Lu bơ̆n ‘măn chăl arih, lu bơ̆n oei hŏk pơhrăm pơma dơnuh hăm lu bơngai lăm teh đak ‘nâu: pơma thoi yơ wă kơ đei gơh hơgei, rơih nơ̆r thoi yơ ăn kơ bơngai mơ̆ng lăp đon. Mă kơplah lu bơ̆n năm tơ Kră Yang ‘Bok Kei-Dei pơjing plĕnh păng teh, lu bơ̆n đei tơdrong hli krê lăm jơhngơ̆m: “Nơ̆r krao khan inh hăm đei rơgoh tôm dah ưh? Kră Yang hăm lăp đon kơ nơ̆r inh krao khan dah ưh?” Yua kơ lu bơ̆n pơma trŏ tôm, na tơdrong ‘lơ̆ng mă lu bơ̆n đei pơma hăm ‘Bă jing thoi minh tơdrong pơhlŭ mă pơm kơ jơhngơ̆m gleh lap. Thoi noh, lu bơ̆n ưh kơ băt kơ lu bơ̆n tơhiong lê̆ minh tơdrong mơnat tih mă Kră Yang ăn kơ kon Sư – tơdrong ăn đĕch tôm tơdrong đơ̆ng Kră Yang, mă ưh kơ đei ôn tơdrong kiơ, păng thĕng hreh chang gô nơ̆r ‘Bă tơl tơwih.

Năr ‘nâu, năr 30/08/2026 tơdrong tơdă Amăn Jơ Krao Khan Rim Năr wơ̆n bơngai ‘mơ̆ng pơwao nơ̆r Kră Yang hăm bơngai chih Jessica Teed kơ̆l ‘bai THĔNG HRĔH NA NĂM TƠ KRĂ YANG

“Tơpă Kră Yang ‘Bok Kei-Dei mơ̆ng boih; Sư pơgling boih đon mơ̆ng nơ̆r inh krao khan.” (Hơriso 66:19)

Lăp kơtơ̆ng nơ̆r “krao khan”, ih tơchĕng kơ tơdrong kiơ blŭng-a truh tơ jơhngơ̆m ih? Hăm trŏ kơ rup minh ‘nu bơngai rôp ti, tep măt na kŭp kơ̆l krao khan? Dah ih tơchĕng truh kơ lu bơngai mă krao khan tơproh ‘lơ̆ng hăm nơ̆r lăm Sơ̆p hla bơar ‘Bok Kei-Dei đei rơih iŏk lăm nơ̆r krao khan dah lu nơ̆r pơma pơsĭt lăm đon lui? Rŏlăng ih kư̆m tơchĕng khan lu bơngai bơtho Nơ̆r Kră Yang, lu bơngai chông hơri akŭm kơkuh, dah lu bơngai wei-lăng dôm khŭl bơ̆jang lăm Hnam Akŭm đĕch jơ̆ lu bơngai mă sĭt tơpă băt krao khan hăm Kră Yang.

Mă-lei krao khan ưh kơ sĭ kŭp kơ̆l, tep măt, dah pơma dôm nơ̆r pơma hơ iă păng pơma gah đon lui đĕch ôh. Noh jơ̆ minh tơdrong mơnat mă ‘Bok Kei-Dei ăn kơ đĭ-đăng kon Sư. Mă ih bơngai thoi yơ, oei tơ yơ, dah pŭ iŏk tơdrong jang kiơ lăm Hnam Akŭm, ih kư̆m arih lăm tơdrong krao khan pơgơ̆p hăm Kră Yang.

Lăm dôm năr blŭng-a inh pơhrăm krao khan, inh hli dêh kơ krao khan ‘bơ̆t anăp lu bơngai nai. Inh ling-lang ngeh kơ nơ̆r krao khan inh ưh kơ lăp, ưh kơ trŏ, păng ưh kơ đei pran kơtang thoi nơ̆r krao khan lu sư. Yua kơ inh wă pơhrăm krao khan ‘lơ̆ng trŏ hloh, inh năm akŭm hơdai hăm minh khŭl kơ tuei mă ling-lang akŭm wă kơ đei krao khan rai gơh hloh. Na lăm kơplah akŭm blŭng-a noh, đei minh nơ̆r pơma mă truh tơ dang ei inh ưh pă đei hiơt.

