih trŏ kiơ̆ kơ Sư wă. Mă-lei, đei kơplah lu bơ̆n kơnhăm dêh kơ dôm tơdrong ‘bôh gah ‘ngoaih mă hiơt lê̆ kơ ‘Bok Kei-Dei lăp đon. Kơplah tơdrong wei răk tơdrong juăt ưh kơ hơdai hăm tơdrong ‘mêm păng jơhngơ̆m ‘mêm mơnat, dôm tơdrong đei pơgơ̆r gô ba ăn tơdrong pŭn hiôk jing dôm tơdrong pŭ trăp ăn kơ kơdih păng bơngai nai.

Năr ‘nâu, ‘năr 10/08/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang đơ̆ng bơngai chih Dina Sleiman hăm kơ̆l ‘bai KHÔI JUĂT PĂNG JƠHNGƠ̆M ‘MÊM MƠNAT

“Đơ̆ng noh Yêsu khan kơ lu đe ei: “Dah iĕm đei kon iĕm dah rơmo iĕm huŏng tơ sơlŭng đak lăm năr pơdơh, iĕm jur iŏk sư lăm năr pơdơh hloi mơ̆n dah kiơ?” (Luka 14:5)

Brei mơsơ̆ âu, inh hiôk dêh tơpă kơplah sơng iŏk minh ‘nu sâu mă tơpêng. Inh wă kơ ‘măn jơ oei ngôi hơdai hăm dôm lu sâu inh. Pêng ‘nu nhôn pơm ngôi tŏk hao, pơm tơsĕr, đă ‘bŏng ‘lŏng, dah man lu rup iĕ hăm teh lơ̆n.

Mă-lei đei mĭnh tơdrong mă inh ưh kơ wă. Noh jơ̆ kơplah sau drŏnglo pơđăm sơnăm pơm ngôi, sư nao pơtơm tơdrong pơchơt đĕch, mă-lei đei ngôi pơchơt pơthim ăn tơdrong pơm ngôi plơ̆ng. Dôm nơ̆r pơdrơ̆ng lăm tơdrong pơm ngôi noh mơ̆ng phara dêh, mă dôm lu tơdrong noh đei yua kơ sư ngăl, wă kơ sư ‘bônh kơ kĕ jĕi hloh.

Tơdrong noh pơm kơ inh ‘blŏk kơ lu kră pơgơ̆r tơdrong lui chăl sơ̆ kơplah chăl Yang Yêsu. Lu sư đei pơthim ăn lăm khôi juăt ‘Bok Kei-Dei dôm lu tơdrong noh đơ̆ng lu sư dan ăn. Lu sư lui kơ dôm nơ̆r lăm khôi juăt noh gô tơgŭm wei răk tơdrong juăt ‘Bok Kei-Dei. Mă-lei, kiơ̆ kơ jơ năr, lu sư dan dôm lu khôi juăt đơ̆ng sơ̆ ‘noh hơtŏ dih băl, kư̆m hloh kơ khôi juăt ‘Bok Kei-Dei đơ̆ng blŭng a.

Sơ̆p hla bơar ‘Bok Kei-Dei đei chih: “Năr pơdơh Sa’bat ei Yêsu năm sŏng sa tơ hnam minh ‘nu bơngai pơm kră kơ lu bơngai khŭl Pharisi. Na đe lăng Yêsu hnhong. Pă ‘biơ̆ kơ ‘nei ‘bôh blư kơ minh ‘nu bơngai jĭ pơpông năm tơ Yêsu. Na Yêsu jet hloi lu thây bơtho tơdrong juăt đe Juđê păng lu bơngai Pharisi thoi âu: “Kiơ̆ kơ tơdrong juăt bơ̆n, bơ̆n hăm gơh pơklaih đe jĭ jăn lăm năr pơdơh Sa’bat ưh?” Mă-lei thĕng kơ lu sư. Na Yêsu pơklaih hloi bơngai jĭ ei, na athei sư brŏk. Đơ̆ng noh Yêsu khan kơ lu đe ei: “Dah iĕm đei kon iĕm dah rơmo iĕm huŏng tơ sơlŭng đak lăm năr pơdơh, iĕm jur iŏk sư lăm năr pơdơh hloi mơ̆n dah kiơ?” Na hreh kơ lu sư pă gơh drơ̆ng.” (Luka 14:1-6)

