Hăm đei layơ lu bơ̆n lăng kơdih păng ‘bôh dôm lu tơdrong rơdu tơrăn ưh? Lăm ala teh âu ling lang pôk pơ-ư kơ lu bơngai hơgei, lu bơngai pran kơtang păng ‘bôh gah ‘ngoaih, bơ̆n ‘bônh kơ tơchĕng khan lăp lu bơngai hơgei ‘noh đĕch gơh pơm tih pơm yŏng. Mă-lei, ‘Bok Kei-Dei pơm phara tơpă kơ đon bơ̆n tơchĕng. Dôm tơdrong mă kon bơngai lăng thoi lĕ kơtul, dah tơdrong rơdu tơrăn, na jing đei yua lăm tơpang ti Kră Yang wă kơnhăm kơ tơdrong tih hloh.

Năr ‘nâu, năr 13/8/2026 tơdrong tơdă Amăn Jơ Krao Khan Rim Năr wơ̆n bơngai ‘mơ̆ng pơwao nơ̆r Kră Yang hăm kơ̆l ‘bai PHARA LĂM TƠPANG TI KRĂ YANG.

“Mă-lei mưh kon pơlei Isơrael krao ôr apinh Kră Yang, Kră Yang rơih ăn kơ lu sư minh ‘nu ‘bok dŏng pơklaih, anăn sư Êhut, kon drŏ-nglo Gêra, sư adrĕch Bênjamin. ‘Noh bơngai juăt kơ yua ti gah ‘ngiĕo.” (Lu ‘Bok Sek Tơlang 3:15a)

Đei dôm lu tơdrong lăm chăl arih pơm ăn kơ lu bơ̆n lăng kơdih nhen lĕ rơdu. Đei bơngai lăng kơdih thoi lĕ kơtul yua ưh kơ đei adrĕch pơm yŏng mơng, ưh kơ đei hŏk hơgei, ưh kơ pơma hơgei, ‘bôh gah ‘ngoaih ưh kơ ‘lơ̆ng, dah đei tơdrong phara đơ̆ng kơdih. Bơ̆n ling lang tơchĕng khan tơdah lu bơ̆n hơgei na Kră Yang gô yua bơ̆n. Mă-lei, tơdrong roi gah Êhut lăm sơ̆p hla bơar Lu ‘Bok Sek Tơlang chăl 3 pơdăh ăn kơ lu bơ̆n ‘bôh mĭnh tơdrong lăng phara tơpă.

Sơ̆p hla bơar roi gah Êhut hăm mĭnh tơdrong phara dêh: sư jơ̆ “bơngai juăt kơ yua ti gah ‘ngiĕo”. Lăng thoi noh, ‘nâu jơ̆ mĭnh tơdrong iĕ đĕch, mă-lei Sơ̆p hla bơar ‘Bok Kei-Dei wă tơbăt ăn. Lăm chăl sơ̆, ti gah ‘ma jơ̆ mĭnh tơdrong pơdăh ăn kơ tơdrong pran kơtang păng hơgei kơ tơblah. Mă-lei, bơngai juăt kơ yua ti gah ‘ngiĕo lăng phara dêh, truh tơ lăng ưh kơ đei yua lăm tơdrong tơblah.

Mă-lei Kră Yang ‘Bok Kei-Dei ưh kơ đei pơgăn yua kơ tơdrong phara ‘noh ôh. Mă tơplơ̆ dơ̆ng, Sư yua hloi tơdrong ‘noh wă pơm trŏ kiơ̆ kơ Sư wă.

