Bơ̆n bơngai kiơ̆ Kră Yang, rŏ lăng đei lơ wơ̆t bơ̆n mơ̆ng lu nơ̆r thoi âu: “Kră Yang đei pơma kơ inh,” dah “Athei hŏk mơ̆ng kơ ‘bơ̆r Kră Yang pơma.” Mă tơdrong noh wă khan thoi yơ? ‘Bơ̆r Kră Yang pơma jơ̆ minh nơ̆r jơwa truh tơ lăm đon tơchĕng bơ̆n, dah jơ̆ minh tơdrong jơhngơ̆m mơn kơ phara? Tơdah trŏ kơ thoi noh, na bơ̆n băt thoi yơ tơdrong noh jơ̆ ‘bơ̆r Kră Yang pơma, ưh kơ đơ̆ng bơ̆n kơdih tơchĕng? Na tơdrong kăl hloh dơ̆ng, bu mă tơpă băt kơ ‘bơ̆r Kră Yang pơma?

Năr ‘nâu, năr 10/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Dina Sleiman kơ̆l ‘bai TRIU INH BĂT KƠ ‘BƠ̆R PƠMA INH

“Dah iĕm triu Inh tơpă lei iĕm băt kơ ‘bơ̆r Inh pơma hloi păng Inh kư̆m băt kơ iĕm mơ̆n, na iĕm kiơ̆ Inh hloi. Inh ăn kơ triu Inh arih ling-lang, sư ưh kơ layơ lôch răm ôh. Ưh kơ đei bu kĕ tơgar iŏk sư đơ̆ng ti Inh.” (Yôhan 10:27-28)

Đơ̆ng inh oei hơ’lơ̆p, inh juăt tơchĕng tơdrong krao khan kư̆ pơma hăm ‘Bok Kei-Dei đĕch. Mă rai đunh inh yak kiơ̆ Kră Yang păng rai wơ̆ ‘lŏ lăm tơdrong lui, inh rai băt kơ tơdrong krao khan kư̆m jơ̆ pơhrăm mơ̆ng Sư mơ̆n. Mă tơdrong mơ̆ng kơ ‘bơ̆r Kră Yang pơma tơpă wă khan liơ?

Wă kơ tơl tơdrong jet âu, bơ̆n kăl kơ lăng Nơ̆r Kră Yang Yêsu lăm Yôhan 10.
Kơplah noh, Kră Yang Yêsu oei tơ hnam akŭm ‘Bok Kei-Dei tơm lăm Pơlei Jêrusalem. Lu bơngai Juđê akŭm tăp dăr kơ Sư păng jet Sư: “Dah Ih ‘Bok Krist mă ‘Bok Kei-Dei wơh wă pơgơ̆r nhôn Ih jah roi kơ nhôn bĕ wă kơ nhôn băt kơ Ih.” (trong24). Kră Yang Yêsu roi kơ lu sư păng kư̆m đei pơdah kơ lu sư boih, păng dôm tơdrong mơsêh mơyang ‘Bă Sư ăn kơ Sư pơm kư̆m tơ’bôh ăn kơ lu sư băt kơ Sư jơ̆ ‘Bok Krist. Mă-lei lu sư ưh kơ lui ngeh. Na Sư khan: “Mă-lei lu iĕm kuă kơ lui, kơlih lu iĕm ưh kơ trŏ kơ triu Inh.” ( trong26)

Kră Yang Yêsu oei tơ’bôh gah jơhngơ̆m kơjăp đơ̆ng lu bơngai mă đei mơ̆ng Sư. Lu sư đei mơ̆ng Sư bơtho, đei ‘bôh lơ tơdrong hlĭch chrơp păng mơsêh mơyang đơ̆ng Sư. Tơdrong ưh kơ sĭ lu sư ưh kơ ‘bôh hăm măt, mă yua kơ lăm jơhngơ̆m lu sư. Lu sư ưh kơ lui yua kơ lu sư ưh kơ lăm Kră Yang. Yua kơ thoi noh Kră Yang Yêsu khan: “Dah iĕm triu Inh tơpă lei iĕm băt kơ ‘bơ̆r Inh pơma hloi păng Inh kư̆m băt kơ iĕm mơ̆n, na iĕm kiơ̆ Inh hloi.” ( trong 27)

Đơ̆ng nơ̆r Sư pơma âu, Kră Yang Yêsu bơtho gah tơdrong triu hăm Tơ’ngla wei triu. Triu gah Tơ’ngla sư. Triu băt kơ ‘bơ̆r Tơ’ngla sư yua kơ Tơ’ngla sư đei băt kơ lu triu noh adrol. Păng yua kơ triu băt kơ Tơ’ngla sư, na lu sư yak kiơ̆ đơ̆ng rŏng Sư.

