05.09 Amăn Jơ Krao Khan Rim Năr: DÔM LU TƠDRONG PƠTƠM ĐƠ̆NG BLŬNG A IĔ ĐĔCH

Jơhngơ̆m kon bơngai lu bơ̆n juăt kơ hli kơ pơtơm đơ̆ng blŭng-a minh tơdrong ‘nao, mă tơdrong noh lăng đơ̆ng blŭng-a iĕ đĕch. Lu bơ̆n hli khan kơdih ưh kơ đei tơdrong hlôh wao wă pơm, hli kơ tơhiong lê̆, dah hli kơ dôm lu tơdrong lu bơ̆n pơm iĕ dêh dah pơting hăm tơdrong tih mă oei ‘bơ̆t anăp. Rŏlăng dôm tơdrong Kră Yang ăn kơ lu bơ̆n pơm năr ‘nâu lăng iĕ đĕch, mă-lei Sư gơh yua dôm tơdrong iĕ noh wă pơm minh tơdrong tih hloh mă dang ei lu bơ̆n ưh kơ ‘bôh.

Năr ‘nâu, năr 05/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai DÔM LU TƠDRONG PƠTƠM ĐƠ̆NG BLŬNG A IĔ ĐĔCH.

“Yua kơ bu pơ̆n pơjăm kơ năr tơdrong iĕ âu? Sư gô chơt hiôk ‘bôh tơlei dăng pơtŏ ‘bơ̆t ti Sôrôbabel. Đei tơpơh tŏ măt ‘nâu măt Kră Yang năm tơmang lăng jơ̆p kơ teh đak.” (Sachari 4:10)

“Đơ̆ng noh đei dơ̆ng nơ̆r Kră Yang khan kơ inh. “Đơ̆ng ti Sôrôbabel đei pơjing hnam ‘nâu păng ti sư kư̆m gô pơm keh mơ̆n.” Kơplah noh ih gô băt Kră Yang Tih Hloh đei wơh inh năm tơ lu iĕm. Yua kơ bu pơ̆n pơjăm kơ năr tơdrong iĕ âu? Sư gô chơt hiôk ‘bôh tơlei dăng pơtŏ ‘bơ̆t ti Sôrôbabel. Đei tơpơh tŏ măt ‘nâu măt Kră Yang năm tơmang lăng jơ̆p kơ teh đak.” (Sachari 4:8-10)

Nơ̆r hơri chơt hiôk tơ jơ̆p anih, dôm lu muh măt hơ’lơ̆p đei jơhngơ̆m ‘nă hal, dôm lu tơmam apah, păng hla bơar pơ-ư đei tơtă trŏ kơ đơ̆ng kơpal ăn, chang gô jơ mă lu sư krao anăn păng jao ăn kơ dôm lu hơ’lơ̆p đei tơdrong pơhrăm ‘lơ̆ng. Lăm tơdrong chơt hiôk tơ Hnam Pơhrăm School Of Light, nơ̆r bơngai bơtho mă wei-lăng khŭl hơ’lơ̆p đei pơma:

“Đei bơngai pơma khan kơ rim trong yak năm tih, kư̆m đơ̆ng kơnao jơ̆ng yak năm blŭng-a đĕch.

Lăm tơdrong pơhrăm, jơ̆ng yak năm blŭng-a noh jơ̆ hŏk đŏk chư. Dôm kơ kơ’bang chư wă pơih ăn ‘bôh teh đak. Đơ̆ng noh boih blŭng-a dôm lu tơdrong hơ’mon lu bơ̆n gô đŏk păng dôm lu tơdrong hơpơi wă gô yak năm kiơ̆ lăm dôm lu năr tơ anăp.

Ih athei tơchĕng lăng minh ‘nu hơ’lơ̆p oei hŏk đŏk chư. Blŭng-a, dôm lu chư lăm hla bơar nhen thoi dôm tơdrong tang wao ưh kơ đei hlôh. Mă kơplah lu hơ’lơ̆p noh chu yom hŏk rim nơ̆r, hŏk pơgơ̆p dôm lu nơ̆r noh, gô đei minh tơdrong mơsêh mơyang truh. Dôm nơ̆r noh rai jing chư; dôm kơ chư rai jing nơ̆r pơma; dôm nơ̆r pơma rai jing trong pơih teh đak ‘nao. Yua kơ hŏk đŏk đĕch, lu bơ̆n gơh ‘bôh minh tơdrong tih rai jing đơ̆ng dôm tơdrong iĕ iĕ noh.

