15.08 Amăn Jơ Krao Khan Rim Năr: TƠPANG TI JANG TƠGŬM

Teh đak ‘nâu dang lĕ wă kơ lu bơ̆n tơ’bôh kơdih khan inh “oĕi liĕm akâu hiôk ‘lơ̆ng”. Lu bơ̆n adrin adran wă tơ’bôh khan kơdih pran jăng, mă khan kơplah lăm jơhngơ̆m mơn đĭ pă kĕ hloi bơih ră. Lu bơn krê kơplah wă drơ̆ng khan kơdih lu bơ̆n oei lĕng lŏng, ưh kơ pơ̆n wă chro tơpang ti apĭnh dŏng tơgŭm yua tơ’bôh ăn tơdrong rơdu rơmơ̆n kơdih. Mălei Kră Yang đei tơdrong hơmet tơdă ‘lơ̆ng hloh ăn kơ lu bơ̆n: Sư ưh kơ pơjing kon bơngai wă yak năm adrô̆. Sư ling lang hơmet ăn lu tơpang ti glơng tơgŭm, pơtrŭt lu bơ̆n yak dơ̆ng lăm tơdrong ‘mêm.

Năr ‘nâu, ‘năr 15/08/2026, tơdrong tơdă Amăn Jơ Krao Khan Rim Năr apinh wơ̆n bơngai mơ̆ng wang pơwao hơdai Nơ̆r Kră Yang hăm bơngai chih Jessie Bigelow kơ̆l ‘bai TƠPANG TI JANG TƠGŬM

“ ‘Bar ‘nu hloh kơ minh ‘nu, yua kơ jang hơdai đei yua kơ ‘bar ‘nu.” (‘Bok Bơtho 4:9)

“ ‘Bar ‘nu hloh kơ minh ‘nu, yua kơ jang hơdai đei yua kơ ‘bar ‘nu. Tơdah minh ‘nu pơ̆k minh ‘nu tơiung; mơnat ‘biơ̆ kơ bơngai hơdrô̆ huŏng, ưh kơ đei bu tơiung!” (‘Bok bơtho 4:9-10)

Kơplah hơri trong hơri dơ̆ng, nơ̆r hơri inh prâu tơ nai hloi. Lăm kơplah noh, inh mơn ‘bôh lu ŭnh pơchrang mơnhal, hăm tơ-hrĕng tŏ muh măt oei lăng tơ inh. ‘Bai hơri oei re hơnơ̆ng, mălei mưh inh adrin wă pơih nơ̆r, lăp pă mĭnh nơ̆r re hơdar rơmơ̆n đĕch.

Inh ưh kơ băt wă pơm thoi yơ. Ưh kơ đei kiơ wă mơlâu dah drơ̆ng iŏk tơdrong noh. Tŏk bŏk khŭl hơri ư-ang kơ Kră Yang păng dơ̆ng bơ̆t anăp tơpôl Bơngai Lui Hnam Akŭm, inh mơn rơhông hơdrô̆ hlĭch tơpă. Inh nhen thoi pơklơ̆p lăm tơdrong mơlâu. Tơdrong tơ-tơ̆ tơ-tăm jum dăr kơ inh, plĭnh dang lĕ đei hơyuh poh-yă truh, kơ lơ̆p lê̆ inh. Rim jơ phŭt hlôi hloh, đak nhen rai kơjung, dui ba inh huŏng tơ jrŭ dĭng mah ưh pă đei hơyuh wă gơh dui jơhngơ̆m.

Lăm tơdrong pă đei hơmĕng kiơ noh, inh adrin chơ-chă lăm kơ̆l ‘ngok inh tơmam wă dŏng pơđông, dah đei tơmam kiơ mă gơh pơm kơ inh dơ̆ng kơjăp lăm ‘bai hơri. Brŏ reh oei re hơnơ̆ng, dôm lu nơ̆r jet oei lăm kơ̆l inh hrĕnh dêh mă pơm kơ inh pă đei gơh gơnang kơ tơdrong hơmĕng ayơ. Inh kăl kơ mĭnh tơdrong dŏng tơgŭm.

Lăm kơplah noh, inh lăng tơ gah ‘ma.

Minh ‘nu mai oh lăm khŭl hơri lăng tơklă măt inh. Ưh kơ đei pơma mĭnh nơ̆r kiơ, sư iŏk mikrô păng tơplih kơ inh hơri pơkeh ‘bai hơri noh. Tơdrong akŭm jơ noh ‘bĕnh blai kơ tơdrong ‘mêm, trŏ kơ kơnhăm mă Hnam Akŭm ling lang hơpơi. Păng tơpă, noh kư̆m jơ̆ tơdrong mă inh kăl hloh kơplah noh.

Rŏlăng yua kơ hơ-lŏng inh lap, tơdrong glăi đơ̆ng tơmam re tơdah mă iŏk dui jơhngơ̆m ưh kơ lăp. Anăn dôm lu tơdrong yua kơ ‘nâu yua kơ to kơjung ưh kơ tôch. Mălei dôm kơ tơdrong đơ̆ng kơmăi dah nơ̆r jet “Yua kơ kiơ” noh dang ei ưh pă yua kiơ dơ̆ng bơih. Mĭnh nơ̆r tơblang trŏ ‘blep tơdah mă dôm lu tơdrong tơchĕng ưh kơ đei tơgŭm kiơ kơ inh.

