Tơdrong arih ling lang đei dôm “anih hơđơ̆ng” hiôk hian- anih lu bơ̆n ‘blŏk răk rim kơ trong yak năm, rim kơ tơdrong juăt kơ tơchĕng păng ưh pă ‘maih wă tơ’bơ̆p hăm dôm tơdrong ‘nao plơ̆ng. Oei ‘bơ̆t lăm anih hiôk ‘lơ̆ng ‘noh hiôk rơngơp, mă lei trŏ lăp sư đei pơm hơgăt dôm kơ tơdrong hlôi đei tơ’bơ̆p gah bơhngol jrŭ să păng jơnăr wă kơ đon lui đei minh kơ nao tơplih. Wă kơ yak hlôi, lu bơ̆n kăl kơ đei minh tơdrong pơdrơ̆ng hlôi đơ̆ng kơdih kâu, minh tơdrong pơ̆n nuih yak năm kiơ̆ kơ nơ̆r krao pơtrŭt đơ̆ng gah lăm.

Năr ‘nâu, ‘năr 12/08/2026, tơdrong tơdă Amăn Jơ Krao Khan Rim Năr apinh wơ̆n đĭ đăng bơngai mơ̆ng wang pơwao hơdai Nơ̆r Kră Yang hăm kơ̆l ‘bai: TRONG YAK NĂM LĔCH ĐƠ̆NG ANIH HIÔK ‘LƠ̆NG

“Kơkuh bơnê kơ Kră Yang ‘Bok Kei-Dei ih, yua kơ Sư lăp đon kơ ih ăn kơ ih hơ-oei kơpal tang-dŏ pơtao lu bơngai Isơrael! Yua kơ Kră Yang ‘mêm kơ Isơrael ling-lang, thoi noh na Sư ăn kơ ih pơm pơtao wei-lăng wă kơ ih pơm tơdrong trŏ păng ‘lơ̆ng tơpăt.” (I Lu Pơtao 10:9)

“Wă yă pơtao dêh char Sêba kơtơ̆ng đe ư-ang kơ pơtao Sôlômôn đơ̆ng anăn Kră Yang, sư năm tơ noh wă pơlong lăng tơdrong hơgei Sôlômôn hăm tơdrong pơpơn tơnat…Lăp yă pơtao dêh char Sêba ‘bôh dôm tơdrong gơh hơgei Sôlômôn păng hnam pơtao sư đei pơm, tơmam sŏng sa kơpal gơ’bang, tang-dŏ lu bơngai jang sư hơ-oei, tơdrong jang lu đĭch đam sư, hơbĕn ao lu sư hrŭk, lu bơngai năm ba kơchŏk đak nhă pơtao păng dôm tơmam soi pơyơ̆r lăm Hnam kơkuh kơ Kră Yang, yă pơtao ưh pă gơh pơma kiơ…Kơkuh bơnê kơ Kră Yang ‘Bok Kei-Dei ih, yua kơ Sư lăp đon kơ ih ăn kơ ih hơ-oei kơpal tang-dŏ pơtao lu bơngai Isơrael! Yua kơ Kră Yang ‘mêm kơ Isơrael ling-lang, thoi noh na Sư ăn kơ ih pơm pơtao wei-lăng wă kơ ih pơm tơdrong trŏ păng ‘lơ̆ng tơpăt.” ( I Lu Pơtao 10:1,4-5,9)

