07.09 Amăn Jơ Krao Khan Rim Năr: TƠDRONG HƠ’MON TƠPLIH LUBƠ̆N

Lu bơ̆n juăt kơ ‘maih tơplih mă hrĕnh tenh, nhen thoi tơpu hơdrông tơplih jing măt mêng ‘lơ̆ng rŏ, dah nhen thoi pơgê sêng brêng tŭn lê̆ măng mu. Kon bơngai bơ̆n rơhing kơ tơplih bơhngol bơ̆n. Kơplah kơdih bơ̆n tơ’bơ̆p tơdrong ưh kơ kĕ, păng dôm tơdrong bơ̆n adrin jing trong tôch. Lu bơ̆n ‘bôh rơhing kơ minh tơdrong tơplih kơ jơhngơ̆m. Lu bơ̆n kăl kơ minh ‘nu Tơngla hơtŭt ‘bơm lăm jơhngơ̆m bơ̆n, wă kơ tơplih đơ̆ng lăm păng đei tơdrong arih ‘lơ̆ng rŏ tôm tơdrong.

Năr ‘nâu năr 07/09/2026 tơdrong tơdă Măn Jơ Krao Khan Rim Năr krao wơ̆n bơngai mơ̆ng wong pơwao nơ̆r Kră Yang hăm bơngai chih Tori Tronecone hăm kơ̆l ‘bai TƠDRONG HƠ’MON TƠPLIH LUBƠ̆N

“Thoi noh na bu kiơ̆ Yêsu Krist, bơngai noh bơ̆n băt kơ ‘Bok Kei-Dei pơjing sư jing bơngai ‘nao, dôm tơdrong so ưh pă đei boih, sư đei tơdrong ‘nao ngăl, yua kơ sư jing bơngai ‘nao boih.” (II Kôrintô 5:17)

“Kơplah Yêsu oei năm rok trong, Sư ‘bôh minh ‘nu bơngai măt tol đơ̆ng mĕ Sư tơpŭ sơ̆. Na lu bơngai pơhrăm păng Sư khan kơ Sư thoi âu: “Ơ ‘Bok Thây, bơngai âu măt tol đơ̆ng mĕ sư tơpŭ sơ̆, na yua kơ kiơ? Yua kơ sư kơdih pơm yoch dah yua kơ mĕ ‘bă sư pơm yoch?” Yêsu khan: “Sư măt tol ưh kơ sĭ yua kơ đơ̆ng sư pơm yoch, dah đơ̆ng mĕ ‘bă sư pơm yoch ôh. Sư măt tol yua kơ ‘Bok Kei-Dei wă tơ’bôh kơ đe tơdrong mơsêh mơyang Sư wă pơklaih bơngai âu. “Dang ei oei ‘năr, na bơ̆n athei jang tơdrong ‘Bă Inh mă wơh Inh. Dah ‘năr mơ̆t boih, ưh kơ đei bu gơh jang dơ̆ng. Kơplah Inh oei ala teh âu Inh dang măt ‘năr pơchrang hơdah tơ teh âu wă kơ kon bơngai băt tơdrong ‘Bok Kei-Dei.” Klaih kơ noh Yêsu kơsoh đak hai tơ teh, hơwơ̆r đak hai păng teh hơdai. Klaih kơ noh na Sư pik tơ măt bơngai măt tol. Na Yêsu khan kơ sư: “Năm bĕ ih, năm ‘nhao măt ih tơ đak dơnâu mă đe anăn dơnâu Silôm.” (Silôm wă khan đak klang đơ̆ng nai ro tơ dơnâu Silôm.) Na sư năm ‘nhao hloi tơ đak dơnâu ei. Klaih kơ noh sư brŏk tơ hnam sư kơdih, sư gơh ‘bôh hơdah boih. Lu buăl sư păng lu bơngai juăt ‘bôh sư pơm ăn-mai krô hmă jet thoi âu: “Bơngai âu sơ̆ sư pơm ăn-mai ih?” Đei buăl mơ’nah khan: “Jơ̆ sư âu tơpă.”Buăl mơ’nah khan dơ̆ng: “Ưh kơ sĭ sư âu ôh, hơbŏ sư âu đĕch thoi sư.”Mă-lei bơngai đêl măt tol ei khan kơ lu sư: “Trŏ kơ inh âu boih măt tol pơm ăn-mai sơ̆.” Na lu đe ei jet sư: “Lei lơliơ ih gơh ‘bôh hơdah boih?” Sư khan: “Bơngai mă đe anăn Yêsu, Sư kơsoh đak hai tơ teh, hơwơ̆r đak hai păng teh hơdai; klaih kơ noh pik kơ măt inh. Na Sư khan kơ inh: ‘Năm bĕ ih, năm ‘nhao măt ih tơ đak dơnâu Silôm.’ Na inh năm ‘nhao măt inh tơ đak ei na măt inh ‘bôh hơdah hloi.” (Yôhan 9: 1-11)

