Đei tơdrong truh lăm chăl arih, lu bơ̆n adrin đĭ jơhngơ̆m wă bơwei tơdrong lu bơ̆n ‘mêm păng gĭt kăl. Kơplah tơ’bơ̆p tơdrong jĭ jăn, hiong răm, dah tơdrong kơnê̆ truh kơ lu bơ̆n, jên mŭk tơmam păng dôm tơdrong lu bơ̆n juăt kơ lui gơnang ưh kơ đei tơgŭm bơ̆n dơ̆ng bơih. Lăm kơplah thoi noh, tơdrong kiơ đei wei jơhngơ̆m lu bơ̆n wă huay kơ răm? Tơdrong kiơ tơgŭm bơ̆n đei gơnang hơmĕng, kơplah tơnang ‘măng tơ anăp tang lê̆ bơih?

Năr ‘nâu, năr 02/09/2026, tơdrong tơdă Amăn Jơ Krao Khan Rim Năr krao wơ̆n lu bơngai mơ̆ng pơwao Nơ̆r Kră Yang hăm kơ̆l ‘bai ‘NĔ KƠ HLI, KƯ̆ KƠ LUI ĐĔCH!

“Yêsu kơtơ̆ng đe pơtruh kơ ‘bok Jairut thoi noh, Sư pơhơi. Na Sư khan kơ ‘bok Jairut bơngai mă wei-lăng hnam akŭm ‘Bok Kei-Dei ei khan: “Ih ‘nĕ kơ hli, ih kư̆ kơ lui đĕch.” (Markôs 5:36)

“Kơplah Yêsu oei pơma, blư ‘bôh ‘bar pêng ‘nu bơngai đơ̆ng hnam ‘bok Jairut năm giong khan kơ sư: ‘Kon adruh ih lôch boih, ih oei pơhrat kiơ kơ ‘Bok Thây?’ Yêsu kơtơ̆ng đe pơtruh kơ ‘bok Jairut thoi noh, Sư pơhơi. Na Sư khan kơ ‘bok Jairut bơngai mă wei-lăng hnam akŭm ‘Bok Kei-Dei ei khan: ‘Ih ‘nĕ kơ hli, ih kư̆ kơ lui đĕch.” (Markôs 5:35-36)

Yua kơ inh jơ̆ ‘bok pơgang hơmet gah plei nuih, tơdrong jang inh rim năr mơ̆ng plei nuih pơpơ̆. Kơplah inh mơ̆ng “bĭp” đơ̆ng máy monitor dah kơplah tôm tơdrong hreh boih păng lăng ‘bôh trong kơdâu tơpăt tơ man hinh, inh băt rơđah hloh kơ tơdrong arih păng tơdrong lôch oei tơjê̆ băl tơpă. Inh băt kơ tôm tơdrong pơgang ming hơmet đơ̆ng tơdrong pơgang tơmam jang tơgŭm đĕch. Mă tơdrong arih păng jơ năr arih kon bơngai, noh jơ̆ lăm tơpang ti Tơ’ngla Pơjing bơ̆n, kiơ̆ tơdrong ‘lơ̆ng Sư wă păng tơdrong Sư pơgơ̆r. Kơplah inh ‘bôh kon bơngai đei tơdrong tơchĕng tơ Sơ̆p hla bơar ‘Bok Kei-Dei đei chi roi đon lui kơ minh ‘nu ‘bă anăn Jairut, păng tơdrong mơsêh mơyang đơ̆ng Yang Yêsu pơm kơ kon adruh sư.

