Lăm tŏk bŏk pơlei tih, kon bơngai oei adrin pơm pơjing hnam tih kơjung truh tơ plĕnh, lăng noh thoi kơ tơdrong pơ-ang đơ̆ng kon bơngai. Bơ̆n lui ngeh kơ dôm lu hnam pơm hăm mam păng ‘bê-tŏng kơjăp noh ưh kơ đei tơdrong kiơ gơh pơrăm. Mă-lei tơdrong hlôi đei tơ’bôh ăn kơ bơ̆n lơ tơdrong hŏk pơhrăm chhŭr nuih dêh: ưh kơ đei minh tơdrong kơjăp kiơ đơ̆ng kon bơngai pơm mă kĕ găn dôm lu tơdrong pơrăm đơ̆ng lăm bơhngol. Kơplah dôm lu tơdrong bơ̆n sơ̆ lui khan “khŏm khŏm” rŏ lăng rŭng răng lăp iĕ đĕch, jơhngơ̆m lu bơ̆n chhŭr nuih na jet: Kơđông kơjăp hơyơ mă ưh kơ layơ hơlŭng, ăn kơ bơhngol bơ̆n đei anih kơ’nơp hơđơ̆ng?

Năr ‘nâu, năr 11/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Dianne Neal Matthews kơ̆l ‘bai KƠĐÔNG KƠJĂP

“Anăn Kră Yang jing kơđông kơjăp, Lu bơngai tơpăt băt kơdâu tơ noh đei anih kơ’nơp hơđơ̆ng.” (Tơdrong Pơđơ̆k 18:10)

Năr 11 khei 9 sơnăm 2001, lơ rơbâu rơbâu bơngai lăng tivi jơ̆p kơ teh đak sơleng kơ đon ‘bôh minh tơdrong hli dêh. Dôm lu gre păr chơ bơngai păng tơmam đei lu bơngai kơnê̆ rôp iŏk na păr pơ̆ng tơ hnam kơjung tŏk bŏk pơlei tơ New York, păng tơ Hnam ‘Bok yŏng bơ̆jang tơ Washington, D.C. Tơdrong noh sơ’ngon dêh: dang 2.800 ‘nu bơngai lôch lăm tơdrong pơrăm tih mă Osama bin Laden păng khŭl al Qaeda đei pơm.

Kơplah noh, lu kră pơgơ̆r đơ̆ng lơ dêh char đei pơtruh nơ̆r pơlung jơhngơ̆m păng apinh wă tơgŭm dêh char My. Mă-lei đơ̆ng rŏng kơ noh minh ‘bar jơ, bơngai lăng kơmăi phĭn rup dơ̆ng lăng sơleng kơ đon ‘bôh minh khŭl bơngai Palestine jrĕo ôrr hiôk chơt yua kơ tơdrong “jei bơih” đơ̆ng tơdrong pơm pơrăm noh. Tơ dôm lu anih pơma pơjah lăm măng tơ Trung Quôc, kư̆m đei ưh kơ tŏ sĕt lu bơngai lăp đon kơ tơdrong noh, păng jô̆ noh jơ̆ minh tơdrong pơrăm tih kơ “jơhngơ̆m pơang lăm dêh char My”. Lơ bơngai tơ lu dêh char nai kư̆m tơ’bôh jơhngơ̆m băt mơnat kơ lu bơngai năm pơrăm hloh kơ băt mơnat kơ lu bơngai hiong răm. Hăm lu bơngai dêh char My, tơdrong âu ưh kơ pơm kơ lu sư sơleng kơ đon yua kơ tơdrong pơrăm mă ‘bĕnh kơ blĕk hil pơjah dih băl ôh. Lu sư rai sơleng hloh dơ̆ng kơplah băt truh kơ lu bơngai jơ̆p kơ teh đak đei jơhngơ̆m blĕk kơ dêh char lu sư tih thoi yơ.

Kơplah ‘blŏk tơdrong truh tih noh, bơ̆n athei ‘blŏk kơ ‘Bok Kei-Dei oei pơgơ̆r tôm tơdrong. Mă-lei Sơ̆p hla bơar ‘Bok Kei-Dei kư̆m roi ăn kơ bơ̆n băt: “Păng bơ̆n kư̆m băt bơ̆n kon ‘Bok Kei-Dei boih păng bơ̆n băt đĭ-đăng dôm lu bơngai mă lĕch đơ̆ng ala teh âu mă ưh kơ lui kơ Kon Sư, yang Satan pơgơ̆r lu sư” (I Yôhan 5:19). Yua kơ thoi noh, kơplah kon bơngai ưh kơ wă lui kơ ‘Bok Kei-Dei păng arih kiơ̆ tơdrong akâu sư kơdih wă, lu sư rai jing tơmam ăn kơ yang kơnê̆ yua pơm tơdrong kơnê̆. Satan lăp đon dêh kơplah rĕi tơdrong kơnê̆, pơhlŭ, tơhil pơjah pơjăng rai tih hloh dơ̆ng, pơm kơ lu bơngai mă weh ataih đơ̆ng tơdrong ‘lơ̆ng trŏ, tŭk lê̆ akâu kơdih sư, wă pơlôch lơ rơbâu bơngai huay kơ pơm yoch – lu bơngai mă oei adrin bơ̆jang rim năr.