Đơ̆ng rŏng kơ mơjĭt-tơhngam sơnăm Eglôn pơtao char Môap pơgŏ pơđep kon pơlei Isơrael, Kră Yang rơih iŏk Êhut jing ‘bok dŏng pơklaih ăn kơ kon pơlei. Yua kơ Êhut jơ̆ bơngai juăt kơ yua ti gah ‘ngiĕo, na sư pơm kơdih sư minh hlak đao gưm kơđeh păng tơ̆n đao gưm tơ kơiĕng gah ‘ma, tah tơ lăm ao sư. Pơm thoi ‘nâu tơgŭm sư pơm ăn kơ lu bơngai wei gác ưh kơ ‘bôh, yua kơ lu sư ưh kơ tơchĕng truh đei mĭnh ‘nu bơngai juăt kơ yua ti gah ‘ngiĕo mă chĕp tơmam tơblah tơ gah ‘ma. Yua kơ thoi noh, Êhut toh iŏk đao hăm ti gah ‘ngiĕo kơplah sư kăl. Đang kơ chĕp ba tơmam, lăp mĭnh ‘nu sư wơ̆t brŏk tơ pơtao păng khan sư đei minh nơ̆r hlơp wă roi ăn kơ pơtao.

Lăm kơplah noh, lăm hnam oei pă ‘bar ‘nu măr sư đĕch jơ̆ Êhut hăm pơtao Eglôn. Iŏk tơdrong noh, Êhut yơ̆r ti ‘ngiĕo sư toh iŏk đao păng teh pơlôch pơtao. Đơ̆ng rŏng kơ noh, sư kơdâu klĕnh, sư krao akŭm kon pơlei Isơrael, krao wơ̆t lu sư iung năm blah yua kơ Kră Yang pơjao boih kon pơlei Môap lăm ti lu sư. Kon pơlei jur kiơ̆ Êhut hloi wă blah pơlôch mơjĭt-rơbâu ‘nu bơngai tơblah Môap. Đơ̆ng năr noh, kon pơlei Isơrael đei hơđơ̆ng rơngei hiôk lăm tơhngam-jĭt sơnăm (kiơ̆ kơ sơ̆p Lu ‘Bok Sek Tơlang 3:15-30).
‘Noh kư̆m jơ̆ ‘Bok Kei-Dei ling lang ngăl bơ̆jang. Sư krao Môis mă khan sư pơma hơrăk. Sư rơih iŏk Đawit, mĭnh ‘nu bơngai hơ’lơ̆p wei triu, tơplih kơ dôm lu ‘nhŏng sư bơngai tih kơjung păng pran kơtang hloh. Yang Yêsu kư̆m yua dôm lu bơngai kiơ̆ Sư jơ̆ lu bơngai chă ka wă ba tơdrong ‘nao ‘lơ̆ng Sư truh tơ ala teh âu. ‘Bok Kei-Dei oei yua lu sư mă khan lu sư đei dôm lu tơdrong rơdu dah tơdrong phara noh nai. Tơdrong âu trŏ tơpă thoi Nơ̆r ‘Bok Pôl chih khan: “Mă-lei ‘Bok Kei-Dei rơih iŏk boih lu bơngai ưh kơ hơgei ala teh âu wă pơm kơ lu bơngai hơgei mơlâu; ‘Bok Kei-Dei kư̆m rơih iŏk boih lu bơngai tơrăn ala teh âu wă pơm kơ lu bơngai pran kơtang mơlâu; păng ‘Bok Kei-Dei rơih iŏk boih lu bơngai mă pă jing jat pă-tat tơdrong wă pơthuơ lu bơngai pơm tih pơm yŏng. Thoi noh na ưh kơ đei bu gơh pơang akâu sư ‘bơ̆t anăp ‘Bok Kei-Dei.” (I Kôrintô 1:27-29)

Rŏlăng ahrei âu, ih oei lăng kơdih nhen lĕ rơdu. Ih kơ tơchĕng khan kơdih oei ‘lơ̆p dah lĕ kră hloh, ưh kơ băt lơ, ưh kơ hơgei lơ, dah hlôi pơm ưh kơ đei trŏ lăm chăl sơ̆. Ih lăng lăm dôm lu tơdrong ih tơhiong lê̆ păng tơchĕng khan Kră Yang gô yua bu nai trŏ hloh.
Mă-lei athei ‘blŏk kơ Êhut. Tơdrong phara lăm kon bơngai sư ưh kơ đei pơgăn ‘Bok Kei-Dei bơ̆jang hăm sư. Mă tơplơ̆ dơ̆ng, tơm đơ̆ng tơdrong ‘noh jing mĭnh tơdrong lăm tơdrong ‘Bok Kei-Dei pơkă. ‘Bok Kei-Dei lăng ‘bôh dôm lu tơdrong mă kon bơngai ưh kơ lăng ‘bôh. ‘Bok Kei-Dei yua dôm lu tơdrong mă kon bơngai lăng pă jing jat pă-tat tơdrong. ‘Bok Kei-Dei gơh tơplĭh tơdrong rơdu tơrăn jing anih pơdăh tơ’bôh tơdrong pran kơtang Sư, wă tơgŭm ăn kơ lơ bơngai.

