“Yua anăn tơdrong ‘mêm” jơ̆ minh nơ̆r bơ̆n juăt kơ mơ̆ng kơplah minh ‘nu bơngai wă bơwei, hŭt akâu kơdih, dah rơih iŏk minh tơdrong kiơ ăn kơ bơngai sư ‘mêm. Mă ih tam đei layơ jet lăng: Tơdrong inh pơm yua anăn tơdrong ‘mêm noh, tơpă jơ̆ tơdrong ‘lơ̆ng trŏ ưh? Đei tơdrong ‘mêm ăn kơ kon bơngai rai wơ̆ ‘lŏ, mă kư̆m đei tơdrong ‘mêm pơm kơ kon bơngai pơm kư̆ kă, pơrăm tơhiong akâu sư kơdih, păng rŏ lăng pơm tơplơ̆ kơ tơdrong ‘lơ̆ng mă Kră Yang wă ăn kơ bơ̆n.

Năr ‘nâu, năr 09/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai YUA KƠ ‘MÊM

“Bơngai bu ‘mêm kơ ‘Bok Kei-Dei hăm bôl buăl sư… sư ưh kơ pơ’lŏ, sư ưh kơ pơ’brơh kơ đe, sư mơ̆ng kơ đe, sư ưh kơ pơjah, sư ưh kơ lah jô̆ yo kơ đe pơm kơnê̆ kơ sư ôh, sư ưh kơ lăp đon kơ tơdrong kơnê̆, sư lăp đon kơ tơdrong ‘lơ̆ng tơpăt.” ( I Kôrintô 13:4a,5,6)

“Sôl wơh bơngai năm răp tơ hnam Đawit wă kơ pơgê đơ̆ng rŏng noh gơh pơlôch sư hloi, mă-lei Mikal akăn Đawit roi ăn kơ sư băt: “Tơdah măng ‘nâu ih ưh kơ kơdâu klĕnh, na pơgê dơning đe gô pơlôch ih.” Mikal tơjur Đawit trong ‘măng-‘mŏk; sư kơdâu klĕnh păng hlôi hloi.” (I Samuel 19:1-17)

Mỹ Ngọc jơ̆ minh ‘nu oh drŏ-kăn mă juăt dêh hăm inh lăm khŭl hŏk pơhrăm Nơ̆r ‘Bok Kei-Dei. Tơdrong ŭnh om sư đei ma sư hơmet pơjao ăn. Lăm tơdrong noh, Mỹ Ngọc chu yom tôm nơ̆r ma sư păng sư bơnê tơpă yua kơ ma sư tơgŭm ăn kơ sư đei tơdrong gơh năm oei tơ dêh char ‘nao. Hlôi et pơkong tih, chơt hiôk păng ‘bar pah adrĕch adrŭng akŭm hơdai hăm jơhngơ̆m hiôk, Mỹ Ngọc pơtơm hơmet hnam dơnŏ sư tơ dêh char tơmoi, lăm tơdrong ‘mêm păng tơdrong tơgŭm hăm đĭ jơhngơ̆m đơ̆ng hnam dơnŏ ma sư păng lu adrĕch gah mĕ sư.

Mă-lei kiơ̆ kơ khei năr, tơdrong ưh kơ pôm đon ưh kơ ‘mêm băl lăm hnam dơnŏ sư rai đei bơih. Dôm tơdrong pơma dih băl lăm hnam dơnŏ pơm kơ tơdrong arih hnam dơnŏ ưh pă thoi tơdrong Mỹ Ngọc sơ̆ hơmĕng chang gô. Dôm tơdrong noh rai pă đĕi gơh ôn hlơp kơ ma sư dơ̆ng bơih. Dah adrol ki, ma sư jơ̆ bơngai hơmet ŭnh ôm ăn kơ Mỹ Ngọc păng jang tơgŭm ‘lơ̆ng, mă dang ei, kơplah sư ‘bôh dôm tơdrong ưh kơ pôm đon, ưh kơ ‘mêm băl lăm hnam dơnŏ Mỹ Ngọc, nơ̆r ma sư tơtă jơ̆ “Dah kon oei hăm sư ưh pă hiôk bơih, achăng lê̆ sư bĕ.”

Kơplah mơ̆ng dôm nơ̆r tơtă thoi noh, Mỹ Ngọc tơchĕng lơ păng sư ngăn đĕch. Yua kơ lăm dôm tơdrong pơma tơhil dih băl, dôm tơdrong pơchah pơchek lăm jơhngơ̆m păng jơhngơ̆m rơdu kơdŭn tơrŏng, sư kư̆m ưh kơ ngeh tơdrong noh truh: sư oei ‘mêm dêh kơ klo sư.

