Kon bơngai đơ̆ng adrol sơ̆ truh tơ hrei ‘nâu, ling-lang ‘maih chă tơdrong tơpăt, yua kơ lăm jơhngơ̆m rim ‘nu bơngai wă băt tơdrong gĭt kăl sĭt tơpă lăm chăl arih kơdih, păng tơdrong kiơ trŏ kơ lui gơnang. Mă-lei, adrol sơ̆ hloh kơ ‘bar-rơbâu sơnăm, Yang Yêsu đei tơl kơ tơdrong jet noh bơih. Dang ei, lu bơ̆n oei lăm teh đak rai đunh rai wơ̆ ‘lŏ, đei lơ nơ̆r pơma păng tơdrong bơtho tơ jơ̆p anih, mă đei lơ bơngai tơchĕng khan ưh kơ đei minh tơdrong tơpăt kiơ oei kơjăp ling-lang, mă rim tơdrong đei phara kiơ̆ kơ rim ‘nu bơngai tơchĕng. Lu bơ̆n jơ̆ bơngai lui kơ Yang Yêsu Krist, lei lu bơ̆n gô tơl thoi yơ kơ dôm nơ̆r tơchĕng thoi noh? Păng lu bơ̆n hăm lui kơjăp tơpă kơ Yang Yêsu jơ̆ minh ‘nu Tơ’ngla mă roi tơbăt tơdrong tơpăt kơ lu bơ̆n dah ưh?

Năr ‘nâu, năr 04/09/2026, tơdrong tơdă Amăn Jơ Krao Khan Rim Năr krao wơ̆n lu bơngai mơ̆ng pơwao Nơ̆r Kră Yang hăm bơngai chih Gary E. Roberts kơ̆l ‘bai TRONG ‘LƠ̆NG TƠPĂT NOH KIƠ?

“Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh. ” (Yôhan 14:6)

“Yêsu khan: ‘Tơdrong Inh pơm Pơtao ưh kơ sĭ thoi lu ‘bok pơtao tơ ala teh âu ôh. Dah Inh pơm pơtao thoi lu sư, đei bơngai linh kiơ̆ Inh, tơblah păng lu bơngai Juđê ‘noh wă kơ lu sư huay kơ rôp Inh. Tơdrong Inh pơm Pơtao ưh kơ sĭ đơ̆ng kon bơngai ăn kơ Inh pơm ôh.’Pilat jet dơ̆ng: ‘’Noh hăm trŏ Ih ‘Bok Pơtao dah ưh?’ Yêsu khan: ‘Trŏ boih ih khan Inh ‘Bok Pơtao. Kơlih kơ minh tơdrong âu Inh tơpŭ tơ ala teh âu, wă bơtho tơdrong tơpăt. Bu mă kiơ̆ tơdrong tơpăt, sư mơ̆ng nơ̆r Inh pơma.’ Pilat khan: ‘Tơdrong kiơ khan tơdrong tơpăt?”(Yôhan 18:36-38)

Lu bơ̆n oei arih lăm jơnăr mă kơmăi A.I rai đunh rai wơ̆ pran. Kơmăi A.I đei lơ tơdrong yua tơgŭm kon bơngai, na gơh tơplĭh tơdrong lu bơ̆n pơhrăm, tơdrong jang, păng tơdrong lu bơ̆n chă băt nơ̆r pơma păng dôm tơdrong tơbăt. Mă hơdai hăm dôm tơdrong yua noh, kư̆m đei tơdrong pơlong lăng ‘nao truh kơ lu bơ̆n. Minh lăm dôm lu tơdrong noh jơ̆: rai đunh rai đei tơdrong pơlong lăng wă băt tơdrong kiơ sĭt đei tơpă, tơdrong kiơ hơlĕnh.