Bơngai chông khŭl lăng jơ̆p kơ lu sư na khan: “Lu bơngai nai tơchĕng kiơ kơ nơ̆r krao khan ih, tơdrong noh ưh kơ kăl. Nơ̆r krao khan noh ưh kơ wă kơ lu sư mơ̆ng, mă wă kơ ih pơma hăm ‘Bok Kei-Dei. Sư đĕch jơ̆ Tơ’ngla ih pơma dơnuh hăm Sư, Tơ’ngla ling-lang mơ̆ng nơ̆r ih pơma.”

Dôm lu nơ̆r noh nhen thoi iŏk lê̆ tơdrong trăp trĭn lăm jơhngơ̆m inh. Adrol kơ noh, inh ling-lang tơchĕng lơ khan lu bơngai nai gô tơchĕng thoi yơ kơ nơ̆r krao khan inh. Mă klaih kơ noh, inh adrin wă băt kơ tơdrong kăl hloh ưh kơ lu bơngai nai mơ̆ng jô̆ nơ̆r krao khan inh thoi yơ, mă jơ̆ inh năm ‘bơ̆t anăp ‘Bok Kei-Dei păng pơma hăm Sư dah ưh.

Tơpă, krao khan jơ̆ tơdrong kon bơngai pơgơ̆p hăm ‘Bok Kei-Dei. Na lăm tôm tơdrong pơgơ̆p jơ̆ minh tơdrong kăl dêh. Kră Yang ưh kơ kăl kơ lu bơ̆n pơma dôm lu nơ̆r mơ̆ng hơ iă, dah krao khan hrĕnh tĕnh ôh. Sư wă kơ lu bơ̆n tơpăt pŭ iŏk tơdrong trăp trĭn, dôm lu tơdrong hiơ̆k bơngơ̆t pơjao kơ Sư, hăm jơhngơ̆m lui gơnang kơ tơdrong Sư pơgơ̆r păng tơdrong ‘lơ̆ng tơpăt Sư.

Mă-lei, noh ưh tam mă tôm lăm tơdrong krao khan ôh.

Mă lăm I Pêtrôs 5:7 bơtho lu bơ̆n pơjao dôm lu tơdrong tơchĕng kơ Sư, yua kơ Sư wei-lăng lu bơ̆n, krao khan ưh kơ roi dôm lu tơdrong lu bơ̆n kăl yua năm tơ anăp Sư đĕch. Krao khan jơ̆ lu bơ̆n pơgơ̆p hăm ‘Bok Kei-Dei, jơ̆ tơdrong pơma dơnuh đơ̆ng ‘bar pah hăm A-ba, ‘Bă bơ̆n. Lăm tơdrong pơgơ̆p, tơdah minh ‘nu bơngai ling-lang pơma ngăl đĕch, pơma ưh kơ pơdơh, mă ưh kơ wă mơ̆ng bơngai nai pơma, tơdrong pơgơ̆p noh ưh kơ đei rai tơjê̆ băl ôh.

Mơ̆ng jơ̆ minh tơdrong kăl dêh lăm tơdrong lu bơ̆n pơgơ̆p hăm ‘Bok Kei-Dei. Đei kơplah lu bơ̆n krao khan, Kră Yang kư̆m wă kơ lu bơ̆n jang hơdai hăm Sư lăm tơdrong Sư oei pơm, wă tơl lu tơdrong bơ̆n oei krao apinh. Kră Yang ưh kơ wă lu bơ̆n năm tơ Sư wă roi dôm lu tơdrong kăl yua đĕch ôh. Sư kư̆m wă kơ lu bơ̆n hrĕp hreh, mơ̆ng nơ̆r pơma khan đơ̆ng Sư, păng ư-ang kơ Sư kơplah lu bơ̆n oei chang gô Sư tơl tơwih.

Hơriso 46:10 chih thoi âu: “Hreh bĕ athei băt Inh boih Kră Yang ‘Bok Kei-Dei. Inh đe gô pôk pơư tơ jơ̆p dêh char, kư̆m pôk pơư kơ Inh tơ kơpal teh.”

