Minh hlak rup ưh kơ đei pơgơ̆p jơ̆ oei minh hlak đĕch ưh kơ đei yua kiơ ôh, mă kơplah lơ kơ hlak rup đei pơgơ̆p trŏ kơ anih sư, na gô jing minh hlak rup ‘lơ̆ng rŏ tơpă. Kon bơngai lu bơ̆n kư̆m thoi noh. Tơdah lu bơ̆n ling-lang mơ̆t lăm akâu kơdih, akâu pŭ iŏk dôm lu tơdrong gleh glăn kơdih, lu bơ̆n ưh kơ layơ băt ‘bôh tôm tơdrong ‘lơ̆ng rŏ, mă Kră Yang đei ăn kơ akâu jăn Sư. Yua kơ Kră Yang pơjing lu bơ̆n wă kơ lu bơ̆n yak năm hơdai dih băl, jang tơgŭm păng tưk tơiung dih băl. Kư̆m yua kơ akâu jăn Sư noh, Kră Yang tơ’bôh tơdrong Sư tơgŭm tơmam mơsêh mơyang, trŏ kơ jơ năr ăn kơ rim ‘nu bơngai tôm tơdrong sư kăl yua – yua kơ tơpang ti păng jơhngơ̆m đơ̆ng rim ‘nu minh jơhngơ̆m năm tơ Sư.

Năr ‘nâu, năr 06/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai TƠDRONG TƠGŬM ĐƠ̆NG ‘BOK KEI-DEI

“Kră Yang bơ̆n ‘Bok Kei-Dei mơdrŏng tih tơpă, Sư gô tơgŭm iĕm tôm tơdrong tơmam iĕm kăl yua, kơlih kơ iĕm lui kơ Yêsu Krist.” (Philip 4:19)

“Kră Yang bơ̆n ‘Bok Kei-Dei mơdrŏng tih tơpă, Sư gô tơgŭm iĕm tôm tơdrong tơmam iĕm kăl yua, kơlih kơ iĕm lui kơ Yêsu Krist. Ư-ang ‘Bă tơm bơ̆n ‘Bok Kei-Dei ling-lang ưh kơ layơ tôch! A-men.” (Philip 4:19-20)

Inh pơih ‘măng mơ̆t tơ hnam, jơhngơ̆m inh trăp trĭn yua kơ lơ tơdrong hiơ̆k bơngơ̆t wăr tăp tơdrong arih inh. Tơ kơpal kơ’bang bơ̆jang, tơpu kơthơ đei chih anăn inh oei tơ noh, na tơ ala noh đei chih dơ̆ng nơ̆r lăm Philip 4:19.

Kơplah inh pơih tơpu kơthơ noh, inh ‘bôh lăm noh đei minh hlak hla bơar iĕ păng kơsô̆ jên, mă ưh kơ đei anăn bơngai chih dah nơ̆r pơma dơnuh kiơ ôh. Inh jet lăm jơhngơ̆m kơdih: Bu đei pơm tơdrong âu ăn kơ inh?

Adrol kơ ‘nâu ‘bar pêng giĕng, gre ôtô inh răm trăp tơpă, jên hơmet gre hloh kơ jên inh đei. Đĭ kơ dôm giĕng noh, inh kăl kơ apinh lu bơngai jang hơdai inh ngôi hơdai tơ anih jang; kư̆m đei năr inh kăl kơ yak jơ̆ng jê̆ 8km rim năr wă truh tơ anih jang.