Tơ teh đak Viêt Nam, rim sơnăm truh năr 5 khei 9 jơ̆ năr blŭng a sơnăm pơhrăm ‘nao. Lơ rơbâu-rơbâu hơ’lơ̆p păng bơngai pơhrăm wih dơ̆ng tơ hnam pơhrăm. Đei hơ’lơ̆p đei juăt kơ sơ̆p hla bơar păng hnam pơhrăm boih; mă kư̆m đei hơ’lơ̆p blŭng-a tơpă yak mơ̆t tơ ‘măng hnam pơhrăm. Lu sư gô pơtơm đơ̆ng blŭng-a hăm minh sơ̆p hla bơar ‘nao, minh khŭl pơhrăm ‘nao, minh ‘bai hŏk blŭng-a, dah minh ‘nu buăl juăt ‘nao. Dôm lu tơdrong noh lăng nhen tơdrong juăt păng iĕ đĕch, mă-lei jơ̆ pơtơm đơ̆ng blŭng – a lăm trong yak năm ‘nao.

Lăm jơnăr ‘bok khan lê̆ adrol Sachari, kon pơlei Isơrael pă wih brŏk đơ̆ng anih lu sư đei ataih đơ̆ng pơlei. Kơplah lăng tơ anăp lu sư ‘bôh pơlei Jêrusalem đei hiong răm pơchah pơchek, Sôrôbabel blŭng-a pơtơm pơjing ming Hnam Akŭm ‘Bok Kei-Dei. Mă tơdrong jang noh ưh kơ ‘bônh ôh. Gah ‘nguaih, lu adrĕch adrŭng jum dăr tơplơ̆ kơ lu sư; gah lăm, lu sư tơbơ̆p jơhngơ̆m rơdu păng tơdrong kơ ‘bah. Tơdrong jang ‘bơ̆t anăp lu sư tih dêh, mă dôm tơmam lu sư đei lăng nhen iĕ đĕch.

Mă -lĕi lăm tơdrong thoi noh, Kră Yang khan: “Đơ̆ng ti Sôrôbabel đei pơjing hnam ‘nâu păng ti sư kư̆m gô pơm keh mơ̆n.” (Sachari 4:9) Na Sư pơma khan dơ̆ng: “Yua kơ bu pơ̆n pơjăm kơ năr tơdrong iĕ âu? Lu sư gô chơt hiôk kơplah ‘bôh tơlei dăng pơtŏ ‘bơ̆t ti Sôrôbabel.” (tơdrong 10) Tơlei dăng pơtŏ trŏ jơ̆ tơmam bơngai pơm hnam yua wă lăng hnam đei pơtŏ dăng tơpăt trŏ bơih dah ưh. Rup Sôrôbabel chĕp tơlei noh lăm tơpang ti tơ’bôh ăn kơ bơ̆n băt kơ tơdrong jang ưh kơ dơ̆ng ‘bơ̆t hơnă hnam đĕch, mă tơdrong jang oei pơtrơp tơ anăp. Rŏlăng Kră Yang wă tưk tơiung kon pơlei Sư: ‘nĕ kơ pơjăm tơdrong Sư đei blŭng-a, mă khan blŭng-a iĕ đĕch păng đei lơ tơdrong pơlong lăng. Mă thoi yơ, lu sư đei pơm tơdrong jang noh trŏ tôm, ưh kơ yua hlôh wao kon bơngai, mă yua kơ tơdrong mơsêh mơyang pran kơtang đơ̆ng Kră Yang. Yua kơ thoi noh Sư khan: “ ‘Noh ưh kơ sĭ đơ̆ng tơdrong gơh hơgei, kư̆m ưh kơ sĭ đơ̆ng tơdrong pran kơtang ôh, mă-lei đơ̆ng Yang Bơhngol ‘Lơ̆ng Inh.” (Sachari 4:6)

Athei lu bơ̆n wih lăng ‘bôh dôm lu hơ’lơ̆p oei hŏk đŏk. Lu sư ưh kơ gơh đŏk sơ̆p hla bơar lăm năr blŭng-a hloi ôh. Lu sư kăl kơ pơtơm đơ̆ng dôm lu tơdrong iĕ.
Yua kơ thoi noh, ơ lu hơ’lơ̆p păng bơngai pơhrăm mă lui kơ Yang Yêsu Krist, sơnăm pơhrăm ‘nao iĕm kư̆m đei dôm lu tơdrong pơjuăt lăp ai đĕch. Noh jơ̆ adrol kơ iĕm năm pơhrăm rim năr, iĕm athei krao khan, lui gơnang kơ Kră Yang păng pơm bai hăm jơhngơ̆m tơpăt, dah kơplah iĕm đei pŭn lăm tơdrong pơhrăm, iĕm pơyơ̆r tôm tơdrong ư-ang kơ Kră Yang. Dôm tơdrong pơjuăt noh lăng iĕ dêh, mă-lei noh jơ̆ trong iĕm gô ‘bôh đon lui kơdih.