Inh ‘maih lăng tơdrong pơdah hơmet ming hnam. Inh ‘bôh hơiă kơplah ‘bôh minh pôm hnam so sĕnh, tơnăr hơđang tơlŏng, rŏ lăng ưh kơ gơh “hơmet” hrĕnh tenh jing minh pôm hnam ‘lơ̆ng kơjăp. Inh ‘maih lăng đơ̆ng rim chăl: đơ̆ng blŭng-a chhơ̆ hơmet, hleh lê̆ lu hơtuh so, truh tơ teh pơchah lu tơnăr kơnê̆. Mălei tơdrong inh chang gô hloh noh tơ tuch luch tơdrong pơdah, kơplah tơ’bôh rup “adrol” păng “đơ̆ng rŏng”. Tơdrong sư phara tơpă tơdah ưh kơ đei lăng đơ̆ng blŭng-a, inh ưh kơ ngeh hnam ‘nao noh đơ̆ng hnam so sĕnh.

Mălei, tơdrong tơplih ‘lơ̆ng rŏ kon bơngai bơ̆n ưh kơ gơh pơtŏ pơting hăm tơdrong tơplih Kră Yang lăm chăl arih lu bơ̆n. Tơdrong hơmon gah tơdrong tơplih mă inh hơiă hloh đei chih lăm Yôhan chăl 9. Kră Yang Yêsu păng jơ̆ng ‘bang Sư tơ’bơ̆p minh ‘nu bơngai măt tol đơ̆ng mĕ sư tơpŭ. Kră Yang iŏk teh pik tơ măt sư păng thei sư năm ‘nhao tơ đak dơnâu Silôm.

Sư đei tơplih truh tơ lu bơngai đei băt kơ sư ưh kơ ngeh noh jơ̆ minh ‘nu bơngai măt tol adrol sơ̆. Noh tơpă jơ̆ minh tơdrong “hơmet” tôm tơdrong! păng noh boih tơdrong Kră Yang Yêsu ‘maih wă bơ̆jang lăm tơdrong arih lu bơ̆n. Kră Yang ưh kơ sĭ lăp gơh pơklaih tơdrong jĭ jăn gah sĕch akar đĕch, mă Sư kŭm gơh pơklaih păng tơplih gah lăm jơhngơ̆m kon bơngai bơ̆n. Kră Yang ưh kơ sĭ lăp tơgŭm bơ̆n jing “rup lơ̆ng hloh” kơdih bơ̆n, Sư kŭm ăn kơ bơ̆n đei tơdrong arih ‘nao, ăn kơ bơ̆n tơpŭ ming ‘nao hloi!

Nơ̆r ‘Bok Kei Dei đei chih khan: “Thoi noh na bu kiơ̆ Yêsu Krist, bơngai noh bơ̆n băt kơ ‘Bok Kei-Dei pơjing sư jing bơngai ‘nao, dôm tơdrong so ưh pă đei boih, sư đei tơdrong ‘nao ngăl, yua kơ sư jing bơngai ‘nao boih.” (II Kôrintô 5:17)

Kơplah bơ̆n ăn Kră Yang pơgơ̆r păng pơmkiơ̆ Kră Yang Yêsu, bơ̆n jing bơngai ‘nao boih, ‘Bok Kei-Dei pơjing bơ̆n hơbŏ thoi Sư, ăn kơ bơ̆n rai đunh rai hơgei hlôh tôm tơdrong Sư (Kôlôsê 3:10). Tơdrong ‘mêm tơplih kơ tơdrong gơnam, tơdrong hơđơ̆ng tơplih ăn kơ tơdrong hiơ̆k bơngơ̆t, tơdrong khĕnh đei ‘bơ̆ jing iơ̆m dim, tơdrong arăng kơ̆l jing huay yua kơ đơ̆ng tơdrong ‘mêm păng tơdrong pơlung. Kiơ̆ kơ jơ năr, tơdrong tơplih rơđah hơđăl truh tơ lu bơngai đêl băt kơ bơ̆n kŭm hlĭch yua kơ tơdrong ‘Bok Kei Dei bơ̆jang.

