Hrei ‘nâu, tơdrong ră roi Tơdrong ‘Nao ‘Lơ̆ng pơm kơ lơ bơngai lui đei jơhngơ̆m hli. Lu bơ̆n oei arih lăm jơ năr mă tơdrong pơma tơ lăm măng facebook, dôm lu tơdrong pơma pơjah pơjăng, pơma phara dih băl hăm lơ tơdrong tơchĕng. Đei lơ bơngai sơng iŏk tơdrong kiơ lu sư đei ‘bôh hăm măt, dah đei hlôh hăm đon tơchĕng kơdih. Yua kơ thoi noh, kơplah lu bơ̆n pơma gah Yang Yêsu, lu bơ̆n ưh kơ tơ’bơ̆p dôm nơ̆r jet mă ngĭl ngŭl đĕch ôh, mă kư̆m đei tơ’bơ̆p lu bơngai ưh kơ gơnang, tơplơ̆, dah bâu roi pơjăm bơ̆n. Mă-lei, tam mă đei lơ tơdrong tơplơ̆ thoi noh, Kră Yang krao lu bơ̆n chu yom, tơpăt lăm tơdrong ră roi Tơdrong ‘Nao ‘Lơ̆ng, yua kơ Sư đei pran kơtang gơh tơplĭh truh tơ jơhngơ̆m lu bơngai mă ưh kơ wă sơng iŏk Sư.

Năr ‘nâu, năr 01/09/2026, tơdrong tơdă Amăn Jơ Krao Khan Rim Năr wơ̆n lu bơngai mơ̆ng pơwao Nơ̆r Kră Yang hăm bơngai chih Jessica Teed hăm kơ̆l ‘bai MINH JƠHNGƠ̆M LĂM TƠDRONG JANG.

“Kră Yang ‘Bok Kei-Dei kư̆m tơgŭm lu bơngai Juđa pơm ăn kơ lu sư lăp đon ‘maih wă pơm kiơ̆ nơ̆r pơtao păng yŏng pơgơ̆r đei tơtă, kiơ̆ thoi nơ̆r Kră Yang.” (II Hơ’mon 30:12)

“…Lu sư tơtă pơkă wă chă roi tơbăt jơ̆p-jang kơ char Isơrael, iŏk đơ̆ng pơlei Bêrsêba truh tơ pơlei Đan, wă kơ kon pơlei năm pơm giĕng Năm Brih ‘blŏk hơdơ̆r Kră Yang ‘Bok Kei-Dei Isơrael tơ pơlei Jêrusalem; yua kơ lu sư ưh tam mă biơh năm pơm giĕng năm brih wă kơ ‘blŏk hơdơ̆r kiơ̆ kơ tơdrong juăt đei pơkă sơ̆. Thoi noh lu bơngai năm tơbăt tơ jơ̆p kơ dêh char Isơrael păng char Juđa …Lu bơngai mă năm ba hla bơar năm tơ jơ̆p-jang đơ̆ng pơlei âu truh tơ pơlei nai lăm teh đak Êphraim, Manase păng truh tơ teh đak Sabulôn, đei bơngai hiĕk ăr chebơle kơ lu sư. Mă-lei đei lu mơ’nah đơ̆ng lăm teh đak Aser, Manase, hăm teh đak Sabulôn chu tơjur akâu păng năm truh tơ pơlei Jêrusalem. Kră Yang ‘Bok Kei-Dei kư̆m tơgŭm lu bơngai Juđa pơm ăn kơ lu sư lăp đon ‘maih wă pơm kiơ̆ nơ̆r pơtao păng yŏng pơgơ̆r đei tơtă, kiơ̆ thoi nơ̆r Kră Yang.” (II Hơ’mon 30:5-6,10-12)

Tơ lơ anih, tơdrong akŭm kơkuh kơ Kră Yang juăt pơtơm trŏ kơ jơ kiơ̆ kơ tơdrong lu sư đei hơmet tơdă. Mă-lei, inh đei tơ’bơ̆p minh tơdrong phara tơpă kơplah inh năm bơ̆jang kơ Kră Yang tơ pơlei tih Trujillo, Peru. Jơ akŭm đei truh boih, lu bơngai ‘net ‘net mơ̆t tơ lăm Hnam Akŭm, mă tơdrong akŭm ưh tam mă pơtơm. Adrol kơ inh băt rơđah kơ tơdrong kiơ oei truh, bơngai bơtho Nơ̆r Kră Yang mă wei-lăng Hnam Akŭm krao akŭm khŭl ră roi Tơdrong ‘Nao ‘Lơ̆ng lu nhôn ‘bơ̆t ‘ngoaih Hnam Akŭm. Sư ‘bôh bơngai lui năm akŭm ưh pă tôm. Thoi noh, đĭ-đăng lu nhôn năm hơdai tơ rim hnam lăm pơlei, krao wơ̆n lu bơngai năm akŭm kơkuh kơ Kră Yang. Ih đei tơchĕng tơdrong thoi noh truh tơ anih ih oei dah ưh? Tơdrong noh tơ’blŏk kơ inh ‘blŏk truh tơ dôm lu tơdrong pơtao Hesekia đei pơm lăm II Hơ’mon chăl 29 truh tơ chăl 31.