Ơ lu bơngai jing mĕ, jing ‘bă mă ‘mêm, kư̆m đei lơ ‘măng lu bơ̆n wă dôm tơdrong tih ‘lơ̆ng kơ kon bơ̆n. Lu bơ̆n wă kơ kon pơhrăm ‘lơ̆ng, đei tơdrong jang kơjăp păng đei tơdrong arih hiôk. Dôm tơdrong wă thoi noh jơ̆ tơdrong juăt đơ̆ng jơhngơ̆m bơngai jing mĕ, bơngai jing ‘bă. Mă jing mĕ, ‘bă lăm bơngai lui kơ Yang Yêsu Krist, tơdrong bơ̆n lăng ‘bơ̆t anăp ưh kơ jơ̆ kơsô̆ pơhrăm dah tơdrong pŭn tơ teh âu đĕch ôh. Tơdrong gĭt kăl tih jơ̆ wă kơ kon arih gah bơhngol kiơ̆ Kră Yang. Athei pơtơm đơ̆ng blŭng-a đơ̆ng dôm lu tơdrong iĕ: bơtho kon băt kơ ‘mêm mơnat, băt kơ tơpăt, băt kơ krao khan, păng băt lui gơnang kơ Tơ’ngla chĕp bơwei dôm lu năr tơ anăp kơ kon. Yua kơ dôm tơdrong juăt noh, bơngai jing mĕ, bơngai jing‘bă gơh tơgŭm kon kơdih pơgơ̆p hăm Yang Yêsu Krist, băt kơ tơdrong arih đei tơplĭh păng rai wơ̆ ‘lŏ gah bơhngol.

Sơ̆p hla bơar ‘Bok Kei-Dei đei chih: “Bơngai bu pơm tơpăt mă tơdrong iĕ, bơngai noh sư kư̆m gô pơm tơpăt tơdrong tih mơ̆n. Bơngai bu pơm ưh kơ tơpăt đơ̆ng tơdrong iĕ, sư kư̆m ưh kơ tơpăt kơ tơdrong tih.” (Luka 16:10) Mă ih oei pơhrăm, bơ̆jang kơ Kră Yang, dah bơ̆jang lăm rim khŭl tơdrong jang, ‘nĕ kơ jing bơngai ưh kơ tơpăt, mă athei chu yom, tơpăt lăm rim tơdrong. ‘Nĕ ăn kơ jơhngơ̆m rơdu yua kơ đơ̆ng tơdrong blŭng-a iĕ, dah yua kơ ih oei rơdu tơrăn. Kơplah lu bơ̆n băt pơjao trong yak năm iŏk đon ala hăm lui gơnang kơ Kră Yang păng hli yom kơ Sư, Sư gô yua dôm lu tơdrong iĕ noh jing tơdrong proh hơmet ‘lơ̆ng đơ̆ng Kră Yang.

Apĭnh đĭ đăng krao khan hơdai: Kơkuh kơ Kră Yang mă ‘mêm, kơplah kon hli păng đei jơhngơ̆m ưh kơ gơnang yua kơ ngĭl ngŭl kơ tơdrong hlôh wao kơdih, dah yua kơ dôm tơdrong jum dăr, apinh Ih tơgŭm ăn kơ măt kon ling-lang lăng tơ Ih, Tơ’ngla đei tơdrong gơh hơgei păng pran kơtang tih hloh. Kră Yang ơi, apinh Ih tơgŭm kon huay kơ pơjăm dôm tơdrong blŭng-a lăng thoi kơ iĕ noh, mă băt gơnang kơ tơdrong ‘mêm mơnat Ih, yak năm hăm chu yom, tơpăt, pơm ‘lơ̆ng tôm tơdrong Ih ăn ‘bơ̆t anăp kon rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu Kră Yang đei ăn ‘bơ̆t anăp ih minh tơdrong blŭng-a iĕ kiơ ưh? Athei ‘blŏk kơ dôm tơdrong tih ưh kơ đei gơh jing dah ưh kơ đei dôm lu tơdrong iĕ adrol. Yua kơ thoi noh, athei bơ̆jang tơdrong Kră Yang oei pơjao kơ ih năr ‘nâu. Krao khan apinh Sư tơgŭm ih achăng lê̆ tơdrong pơdơh kơ bơ̆jang đunh bơih; athei chu yom, tơpăt đơ̆ng lăm tơdrong iĕ. Păng rim ‘măng ih mơn kơdih rơdu tơrăn dah ưh kơ đei gơh wă bơ̆jang, athei ‘blŏk kơ Nơ̆r Kră Yang: “ Noh ưh kơ sĭ đơ̆ng tơdrong gơh hơgei, kư̆m ưh kơ sĭ đơ̆ng tơdrong pran kơtang ôh, mă-lei đơ̆ng Yang Bơhngol ‘Lơ̆ng Inh.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.