Lăm jơ năr noh, đơ̆ng minh tơdrong pơgơ̆p juăt lăm khŭl hŏk pơhrăm Nơ̆r ‘Bok Kei-Dei, inh păng Mỹ Ngọc rai đunh rai juăt hloh. Dôm tơdrong lăm pơjing ŭnh ôm ba nhi năm hơdai lăng chă păng hŏk pơhrăm Nơ̆r Kră Yang. Kơplah hŏk pơhrăm hlôh kơ tơdrong kơnhăm ‘Bok Kei-Dei wă păng Sư đei pơjing ŭnh om đơ̆ng blŭng, Nơ̆r Kră Yang pơchrang hơdah mơ̆t lăm jơhngơ̆m Mỹ Ngọc. Lơ wơ̆t, sư sơ’ngon păng tơchĕng lơ, Mỹ Ngọc roi kơ inh mơ̆ng, dôm tơdrong ôn hlơp lăm jơhngơ̆m, gah tơdrong ‘mêm mă Kră Yang đei dan ăn lăm sư wă ‘mêm kơ klo sư. Đơ̆ng dôm năr sư ưh tam băt kơ Kră Yang, tơdrong sư tơchĕng gah tơdrong ŭnh om jơ̆ trong ba sư năm tơ dêh char mơdrŏng, ŭnh om jơ̆ trong ba sư lĕch đơ̆ng dôm lu khôi juăt lăm hnam dơnŏ, ŭnh om jơ̆ thoi ‘bar pah pơnăr hơmĕng ba sư păr tơ ataih păng kơjung … Mă-lei đĭ-đăng dôm tơdrong tơchĕng noh đei tơplih đơ̆ng Nơ̆r Kră Yang pơchrang hơdah.

Inh pơjao dôm tơdrong kơ’bah đơ̆ng Mỹ Ngọc tơ Kră Yang lăm jơ krao khan tơgŭm. Na tơdrong hơ’mon đei chih lăm Sơ̆p hla bơar ‘Bok Kei-Dei, I Samuel 18, tơ’bôh tơdrong arih Mikai, kon drŏ-kăn pơtao Sôl, pơm kơ inh tơchĕng lơ năr.
Sơ̆p hla bơar ‘Bok Kei-Dei khan: “Mă-lei Mikai, kon drŏ-kăn Sôl, hưch kơ Đawit.” (ISamuel 18:20)

Đơ̆ng blŭng a ‘Bok Kei-Dei pơjing tôm tơdrong, Sư đei hơmet ăn kơ drŏ-kăn ‘lơ̆ng hơbŏ đơ̆ng Sư wă kơ lu sư pŭ iŏk jang tơgŭm. Pran kơtang đơ̆ng tơdrong ‘mêm đei tơgŭm Mikai gơh pơm hloh kơ tơdrong pơgơ̆r đơ̆ng pơtao păng hloh kơ nơ̆r pơgơ̆r đơ̆ng ‘bă sư. Sư rơih iŏk jơhngơ̆m pơ̆n nuih wă dŏng iŏk tơdrong arih Đawit: “Mikal tơjur Đawit trong ‘măng-‘mŏk; sư kơdâu klĕnh păng hlôi hloi.” (I Samuel 19:12)

Tơdrong Mikai pơm, pơm kơ inh ‘blŏk kơ Mỹ Ngọc. Lui kơ Kră Yang păng hŏk băt kơ ‘Bok Kei-Dei pơjing kon bơngai ăn kơ lu sư arih lăm tơdrong pơgơ̆p hăm Sư păng pơgơ̆p dih băl, Mỹ Ngọc đei pơ̆n nuih rơih iŏk. Sư chơchă tơdrong jang ăn kơ akâu sư kơdih, na rơih lĕch đơ̆ng hnam mă ma sư ăn kơ klo akăn sư. Sư drơ̆gn iŏk tơdrong pơmat blŭn a, ‘net ‘net huay pă gơnang kơ đe nai.

Kư̆m thoi Mikai hrĕp hreh ưh kơ chu kiơ̆ nơ̆r pơtao wă bơwei ŭnh om sư păng dŏng tơdrong arih Đawit, Mỹ Ngọc kư̆m hrĕp hreh hơmet dôm tơdrong jang huay pă gơneh gơnơm kơ ma sư. Sư tơchĕng kơ dôm nơ̆r pơma athei achăng klo, păng krăng kơchăng chu iŏk dôm tơdrong pơmat đơ̆ng gah hnam dơnŏ, wă bơwei tơdrong ŭnh om kiơ̆ tơdrong ‘lơ̆ng mă ‘Bok Kei-Dei đei dan ăn, Tơ’ngla mă sư ‘mêm păng kơkuh kơ Sư.

