Kơplah bơ̆n lăng tơnơm ‘long dơng tơhleh hla hơlŭng, păk yua kơ đơ̆ng kial hơbŭt, lu bơ̆n tơchĕng khan tôm tơdrong tôch boih. Kơplah bơ̆n tơ’bơ̆p chăl wă pơchah, răm dah kơplah tôm tơdrong bơ̆n pơjing plinh wă hiong, jơhngơ̆m lu bơ̆n ‘mônh kơ hơwơ̆l păng tôm tơdrong bơ̆n khan trŏ kơ truh thoi noh bơih. Mălei, Kră Yang lăng phara kơ bơ̆n lăng. Kơplah lu bơ̆n tơchĕng ngeh kơ tơnơm ‘long lôch, na măt Kră Yang lăng ‘bôh tơmơ̆ng bluh đei tơdrong arih ‘lơ̆ng rŏ tơ anăp.

Năr ‘nâu, năr 11/8/2026 tơdrong tơdă Amăn Jơ Krao Khan Rim Năr wơ̆n bơngai ‘mơ̆ng pơwao nơ̆r Kră Yang hăm bơngai chih Paula L..Stansbury kơ̆l ‘bai HƠ’MON GAH TƠNƠM ‘LONG GÔ PƠRĂM LÊ̆

“Mă khan minh lăm mơjĭt ‘nu kon pơlei oei đei tơ noh, lu sư đe kư̆m gô pơrăm đĭ, thoi đe kăl ‘long hơngo, ‘long kôih, sư kư̆m oei đei tơm, na gô đei adrĕch rơgoh ‘lơ̆ng tơpăt thoi tơm lăm teh đak noh.” (Êsai 6:13)

“Lu tơnơm ‘long đe kăl bơih, kư̆m oei hơmĕng kơ wă bluh dơ̆ng,Tơnơm sư gô chăt bluh tơmơ̆ng dơ̆ng,Mă khan rơh sư rai kră lăm teh.Tơm sư lôch kro tơ lăm teh.Mưh đei hơyuh đak, sư gô chăt tơ’biĕng,păng bluh dơ̆ng thoi minh tơnơm ‘long.” (Jop 14: 7-9)

Hui dêh lăm lu bơ̆n tơchĕng khan tơnơm ‘long dơng kro hla hơlŭng, tơmơ̆ng tul na đei tơdrong arih tơ anăp- na roi kiơ dơ̆ng khan gô đei tơdrong arih ‘lơ̆ng rŏ tơ anăp. Mălei inh lui ngeh Kră Yang ‘bôh tơ anăp đei phara kơplah sư bơtho pơjĭ kon pơlei Isarael.

Lăm hla ar Êsai 6:13, ‘Bok Kei Dei khan kơ kon pơlei Sư thoi âu: “Thoi đe kăl ‘long hơngo, ‘long kôih,sư kư̆m oei đei tơm,na gô đei adrĕch rơgoh ‘lơ̆ng tơpăt thoi tơm lăm teh đak noh.”

Ki sơ̆, inh đei tơdrong jang păng arih tơ minh anih bơ̆jang mă đe anăn sư noh “Anih Teh”. Anih ‘nâu kơpal kơ nak tơmo kơ jung 50m, đei lăng ‘bôh hơđăl đak dơ sĭ să sap. Lăm minh pơge, oei yak năm lăm anih kơ jung noh, lăm kơ̆l ‘ngok inh đei ‘blŏk kơ nơ̆r ‘Bok Kei Dei lăm hla ar Êsai. Kơplah inh brŏk tơ anih hnam păng pơih rim hlak hla ar lăng, dôm lu nơ̆r noh blŭng-a tơ’bôh lăm inh minh pôm rup juơ đĭ bơih, pơchah pơchek. Inh jet kơdih, anih ‘lơ̆ng rŏ ‘nâu sư gô thoi yơ- anih đei lơ tơdrong đei đơ̆ng sơ̆, jing minh anih tơm kơ năr tơplih tơk tơiung pŭn hiôk.
Noh jơ̆ kơplah đei lơ hơwơ̆l kơ tơdrong bơ̆ jang Anih Teh, păng dôm tơdrong inh hlôh kơ nơ̆r ‘Bok Kei Dei ‘nâu wă pơtih gia tơ anăp gô đei măng mu. Đei rơbâu bơngai năm tơ anih ‘nâu, đei lơ bơngai tơ’bơ̆p Kră Yang Yêsu păng yak năm jing bơngai lui ‘lơ̆ng kơ Kră Yang đei yua. Mălei arih tơ anih ‘nâu kơplah sơnăm lơ̆ng rŏ hlôi bơih, inh ‘bôh bơngai rai tŏ sĕt, păng lu tơnăr hnam đei hơđŏh tơlŏng. Hăm nơ̆r ‘Bok Kei Dei đei lăm tơdrong tơchĕng inh, hăm tơdrong bơjang Anih Teh ‘nâu ưh kơ gơh pơdŏng dơ̆ng boih.