Pơtao Hesekia đei jơhngơ̆m kơjăp wă pơm tơdrong trŏ ‘bơ̆t anăp Kră Yang. Sư ‘maih wă hơmet ming Hnam Kră Yang, mă dôm lu pơtao adrol sơ̆ đei pơrăm păng pơm kơ anih noh ưh kơ rơgoh. Sư wă kơ kon pơlei Isơrael đei wih brŏk tơ Kră Yang păng pơm năr giĕng. Yua kơ thoi noh, pơtao wơh lu bơngai ba hla bơar năm jơ̆p char Isơrael păng Juđa, krao wơ̆n kon pơlei brŏk tơ Kră Yang păng minh jơhngơ̆m hăm pơtao pơm năr giĕng.

“Lu bơngai mă năm ba hla bơar năm tơ jơ̆p-jang đơ̆ng pơlei âu truh tơ pơlei nai lăm teh đak Êphraim, Manase păng truh tơ teh đak Sabulôn, đei bơngai hiĕk ăr chebơle kơ lu sư. Mă-lei đei lu mơ’nah đơ̆ng lăm teh đak Aser, Manase, hăm teh đak Sabulôn chu tơjur akâu păng năm truh tơ pơlei Jêrusalem.” (II Hơ’mon 30:10-11)

Kơplah lu bơ̆n lăng lăm rup teh đak lăm jơnăr noh, lu bơ̆n gô sơleng kơ trong lu bơngai ba hla bơar đei yak năm. Đơ̆ng pơlei tih Jêrusalem gah gơal, lu sư yak năm hlôi dôm anih bri brah tơ gah yă nơ̆m. Đơ̆ng Jêrusalem truh tơ Êphraim dang 40 km; truh tơ Manase 90 km; na truh hơdral Sabulon dah Ase, pah kơpal Galilê, trong lu sư yak năm dang kơ 200 km. Lu sư ưh kơ đei sĕh, ưh kơ đei ôtô, trong kư̆m ưh kơ dơhnă ‘lơ̆ng. Lu sư đei ‘bar pah jơ̆ng đĕch, păng đei jơhngơ̆m rơhing tơpă kơ tơdrong jang Kră Yang đei pơjao.

Mă-lei, tơdrong pơlong lăng lăm trong lơ rơbâu kilômet noh ưh kơ yua kơ akâu jăn rơdu tơrăn dah yua kơ trong bri brah ataih anat anot đĕch ôh. Tơdrong pơmat hloh jơ̆ lu bơngai sơngah kơ nơ̆r tơdrong bơ̆jang. Athei tơchĕng lăng, lu sư đei yak năm lơ măng năr, akâu jăn rơdu, hlôi kơ bri brah, wă ba nơ̆r pơtao truh tơ kon pơlei. Mă kơplah truh boih, lu sư sơng iŏk minh tơdrong, bơngai lăng lu sư ưh kơ gĭt, pơhơi, bâu roi pơjăm păng pơma kơnê̆ kơ lu sư. Bơngai bơ̆jang kơ Kră Yang ‘bônh kơ đei jơhngơ̆m rơdu, kơplah lu bơngai ala teh âu sơngah kơ Tơdrong ‘Nao ‘Lơ̆ng.

Mă sơleng tơpă, lu bơngai ba hla bơar noh ưh kơ mơ̆ng dôm lu nơ̆r pơma kơnê̆ pơm kơ jơ̆ng lu sư kơdŭn tơrŏng. Lu sư ‘maih wă ‘bôh bơngai nai brŏk tơ Kră Yang hloh kơ tơchĕng kơ akâu kơdih. Mă đei lơ bơngai sơngah kơ lu sư, đei dôm ‘nu đĕch sơng iŏk, lu sư chu yom yak năm. Yua kơ lu sư băt, tơ̆ng đei dôm ‘nu bơngai đơ̆ng Ase dah Manase iŏk đon ala na brŏk tơ Jêrusalem, lei dôm đak bơ-uh păng đak măt lăm trong yak năm đunh noh lu sư lăp đon bơih.

