Đei layơ ih đei ngeh lăm jơhngơ̆m khan: “Inh ưh pă gah anih âu dơ̆ng bơih” dah ưh? Mă khan ih oei arih hơdai hăm lu bơngai ih đei băt, mă lăm jơhngơ̆m ih băt kơ ih ưh pă jơ̆ bơngai đơ̆ng anih noh dơ̆ng bơih. Tơdrong arih bơngai lui kơ Yang Yêsu Krist kư̆m thoi noh mơ̆n. Kơplah lu bơ̆n lui sơng iŏk Yang Yêsu Krist, ‘Bok Kei-Dei ăn kơ lu bơ̆n jing kon Sư, jing bơngai khŭl lăm ‘Bok Krist. Lu bơ̆n oei arih lăm ala teh âu, mă lu bơ̆n ưh pă gah khŭl ala teh âu bơih. Yua kơ lu bơ̆n khŭl gah ‘Bok Krist, na dôm tơdrong lu bơ̆n jô̆ gĭt kăl, dôm tơdrong lu bơ̆n rơih pơm adrol, păng tơdrong arih lu bơ̆n kư̆m phara kơ ala teh âu. Na đei dôm lu tơdrong phara noh, pơm kơ lu bơngai nai ưh kơ băt rơđah kơ lu bơ̆n, dah kư̆m pơm kơnê̆ kơ lu bơ̆n.

Năr ‘nâu, năr 31/08/2026 tơdrong tơdă Amăn Jơ Krao Khan Rim Năr wơ̆n bơngai ‘mơ̆ng pơwao nơ̆r Kră Yang hăm bơngai chih Aaron Littlekơ̆l ‘bai ƯH KƠ GAH KHŬL BƠNGAI ALA TEH ÂU.

“Dah iĕm khŭl bơngai ala teh âu, lei tơduă iĕm ala teh âu ‘mêm mơnat dih băl. Mă-lei Inh rơih iŏk iĕm đơ̆ng khŭl ala teh âu na lu sư lăng iĕm thoi lĕ ưh kơ dih bôl. Kơlih kơ thoi noh na lu sư hil areh kơ lu iĕm.” (Yôhan 15:19)

Lu bơngai Mi ‘mêm wă dêh kơ tơdrong pơchơt. Tơdrong pơchơt tơ char noh jing minh tơdrong chă jên tih tơpă. Hăm lơ lu bơngai, tơdrong pơchơt jing minh pah lăm tơdrong arih păng lăm jơhngơ̆m lu sư. Lăp lu bơngai mă ‘mêm wă kơ ‘bar khŭl pơchơt pơgơ̆p băl, tơdrong oei hơdai đei tơplih lơliơ. Đei dôm nơ̆r pơma pơhơi mă lăng thoi ưh kơ đei kiơ, mă gơh pơm kơ jơhngơ̆m bơngai nai ơh sơ’ngon. Đei dôm lu bơngai adrol noh pơgơ̆p băl rai jê̆ hloh, mă jing gleh lap yua kơ lu sư dơ̆ng ‘bar pah khŭl phara.

Lăm jơnăr pơchơt ‘bŏng lŏng wong NFL noh ki, inh hăm dôm lu ‘nhŏng oh lăm Hnam Akŭm akŭm hơdai pơma dơnuh kơ dôm lu tơdrong pơchơt. Lu nhôn lăng tơdrong noh thoi kơ hiôk chơt păng rai tơjê̆ dih băl hloh. Mă-lei, kơplah ‘bar khŭl pơchơt pơjei dih băl, nơ̆r pơma lăm khŭl rai rơ̆n re hloh. Lu bơngai mă ling-lang kiơ̆ ‘bar khŭl noh pơjah pơjăng dih băl, na kư̆m đei pơm kơ lu nhôn gleh lap. Tơdrong pơm kơ inh tơchĕng ưh kơ yua kơ khŭl ayơ mă lu bơ̆n kuă, ưh kơ rơhău wă pơma dơnuh. Tơdrong pơm kơ inh tơchĕng ưh kơ sĭ wă kơ jei bu, mă kon bơngai ‘bônh kơ tơklah dih băl yua kơ tơdrong ưh kơ gĭt kăl, thoi kơ tơdrong pơchơt.