Anih Teh gĭt ‘nâu gô jing lăm tơpang ti bu? Đơ̆ng nak tơmo ‘nâu, tơdrong tơdă triê̆u đôla anih ‘nâu să thoi đak dơsĭ nhen ưh kơ tôch. Anih ‘nâu ‘bôh hơiă ăn kơ lơ bơngai, mă lu bơngai arih kơtă jê̆ sư noh.

Lăm nơ̆r ‘Bok Kei Dei đei chih lăm pah so, ‘long hơngo- jơ̆ minh tơnơm long kơjăp lei lăi thoi ‘long kôih – đei pơma lơwơ̆t. Sư đei rơh ‘bet jrŭ, lanh să yua kơ thoi noh na sư oei jơk ‘lơ̆ng mă khan lăm pơyan phang. ‘Long ‘nâu tih păng arih truh tơ rơbâu sơnăm. Yua kơ đơ̆ng tơdrong kơjăp noh, ‘long hơngo juăt kơ jing hơdral, anih ‘blŏk hơdơ̆r păng anih pơdơh.

Kơplah tơ’bơ̆p tơdrong pơlong lăng, lu bơ̆n juăt kơ lăng tơmơ̆ng tơgơ̆ hơdrol hloh na hiơt lê̆ rơh bơhngol oei chăt jrŭ lăm tơdrong ‘mêm mơnat. Măkhan kơplah koh lê̆, minh tơdrong arih oei arih đơ̆ng tơnơm ‘long noh. Lăm Sơ̆p hla bơar ‘Bok Kei Dei, ‘long ‘nâu pơtih gia kơ chu iŏk păng adrin, nhen thoi chăl sơ̆ kơplah Kră Yang pơdah akâu sư hăm Abraham. Blŭnga 18:1 chih: “Kră Yang pơdah akâu sư kơ Abraham lăm kơdrơ̆ng ‘long kôih Mamrê, kơplah sư oei ngôi ‘bơ̆t ‘măng bơsŭn sư kơ’năr drang tŏ.” Đơ̆ng tơdrong tơ’bơ̆p ‘nâu, ‘Bok Kei Dei pơkă kơ sư đei minh ‘nu kon drŏnglo.

Tơdrong hơmet đơ̆ng Kră Yang ưh kơ đei layơ wă kơ nhăm pơrăm lê̆. Sư pơm tơdrong noh wă pơjing tơdrong arih plơ̆ng. Nơ̆r ‘Bok Kei Dei lăm hla bơar Êsai pơsĭt khan “adrĕch rơgoh ‘lơ̆ng tơpăt thoi tơm sư noh” hơtŭt ‘bơm lăm jơhngơ̆m inh. Bơ̆t Anih Teh nâu, Tơdrong ‘Nao ‘Lơ̆ng đei rei lăm bơhngol lu bơngai đei pơgơ̆p tơ anih âu, pơhrăm păng pơjuăt. Nhen thoi kon pơlei Isarael pă tŏsĕt noh sơ̆, kon sâu sư gô chăt tơ’biĕng, ba ăn bơyan kĕch iŏk lơ bơhngol tơ anăp.