Lăm tơdrong pơgang, mă loi gah ‘bok pơgang gah plei nuih, lăp kon bơngai lôch, lu ‘bok pơgang bôh rơđah: plei nuih pă đei pơpơ̆, na lăm kơmăi điê̆n tâm đô ‘bôh trong kơdâu tơpăt. Kơplah bơngai jĭ pă đei tơdrŏ bơih, lu khŭl bơ̆jang pơgang kăl kơ pơm tôm tơdrong jang wă kơ đei dui jơhngơ̆m: kơtĭt plei nuih, tôt kơmăi điê̆n, ‘bet pơgang, hơmĕng wă kơ gơh dui jơhngơ̆m. Lơ wơ̆t, đĭ-đăng lu ‘bok pơgang păng lu bơngai jang hiôk dêh, kơplah plei nuih pơpơ̆ thoi đêl. Mă kư̆m đei đơ̆ng rŏng kơ pơm thoi noh, kơmăi tơ’bôh trong dui jơhngơ̆m oei topăt đĕch, bôh hơđăl kơ tơdrong lôch gô truh. Noh jơ̆ tơdrong lu nhôn hlôh gah tơdrong pơgang. Bok pơgang jang adrin hơmet gah tơdrong jĭ sĕch akar, mă lei dui jơhngơ̆m hăm bơhngol gah Tơ’ngla pơjing kon bơngai. Tơdrong arih ưh kơ sĭ kon bơngai gơh tơgar iŏk, mă noh jơ̆ tơmam mơsêh mơyang lăm tơpang ti Kră Yang.
Lăm Markôs chăl 5, lu bơ̆n ‘bôh ‘bok Jairut, minh ‘nu bơngai wei-lăng hnam akŭm đe Juđê, jơ̆ bơngai đei anăn păng đei tơdrong pơgơ̆r. Mă kơplah kon adruh sư, mơjĭt-‘bar sơnăm, jĭ pơmat mah truh tơ lôch, tôm tơdrong sư đei, tôm nơ̆r sư băt, tôm tơdrong anăn tih lu bơngai jô̆ kơ sư ưh kơ đei gơh tơgŭm sư kiơ dơ̆ng. Sư jơ̆ minh ‘nu ‘bă ‘mêm kơ kon. Sư iŏk đon ala, năm tơ Yang Yêsu na sơtơ̆p kŭl tăng ‘bơ̆t anăp Sư, apinh lung khan: “Kon adruh inh wă jê̆ lôch. Apinh Ih năm chro ti pel akâu sư wă kơ sư klaih, huay kơ lôch.” Nơ̆r krao apinh noh tơ’bôh tơdrong kon bơngai rơdu tơrăn kơplah ‘bôh kơdih ưh kơ gơh pơm kiơ dơ̆ng, na jơhngơ̆m sư gơnang hơmĕng kơ Yang Yêsu. Mă kơplah Yang Yêsu oei yak năm tơ hnam sư, đei bơngai đơ̆ng hnam năm roi kơ sư pơm kơ jơhngơ̆m sư hiong răm: “Kon adruh ih lôch boih, ih oei pơhrat kiơ kơ ‘Bok Thây?” Hăm bơngai ala teh, lăp bơngai kơ tĕch jơhngơ̆m bơih noh jơ̆ lôch bơih, tơdrong noh nhen thoi tôm tơdrong gơnang hơmĕng kư̆m pă đei bơih. Ưh pă kăl chă ‘Bok Thây dơ̆ng bơih păng ưh pă đei tơdrong kiơ gơh pơm dơ̆ng.

Hloh kơ kon bơngai tơchĕng băt, Yang Yêsu đei pơm khan nơ̆r hiôk hian kơ Jairut: “Ih ‘nĕ kơ hli, ih kư̆ kơ lui đĕch.” Kơplah Sư truh tơ hnam nơ̆r nhơ̆m hmoi tơjrông tơjrang, Sư khan: “Iĕm mah nhơ̆m hmoi ơh kơ kiơ mah tơjrông tơjrang? Bơngai âu ưh kơ lôch ôh, sư tep đĕch.” Lu bơngai oei ‘bơ̆t ei, nơ̆r noh nhen ưh kơ đei trŏ. Lu sư ‘bôh akâu jăn mă lôch bơih, na lu sư hiĕk kơ Sư. Mă Yang Yêsu ưh kơ mơ̆ng dôm nơ̆r tơjrông tơjrang noh. Sư athei lu bơngai noh lĕch tơ ‘ngoaih, na dui ba mĕ ‘bă adruh păng pêng ‘nu bơngai pơhrăm păng Sư mơ̆t lăm anih hrĕp noh. Sư rôp ti kon adruh, na khan: “Talitha kumi,” wă khan: “Ơ mŏ adruh iĕ, Inh râu e, iung bĕ.” Na adruh ei iung yak năm hloi, mă đei lơ bơngai ‘bôh.

Kơplah inh tơchĕng gah tơdrong mơsêh mơyang âu hăm tơdrong inh jang pơgang, inh băt kơ đon lui ưh kơ đei ba lu bơ̆n năm tơ lăm tơdrong tơblah tơnat pat gah tơdrong lôch mă ba lu bơ̆n iŏk đon ala tôm tơdrong ‘bơ̆t anăp Kră Yang kiơ̆ kơ thoi Sư wă. Mă lei kon bơngai đei nơ̆r jet: Tơdah năr noh Yang Yêsu ưh kơ pơm mơsêh mơyang, na kon adruh Jairut lôch tơpă lei thoi yơ? Lăm tơdrong jang ‘bok pơgang, inh hlôi ‘bôh lơ hnam dơnŏ bơngai lui krao khan tơpă, apinh Kră Yang pơklaih bơngai mă ‘mêm, mă-lei bơngai noh oei lôch đĕch. Lei nơ̆r krao khan hăm đon lui gơh pơrih bơngai đơ̆ng lôch dah ưh? Sơ̆p hla bơar Nơ̆r ‘Bok Kei-Dei tơ’bôh kơ tơdrong arih păng tơdrong lôch lăm Kră Yang pơgơ̆r, tơdrong mă kon bơngai lu bơ̆n ưh kơ băt tôm.