Tơdrong âu tơgŭm bơ̆n hlôh trŏ gah tơdrong “mơ̆ng kơ ‘bơ̆r Kră Yang pơma.” Mơ̆ng kơ ‘bơ̆r Kră Yang pơma ưh kơ adrin chơchă tơdrong phara kiơ, dah chă minh nơ̆r pơma khan ‘ngoaih kơ Sơ̆p hla bơar ‘Bok Kei-Dei ôh. Mă Kră Yang Yêsu wă kơ lu bơ̆n pơgơ̆p hăm Sư adrol hloh. Minh ‘nu bơngai rŏ lăng mơ̆ng lơ tơdrong gah Kră Yang, mă ưh kơ băt kơ ‘bơ̆r Sư tơpă, tơdah bơngai noh ưh tam mă lăm Kră Yang tơpă.

Na hrei âu bơ̆n mơ̆ng ‘bơ̆r Kră Yang pơma hăm tơdrong kiơ?

Noh jơ̆ đơ̆ng lu bơ̆n đŏk păng tơchĕng pơwao Nơ̆r Kră Yang. ‘Bơ̆r Sư pơma kơ bơ̆n hăm Sơ̆p hla bơar ‘Bok Kei-Dei. Na Nơ̆r Kră Yang, Yang Bơhngol ‘Lơ̆ng tơgŭm bơ̆n hlôh tơdrong ‘lơ̆ng tơpăt, lui kơjăp păng pơm kiơ̆ Nơ̆r noh lăm tơdrong arih bơ̆n. Tơm đơ̆ng ‘bơ̆r Kră Yang pơma lăm Sơ̆p hla bơar ‘Bok Kei-Dei gô tơ’bôh kơ bơ̆n gah tơdrong yoch, pơlung bơ̆n kơplah jơhngơ̆m rơdu tơrăn, păng chông anhăk bơ̆n yak lăm tơdrong arih ‘lơ̆ng rơgoh.

Kơplah bơ̆n hlôh tơdrong noh, bơ̆n gô băt kơ tơdrong krao khan ưh kơ sĭ pơma hăm Kră Yang đĕch. Lăm Hơriso 139:4 đei chih khan: “Adrol kơ hơpiĕt inh wă pơma. Ih băt đĭ tôm tĕch boih, ơ Kră Yang.” Tơdrong âu wă khan ‘Bok Kei-Dei đei băt boih dôm tơdrong bơ̆n kăl yua, dôm tơdrong bơ̆n tơchĕng păng dôm tơdrong anat lăm jơhngơ̆m bơ̆n adrol kơ bơ̆n krao khan apinh Sư. Tơdrong noh ưh kơ khan bơ̆n ưh pă kăl kơ krao khan dơ̆ng bơih ôh, mă tơ’blŏk kơ bơ̆n băt kơ tơdrong krao khan kư̆m jơ̆ bơ̆n hrĕp hrĕh ‘bơ̆t anăp Kră Yang, ăn kơ Nơ̆r Sư bơtho jơhngơ̆m bơ̆n.

Mă-lei, lơ wơ̆t bơ̆n ưh kơ ‘măn jơ wă mơ̆ng Kră Yang. Rŏ lăng yua kơ tơdrong arih bơ̆n lơ tơdrong jang, dah lu bơ̆n wă hăt hot kơ hơmet dôm tơdrong truh ưh kơ ‘lơ̆ng hloh kơ hŏk băt tơdrong Kră Yang wă.

Na bơ̆n athei pơhrăm pơm tơdrong âu thoi yơ?

Minh tơdrong hŏk pơm kiơ̆ noh đŏk pơhiơ̆ minh trong lăm Sơ̆p hla bơar ‘Bok Kei-Dei. ‘Nĕ kơ đŏk hăt hot, mă athei tơchĕng pơwao rim nơ̆r, krao khan apinh Yang Bơhngol ‘Lơ̆ng pơchrang hơdah ăn kơ bơ̆n hlôh, na ‘măn jơ hrĕp hrĕh, tơchĕng pơwao tơdrong Kră Yang oei bơtho bơ̆n. Ih kư̆m chih iŏk dôm tơdrong ih hŏk iŏk đơ̆ng Nơ̆r Kră Yang, dôm nơ̆r krao khan, dah dôm tơdrong ‘lơ̆ng tơpăt mă Yang Bơhngol ‘Lơ̆ng tơgŭm ăn kơ ih hlôh băt.

Mă-lei, đei minh nơ̆r jet kăl hloh noh jơ̆: Bơ̆n đei băt thoi yơ tơdrong bơ̆n mơ̆ng noh mă lĕch đơ̆ng Kră Yang?