Tơdah minh tơdrong lu bơ̆n ‘mêm wă đĕch mă pơm kơ kon bơngai tơklah dih băl, lei ưh kơ hlĭch bơngai đei đon chĕng phara kơ Yang Yêsu. Ưh kơ đĭ-đăng sơng iŏk Sư ngăl. Đei bơngai lui kơ Sư, mă kư̆m đei bơngai hil areh păng tơplơ̆ kơ Sư. Yang Yêsu đei bơtho kơ lu bơngai pơhrăm păng Sư thoi âu:

“Dah bơngai ala teh âu hil areh kơ iĕm, iĕm kư̆m băt mơ̆n lu sư hil ‘noh, lu sư hil areh kơ Inh mă hơdrol. Dah iĕm khŭl bơngai ala teh âu, lei tơduă iĕm ala teh âu ‘mêm mơnat dih băl. Mă-lei Inh rơih iŏk iĕm đơ̆ng khŭl ala teh âu na lu sư lăng iĕm thoi lĕ ưh kơ dih bôl. Kơlih kơ thoi noh na lu sư hil areh kơ lu iĕm.” (Yôhan 15:18-19)

Nơ̆r “ala teh âu” mă Yang Yêsu đei pơma jơ̆ tơproh gĭt kăl, tơdrong tơchĕng păng tơdrong arih mă tơplơ̆ kơ ‘Bok Kei-Dei. Kơplah Yang Yêsu khan: “Inh rơih iŏk iĕm đơ̆ng khŭl ala teh âu”, tơdrong noh khan kơ lu bơngai lui đei Sư rơih iŏk đơ̆ng tơdrong arih noh. Lu sư arih lăm ala teh âu, mă ưh pă pơm kiơ̆ dôm tơdrong ala teh âu jô̆ gĭt kăl dơ̆ng bơih. Lu sư arih kiơ̆ dôm tơdrong Kră Yang jô̆ gĭt kăl. Yua kơ tơdrong phara noh, bơngai lui đei tơ’bơ̆p bơngai nai ưh kơ băt rơđah, dah tơplơ̆ kơ lu sư. Tơdrong tơplơ̆ noh lu bơ̆n huay kơ lăng hlĭch ôh, tơdah lu bơ̆n sĭt tơpă khŭl gah ‘Bok Krist păng arih kiơ̆ kơ Sư.

Dôm lu buăl inh đei pơjah pơjăng kơplah yua dôm lu khŭl pơchơt ‘bŏng lŏng, mă klaih kơ noh, noh kư̆m jơ̆ tơdrong pơchơt đĕch. Mă dôm lu tơdrong kiơ̆ Yang Yêsu phara tơpă. Kơplah lu bơ̆n lui kơjăp kơ ‘Bok Krist, lu bơ̆n jing bơngai đei tơdrong pơgơ̆p ‘nao hăm ‘Bok Kei-Dei. Yua kơ lu bơ̆n ưh pă khŭl ala teh âu dơ̆ng bơih, na lu bơ̆n huay kơ hlĭch ôh dah đei bơngai tơplơ̆ kơ dôm tơdrong lu bơ̆n jô̆ gĭt kăl, dôm tơdrong lu bơ̆n lui păng tơdrong arih lu bơ̆n.

Tơdrong noh ưh kơ sĭ khan bơngai lui athei chă tơdrong pơjah pơjăng, tơdrong tơblah, dah pơm kơ bơngai nai gleh lap ôh. Tơplơ̆ kơ noh, Sơ̆p hla bơar Nơ̆r ‘Bok Kei-Dei bơtho lu bơ̆n ‘mêm mơnat dih băl, oei hiôk hăm đĭ-đăng, păng tơl kơ tơdrong kơnê̆ hăm tơdrong ‘lơ̆ng. Mă-lei, ‘mêm mơnat ưh kơ sĭ khan lu bơ̆n athei tơl kiơ̆ tơdrong mă ala teh âu wă, păng tơdrong oei hiôk kư̆m ưh kơ sĭ khan lu bơ̆n athei achăng lê̆ tơdrong tơpăt đơ̆ng ‘Bok Kei-Dei wă kơ lu bơngai ala teh âu lăp đon.