Blŭng-a Kră Yang Yêsu khan kơ bơngai măt tol thoi âu: “Sư măt tol ưh kơ sĭ yua kơ đơ̆ng sư pơm yoch, dah đơ̆ng mĕ ‘bă sư pơm yoch ôh. Sư măt tol yua kơ ‘Bok Kei-Dei wă tơ’bôh kơ đe tơdrong mơsêh mơyang Sư wă pơklaih bơngai âu.”(Yôhan 9:3)

Kơplah bơ̆n ăn Kră Yang Yêsu pơgơ̆r păng pơjao đĭ dôm lu tơdrong gleh trăp ăn kơ Sư, Sư gô tơplih tơdrong arih lu bơ̆n ‘net ‘net. Tơdrong tơplih ‘noh ưh kơ sĭ lăp ăn kơ bơ̆n đei yua, tơdrong noh kŭm tơgŭm bơngai nai ‘bôh tơdrong mơsêh mơyang păng tơdrong ‘mêm ‘Bok Kei Dei oei bơ̆jang. Tơdrong arih bơ̆n jing minh tơdrong pơm kơdranh arih kơ tơdrong ‘mêm păng tơpăt Kră Yang. Truh tơ minh năr, rim ‘nu lu bơ̆n gơh roi pơlơ̆k kơ tơdrong tơplih hlĭch chrơp kơdih bơ̆n, nhen thoi bơngai măt tol sơnăm sơ̆, minh tơdrong hơmon ‘lơ̆ng hloh kơ tơdrong tơdă hơmet hnam lăm kơpal teh âu.

“Bơnê bĕ kơ Kră Yang, yua kơ Sư pơm ‘lơ̆ng;Tơdrong ‘mêm Sư oei oei ling-lang.Ăn kơ lu bơngai mă Kră Yang huai iŏk boih.Lu bơngai mă đei dŏng pơklaih đơ̆ng ti lu bơngai ayăt pơjuă, pơma bĕ thoi âu.” (Hơriso 107:1-2)

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Ih jơ̆ ‘Bok Kei Dei kơ tơdrong pơklaih păng tơplih. Rim năr yak năm hăm Ih, apinh ăn kơ kon rai nhen thoi Ih hloh, wă kơ plei Yang Bơhngol ‘Lơ̆ng rai tơ’bôh hơđăl lăm chăl arih kon. Apinh ăn kơ kon đei jơhngơ̆m pơ̆n nuih păng hlôh wao wă pơm kơdranh kơ tơdrong ‘mêm păng tơdrong ‘mêm Ih đei tơplih chăl arih kon. Kon kŭp kơ̆l krao khan hăm anăn Yang Yêsu Krist, A-men

Ơ lu bơngai mơ̆ng mă ‘mêm kơeng, nĕ kơ lăng tơdrong pơchah pơchek hlôi boih ngeh kơdih jing minh anih pơm hnam hŭt lê̆ thoi juơ. Hăm Kră Yang Yêsu, ưh kơđei tơdrong arih ayơ ưh kơ đei yua. Kră Yang jơ̆ minh ‘nu bơngai chhơ̆ pơjing hnam gơh hơgei, mơ̆t lăm rim anih hlơp lăm chăl arih lu bơ̆n, hleh lê̆ tơdrong răm, păng adrin tơplih jing bơngai plơ̆ng. Tơdrong tơplih noh ưh kơ lăp minh măng, tơdrong tơplih noh đơ̆ng lăm rim năr bơ̆n ăn kơ Kră Yang pơgơ̆r păng yak năm hăm Sư. Athei ăn Kră Yang tek pơchak tơnăr tơdrong yoch, tơdrong pơang păng hli tơrơ, wă kơ tơdrong hơdah Kră Yang pơchrang, tơplih buăl jing minh ‘nu bơngai plơ̆ng ‘lơ̆ng rŏ lăm teh đak âu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.