Bơ̆n kon ‘Bok Kei-Dei, rŏ lăng lu bơ̆n hiơt kơ Satan ayăt kơ bơ̆n tih thoi yơ. Yua kơ sư ưh kơ gơh tơgar iŏk bơhngol lu bơngai mă jing kon ‘Bok Kei-Dei, sư blĕk chă tôm trong hơlĕnh pơdăr wă pơrăm tơdrong arih bơ̆n, thoi minh ‘nu bơngai chă pơrăm tơdrong arih đe.

Mă tơpă, lu bơngai chă pơrăm đe lăm tơdrong ‘năr 11 khĕi 9 đei hŏk pơhrăm gah gre păr tơ dêh char My. Mă sơleng kơ đon dêh, lu sư yua tơdrong hlôh wao păng tơdrong gơh hơgei mă đei hŏk noh wă pơm tơdrong pơrăm dêh char My! Satan kư̆m juăt yua trong thoi noh. Sư yua dôm tơdrong Kră Yang ăn, tơdrong gơh hơgei păng dôm tơmam mă ‘Bok Kei-Dei ăn kơ bơ̆n, wă pơhlŭ bơ̆n yua dôm lu tơdrong noh kiơ̆ kơ tơdrong mă ưh kơ trŏ thoi Kră Yang wă.

Lu bơngai chă pơrăm đe juăt kơ chă trong mơ̆t ôn hlơp lăm khŭl bơngai mă lu sư wă pơrăm. Satan kư̆m ưh kơ layơ pơdơh chă trong mơ̆t ôn hlơp lăm Hnam Akŭm, lăm hnam dơnŏ păng truh tơ lăm đon tơchĕng bơ̆n, na pơjing rĕi tơdrong tơchĕng ngĭl ngŭl, tơklah tơklang păng tơdrong hơlĕnh.

Mă-lei, tơplih kơ arih lăm tơdrong hli, bơ̆n athei ‘blŏk kơ Kră Yang Yêsu Krist jing kơđông kơjăp kơ bơ̆n. Lăm Sư, bơ̆n đei anih kơ’nơp hơđơ̆ng mă ưh kơ đei kiơ gơh pơrăm. Mă khan lăm ala teh âu ‘bĕnh kơ tơdrong kơnê̆, mă lei lu bơ̆n ăn kơ Yêsu Krist ‘Bok Dŏng Pơklaih pơgơ̆r jơhngơ̆m păng đon tơchĕng bơ̆n, na dôm tơdrong chă đon đơ̆ng yang kơnê̆, ưh kơ gơh pơrăm bơ̆n ôh. Yua kơ lăm Yêsu Krist, lu bơ̆n gô kĕ jei hloh dơ̆ng.

Apĭnh đĭ đăng krao khan hơdai: Kơkuh kơ Yêsu Krist, Tơ’ngla ‘lơ̆ng tơpăt păng jing anih kơ’nơp hơđơ̆ng kơ kon. Lăm teh đak mă ‘bĕnh kơ tơdrong rŭng răng păng jơhngơ̆m blĕk hil pơjah dih băl, kon băt kơ đon tơchĕng kon kư̆m jing thoi minh anih tơblah mơ̆n. Apinh Ih huay kơ jô̆ yo kơ kon, yua kơ đei lơ wơ̆t kon ăn kơ tơdrong pơjah pơjăng dih băl păng tơdrong hơlĕnh mơ̆t ôn hlơp lăm jơhngơ̆m kon, pơm pơrăm tơdrong pơgơ̆p đơ̆ng kon hăm Ih. Apinh Ih yua pham kăp Ih ôp rơgoh kon, păng wei-lăng đơ̆ng dôm lu tơdrong yang kơnê̆ pơhlŭ. Apinh Ih bơwei đon tơchĕng kon oei lăm tơdrong hiôk đơ̆ng Ih. Ma khan tơ gah ‘ngoaih đei kial hơbŭt păng đak poh-yă tih, hơpơi kơ kon oei kơjăp, yua kơ kon băt kon oei kơ’nơp hơđơ̆ng lăm Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, teh đak âu gô đei kial hơbŭt păng đak poh-yă, păng bơ̆n ưh kơ gơh tơplih tơdrong noh ôh. Mă-lei bơ̆n ling-lang gơh rơih iŏk anih bơ̆n wă kơdâu kơ’nơp. ‘Nĕ ăn kơ tơdrong tơklah dih băl pơjing tơdrong tơklah dih băl rai lơ dơ̆ng, kư̆m ‘nĕ ăn kơ jơhngơ̆m tơhil pơjah dih băl pơm kơ tơdrong ‘mêm lăm jơhngơ̆m bơ̆n rai rơdu. ‘Nĕ ăn kơ yang kơnê̆ đei bơjang tơdrong jang sư. Athei krao khan apinh Kră Yang bơtho lu bơ̆n ăn kơ tơdrong arih bơ̆n kơjăp lăm tơdrong ‘lơ̆ng tơpăt Sư, na bơ̆n jing lu bơngai ba tơdrong hiôk-hian kơ lăm teh đak. Yua kơ anih kơ’nơp hơđơ̆ng tơpă ưh kơ kơđông kơjăp kiơ̆ kơ kon bơngai pơm ôh, mă jơ̆ lăm Yêsu Krist ‘Bok Dŏng Pơklaih bơ̆n. Bơngai bu kơdâu kơ’nơp tơ Sư gô hiôk-hian mă ưh kơ đei minh tơdrong rŭng răng đơ̆ng teh đak âu gơh tơgar iŏk.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.