Blŭng a lăm sơ năm ‘nâu, inh đei sơng iŏk nơ̆r wơ̆n chih ‘bai đơ̆ng khŭl hơmet tơdrong tơdă wei rong bơhngol đơ̆ng minh tơdrong jang. Lăm kơplah đŏk trong chih roi đơ̆ng buăl inh, kŭm jơ̆ bơngai hiơ̆k tơm khŭl hơmet, inh đei mơmrơ̆ng păng hiơ̆k tơtăm lơ dêh. Đei đơ̆ng đunh bơih, inh rơih trong pơdơh lê̆ dôm trong chih, ưh pă drơ̆ng nơ̆r bơ̆jang kơ tơdrong jang tơdă dah khŭl ayơ dơ̆ng bơih. Tơdrong arih hrăt hrot hăm dôm tơdrong hiơ̆k bơngơ̆t rim năr jơ̆ minh pah yua kơ anoh, mă lei gĭt kăl hloh, inh đei pơm pơjing kơdih minh anih kơnơp trŏ lăp, minh anih hiôk hơđơ̆ng hrĕp hreh. Tơdrong chĕp ‘long chih dơ̆ng, tơlĕch dôm tơdrong tơchĕng kơdih ‘bơ̆t rơbâu bơngai mơ̆ng lei lăi thoi minh tơdrong re tih teh pơchah anih thĕng hreh mă inh adrin bơwei. Mă lei lăm jrŭ jơhngơ̆m, inh mơ̆ng kơtơ̆ng nơ̆r Kră Yang pơtrŭt. Sư wă kơ inh pơm minh tơdrong pơdrơ̆ng hloh kơ kơdih kâu thoi minh sơ̆p hla bơar mă inh hơiă, păng kŭm mưng iŏk sơ̆p hla bơar ‘nâu kơ ‘bai ‘măn jơ krao khan năr ‘nâu, “Trong yak năm lĕch đơ̆ng anih hiôk ‘lơ̆ng”. Kră Yang wă kơ inh yak hlôi kơ anih juăt hiôk ‘lơ̆ng wă bơ̆jang kơ Sư kiơ̆ minh trong ‘nao.

Mă lei ră, đơ̆ng jơ pơdrơ̆ng dĭng truh kơplah bơ̆jang dan ‘long chih jơ̆ minh tơdrong tơblah lăm jơhngơ̆m hrĕp hreh hăm tơdrong pơhiơ̆ păng mơn đei hơlah. Đơ̆ng rŏng kơ ŭnh ‘nă hal blŭng a, đon tơchĕng inh pơtơm chhơ̆ tơlĕch kơdih dôm kơ tơdrong yua kơ “trŏ tơpă” wă weh wer. Đơ̆ng rŏng kơ minh năr gleh lap hăm tơdrong jang, tơdrong pơhiôk kơdih kâu lăm tơdrong pơdơh ling lang đei tơdrong pơhlŭ hloh hơoei ‘bơ̆t anăp kơmăy tinh ưh kơ đei kiơ. Inh hơnơ̆ng pơlung kơdih: “Gô dơning athei chih”, “Giĕng đơ̆ng rŏng na hiơ̆k”. Tơdrong hơlah noh tơpă jơ̆ tơdrong hli tơrơ athei yak hlôi đơ̆ng tơdrong hiôk rơhŏu trŏ kơ đei păng hiơ̆k tơtăm athei pơm ‘lơ̆ng. Lăng ‘bôh tơdrong pơhiơ̆ đơ̆ng kơdih, inh ‘bôh băt drơ̆ng nơ̆r ‘noh lăp jơ̆ đơ̆ng ‘bơ̆r, na kĕ jei tơdrong pơhiơ̆ đơ̆ng kơdih kâu wă bơ̆jang ‘noh jơ̆ tơpă kơplah đon lui đei tơdrong pơlong lăng.

Tơdrong tơblah iĕ noh thar pơm kơ inh tơchĕng jrŭ truh tơ minh trong yak năm tih hloh đei chih hơmet lăm chăl sơ̆ Sơ̆p Hla Bơar Nơ̆r ‘Bok Kei-Dei lăm I Lu Pơtao 10- trong yak năm kơ yă pơtao Sêba. Jơ̆ minh ‘nu bơngai drŏkăn pơtao pơgơ̆r minh dêh char mơdrŏng, teh pŭn hiôk tơ gah Gơal, sư đei đĭ đăng tôm tơmam mă kon bơngai hơpơi wă: anih pơtao, tơdrong pơgơ̆r, mơdrŏng tih păng anih hnam pơtao hiôk hian tơpă. Dêh char Sêba trŏ kơ đei tơmam gĭt kăl, pơgang păng hu maih. Yă pơtao tơpă gơh rơih oei tơ anih hnam pơtao ‘lơ̆ng rŏ sư, sơng iŏk chăl arih rơnŭk rơnua păng tơdrong pơyom đơ̆ng kon pơlei pơla na ưh kơ kăl athei tơchĕng tơdrong kiơ.