Kơplah lu bơ̆n lăng dôm lu rup, video dah nơ̆r tơbăt tơ lăm măng, đei lơ ‘măng lu bơ̆n jet kơdih: “Video âu sĭt tơpă dah kơmăi A.I pơm?” dah “Nơ̆r tơbăt âu trŏ kơ lui gơnang dah jơ̆ nơ̆r hơlĕnh?” Na sơleng kơ đon jơ̆ rai đunh rai đei lơ nơ̆r tơbăt, kon bơngai rai đunh rai gleh lap wă băt tơdrong kiơ sĭt tơpă, tơdrong kiơ jơ̆ tơdrong tơpăt. Nơ̆r jet gah tơdrong tơpăt ưh kơ đei đơ̆ng dang ei đĕch ôh. Hloh kơ ‘bar-rơbâu sơnăm adrol, đei minh ‘nu bơngai đei jet Yang Yêsu tơdrong noh bơih.

Đơ̆ng rŏng kơ lu sư rôp Yang Yêsu, lu sư ba Sư năm tơ Pilat, minh ‘nu ‘bok pơgơ̆r Rôm, mă đei mơsêh sek tơlang păng pơlôch bơngai. Mă lei Pilat ‘bôh Yang Yêsu ưh kơ đei tơdrong yoch kiơ, mă sư oei jet Sư wă kơ băt: Yang Yêsu hăm wă pơrăm tơdrong pơgơ̆r Rôm dah ưh. Kơplah Pilat jet Yang Yêsu, “ ‘Noh hăm trŏ Ih ‘Bok Pơtao dah ưh?”, Yang Yêsu tơl khan: “Trŏ boih ih khan Inh ‘Bok Pơtao. Kơlih kơ minh tơdrong âu Inh tơpŭ tơ ala teh âu, wă bơtho tơdrong tơpăt. Bu mă kiơ̆ tơdrong tơpăt, sư mơ̆ng nơ̆r Inh pơma.” (Yôhan 18:37)

Đơ̆ng rŏng kơ noh, Pilat jet dơ̆ng: “Tơdrong kiơ khan tơdrong tơpăt?” (trong 38). Nơ̆r jet noh đei minh tơdrong phara dêh. Pilat oei dơ̆ng ‘bơ̆t anăp Yang Yêsu, Tơ’ngla Tơdrong Tơpăt, mă lei sư ưh kơ băt kơ Yang Yêsu.

Rŏlăng lăm tơdrong Pilat tơchĕng, lu linh Rôm jơ̆ tơdrong tơpăt, char Rôm jơ̆ tơdrong tơpăt, Sêsa jơ̆ tơdrong tơpăt, păng tơdrong pơgơ̆r đei pran jơ̆ tơdrong tơpăt. Yua kơ thoi noh, Pilat wă kơ băt minh tơdrong đĕch: Yang Yêsu jơ̆ minh ‘nu bơngai tơplơ̆ tơdrong pơgơ̆r dah ưh. Kơplah sư băt Yang Yêsu ưh kơ wă pơrăm tơdrong pơgơ̆r Rôm, Pilat tơchĕng khan tơdrong âu keh đang bơih. Pilat ‘bôh Yang Yêsu hăm lu bơngai kêng dah roi glăi kơ Sư, mă sư ưh kơ băt kơ Tơ’ngla oei dơ̆ng ‘bơ̆t anăp sư jơ̆ Tơ’ngla ‘Bok Kei-Dei wơh truh wă tơbăt tơdrong tơpăt đơ̆ng Sư. Tơdah jơhngơ̆m Pilat đei Kră Yang pơchrang ăn băt rơđah tơpă, lei sư gô sơtơ̆p kŭl-tăng kơkuh kơ Yang Yêsu bơih.