Hla bơar Jop 14:7-9 tơ ‘blŏk kơ lu bơ̆n: “Lu tơnơm ‘long đe kăl bơih, kư̆m oei hơmĕng kơ wă bluh dơ̆ng,Tơnơm sư gô chăt bluh tơmơ̆ng dơ̆ng, mă khan rơh sư rai kră lăm teh.Tơm sư lôch kro tơ lăm teh. Mưh đei hơyuh đak, sư gô chăt tơ’biĕng,păng bluh dơ̆ng thoi minh tơnơm ‘long.”

Mă khan tơnơm ‘long lăng rŏ kơ wă lôch, adrĕch nơ̆r Kră Yang đei Yang Bơhngol ‘Lơ̆ng ruh rơngơp jơ̆ jing adrĕch arih ling lang, ưh kơ đei layơ hiong tôch. Truh tơ tơnơm ‘long jô kro kŭm đei hơmĕng kơ tơplih kơplah đei đak, pơma kiơ kơ buăl, hăm inh, păng lu bơngai jum dăr lu bơ̆n? Athei lui ngeh kơ Kră Yang, yua kơ lăm tơpang ti Kră Yang Yêsu, mă khan tơnơm ‘long kăl tơpăk lê̆ bơih mă lei pơtơm kơ minh tơdrong tơplih tưk tơiung tơdrong lui tih.

Apĭnh đĭ đăng krao khan hơdai: Kơkuh kơ ‘Bok Kei Dei pêng anăn Yang arih ling lang, Ih jơ̆ ‘Bă gơh tơgŭm păng Tơngla wei lăng tơdrong arih kon tơ anăp. Ơ Kră Yang, kon kŭm đei ‘bôh hơwơ̆l păng rơdu bơ̆t anăp tơdrong hiong răm, pơchah pơchek lăm jơhngơ̆m kon. Apinh Yang Bơhngol ‘Lơ̆ng huay kơ jô̆ yo păng tơiung đon lui rơdu kon. Jơ ‘nâu, apinh Ih ruh rơngơp jơhngơ̆m kon hăm đak arih ling lang. Kon roih iok dan đon lui đei tơplih đơ̆ng Ih, lui ngeh tơnơm ‘long kon jing adrĕch ‘lơ̆ng rơgoh đei Ih bơwei. Apinh ăn kơ rơh bơhngol kon chăt jrŭ lăm Ih, chu iŏk păng adrin năm hlôi kơ bơyan phang păng chang gô tơdrong tơplih tưk tơiung đon lui pran kơtang. Kon lui ngeh tơdrong arih đơ̆ng tơnơm ‘long jôkro gô bluh dơ̆ng, yơ̆p ăn kơ hnam Ih. Kon kŭp kơ̆l krao khan hăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, rŏlăng lăng jơ ‘nâu buăl ‘bôh tơdrong arih kơdih nhen thoi tơnơm ‘long hla hơlŭng đĭ đơ̆ng rŏng kơ dôm tơdrong glăi, chhur nuih păng pơchah pơchek. Buăl lăng tơ anăp păng ‘bôh măng mu, rŏ lăng tôm tơdrong gô tôch, păng lu sơnăm ‘lơ̆ng rŏ ưh pă đei pơlơ̆k dơ̆ng. Mălei buăl athei ‘blŏk, kơplah dôm tơdrong gơnang gah ‘ngoaih koh pơrăm lê̆, kơplah noh rơh bơhngol buăl đei chăt jrŭ lăm glung ‘mêm mơnat hlơp. Tơplih kơ lăng tơm ‘long răm, athei lăng adrĕch ‘lơ̆nmg rơgoh Kră Yang đei rei lăm jơhngơ̆m buăl. Adrĕch ‘lơ̆ng rơgoh noh đei ruh rơngơp đơ̆ng Yang Bơhngol ‘Lơ̆ng, tơdrong arih plơ̆ng gô đei yua tơpă. Yua kơ lăm tơpang ti Kră Yang Yêsu, lu bơ̆n ling lang đei tơdrong chang hơmĕng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.