Đei pơtŏ pơting lăm tơdrong “băt kơ Kră Yang” păng “lui gơnang kơ Kră Yang”. Lu bơ̆n đei răk lăm jơhngơ̆m khan Kră Yang jơ̆ Tơ’ngla ‘Lơ̆ng Tơpăt, mălei jơhngơ̆m lu bơ̆n oei ngĭl ngŭl thoi lĕ kơ teh ala jơ̆ng bơ̆n wă pơchah pơchek. Hăm tơplơ̆ ưh, kơplah mă lu bơ̆n pơma tơ’bôh khan lu bơ̆n oei kơkuh kơ Tơ’ngla pơjing tôm tĕch tơmam tơ kơpal plĕnh, ala the âu, mălei oei ưh kơpơ̆n yak năm kơplah đei tơdrong truh tơ teh đak ‘nâu. Kră Yang oei ling lang hơdai păng pơgơ̆r, noh na lu bơ̆n hăm lui gơnang wă yak năm kiơ̆ Sư mă ưh kơ đei tơdrong hli krê kiơ dah ưh?

Năr ‘nâu, ‘năr 03/09/2026, tơdrong tơdă Amăn Jơ Krao Khan Rim Năr apinh wơ̆n đĭ đăng bơngai mơ̆ng pơwao Nơ̆r Kră Yang hơdai hăm bơngai chih Linda Vulcano kơ̆l ‘bai ARIH HIÔK HĂM ĐON LUI GƠNANG

“’Nĕ hli yua kơ Inh oei hơdai iĕm, ‘nĕ tơrơ dêh, yua kơ Inh bơih Kră Yang ‘Bok Kei-Dei iĕm! Inh gô ăn kơ iĕm pran; tơpă inh tơgŭm iĕm, Inh gô wei-lăng iĕm hăm ti gah ‘ma ‘Lơ̆ng Tơpăt Inh.” ( Êsai 41:10)

“Inh iŏk iĕm đơ̆ng tôch kơ teh đak, krao iŏk iĕm đơ̆ng puăn pah mum teh; Inh khan kơ iĕm : Iĕm bơih đam Inh, Inh rơih iŏk iĕm bơih, ưh kơ đei layơ achăng lê̆ ih, ‘Nĕ hli yua kơ Inh oei hơdai iĕm, ‘nĕ tơrơ dêh, yua kơ Inh bơih Kră Yang ‘Bok Kei-Dei iĕm! Inh gô ăn kơ iĕm pran; tơpă Inh tơgŭm iĕm, Inh gô wei lăng iĕm hăm ti gah ‘ma ‘Lơ̆ng tơpăt Inh.” (Êsai 41: 9-10)

Đei hlôi 30 sơnăm bơih đơ̆ng năr mă inh đei mơ̆ng tơdrong roi hơ’mon lăm ‘bai bơtho ‘bok bơtho noh. Mălei truh kơ năr ‘nâu inh oei ‘blŏk rơđah đĕch.

Tơdrong hơ’mon roi gah mĭnh ‘nu bơngai drŏnglo năm tơ gah yă nâm lăm bơyan yă rak tơngiĕt tơngiot. Kơplah hơoei kơpal gre taxi đơ̆ng cham gre păr brŏk tơ anih ‘bĭch, sư ‘bôh mĭnh ‘nu bơngai oei chă wah ka tŏk bŏk glung đak đĭ krăl jing prĕl.

Bơngai tơmoi ei jet wă kơ băt: “Hơ oei kơpal noh hăm kơjăp hơđơ̆ng ưh?”

Bơngai wơ̆r gre hiĕk păng khan: “Hơđơ̆ng mơ̆n, gô inh tơ’bôh kơ ih.”

Bơngai tơmoi ei yak hăm krê lĕch tơ kơpal hơnă prĕl, đơ̆ng noh hăt hot kơ wơ̆t alơ̆k tơ kơpal bơnơ̆.

Truh bơ̆t doh bơih, ‘bok bơtho jet đĭ đăng lu nhôn “Kiơ̆ kơ lu bơ̆n, bơngai ayơ mă hơđơ̆ng hloh? Bơngai mă năm mĭnh ‘bar yak kơpal hơnă prĕl na wơ̆t alơ̆k tơdah mă bơngai oei hơ oei pơhơi tŏk bŏk glung đak, jơhngơ̆m rơwơn sơng iŏk mĭnh năr chă wah ka?”

Apinh ‘măn mĭnh phŭt tơchĕng bĕ. Kiơ̆ kơ ih, bơngai ayơ mă hơđơ̆ng hloh?

Inh ưh kơ đei layơ hiơt nơ̆r tơl đơ̆ng ‘bok bơtho ei: “Đĭ ‘bar ‘nu bơngai noh hơđơ̆ng ngăl. Bre sư hơđơ̆ng yua kơ hơnă prĕl jơ̆ oei hơnă prĕl. Mălei tơdrong phara noh jơ̆ tơdrong hiôk hian lăm chăl arih bre sư”

Nơ̆r tơl noh ‘bơm jơhngơ̆m inh tơpă.

Hơnă prĕl jơ̆ oei hơnă prĕl. Sư oei ling lang kơjăp bơwei kơjăp kơ bre sư, mă khan bre sư mơn lăm jơhngơ̆m thoi yơ hĭ.

Mĭnh ‘nu lui ngeh khan hơnă prĕl noh kơjăp ăn kơ sư hơ oei kơpal noh, thoi noh na sư hơ oei rơwơn chă wah tŏk bŏk glung đak. Bơngai pă minh ‘nu noh ưh kơ đei tơdrong lui ngeh. Thoi noh, rim yak jơ̆ng sư oei hli krê, păng tuch luch sư hăt hot wơ̆t alơ̆k tơ kông.