‘Bok Kei-Dei wă kơ inh pơhrăm iŏk tơdrong ‘nĕ kơ gơnang kơ kơdih akâu jăn inh.
Nơ̆r Kră Yang lăm ‘Bok Bơtho 4:9-10 chih: “‘Bar ‘nu hloh kơ minh ‘nu, yua kơ jang hơdai đei yua kơ ‘bar ‘nu. Tơdah minh ‘nu pơ̆k minh ‘nu tơiung; mơnat ‘biơ̆ kơ bơngai hơdrô̆ huŏng, ưh kơ đei bu tơiung!”

Loi kơ 10 sơnăm bơ̆jang kơ Kră Yang hăm tơdrong jang wei lăng jơ, inh ưh tam mă đei layơ tơ’bơ̆p tơdrong thoi noh. Inh bơnê kơ Kră Yang yua kơ mai oh noh dang ei jing mĭnh ‘nu bơngai buăl juăt hăm inh. Inh pơyom tơdrong mă sư tơgŭm inh. Ưh kơ kăl kơ jet, kư̆m ưh kơ kăl kơ tơchĕng đunh. Sư bôh inh oei hơwơ̆l dơ̆ng păng chro hloi ti sư. Đơ̆ng sư noh, Kră Yang tơ’bôh tơdrong ‘lơ̆ng rŏ Sư, yua tơpang ti mai noh tơgŭm inh hlôi đơ̆ng trong tôch.

Tơpă, tơdrong arih ưh kơ layơ kư̆m đei hloi bơngai wă tơgŭm, thoi lĕ inh đei tơdrong tơgŭm tơ kơplah anih hơri. Mălei, Kră Yang wă kơ lu bơ̆n pơhrăm iŏk tơdrong lui gơnang kơ Sư hăm đĭ jơhngơ̆m-Tơ’ngla ling lang hơtă ăn kơ lu tơpang ti dŏng tơgŭm kiơ̆ thoi tơdrong hlĭch chrơp, đơ̆ng lu bơngai mă lu bơ̆n ưh kơ ngeh. Mă khan dang ei ih oei đei tơdrong trăp trĭn mă ưh kơ đei anăn, tơdrong trăp trĭn gah jên tơmam, tơdrong mơn rơhông hơdrô̆ dah mă dôm lu tơdrong trăp trĭn kiơ noh, kư̆ kơ lui ngeh, ih ưh kơ layơ mĭnh drô̆ ôh. Yua kơ Kră Yang oei hnhoi kiơ̆ ih păng bơwei ih, Sư gô yua lu ‘nhŏng oh jum dăr ih wă tuh thim tơdrong pran jăng ăn kơ ih lăm lu năr ‘mi kial hơbŭt.

Apĭnh đĭ đăng krao khan hơdai: Kơkuh kơ Kră Yang, mă Tơ’Ngla ‘mêm mơnat păng hlôh tôm tơdrong tơchĕng jrŭ hlơp kon. Bơnê kơ Ih yua kơ mă khan lăm dôm ‘măng kon sơ’ngon păng rơdu, Ih oei ling lang hơdai kon, ưh kơ layơ achăng lê̆ kon. Kơkuh kơ Kră Yang, apinh Ih pơih ăn măt gah bơhngol kon wă kơ kon gơh ‘bôh bang dôm tơdrong ‘mêm mă ih dan jum dăr kơ kon. Hơpơi kơ tơdrong arih kon kư̆m jing mĭnh anih pơtơm blŭng a, gô lăp đon tưk tơgŭm lu ‘nhŏng oh mă oei pơ̆k huŏng lăm thŭng thong âu. Hơpơi kơ tơdrong ‘mêm Ih tuh ‘bĕnh blai lăm khŭl bơngai lui, wă kơ rim năr, lu nhôn băt gơnang dihbăl păng rai kơjăp lăm Ih. Kon kŭp kơ̆l krao khan hăm anăn Yang Yêsu Krist, A – men.

Ơ lu bơngai mơ̆ng mă ‘mêm kơ eng, lăm tôm tơdrong, Kră Yang krao iŏk lu bơ̆n arih lăm tơdrong pơgơ̆p hăm khŭl bơngai lui. Yua kơ thoi noh, kơplah đei mĭnh ‘nu pơ̆k huŏng, ling lang gô đei tơpang ti ‘nhŏng oh chro sơng iŏk. Yua kơ, tơdrong ‘lơ̆ng tơdrong ‘mêm mơnat đei tơ’bôh kơplah rim ‘nu băt kơ pŭ iŏk tơdrong trăp kơ kơplah pơmat tat. Na truh tơ ih dơ̆ng kơjăp bơih, athei ‘blŏk kơ chro bĕ ti ih dŏng tơgŭm bơngai nai mă kăl kơ tơiung thoi ih năr ‘nâu.