Mă lei ră, anih hiôk ‘lơ̆ng noh ưh kơ gơh tơ’bĕnh jơhngơ̆m rơhing tơpăt păng tơdrong gơh hơgei đơ̆ng sư. Kơplah dôm nơ̆r pơma roi kơtơ̆ng gah tơdrong gơh hơgei hloh đơ̆ng Pơtao Sôlômôn, hăm anăn Kră Yang Yêhôwa kơ tơ̆ng ang truh tơ gah Gơal, jơhngơ̆m yă pơtao ‘nâu đei tơdrong pơtrŭt pran kơtang. Yă ưh kơ lăp lăm jơhngơ̆m hăm dôm tơdrong kiơ đei băt bơih, kŭm ưh kơ wă drơ̆ng iŏk chô̆ iĕ sư lăm tơdrong arih hiôk hian dang ei. Sư rơhing gơh kơdih măt ‘bôh đon kơtơ̆ng, đei mơn tơpă păng hŏk iŏk dôm tơdrong kơjung hloh kơ noh dơ̆ng.

Păng thoi noh na, yă pơtao Sêba đei tơlĕch minh tơdrong pơdrơ̆ng đei tơdrong hloh kơ đĭ đăng: yak hlôi đơ̆ng anih hơđơ̆ng kơdih. ‘Noh ưh kơ trŏ jơ̆ mĭnh tơdrong năm chă thông ‘bônh đĕch. Wă yak đơ̆ng Sêba truh tơ Jêrusalem, yă hăm khŭl sư kăl kơ yak hlôi kơ trong kơjung dang 2000 kơsô̆. Yak hlôi kơ char glă tŏ hang, tơ’bơ̆p hăm dôm tơdrong kơnê̆ krưp oei chop răp đơ̆ng chăl kră sơ̆. Tơdah yă kŭm pơhiôk kơ tơdrong hiôk hian, dah yă pơma wă kơ pơhiơ̆ yua kơ tơdrong tŏ kial char glă, chăl sơ̆ ưh kơ đei minh chăl ‘lơ̆ng rŏ gah yă. Yă chĕp ba minh khŭl bơngai rŏ tơpă hăm khŭl aseh lakđa chĕp ‘bĕnh kơ tơmam pơgang, lơ maih păng tơmo gĭt- dôm mŭk tơmam gĭt đơ̆ng dêh char sư- ưh kơ sĭ lăp wă pơm tơmam ăn kơplah tơ’bơ̆p hơdai, mă jơ̆ tơdrong wă pơm pơjing tơpă kơ trong yak năm chơ chă nơ̆r tơl kơ dôm nơ̆r jet anat pat hloh oei đei mong răk lăm jơhngơ̆m.

Kơplah yak truh tơ Jêrusalem păng pơma dơnuh hăm pơtao Sôlômôn, yă pơtao sêba đei hlĭch hlăch. Sơ̆p Hla Bơar Nơ̆r ‘Bok Kei-Dei đei chih khan pơtao đei tơl đĭ đăng dôm nơ̆r jet đơ̆ng yă, ưh kơ đei tơdrong kiơ hlơp mă pơtao ưh kơ gơh tơl. Kơplah ‘bôh tơm măt tơdrong gơh hơgei đơ̆ng ‘bok pơtao, tơdrong ‘lơ̆ng rŏ đơ̆ng hnam pơtao, tơdrong pơjing tơproh đơ̆ng khŭl pơtao păng hăm đĭ dôm tơmam soi pơyơ̆r kơ Kră Yang Yêhôwa, yă pơtao đei hlĭch hlăch tơpă mah truh “jơhnơ̆m hoi”. Yă đei ôr khan dôm tơdrong yă ‘bôh tơm măt kơdih đei hloh kơ dôm nơ̆r pơma roi băt mă yă đơ̆ng đei kơtơ̆ng tơ pơlei kơdih. Trong yak năm hlôi kơ char glă pơmat tat, hlôi kơ đơ̆ng tơdrong pơhlŭ pơgăn đơ̆ng hơbăn ao ‘lơ̆ng gah Gơal noh đei ‘mong ăn hăm minh tơdrong hlôi đei tơ’bơ̆p gah bơhngol păng tơdrong gơh hơgei gĭt hloh. Yă ư-ang kơ Kră Yang Yêhôwa, ‘Bok Kei-Dei kơ pơtao Sôlômôn, păng ‘bôh băt tơdrong ‘mêm mơnat tih hloh đơ̆ng Sư ‘măn ăn kơ kon pơlei.