Lăm dôm jơ phŭt hrĕp hreh, lăp lu bơ̆n năm tơ ‘Bok Kei-Dei na pơjao dôm tơdrong trăp kơ Sư, jơhngơ̆m lu bơ̆n kư̆m pơih wă băt rơđah hloh kơ tơdrong ‘mêm mơnat păng tơdrong Sư ling-lang tơpăt. Lăp lu bơ̆n pơjao jơhngơ̆m kơ Sư, roi kơ Sư dôm tơdrong lu bơ̆n wă, dôm tơdrong lu bơ̆n gơnang hơmĕng păng dôm tơdrong pơm kơ jơhngơ̆m lu bơ̆n ơh sơ’ngon, lu bơ̆n tơ’bôh kơ Sư băt: lu bơ̆n lui gơnang kơ Sư wei-lăng lu bơ̆n hăm tơdrong ‘mêm. Tơdrong pơjao păng lui gơnang thoi noh pơm kơ ‘Bok Kei-Dei lăp đon. Na lăm dôm jơ phŭt noh, Yang Bơhngol ‘Lơ̆ng gô bơ̆jang lăm jơhngơ̆m lu bơ̆n, ăn kơ lu bơ̆n hiôk-hian, na tơ’blŏk kơ lu bơ̆n băt kơ Kră Yang ling-lang tơpăt hăm dôm nơ̆r Sư đei pơkă.

Tơdrong krao khan đei pran kơtang tih tơpă. ‘Nĕ hiơt lê̆ lu bơ̆n đei minh tơdrong mơnat gĭt kăl: gơh pơgơ̆p hăm ‘Bă tơ kơpal plĕnh ti, gơh pơ haih jơhngơ̆m kơ Sư, păng hŏk iŏk hrĕp hreh wă mơ̆ng nơ̆r Sư pơma.

“Tơpă Kră Yang ‘Bok Kei-Dei mơ̆ng boih. Sư pơgling boih đon mơ̆ng nơ̆r inh krao khan. Kơkuh bơnê kơ Kră Yang ‘Bok Kei-Dei, yua kơ sư ưh kơ đei sơngah kơ nơ̆r inh krao khan. Kŭm ưh kơ đei lê̆ iŏk tơdrong Sư ‘mêm kơ inh.” (Hơriso 66:19-20)

Apĭnh đĭ đăng krao khan hơdai: Kơkuh kơ ‘Bă tơ kơpal plĕnh ti mă ‘mêm! Kon bơnê kơ Ih, yua kơ Ih ăn kơ kon minh tơdrong mơnat gĭt kăl: gơh pơma păng pơgơ̆p hăm Ih. Ih băt rơđah tôm lu tơdrong oei lăm jơhngơ̆m kon, dôm tơdrong kon rơdu tơrăn, păng dôm tơdrong ơh sơ’ngon mă kon mong răk lăm jơhngơ̆m. Apinh Ih huay kơ jô̆ yo kơ kon, yua kơ đei kơplah kon ling-lang hli kơ lu bơngai nai lăng jô̆ kon thoi yơ, na kon hiơt lê̆ kơ Ih oei chang gô nơ̆r kon krao apinh Ih. Dang ei, apinh Yang Bơhngol ‘Lơ̆ng chông ba kon năm lăm tơdrong hrĕp hreh, ăn kơ kon đei jơhngơ̆m lui gơnang kơ Ih, wă kơ kon pơjao dôm lu tơdrong tơchĕng kơ Ih. Apinh Ih tơgŭm kon hrĕp hreh, mơ̆ng rơđah nơ̆r pơma khan đơ̆ng Ih. Apinh Ih ăn kơ kon jing ‘nao lăm tơdrong pơgơ̆p hăm ‘Bă, đơ̆ng lăm năr ‘nâu. Kon kŭp kơ̆l krao khan hăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, năr ‘nâu ih gô pơm kiơ wă hơmet tơdrong arih krao khan ih kơjăp hloh? ‘Nĕ gô truh tơ năr dơning. Dang ei hloi, athei ‘măn jơ năm tơ anih hrĕp hreh hăm Yang Yêsu, roi păng pơjao kơ Sư tôm tơdrong oei lăm jơhngơ̆m ih, na hrĕp hreh mơ̆ng nơ̆r Sư pơma. Apinh Kră Yang tơgŭm ih, ăn tơdrong krao khan jing thoi tơdrong arih rim năr, nhen thoi dui jơhngơ̆m, na pơm kơ ih rai jê̆ hăm Kră Yang rim năr hloh. ‘Bă tơ kơpal plĕnh ti oei chang gô ih!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.