Mă khan ưh kơ đei hla bơar ayơ roi rơđah yua kơ thoi yơ Yang Yêsu thĕng hreh đơ̆ng rŏng kơ Pilat jet: “Tơdrong kiơ khan tơdrong tơpăt?” Mă-lei, lu bơ̆n ‘bôh nơ̆r jet đơ̆ng Pilat ưh kơ jơ̆ nơ̆r jet đơ̆ng jơhngơ̆m tơpăt wă chă tơdrong tơpăt, dah chang gô nơ̆r tơl tơwih. Nhen thoi, nơ̆r noh tơ’bôh sư đei jơhngơ̆m ơh păng ưh kơ gĭt kăl kơ dôm nơ̆r Yang Yêsu pơma kơ sư. Mă tơdrong pơm kơ lu bơ̆n tơchĕng noh jơ̆: Tơdrong Tơpăt oei dơ̆ng ‘bơ̆t anăp Pilat tơpă. Ưh kơ đei đunh adrol kơ lu sư rôp Yang Yêsu, Sư đei khan: “Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh.” (Yôhan 14:6). Yang Yêsu ưh kơ pơma gah tơdrong tơpăt đĕch ôh, mă Sư khan rơđah kơ kơdih Sư jơ̆ Tơdrong Tơpăt. Yua kơ thoi noh, tơdrong tơpăt jơ̆ ưh kơ minh tơdrong mă kon bơngai pơma pơjing kơdih, dah chă đon tơchĕng kơdih đĕch ôh. Mă tơdrong tơpăt jơ̆ tơdrong ‘Bok Kei-Dei tơbăt kơ kon bơngai đơ̆ng Kon Sư kơdih, Yang Yêsu Krist.

Tơdrong ‘nâu kư̆m jơ̆ tơdrong pơlong lăng kơ đĭ-đăng kon bơngai đơ̆ng kơplah Ađam păng Ewơ pơm yoch tơ pơgar Eđen truh tơ dang ei. Minh tơdrong tơ’bôh đơ̆ng akâu jăn yoch kon bơngai jơ̆ kon bơngai wă tơtă kơdih tơdrong kiơ trŏ, tơdrong kiơ glăi, tơplih kơ iŏk đon ala kiơ̆ nơ̆r ‘Bok Kei-Dei đei pơma. Yua kơ kon bơngai đei jơhngơ̆m pơ-ang kơdih, đei dôm lu tơdrong kiơ̆ kơ akâu kơdih wă, păng đon tơchĕng kơdih ưh kơ hlôh wao tôm, thoi noh, tơplih kơ iŏk đon ala kiơ̆ tơdrong tơpăt đơ̆ng ‘Bok Kei-Dei, kon bơngai juăt kơ pơjing minh tơdrong “tơpăt” kiơ̆ kơ jơhngơ̆m kơdih wă, tơdrong mă tơ’bôh dôm tơdrong kơdih ‘maih păng tơchĕng đĕch.

Yua kơ thoi noh, Yang Yêsu bơtho lu bơ̆n tơplih ming jơhngơ̆m đon bơ̆n kiơ̆ thoi bơngai ‘lơ̆p (Mathiơ 18:3). Hloh kơ noh dơ̆ng, lu bơ̆n kăl kơ pơlôch jơhngơ̆m pơ-ang kơdih, iŏk đon ala na drơ̆ng iŏk đon tơchĕng păng tơdrong kon bơngai jô̆ gơh hơgei ưh kơ tôm ôh. Kư̆m kăl băt kơ tơdrong tơchĕng đơ̆ng ‘Bok Kei-Dei tih hloh tơpă kơ tơdrong kon bơngai băt păng tơchĕng. Tơdrong âu ưh kơ sĭ lu bơ̆n athei achăng lê̆ đon tơchĕng dah tơdrong hlôh wao ôh. Mă jơ̆ lu bơ̆n iŏk đon ala, băt kơ đon tơchĕng kon bơngai, mă khan minh tơdrong gĭt kăl đơ̆ng ‘Bok Kei-Dei ăn, đei tơdrong yoch pơm hơlĕnh bơih, na ưh kơ gơh ba lu bơ̆n truh tơ tơdrong tơpăt dah Nơ̆r ‘Bok Kei-Dei păng Yang Bơhngol ‘Lơ̆ng ưh kơ pơchrang păng ba lu bơ̆n. Lăm trong yak năm inh đơ̆ng minh ‘nu bơngai ưh kơ lui kơ ‘Bok Kei-Dei, truh tơ kơplah inh jing bơngai lui kơ Yang Yêsu Krist, inh ‘net ‘net hŏk băt tơdrong ‘nâu. Adrol sơ̆, inh ling-lang wă bơwei tôm tơdrong lăm chăl arih kơdih, păng inh sơng iŏk tơdrong kiơ inh gơh hlôh păng tơl tơwih hăm đon tơchĕng kơdih.