“Kơkuh bơnê kơ Kră Yang ‘Bok Kei-Dei ih, yua kơ Sư lăp đon kơ ih ăn kơ ih hơ-oei kơpal tang-dŏ pơtao lu bơngai Isơrael! Yua kơ Kră Yang ‘mêm kơ Isơrael ling-lang, thoi noh na Sư ăn kơ ih pơm pơtao wei-lăng wă kơ ih pơm tơdrong trŏ păng ‘lơ̆ng tơpăt.” ( I Lu Pơtao 10:9)

Lăng đêl hơ’mon đơ̆ng pơtao Sêba păng lăng dơ̆ng kơdih kâu lăm dôm kơ khei năr pơhiơ̆ đei hlôi, inh đei jet kơdih kâu: Đei dang yơ bơih inh rơih oei ‘bơ̆t lăm “anih hiôk ‘lơ̆ng” đơ̆ng kơdih kâu na hiơt lê̆ khan Kră Yang ling lang krao lu bơ̆n yak năm wă kơ hlôi mơn đei Sư lơ hloh? Anih hơđơ̆ng kơ lu bơ̆n rŏ lăng jơ̆ đei minh tơdrong jang ưh kơ đei wơ̆ pran, minh tơdrong juăt arih bơhngol oei lei lăi ưh kơ đei ŭnh, dah hmă đĕch jơ̆ tơdrong sơngah kơ dôm jơnăr bơ̆jang yua tơrơ kơ ưh kơ đei kĕ jei, tơrơ kơ gleh lap- lei lăi thoi tơdrong inh đơ̆ng sơngah chih hla ar adrol ki. Tơdrong hơlah bơhngol trŏ lăp đei ôn hlơp gơh dêh ala anăn “tơdrong hiôk hian”, pơm kơ lu bơ̆n ưh kơ pơ̆n wă tơplih, ưh kơ pơ̆n năm tơ anăp păng ưh kơ pơ̆n hloi kơ tơdrong ‘mong ăn. Tơdah yă pơtao Sêba ưh kơ pơ̆n nuih achăng anih pơtao rơnŭk rơnua tơ gah Gơal wă đei tơdrong yak năm tih hloh ‘noh, yă gô ling lang lăp jơ̆ minh ‘nu yă pơtao mơdrŏng tih mă lei bơhngol ưh tim mă đei pơih să yua kơ tơdrong gơh hơgei đơ̆ng plĕnh. Yă kŭm ưh kơ đei layơ đei chih anăn lăm Sơ̆p Hla Bơar Nơ̆r ‘Bok Kei-Dei chăl sơ̆ thoi minh tơdrong tơ’bôh đơ̆ng jơhngơ̆m rơhing chơ chă tơdrong tơpăt, păng phŏ kŭm đei kơdih Yang Yêsu pơ-ư tơ chăl Pah ‘Nao. Yak hlôi đơ̆ng anih hiôk ‘lơ̆ng hơdai hăm tơdrong sơng iŏk tơ’bơ̆p hăm tơdrong ưh kơ băt hơđăl tơpă, drơ̆ng iŏk kĕ jei tơdrong hiơ̆ hyĭn đơ̆ng sĕch akar păng dôm kơ tơdrong gleh lap blŭng a. Mă lei ‘noh tă kơ jơ̆ mĭnh trong ‘noh đĕch ăn kơ lu bơ̆n lăng ‘bôh tơdrong ư-ang păng mơsêh mơyang tih hoh đơ̆ng ‘Bok Kei-Dei bơ̆jang lăm chăl arih bơ̆n.