Inh hlôi mơ̆ng bu nai pơma khan: “’Bok Kei-Dei yua lu bơngai hơgei păng kư̆m lu bơngai ưh kơ hơgei. Mă-lei kơplah Sư yua bu noh, Sư kư̆m ăn kơ bơngai ‘noh tơdrong hơgei wă pơm tôm tơdrong Sư jao.” Yua kơ thoi noh, tơdrong kăl hloh jơ̆ ih đei krăng kơchăng wă kơ Sư yua ưh, ưh kơ sĭ yua kơ ih đei tơdrong hơgei. ‘Nĕ kơ lăng dôm lu tơdrong rơdu tơrăn đơ̆ng kơdih ih yua kơ băt kơ kiơ ‘Bok Kei-Dei gô yua dôm lu tơdrong ‘noh wă pơdăh tơ’bôh tơdrong ‘mêm mơnat păng tơdrong pran kơtang Sư.

Apĭnh đĭ đăng krao khan hơdai: Kơkuh kơ Kră Yang, lơ tơdrong kon lăng ‘bôh đei dôm lu tơdrong pơgăn đơ̆ng kơdih kon păng tơchĕng khan kon ưh kơ trŏ wă kơ Ih yua kon. Apinh Ih huay kơ jô̆ yo yua kơ kơplah kon tơchĕng kiơ̆ kơ kon bơngai ala teh âu wă lăng kơdih kon, mă-lei ưh kơ đei lui kơjăp kơ Ih păng krao iŏk đơ̆ng Ih. Kon jao chăl arih kon ăn kơ Ih yua păng pơm ăn kơ anăn Kră Yang gơh ư-ang. Apinh Ih ăn kơ kon băt kơ tơdrong pran kơtang Ih gô pơdăh tơ’bôh trŏ tôm lăm tơdrong rơdu tơrăn kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr 13 khăi 8 rim sơnăm jơ̆ Năr Lăm Teh Đak ‘Măn Ăn Kơ Lu Bơngai Juăt Kơ Yua Ti Gah ‘Ngiĕo. Lăm mơjĭt ‘nu bơngai tơ ala teh âu, đei mĭnh ‘nu jơ̆ bơngai juăt kơ yua ti gah ‘ngiĕo. Lăm ala teh đak âu đei pơm ăn tơmam kơ lu bơngai juăt kơ yua ti gah ‘ma, lu bơngai juăt kơ yua ti gah ‘ngiĕo gô tơ’bơ̆p tơdrong tơnat pat: tơmam rơrĭ kơmăi tĭnh (chuột máy tính), kơ’bang hŏk, dah lăm tơdrong arih bơ̆jang rim năr.

Mă-lei thoi noh, ưh kơ đei mĭnh tơdrong kiơ ‘ngoaih kơ tơdrong proh hơmet pơjing ‘lơ̆ng đơ̆ng ‘Bok Kei-Dei. Dah ahrei âu ih lăng kơdih ưh tam mă đei gơh hơgei wă bơ̆jang kơ Kră Yang, ‘nĕ kơ ăn dôm tơdrong pơgăn đơ̆ng kơdih ih jing tơdrong pơm ăn kơ ih kơdŭn tơrŏng. Athei ba ăn tôm tơdrong pran kơtang păng tơdrong rơdu tơrăn đơ̆ng ih ăn kơ Kră Yang, lui kơjăp kơ Sư păng pơ̆n nuih chu iŏk tơdrong Sư pơjao. Kơplah ‘Bok Kei-Dei krao ih, Sư gô ăn kơ ih tơdrong pran kơtang păng gơh hơgei wă kơ ih pơm keh tôm tơdrong jang Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.