Bơngai Pharisi đei lơ khôi ‘bơm năr pơdơh Sa’bat. Lơ tơdrong âu ưh kơ đei chih lăm khôi juăt Môis, mă-lei dôm lu tơdrong tơblang păng yua iŏk đei bơtho tơ’bôh ăn kơ lơ jơhnơr. Lu sư lui kơ tơdrong juăt đơ̆ng sơ̆ noh gô tơgŭm wei răk tôm tơdrong đơ̆ng khôi juăt. Mă-lei ‘net ‘net, dôm lu tơdrong juăt đơ̆ng sơ̆ ‘noh jơ̆ jing “ ‘long pơtŏ” ăn kơ jơhngơ̆m đon tơpăt hăm khôi juăt. Tơm đơ̆ng tơdrong ‘noh pơm ăn kơ lu sư hiơt lê̆ tơdrong gĭt kăl hloh mă khôi juăt wă kơ pơm, noh jơ̆ tơ’bôh jơhngơ̆m ‘mêm mơnat đơ̆ng ‘Bok Kei-Dei.

Năr pơdơh Sa’bat jơ̆ đơ̆ng ‘Bok Kei-Dei đei pơjing wă kơ kon bơngai bơ̆n đei pơdơh păng pơgơ̆p hăm Sư. Mă-lei, đơ̆ng kon bơngai bơ̆n pơthim ăn kơ năr pơdơh Sa’bat jing mĭnh tơdrong pŭ trăp. Yua kơ đơ̆ng jơhngơ̆m arăng pơm ăn kơ lu sư ưh kơ băt Yang Yêsu jơ̆ Kon ‘Bok Kei-Dei. Mă khan Sư đei pơm trŏ kơ đêl pơkă dôm nơ̆r khan lê̆ adrol păng pơm lơ tơdrong mơsêh mơyang, mă-lei lu sư oei ưh kơ drơ̆ng iŏk kơ Yang Yêsu jơ̆ ‘Bok Mêsi – ‘Bok mă Sơ̆p hla bơar ‘Bok Kei-Dei đei roi tơbăt bơih.

Tơdrong âu kư̆m jơ̆ mĭnh nơ̆r râu tơ iung ăn kơ rim ‘nu bơngai bơ̆n hrei âu. Kư̆m đei, bơ̆n pơm ưh kơ băt dôm lu tơdrong juăt, tơdrong juăt đơ̆ng sơ̆ dan kơpal hloh kơ Nơ̆r ‘Bok Kei-Dei. Dôm lu tơdrong mă đei pơjing wă kơ tơgŭm bơ̆n jê̆ Kră Yang kư̆m jing tơdrong pơgăn pơm ăn kơ bơ̆n ưh pă ‘bôh jơhngơ̆m đon đơ̆ng Sư.
Kơplah Yang Yêsu jet lu bơngai Pharisi khan: “lăm lu iĕm đei kon dah rơmo iĕm huŏng tơ sơlŭng đak lăm năr pơdơh, iĕm jur iŏk sư lăm năr pơdơh hloi mơ̆n dah kiơ?” jơ̆ Kră Yang tơ’blŏk ming kơ lu sư ‘blŏk kơnhăm kơ năr pơdơh Sa’bat. Dah lu bơngai Pharisi wă dŏng iŏk kon drŏ nglo sư dah sem dơrong lu sư lăm năr pơdơh Sa’bat, lei tơdrong pơklaih ăn kơ mĭnh ‘nu bơngai oei jĭ jăn ưh kơ đei glăi ôh, mă rai trŏ kơ ‘Bok Kei-Dei lăp đon. Yang Yêsu tơ’bôh jơhngơ̆m ‘mêm mơnat huay kơ tơplơ̆ hăm jơhngơ̆m chu yom ‘Bok Kei-Dei, mă tơ’bôh tơdrong trŏ kơ Sư lăp đon.
Phara kơ tơdrong noh,Yang Yêsu đei pơma khan: “Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch. Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk. Yua kơ Inh, na iĕm rơhơi jơhngơ̆m păng pŭ hơiơch.” (Mathiơ 11:28-30)
Yang Yêsu jur tơ teh âu ưh kơ wă tŭk lê̆ khôi juăt mă wă pơm pơkeh ăn kơ khôi juăt. Sư kư̆m pơklaih bơ̆n đơ̆ng dôm lu tơdrong pŭ trăp mă đơ̆ng kon bơngai pơjing. Kră Yang wă kơ bơ̆n năm jê̆ tơ Sư hăm jơhngơ̆m ‘mêm tơpă, tơplih kơ adrin wei răk dôm tơdrong pơm gah ‘ngoaih.