Tơdrong inh kĕ jei tơdrong hơlah wă dan ‘long chih chih dôm kơ trong blŭng a đơ̆ng ‘bai rong bơhngol, trŏ jơ̆ yak năm blŭng a lăm trong yak năm lĕch hlôi đơ̆ng anih hiôk ‘lơ̆ng đơ̆ng kơdih inh. Rŏ lăng ‘bai chih ‘nâu tơpă ưh tim mă ‘lơ̆ng tôm, rŏ lăng dôm kơ hlĭch hlăch blŭng a pơm kơ inh tơtăm, mă lei inh lui khan tơdah inh pơ̆n nuih hlôi hloh kơ kơdih kâu wă chu yom nơ̆r krao đơ̆ng Kră Yang, sư gô pơih ăn dôm kơ trong lăng ‘bôh ‘nao, dôm kơ ‘bai pơhrăm hŏk đon lui ‘nao plơ̆ng mă tơdah nŏng kơ oei kơtă lăm anih hơđơ̆ng, inh gô ưh kơ layơ gơh truh.

Na ih lei thoi yơ? Lei hăm đei minh “trong yak năm lĕch hlôi đơ̆ng anih hiôk ‘lơ̆ng” ayơ, dah minh tơdrong juăt pơhiơ̆ ayơ mă Kră Yang oei wă kơ ih kĕ jei wă yak năm hơdai Sư lăm năr ‘nâu dah ưh? Athei ‘blŏk khan, pah to char glă hrĕng kro đơ̆ng tơdrong pơlong lăng ling lang jơ̆ dêh char đơ̆ng tơdrong gơh hơgei păng mơnat ăn đĕch rơkah rơkai oei chang gô lu bơ̆n.

Apĭnh đĭ đăng krao khan hơdai: Kơkuh kơ ‘Bă mă ‘mêm, kon băt Kră Yang ưh kơ wă kon ling lang dơ̆ng minh anih lăm dôm kơ anih hơđơ̆ng hrăt hrot đơ̆ng kơdih kâu. Apinh Kră Yang ăn kơ kon tơdrong pơ̆n nuih păng đon lui pran kơtang wă yak hlôi đơ̆ng anih hiôk ‘lơ̆ng đơ̆ng kơdih kâu, gô sơng iŏk hloi dôm kơ jơ năr bơ̆jang păng hlôi mơn đei Ih hăm trong ‘nao plơ̆ng. Thoi yă pơtao Sêba sơ̆ rơhing kơ tơdrong gơh hơgei, apinh chông anhăk jơ̆ng kon yak năm trŏ trong lăm tơdrong wă păng Tơdrong Tơtă đơ̆ng Ih. Kon kŭp kơ̆l krao khan hăm anăn Yang Yêsu Krist, Amen.

Ơ lu bơngai mơ̆ng mă ‘mêm kơ eng, yak hlôi đơ̆ng anih hiôk hian ưh kơ trŏ jơ̆ lu bơ̆n athei pơm dôm tơdrong tih hloh dang ei hloi. Trŏ lăp, trong yak năm ‘noh lăp hmă đĕch jơ̆ tơdrong pơ̆n nuih pơih jơhngơ̆m ră roi tơdrong lui hăm minh ‘nu bơngai jang hơdai, drơ̆ng iŏk nơ̆r bơ̆jang minh tơdrong bơ̆jang iĕ lăm Khŭl Bơngai Lui, dah pơjing dơ̆ng jơ năr ‘măn jơ krao khan đei yua hăm Kră Yang rim pơge. ‘Nĕ kơ ăn tơdrong hli tơrơ gah tơdrong ưh kơ ‘lơ̆ng tôm dah dôm tơdrong pơgăn blŭng a pơm kơ jơ̆ng ih kơdŭn. Yua kơ kơplah lu bơ̆n sơng iŏk yak năm kiơ̆ nơ̆r krao đơ̆ng Sư, ‘Bok Kei-Dei gô jơ̆ Tơ’ngla hơmet ăn bơih păng ăn pơthim jơhngơ̆m pran rim kơ rok trong. Athei pơ̆n nuih achăng anih hơđơ̆ng lăm năr ‘nâu hloi wă kơ hlôi mơn đei minh chăl arih đon lui ‘nao plơ̆ng păng hơdai lăm dôm kơ tơdrong jang tih hloh mă Kră Yang đei hơmet ăn bơih kơ ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.