Ơ buăl mă ‘mêm kơeng, lu bơ̆n oei bơ̆jang kơ ‘Bok Kei-Dei ưh kơ layơ hiong răm. Lu bơ̆n lui ngeh hăm đĭ jơhngơ̆m kơ Sư. Sư jơ̆ Tơ’ngla ‘Lơ̆ng tơpăt, năr brei, năr ‘nâu păng ling lang đĭ kơ chăl arih.

Mălei tơdrong jet ăn kơ rim ‘nu lu bơ̆n noh jơ̆: Lu bơ̆n hăm lui ngeh kơ tơdrong noh ưh?

Nơ̆r tơl lu bơ̆n gô pơm ăn kơ bơ̆n băt wă arih thoi yơ rim năr. Lu bơ̆n wă kron kơdih lăm tơdrong hli tơrơ, tơdah mă wă yak năm hơđơ̆ng yua băt kơ Kră Yang ling lang chĕp răk nơ̆r pơkă?

Lăm trong yak năm hăm đon lui, lơ ‘măng lu bơ̆n kư̆m thoi bơngai tơmoi lăm tơdrong hơ’mon noh. Kră Yang jơ̆ hơnă kơjăp, jơ̆ Tơ’ngla wei lăng bơhngol păng pơgơ̆r tôm tơdrong lăm chăl arih lu bơ̆n.

Mălei, tơplih kơ tơdrong pơdơh lăm tơdrong wei lăng Sư, lu bơ̆n oei ‘măn lơ jơ năr wă tơchĕng păng ưh kơ lui kơ tơdrong tuh ăn đơ̆ng Kră Yang. Lu bơ̆n băt kơ Sư jơ̆ Tơ’ngla ‘Lơ̆ng Rŏ, mălei oei krê ưh kơ pơ̆n wă yak năm ataih hloh lăm tơdrong chu yom, ưh kơ pơ̆n nuih wă pơyơ̆r đĭ chăl arih lu bơ̆n kơ Sư.

‘Bok Kei-Dei đei khan: “Nĕ hli yua kơ Inh oei hơdai iĕm, ‘nĕ tơrơ dêh, yua kơ Inh bơih Kră Yang ‘Bok Kei-Dei iĕm! Inh gô ăn kơ iĕm pran; tơpă Inh tơgŭm iĕm, Inh gô wei lăng iĕm hăm ti gah ‘ma ‘Lơ̆ng tơpăt Inh.” (Êsai 41:10)

Lu bơ̆n ưh kơ layơ yak năm adrô̆ ôh. Lu bơ̆n kư̆m ưh kơ layơ wă ataih đơ̆ng tơdrong ‘mêm mơnat đơ̆ng Kră Yang. Sư ling lang oei hơdai bơ̆n, păng bơ̆n kư̆m oei hiŏng pơgring lăm tơpang ti ‘mêm mơnat Sư.

Kră Yang oei ling lang chĕp răk nơ̆r pơkă, mă khan đon lui lu bơn pran dah rơdu. Mălei kơplah lu bơ̆n pơsĭt Sư noh jơ̆ Tơ’ngla ‘Lơ̆ng Tơpăt, tơdrong lu bơ̆n gô tơ’bơ̆p lăm chăl arih gô đei tơplih. Tơplih kơ tơdrong tơchĕng hiơ̆k bơngơ̆t, lu bơ̆n go đei arih hăm tơdrong chơ̆n hơđơ̆ng păng nuih pran, yua kơ lu bơ̆n băt lu bơ̆n oei đei tưk tơ iung đơ̆ng Tơ’ngla mă ưh kơ layơ tơplih.

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh tơgŭm kon huay hiơt kơ Ih jơ̆ Tơ’ngla ‘Lơ̆ng Tơpăt, trŏ kơ kon gơnang gơnơm hăm đĭ jơhngơ̆m. Apinh bơtho kon băt pơdơh lăm tơdrong ‘mêm ưh kơ layơ tơplih đơ̆ng Ih. Apinh pơdah dôm tơdrong lăm chăl arih mă kon ưh tam mă lui gơnang kơ Ih tơpă. Apinh tuh ăn kơ kon đei đon lui wă gơh yak năm pơ̆n nuih, arih kĕ jei păng pơkeh dôm tơdrong mă Ih krao chă. Kon kŭp kơ̆l krao khan hăm anăn Yang Yêsu Krist, A-men.

Ơ bơngai mơ̆ng mă ‘mêm kơ eng, dôm tơdrong lu bơ̆n tơchĕng ngĭl ngŭl ưh kơ gơh tơplih tơdrong ‘mêm kơjăp đơ̆ng ‘Bok Kei-Dei. Mălei chhŭr nuih tơpă, tơdrong noh gô iŏk đĭ dôm tơdrong chơ̆n hơđơ̆ng lăm bơhngol lu bơ̆n, pơm kơ tơdrong arih lu bơ̆n jing lĕng lŏng mă ưh kơ đei băt tôm mah păng hơđơ̆ng thoi tơdrong mă trŏ kơ đei ră noh. Tơdrong arih kĕ jei ưh kơ sĭ mĭnh anih truh mă ataih ôh, lu bơ̆n đei rơwơn sơng iŏk tơdrong kĕ jei noh lăm chăl arih kơ đeh âu, mă khan năr tŏ hlăng prăng ‘lơ̆ng tơdah kơplah ‘mi kial hơbŭt. ‘Bok Kei-Dei kơ đĭ đăng tơmam kơpal plĕnh ala teh âu oei tưk tơ iung tơpang jơ̆ng lu bơ̆n rim jơ phŭt, thoi noh lu bơ̆n oei hli tơrơ kơ tơdrong kiơ dơ̆ng lăm teh đak iĕ ioch âu?
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.