Athei kơnhăm kơ pơhrăm Nơ̆r Kră Yang păng krao khan wă kơ Sư pơdah Nơ̆r Sư pơjing đon lui păng chăl arih ih. Kơplah noh, ih gô hlôi mơn đei tơdrong arih rơngei ‘lơ̆ng tơpă. Tơdrong rơngei noh gô chông ba ih pơdăh tơ’bôh jơhngơ̆m ‘mêm mơnat đơ̆ng ‘Bok Kei-Dei lăm chăl arih rim năr.

Apĭnh đĭ đăng krao khan hơdai: Kơkuh kơ Kră Yang, apinh Ih huay kơ jô̆ yo kơ kon yua kơ kon năm tơ Ih hăm dôm tơdrong ‘bôh gah ‘ngoaih mă tơhiong lê̆ jơhngơ̆m đon ‘mêm tơpă păng chu yom tơpă. Kơplah kon đŏk Nơ̆r Ih, athei Nơ̆r noh lăng ming lăm jơhngơ̆m đon kon, tơgŭm kon arih đei jơhngơ̆m ‘mêm mơnat păng pơdăh tơ’bôh jơhngơ̆m ‘mêm mơnat thoi Ih. Ơ Kră Yang, kon ưh kơ wă arăng jơhngơ̆m đon kơ Nơ̆r Ih, tơgŭm kon krăng kơchăng pơm kiơ̆, pơdăh tơ’bôh jơhngơ̆m ‘mêm mơnat đơ̆ng Ih lăm tôm tơdrong kon pơma dah bơ̆jang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Nơ̆r Kră Yang năr ‘nâu krao lu bơ̆n athei lăng ming lăm jơhngơ̆m đon bơ̆n kơdih. Hăm đei layơ bơ̆n pơm ưh kơ băt dôm lu tơdrong juăt đơ̆ng sơ̆, khôi juăt, dah tơdrong tơchĕng dan kơpal hloh kơ Nơ̆r ‘Bok Kei-Dei ưh? Hăm đei layơ lu bơ̆n kơnhăm dêh kơ wei răk dôm lu tơdrong gah ‘ngoaih mă tơhiong lê̆ jơhngơ̆m ‘mêm kơ Kră Yang wă kơ lu bơ̆n pơdăh tơ’bôh ưh? Athei ăn kơ Nơ̆r Kră Yang pơjing ming đon lui păng chăl arih lu bơ̆n. Kơplah năm tơ Nơ̆r Kră Yang iŏk jơhngơ̆m đon ala, Nơ̆r Kră Yang gô tơplĭh bơ̆n jing nhen thoi ‘Bok Krist hloh, băt mơ̆ng nơ̆r Tơdrong Tơpă păng gĭt kăl hloh jơ̆ arih hăm jơhngơ̆m ‘mêm mơnat nhen thoi Yang Yêsu hlôi đei pơm.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.