Mă adrol noh jơ̆ ‘Bok Kei-Dei ưh kơ đei layơ chông anhăk bơ̆n năm kiơ̆ tơdrong mă ‘nguaih kơ Sơ̆p hla bơar ‘Bok Kei-Dei ôh. Rim tơdrong Yang Bơhngol ‘Lơ̆ng chông anhăk bơ̆n trŏ hăm Nơ̆r Kră Yang păng chông bơ̆n năm jê̆ Yêsu Krist rai hloh. Kư̆m đei Sư pơlung, tưk tơiung bơ̆n, mă kư̆m đei Sư bơtho tơ’bôh tơdrong yoch bơ̆n. Mă khan hăm tơdrong thoi yơ, tơdrong kơnhăm đơ̆ng Sư wă chông bơ̆n năm tơ tơdrong tơbral păng arih rai ‘lơ̆ng rơgoh hloh.

Tơplơ̆ dơ̆ng, dôm tơdrong bơ̆n kơdih tơchĕng, lơ wơ̆t ngăl kiơ̆ kơ jơhngơ̆m, dôm tơdrong hlôi đei păng dôm tơdrong arih. Yua kơ thoi noh, dôm tơdrong tơchĕng pơwao noh athei lăng hăm trŏ kơ thoi Sơ̆p hla bơar ‘Bok Kei-Dei, tơplih kơ lăng nhen thoi ‘bơ̆r Kră Yang pơma.

Gah Satan, sư bơngai hơlĕnh păng bơngai bâu roi kơnê̆ kơ bơ̆n, kư̆m jơ̆ bơngai chă tơtông mă wă tơtông iŏk păng pơrăm. Sư tơplĭh tơdrong ‘lơ̆ng tơpăt, sư rĕi tơdrong hli, sơ’ngon păng sek tơlang. Tơdrong bơtho khan đơ̆ng Yang Bơhngol ‘Lơ̆ng chông bơngai lui năm tơ tơdrong tơbral păng tơplih jing ‘nao, mă tơdrong sek tơlang đơ̆ng Satan wă tơweh bơ̆n ataih đơ̆ng Kră Yang pơm kơ bơ̆n hiong tơdrong gơnang hơmĕng lăm Kră Yang.

Kră Yang Yêsu pơtôch nơ̆r Sư pơma hăm minh nơ̆r pơlung: “Inh ăn kơ triu Inh arih ling-lang, sư ưh kơ layơ lôch răm ôh. Ưh kơ đei bu kĕ tơgar iŏk sư đơ̆ng ti Inh.” (trong 28)

Tơ’ngla wei triu ling-lang băt kơ triu Sư păng wei-lăng lu sư lăm ti Sư. Yua kơ thoi noh, tơplih kơ hiơ̆k bơngơ̆t bơ̆n đei mơ̆ng trŏ ‘bơ̆r Kră Yang pơma dah ưh, athei hŏk pơhrăm oei jê̆ Tơ’ngla wei triu. Kơplah rai đŏk, hŏk, tơchĕng pơwao păng chu kiơ̆ Sơ̆p hla bơar ‘Bok Kei-Dei rim năr, ih rai băt nhen kơ ‘bơ̆r Tơ’ngla wei triu păng jơhngơ̆m hiôk kiơ̆ tơdrong Sư chông anhăk ih.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih, yua kơ tơdrong ‘mêm mơnat đơ̆ng Ih na kon đei jing triu lăm tơpôl Ih. Kon băt bơnê kơ Ih yua kơ rim năr lăm tơdrong arih, kon huay kơ minh drô̆ ôh, mă ling-lang đei Nơ̆r Ih chông anhăk păng pơlung kon. Ơ Kră Yang, tơdah mă kon oei wơ̆l jrok, jơhngơ̆m rơdu tơrăn, dah oei lăm dôm tơdrong lăng nhen thoi hmă đĕch lăm tơdrong arih, apinh Ih tơgŭm kon ling-lang băt kơ ‘bơ̆r Ih pơma, lui kơjăp kơ tơdrong Ih chông anhăk, păng chu yom kiơ̆ Ih. Yua kơ kon băt Ih jơ̆ Bơngai wei triu ‘lơ̆ng tơpăt mă wei-lăng tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘nĕ kơ năm tơ Kră Yang yua kơ wă roi đĭ dôm tơdrong ih kăl yua đĕch, mă athei pơih Sơ̆p hla bơar ‘Bok Kei-Dei păng mơ̆ng tơdrong Sư wă bơtho ih. Adrol kơ wă pơtơm đơ̆ng blŭng a dah adrol kơ pơtôch kơ minh năr, athei năm tơ Nơ̆r Kră Yang hăm jơhngơ̆m iŏk đon ala, krao khan apinh Kră Yang tơ’bôh ăn kơ ih băt tơdrong Sư wă bơtho ih, păng tơdrong kiơ ih kăl kơ tơplĭh. Kơplah ih hrĕp hreh oei jê̆ kơ Kră Yang na Nơ̆r Sư păng pơm kiơ̆ dôm tơdrong ih đei hŏk iŏk, ih gô rai băt nhen kơ ‘bơ̆r Tơ’ngla wei triu păng hiôk chơt yak kiơ̆ tơdrong Sư chông anhăk ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.