Khei adrol ki, inh đei rơih iŏk yak năm lăm đon lui, achăng lê̆ pơlei kơdih păng dôm lu bơngai inh ‘mêm, năm tơ minh anih ataih yua kơ nơ̆r Kră Yang krao. Oei tơ dêh tơmoi, ưh kơ đei hnam dơnŏ, kư̆m pă đei pơgơ̆p kơjăp hăm Hnam Akŭm, inh mơn kơdih sơ’ngon dêh lăm trong yak năm âu. Mă-lei Kră Yang đei yua tơdrong Sư ling-lang tơpăt wă tơ’blŏk kơ inh khan: inh huay kơ oei minh drô̆ ôh.
Minh ‘nu bơngai jang hơdai inh đei thĕng hrĕh jao tơmam noh ăn kơ inh. Kơsô̆ jên noh tôm mah kơ inh đei hao gre wih brŏk ngôi tơ hnam dơnŏ păng răt gre ‘nao. Lăm jơ phŭt noh, inh ưh kơ sĭ đei iŏk tơdrong tơgŭm đĕch ôh, mă inh kư̆m ‘bôh akâu jăn ‘Bok Krist oei arih tơpă: Kră Yang tơgŭm tơmam kơ inh yua kơ đơ̆ng jơhngơ̆m băt kơ mơ̆ng, krăng kơchăng păng pơm kiơ̆ Sư.

Đơ̆ng blŭng-a, Kră Yang ưh kơ đei layơ wă ăn kơ lu bơ̆n arih minh drô̆ đĕch ôh. Sư pơjing lu bơ̆n wă kơ yak năm hơdai dih băl. Kơplah akâu jăn ‘Bok Krist đei pran bơih păng minh jơhngơ̆m, ưh kơ đei bu gô tơklah ataih, kư̆m ưh kơ đei bu pŭ iŏk tơdrong trăp trĭn. Kră Yang ưh kơ jao tơmam kơ lu bơ̆n thar đei đĕch ôh. Dôm tơdrong ih đei – đơ̆ng tơdrong ‘mêm mơnat Kră Yang ăn, truh tơ mŭk tơmam – Sư pơjao kơ ih wă kơ đei tơdrong ‘lơ̆ng. Dôm tơmam noh ưh kơ wă tơgŭm yua kơ ih kăl yua kơdih đĕch ôh, mă kư̆m wă jang tơgŭm păng tưk tơiung lu bơngai nai, pơm kơ lu sư rai kơjăp hloh, păng pơyơ̆r tôm tơdrong ư-ang kơ Kră Yang.

Tôm tơdrong ư-ang kơ Kră Yang ngăl; gah lu bơ̆n, lu bơ̆n jơ̆ bơngai chu yom, tơpăt lăm tơdrong wei-lăng dôm tơmam Sư đei pơjao ăn kơ lu bơ̆n. (Bothokhôi Juăt 10:14-17; Hơriso 24:1; 50:10; Yakơ 1:17; Tơdrong Tơ’bôh 4:11).

Kră Yang pơjing ih phara, ưh kơ lei-lăi kơ bơngai nai, păng rim tơdrong Sư ăn kơ ih đei wă kơdih. Ih jơ̆ tơmam pơjing ‘lơ̆ng rŏ tih tơpă đơ̆ng ‘Bok Kei-Dei! Kiơ̆ thoi dôm tơdrong ‘mêm mơnat gah bơhngol, rim ‘nu bơngai đei Kră Yang pơjao ăn dôm tơdrong pŭn hiôk phara dih băl, wă kơ lu bơ̆n wei-lăng păng yua kiơ̆ tôm tơdrong Sư wă.

Rim ‘nu lu bơ̆n jơ̆ minh hlak rup pơgơ̆p gĭt kăl, trŏ kơ anih kơdih lăm akâu jăn Sư. Kơplah lu bơ̆n đei minh jơhngơ̆m, pơyơ̆r tôm tơdrong ư-ang kơ Kră Yang, Hnam Akŭm gô bơ̆jang ‘lơ̆ng trŏ tôm tơdrong kiơ̆ kơ Kră Yang lăp đon.