Dang ei, tơdrong bơngai nai ưh kơ băt rơđah, dah tơplơ̆ kơ lu bơ̆n yua kơ đon lui, ưh kơ tơdrong mă sơleng ôh. Tơdrong noh dei truh lăm hnam, tơ anih jang, tơ anih pơhrăm, dah lăm bôl buăl. Lăm kơplah noh, Nơ̆r Yang Yêsu tơ’blŏk kơ lu bơ̆n băt: tơdrong noh ưh kơ oei ‘ngoaih kơ tơdrong Sư băt ôh. Lu bơ̆n đei jơhngơ̆m hiôk yua kơ băt kơ lu bơ̆n ưh pă khŭl gah ala teh âu dơ̆ng bơih, mă khŭl Tơ’ngla mă ‘mêm păng rơih iŏk lu bơ̆n.

Yua kơ lu bơ̆n jơ̆ bơngai đei Sư rơih iŏk, lu bơ̆n athei arih tơdrong arih đei ‘mêm mơnat păng ‘lơ̆ng rơgoh lăm ala teh mă đei tơdrong yoch âu, thoi Sơ̆p hla bơar ‘Bok Kei-Dei khan:

“Thoi noh de anăn kon ‘Bok Kei-Dei, adrin pơm ‘lơ̆ng ling-lang, na huay kơ đei tơdrong yoch, mă khan iĕm oei tŏk-bŏk lu bơngai kơnê̆, lu bơngai hơlĕnh pơdăr, lu bơngai dang lĕ kơ oei lăm măng mu na lu sư gơh pơm dôm tơdrong ‘noh. Gah iĕm hlôh wao tôm tơdrong boih, thoi lĕ kơ hơdah ŭnh, na iĕm athei pơchrang ăn tơdrong hơdah iĕm kơ lu sư kơplah oei tơ teh âu.” (Philip 2:15)

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih, yua kơ Ih rơih iŏk kon đơ̆ng khŭl ala teh âu, ăn kơ kon lăm khŭl gah Ih, lăm ala teh mă kơnê̆ păng hơlĕnh pơdăr âu. Apinh Ih tơgŭm kon huay kơ kiơ̆ dôm lu tơdrong ala teh âu jô̆ gĭt kăl, mă ăn kơ kon chơ̆n jơhngơ̆m nuih pran arih ăn kơ Ih păng tơdrong tơpăt Ih. Kơplah tơ’bơ̆p bơngai nai ưh kơ băt rơđah, dah tơplơ̆ kơ kon yua kơ kon lui kơ Ih, apinh kon ling-lang ngoi lăng tơ Yang Yêsu Krist, jơ̆ Tơ’ngal pŭ iŏk tơdrong gleh pơmat-tat hơdrol, na Ih pơm trong wă kơ kon rok kiơ̆ Ih, păng arih ‘lơ̆ng tơpăt yak kiơ̆ Ih. Kon kŭp kơ̆l krao khan hăm anăn Yang Yêsu Krist. A-men.

Ơ lu bơngai mơ̆ng mă ‘mêm kơ eng, ih hăm oei mong răk đon lui ih yua kơ hli kơ lu bơngai nai bâu roi pơjăm, ‘nhĕng dah hil areh kơ ih? Ih hăm kơchăng chu yom, tơpăt hăm Kră Yang, yua kơ tơdrong noh lu bơngai nai ưh kơ lăp đon kơ ih dah ưh? Athei ‘blŏk kơ tơdrong gĭt kăl bơ̆n ưh kơ oei lăm lu bơngai ala teh âu pơdrơ̆ng bơ̆n, mă oei lăm tơdrong bơ̆n lăm khŭl ‘Bok Krist. Kơplah ih tơ’bơ̆p bơngai nai pơm kơnê̆, dah bâu roi pơjăm kơ ih yua kơ đon lui, athei ‘blŏk kơ nơ̆r Yang Yêsu khan: “Dah bơngai ala teh âu hil areh kơ iĕm, iĕm kư̆m băt mơ̆n lu sư hil ‘noh, lu sư hil areh kơ Inh mă hơdrol.” Tơ’ngla mă krao iŏk ih gô oei hơdai hăm ih, ăn kơ ih pran kơtang, păng wei-lăng ih khŏm khŏm.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.