Mỹ Ngọc đei rơih pơm kiơ̆ Nơ̆r Kră Yang bơtho: “Akăn ưh kơ gơh achăng klo… Klo kư̆m ưh kơ gơh achăng akăn… Yua kơ ‘Bok Kei-Dei krao lu bơ̆n wă oei hiôk-hian… Rim ‘nu athei arih kiơ̆ tơdrong ‘Bok Kei-Dei ăn păng kiơ̆ nơ̆r Sư krao.” (I Kôrintô 7:10-17)

Mă-lei tơdrong arih Mikai sư đei dŏng Đawit, ning-mônh yak năm tơ pah nai, pơm kơ inh oei tơchĕng. Sơ̆p hla bơar ‘Bok Kei-Dei roi lơ tơdrong Mikai pơm mă ưh kơ kiơ̆ kơ ‘Bok Kei-Dei wă (I Samuel 19). Minh wơ̆t sư pơ̆n nuih lăm tơdrong ‘mêm ưh kơ đei bơwei tôm tơdrong arih Mikai, na tơdrong arih sư rai weh ataih đơ̆ng tơdrong ‘lơ̆ng trŏ, oei lăm tơpang ti lu bơngai pơgơ̆r (I Samuel 25:44; II Samuel 6:20-23).

Tơdrong âu pơm kơ inh kơchăng tơpă lăm trong inh hơdai hăm Mỹ Ngọc chơchă Kră Yang. Bre mai oh nhi mơn băt, wă kơ gơh lĕch đơ̆ng tơdrong kơnê̆ pơgơ̆r, tơdrong ‘mêm lăm tơdrong ŭnh om kiơ̆ kơ Kră Yang wă, athei ling-lang oei lăm Sư pơgơ̆r păng bơtho tơ’bôh, yua kơ Sư jơ̆ Tơ’ngla ‘mêm mơnat.

Yua kơ: “Bơngai bu ‘mêm kơ ‘Bok Kei-Dei hăm bôl buăl sư… sư ưh kơ pơ’brơh kơ đe, sư mơ̆ng kơ đe, sư ưh kơ pơjah, jơhngơ̆m sư huay kơ ‘bônh kơ blĕk… sư ưh kơ lăp đon kơ tơdrong kơnê̆, sư lăp đon kơ tơdrong ‘lơ̆ng tơpăt.” (I Kôrintô 13:4a,5-6)

Kư̆m thoi kơdih inh đei păng oei adrin arih hŏk pơhrăm gah tơdrong ‘mêm đơ̆ng Kră Yang mă Sư tơ’bôh lăm ŭnh om inh, bre mai oh nhi lui gơnang kơ ‘Bă ăn kơ trong tơ anăp pơmat tat gah tơdrong ŭnh om Mỹ Ngọc.

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Ih yua kơ Nơ̆r Ih arih lăm tơdrong arih kon. Apinh Ih huay kơ jô̆ yo kơ kon, yua kơ lơ wơ̆t kon lăp đon kơ dôm tơdrong ‘lơ̆ng kon pơm kơdih, mă tơdrong arih kon tam mă pơjao đĭ kơ Ih. Ơ Kră Yang! Apinh Nơ̆r Ih tơplih kon, păng tơgŭm kon ăn kơ đon tơchĕng, nơ̆r pơma păng dôm tơdrong kon pơm, đĭ-đăng lĕch đơ̆ng tơdrong ‘mêm tơpă đơ̆ng Ih. Apinh tơdrong arih kon tơ’bôh ăn kơ đe băt kơ kon jơ̆ kon Ih tơpă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdrong ‘mêm tơpă ưh kơ kư̆ kơ tơ’bôh dôm lu tơdrong bơ̆n pơm ăn kơ bơngai bơ̆n ‘mêm đĕch, mă kư̆m athei lăng tơdrong noh đei kiơ̆ Nơ̆r Kră Yang dah ưh. Kư̆m đei tơdrong ‘mêm wă kơ bơ̆n pơ̆n nuih rơih iŏk, lĕch đơ̆ng tơdrong gơneh gơnơm kơ đe, tŭk lê̆ dôm tơdrong mă ưh kơ ‘lơ̆ng, păng kơjăp lăm tơdrong Kră Yang lăp đon. Năr âu, athei lăng dôm lu tơdrong pơgơ̆p mă jê̆ hloh hăm ih. Ih oei ‘mêm hăm jơhngơ̆m ih kơdih, dah ih oei hŏk pơhrăm wă ‘mêm kiơ̆ thoi Kră Yang bơtho? Athei ăn kơ Nơ̆r Kră Yang pơchrang hơdah lăm rim tơdrong ih tơchĕng, rim nơ̆r ih pơma păng rim tơdrong ih rơih iŏk, ăn kơ tơdrong ‘mêm huay kơ jing yua kơ bơ̆n rơih iŏk tơdrong kư̆ kă, mă jing tơdrong tơ’bôh tơdrong ‘mêm đơ̆ng Kră Yang păng tơ’bôh ăn kơ đe băt kơ ih jơ̆ kon Kră Yang tơpă.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.