Mă kơplah inh năm tơ ‘Bok Krist, inh băt kơ đon lui ưh kơ achăng lê̆ tơdrong tơchĕng ôh. Đon lui jơ̆ lui gơnang pơjao kơ Tơ’ngla mă đei tơdrong hlôh wao păng gơh hơgei tôm tơdrong. Rai yak năm hăm Kră Yang đunh, inh rai ‘bôh rơđah hloh kơ tơdrong Sư pơgơ̆r đơ̆ng lăm tơdrong iĕ lăm chăl arih inh. Sư băt truh rim hlak sơk tơ kơpal inh, Sư băt kơrim ioy sŏk lămkơ̆l, Sư băt kơ inh arih truh tơ dang yơ, păng Sư pơm ăn kơ tôm tơdrong truh lăm chăl arih inh jing tơdrong ‘lơ̆ng kiơ̆ kơ thoi Sư wă.

Gô đei dôm lu đon tơchĕng lu bơ̆n jet lơ tơdrong gah ‘Bok Kei-Dei, na tơdrong noh ưh kơ đei kiơ sơleng ôh. Mă tơplih kơ lu bơ̆n wă tơl tơwih tôm tơdrong hăm đon tơchĕng kon bơngai ưh kơ đei hlôh tôm, hơpơi kơ lu bơ̆n băt kơ đon lui păng tơdrong ưh kơ gơnang lăm jơhngơ̆m bơ̆n kơ Kră Yang. Athei hŏk iŏk jơhngơ̆m tơpăt păng iŏk đon ala thoi ‘bok mă đei kon jĭ lăm Markôs 9:24, sư khan: “Inh lui; apinh Ih tơgŭm kơ inh lăm tơdrong inh ưh kơ lui kơjăp!”

Apĭnh đĭ đăng krao khan hơdai: Kơkuh kơ ‘Bă mă ‘mêm, năr ‘nâu kon pơsĭt hăm Ih, Ih jơ̆ trong năm, Tơdrong Tơpăt păng Tơdrong Arih kon. Rim ‘măng kon năm tơ Ih, apinh Ih tơgŭm tơplih ming jơhngơ̆m đon kon nhen thoi bơngai ‘lơ̆p, wă kơ kon gơh sơng iŏk tôm tơdrong tơpăt păng tơdrong bơtho đơ̆ng Nơ̆r Ih. Yua kơ thoi noh, kon gô đei yak năm kơjăp lăm teh đak ‘nâu mă đei lơ tơdrong pơjah pơjăng păng tơdrong ưh kơ rơnŭk rơnoa. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong gĭt kăl tih hloh lăm chăl arih mă rim ‘nu lu bơ̆n kăl kơ jet akâu kơdih jơ̆: Ih đei sơng iŏk Tơdrong Tơpăt, jơ̆ Yang Yêsu, mơ̆t lăm jơhngơ̆m ih boih dah ưh? Rim năr, ih hăm oei wă chă Sư, mơ̆ng nơ̆r Sư pơma, păng arih lăm tơdrong pơgơ̆p hăm Sư dah ưh? Dah ih ‘maih mơ̆ng nơ̆r ala teh âu, nơ̆r lu bơngai pơma, dah dôm nơ̆r tơ lăm măng facebook đĕch? Athei ăn kơ tơdrong tơpăt đơ̆ng Sư jing tơm kơjăp, ba ih lăm trong arih păng lăm rim tơdrong ih rơih pơm. Kơplah ih tơbơ̆p dôm tơdrong gah ‘Bok Kei-Dei mă ih ưh kơ băt rơđah, dah jơhngơ̆m ih đei tơdrong ưh kơ gơnang kơ đon lui, ‘nĕ kơ tơtă hloi kiơ̆ kơ tơdrong băt păng đon tơchĕng kon bơngai. Mă athei iŏk đon ala năm tơ Kră Yang, na krao khan apinh Sư thoi âu: “Kơkuh kơ Kră Yang, kon lui kơ Ih. Apinh Ih tơgŭm kon đei đon lui kơjăp!”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.