Sơ̆p hla bơar ‘Bok Kei-Dei đei chih: “Dôm lu bơngai lui pôm đon pôm jơhngơ̆m. Rim ‘nu lu sư đei tơmam kơdih kơdih, mă-lei lu sư jô̆ tơmam sư hơdai ngăl. Lu bơngai jơ̆ng ‘bang Yêsu roi kơ đe lu sư ‘bôh Yêsu iung arih boih. Lu sư kư̆m gơh pơm tơdrong mơsêh mơyang mơ̆n đơ̆ng Yêsu ăn kơ lu sư gơh tơgŭm đe. Păng ‘Bok Kei-Dei kư̆m tơgŭm lu sư lăm tôm tơdrong mơ̆n. Lu bơngai lui kơ Yêsu ưh kơ đei bu jơ̆l kơ tơmam ưh kơ mah ôh yua kơ dôm lu bơngai đei hnam, mir ‘ba, sư blơ̆ mơdro đei bơ̆n kon jên. Lu sư pơyơ̆r kơ ‘Bok Kei-Dei ăn kơ lu bơngai jơ̆ng ‘bang Yêsu chă asong lu bơngai mă hoh kơ đei.” (Tơdrong Jang 4:32-35)

Ih ‘bôh hlich Kră Yang tơgŭm tơmam, tơl tơwih dôm tơdrong ih kăl yua kơ lu ‘nhŏng oh mă lui kơ Kră Yang dah ưh? Noh boih kơplah akâu jăn ‘Bok Krist oei arih tơpă, na tơ’bôh tơdrong pran kơtang Sư.

Păng tơplơ̆ dơ̆ng, ih đei layơ mơn kơ nơ̆r pơtrŭt hơ iă đơ̆ng Kră Yang lăm jơhngơ̆m, chông ba ih năm tơ tơdrong pŭn hiôk ăn kơ minh ‘nu bơngai dah ưh?
Iŏk tơdrong Kră Yang tơgŭm tơmam jơ̆ minh tơdrong pŭn hiôk tih tơpă. Mă đei Kră Yang yua ih wă wei-lăng păng jang tơgŭm bơngai nai, noh jơ̆ jơhngơ̆m hiôk tih hloh, ‘lơ̆ng hơ iă păng gĭt kăl hloh!

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih, yua kơ Ih đei pơjing kon phara, thoi minh hlak rup pơgơ̆p gĭt kăl, ưh kơ đei kơ’bah lăm hnam dơnŏ Ih. Kon băt kơ kon ưh kơ kăl kơ adrin yak năm minh drô̆ lăm chăl arih âu. Apinh Ih tơgŭm kon ‘bôh lu ‘nhŏng oh mă Ih đei dan lăm tơdrong arih kon. Apinh Ih bơtho kon iŏk đon ala wă sơng iŏk tơdrong lu bơngai tơgŭm, păng krăng kơchăng wă tơgŭm păng pơjao ăn kơ bơngai nai, wă kơ akâu jăn Ih rai kơjăp, păng anăn Ih đei ư-ang đơ̆ng lăm tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu Kră Yang wă kơ ih jing minh tơdrong pŭn hiôk ăn kơ bu? Rŏ lăng minh ‘nu bơngai mĕ oei minh drô̆, oei pŭ trăp trĭn hiơ̆k chă tơmam sa rim năr; dah minh ‘nu bơngai adro kăl kơ bơngai jang tơgŭm hơmet hnam; dah minh ‘nu bơngai jang hơdai oei thĕng hrĕh pŭ tơdrong trăp trĭn lăm jơhngơ̆m, na kăl kơ đei nơ̆r jet gia pơma dơnuh, wă kơ sư băt kơ sư ưh kơ oei minh adrô̆ đĕch ôh. Păng lăm dôm khei hơtuch kơ sơnăm, kơplah bơyan mi păng hơbŭt hơbang, đak tih truh, pơm kơ hnam hiong răm, mŭk tơmam, mir ‘ba, tơdrong jang sa, truh tơ tơdrong arih kon bơngai kư̆m đei hiong răm – noh boih jơ mă rim ‘nu lu bơ̆n gơh tơ’bôh tơdrong ‘mêm mơnat Kră Yang đei bơtho. Kră Yang bơ̆jang tơdrong Sư yua kơ dôm lu jơhngơ̆m krăng kơchăng pơm kiơ̆ Sư. Yua kơ thoi noh, năr ‘nâu Kră Yang oei dan tơdrong kăl yua kiơ đơ̆ng lu bơngai jum dăr lăm jơhngơ̆m đon ih? Na ih gô pơm thoi yơ wă tơl tơwih kơ nơ̆r krao ‘mêm mơnat noh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.