Noh jơ̆ minh tơdrong pơdah ‘lơ̆ng tơpăt đơ̆ng ‘Bok Kei-Dei! Sư yua lu bơngai thoi noh, lu bơngai mă ala teh ưh kơ jô̆ tih, na Sư ăn kơ lu sư pran kơtang wă năm krao wơ̆n kon pơlei kơdih. Sư ăn kơ lu sư chu yom păng nuih kơtang, ăn kơ dôm lu tơdrong tơplơ̆ ưh kơ gơh pơm tơdrong jang rơgoh mă Sư đei krao iŏk wă kơ tơdrong jang pơkeh ‘lơ̆ng. Lei ih păng inh hăm kơchăng yak năm thoi lu bơngai ba hla bơar lăm jơnăr noh dah ưh?

Kră Yang ‘Bok Kei-Dei kư̆m tơgŭm lu bơngai Juđa pơm ăn kơ lu sư lăp đon ‘maih wă pơm kiơ̆ nơ̆r pơtao păng yŏng pơgơ̆r đei tơtă, kiơ̆ thoi nơ̆r Kră Yang. Lăp đĭ-đăng lu sư akŭm hơdai tôm boih, lu sư iung iŏk hŭt lê̆ dôm chơnang soi mă pơyơ̆r kơ dôm yang nai lăm pơlei Jêrusalem. (II Hơ’mon 30:12-14).

Inh lui sĭt tơpă kơ hrei ‘nâu, ‘Bok Kei-Dei kư̆m đei pơgơ̆p lu bơ̆n lăm tơdrong đei ‘bôh hơdai thoi lĕ lăm jơhnơr pơtao Hesekia. Kră Yang lu bơ̆n jơ̆ Tơ’ngla ‘mêm mơnat păng ‘lơ̆ng tơpăt. Ưh kơ đei tơdrong kiơ gĭt kăl hloh kơ Sư. Sư ưh kơ wă minh ‘nu bơngai bu lôch răm; Sư wă kơ kon bơngai brŏk tơ Sư. Sư wă kơ đĭ-đăng gô sơtơ̆p kŭl-tăng kơkuh kơ Sư, păng đĭ-đăng bơngai gô băt kơ Yang Yêsu Krist jơ̆ Kră Yang, na ư-ang kơ ‘Bă Sư ‘Bok Kei-Dei. (II Pêtrôs 3:9)

Hiôk păng ư-ang tơpă tơ̆ng lu bơ̆n ‘bôh kon pơlei Kră Yang hrei ‘nâu minh jơhngơ̆m yak năm tơ jơ̆p lu trong pơlei, roi tơbăt tơdrong ‘mêm mơnat, na krao wơ̆n lu bơngai mơ̆t lăm tơdrong pơgơ̆p hăm Pơtao tih hloh kơ đĭ-đăng lu pơtao!

Apĭnh đĭ đăng krao khan hơdai: Kơkuh kơ ‘Bă mă ‘mêm, kon ‘maih wă tơpă wă kơdâu pơjei lăm đon lui âu, hăm jơhngơ̆m iŏk đon ala păng chu yom, tơpăt hăm Ih. Apinh Ih tơgŭm kon ling-lang lăng tơ Yang Yêsu, chu yom yak năm tơ anăp, huay kơ rơdu yua kơ dôm tơdrong pơlong lăng dah lu bơngai tơplơ̆ kơ kon. Hơpơi kơ tơdrong ‘mêm mơnat Ih đei pơdah lĕch đơ̆ng rim nơ̆r kon pơma păng rim tơdrong kon pơm. Apinh Ih ăn kơ lu bơngai oei jê̆ kon ‘bôh Ih đơ̆ng tơdrong arih kon, wă kơ lu sư kư̆m chă Ih păng năm jê̆ tơ anăp Ih hloh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, inh ưh kơ băt ih thoi yơ, mă jơhngơ̆m inh ‘maih tơpă wă ‘bôh kon pơlei bơ̆n băt kơ Yang Yêsu mă arih ling-lang. Inh ‘maih wă ‘bôh dôm tơdrong arih kon bơngai đei tơplĭh, dôm lu jơhngơ̆m pơchah pơchek đei Kră Yang jing klaih ‘lơ̆ng. Ơ buăl mă ‘mêm, dang ei lu bơ̆n đei tơdrong jang hơdai lăm akâu jăn Kră Yang. Lu bơ̆n đei pơchrang thoi hơdah ŭnh lăm anih măng mu, ba tơdrong gơnang hơmĕng truh kơ dôm lu tơdrong arih mă jơhngơ̆m oei rơdu kơdŭn tơrŏng. Ih hăm inh minh jơhngơ̆m pơm kiơ̆ tơdrong jang ‘nâu dah ưh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.