Tơpă, kon adruh Jairut, kon drŏnglo tơ Pơlei Nain, păng Lasarơ, mă Yang Yêsu đei tơ iung arih, đơ̆ng rŏng kơ lơ sơnăm arih tơ teh âu, lu sư kư̆m lôch minh ‘măng. Yua kơ thoi noh, tơdrong Yang Yêsu ăn kơ kon adruh mơjĭt-‘bar sơnăm noh iung arih noh ưh kơ arih ling lang lăm teh đak hloi bơih ôh. Noh jơ̆ tơ’bôh pơdah ư-ang kơ Sư păng pơm kơ đon lui mĕ ‘bă adruh noh kơjăp hloh. Kơplah lu bơ̆n krao khan apinh Kră Yang pơklaih bơngai jĭ, mă Kră Yang oei hreh, lu bơ̆n athei băt kơ tơdrong lôch minh ‘nu bơngai gah Sư ưh kơ sĭ đon lui răm ôh. Noh jơ̆ kơplah, tơdrong Kră Yang ăn kơ sư bơ̆jang tơ teh âu đei trŏ tôm boih, na Sư pơih ăn tơdrong pơklaih tih hloh: sơng iŏk lu sư tơ pơlei ‘lơ̆ng arih ling lang, anih ưh pă đei tơdrong jĭ, pă đei đak măt dah tơdrong tơklah băl dơ̆ng bơih.

Hăm lu bơngai oei arih, tơdrong ơh sơ’ngon kơplah tơklah đơ̆ng bơngai mă ‘mêm jơ̆ tơdrong tơpă, nơ̆r Yang Yêsu pơma khan: “Ih ‘nĕ kơ hli, ih kư̆ kơ lui đĕch” jơ̆ minh tơdrong chô̆ kơjăp wă kơ jơhngơ̆m lu bơ̆n băt kơ gơnang. Tơdrong lui âu ưh kơ dan Kră Yang pơm mơsêh mơyang kiơ̆ thoi jơhngơ̆m lu bơ̆n wă. Mă jơ̆ jơhngơ̆m hiôk pơjao tôm tơdrong lăm tơpang ti Kră Yang, lui kơ tơdrong Sư pơgơ̆r.

Tơdrong âu tơgŭm inh lăng tơdrong jang pơgang trŏ hloh: bơ̆jang đĭ jơhngơ̆m, wei-lăng bơngai jĭ hăm jơhngơ̆m tơpăt, iŏk đon ala pơjao kơ Kră Yang wei-lăng rim tơdrong arih. Tơdrong lôch akâu jăn nhen thoi tep đĕch, na minh năr tơ anăp, kơplah đei nơ̆r pơma khan đơ̆ng Tơ’ngla Iung Arih, đĭ-đăng lu bơ̆n gô iung arih hăm akâu jăn ‘lơ̆ng rŏ na đei arih ling-lang hơdai hăm Sư.

Apĭnh đĭ đăng krao khan hơdai: Kơkuh kơ ‘Bă tơ kơpal plĕnh ti, Tơ’ngla bơwei tơdrong arih păng tơdrong lôch. Kon bơnê kơ Ih yua kơ mơsêh mơyang Ih tih hloh kơ tơdrong pơgang kon bơngai. Apinh Ih huay kơ jô̆ yo kơ kon yua kơ đei jơhngơ̆m kon pơjah pơjăng, ưh kơ gơnang kơ Ih, kơplah kon ‘bôh bơngai jĭ dah bơngai mă wă lôch, dah nơ̆r kon krao khan ưh kơ đei tơl kiơ̆ thoi jơhngơ̆m kon wă. Apinh Ih ăn kơ kon đon lui kơjăp thoi ‘bok Jairut, kơplah lăm tơdrong ưh kơ thoi kon wă kon oei mơ̆ng nơ̆r Ih khan: “Ih ‘nĕ kơ hli, ih kư̆ kơ lui đĕch.” Apinh Ih ăn kơ kon iŏk đon ala kiơ̆ tôm tơdrong Ih wă, păng arih hăm tơdrong gơnang hơmĕng kơjăp kơ tơdrong arih ling-lang mă Ih ăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong arih păng tơdrong lôch oei tơjê̆ băl tơ’blŏk kơ lu bơ̆n băt kơ chăl arih kon bơngai tơ teh âu kơđeh đĕch. Năr ‘nâu, tơplih kơ ih oei hli kơ tơdrong lôch, dah jơhngơ̆m ơh sơ’ngon yua kơ Kră Yang ưh kơ tơl nơ̆r krao khan kiơ̆ thoi ih wă, athei pơjao bơngai ih ‘mêm păng tơdrong arih ih kơdih lăm tơpang ti Kră Yang. Athei arih lăm rim năr kiơ̆ kơ Sư ăn. Băt kơ gĭt kăl rim nơ̆r Sư tơtă kơ ih, păng ‘mêm mơnat kơ lu bơngai oei tăp dăr kơ ih. Na kơplah ih tơ’bơ̆p kial hơbŭt lăm chăl arih dah tơdrong hiong răm, hơpơi kơ nơ̆r “Ih ‘nĕ kơ hli, ih kư̆ kơ lui đĕch” đơ̆ng Yang Yêsu jing nơ̆r tưk tơiung jơhngơ̆m ih, ba đon lui kơ ih lăng tơ tơdrong arih ling-lang hơdai hăm Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.