Kơplah bơ̆n pơm yoch dah pơ̆k huŏng, bơ̆n juăt ‘maih wă ôn kơ Kră Yang. Bơ̆n hli kơ tơdrong hơdah ‘lơ̆ng rơgoh đơ̆ng Sư gô tơ’bôh ăn kơ tôm tơdrong pơchah pơchek, dôm tơdrong ưh kơ ‘lơ̆ng păng tơdrong rơdu tơrăn mă bơ̆n adrin ôn. Mă lĕi buăl ơi, anih măng mu hrĕp noh ưh kơ đei layơ jing anih pơklaih păng tơplih bơ̆n jing ‘nao ôh. Minh anih mă pơklaih lu bơ̆n jơ̆ ‘bơ̆t ala jơ̆ng Kră Yang – Tơ’ngla ling-lang huay kơ jô̆ yo păng lăp đon kơ lu bơngai mă năm jê̆ Sư. Rŏ lăng noh kư̆m jơ̆ tơdrong Năr giĕng hlôm keng (Rosh Hashanah) tơ’blŏk kơ rim ‘nu lu bơ̆n: Athei wih tơ ‘Bok Kei-Dei bĕ.

Năr ‘nâu, năr 12/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai WIH BRŎK TƠ KRĂ YANG

“Iĕm năm jê̆ ‘Bok Kei-Dei na ‘Bok Kei-Dei oei jê̆ iĕm.” (Yakơ 4:8a)

‘Nâu jơ̆ nơ̆r lăm Sơ̆p hla bơar ‘Bok Kei-Dei mă inh ‘blŏk dêh. Rim wơ̆t inh tơ’bơ̆p nơ̆r âu, inh ‘blŏk kơ tơdrong kăl hloh năm jê̆ ‘Bok Kei-Dei păng wei tơdrong pơgơ̆p hăm Sư. Pơtrơp lăm nơ̆r âu kư̆m tơ’bôh ăn kơ bơ̆n băt kơ Sư jơ̆ Tơ’ngla bơ̆n kăl kơ kơdâu năm tơ Sư, kơplah tơdrong arih bơ̆n đei tơdrong yoch mă bơ̆n tam mă tơbral. ‘Bok Kei-Dei wă dêh oei hơdai bơ̆n, ưh kơ sĭ kơplah dôm tơdrong arih hiôk ‘lơ̆ng đĕch, mă kư̆m kơplah bơ̆n oei tơblah hăm tơdrong yoch, tơdrong anat, dah jơhngơ̆m rơdu lăm tơdrong arih. Mă khan lu bơ̆n năm tơ Sư yua kơ tơdrong kiơ, Sư ling-lang chro ti chang gô bơ̆n.

Rosh Hashanah jơ̆ năr adrol blŭng a lăm sơnăm ‘nao kiơ̆ kơ jô̆ khei năr lu bơngai Juđê, năr âu kư̆m jơ̆ năr lu sư tơchĕng pơwao, hiôk chơt păng dan jơhngơ̆m tơ tơdrong gơnang chang gô tih. Tơdrong Phĕt noh pơtơm hăm hlôm keng shofar, nhen thoi nơ̆r krao kon pơlei ‘Bok Kei-Dei iung đơ̆ng tep hiơt gah bơhngol, hơmet jơhngơ̆m wă mơ̆t lăm mơjĭt năr tơbral, păng yak năm tơ Năr huai iŏk tơdrong yoch (Yom Kippur). Yua kơ thoi noh, Rosh Hashanah kư̆m đei krao jơ̆ Năr giĕng hlôm keng (lăng lăm Jô̆ Bơngai 29:1). Noh jơ̆ jơ năr ăn kơ rim ‘nu bơngai lăng ‘bôh tơdrong arih kơdih, wih tơbral ‘bơ̆t anăp ‘Bok Kei-Dei păng hơmet jơhngơ̆m kơdih adrol kơ Năr huai iŏk.

Ih hăm đei layơ đei krao hơdơ̆r iung kơdih ưh? Hăm đei layơ ‘Bok Kei-Dei pơih măt ih ăn kơ ih băt kơ tơdrong ih oei pơm pơrăm akâu ih kơdih, pơmat bơngai nai dah tơweh ih đơ̆ng Sư ưh? Inh mơ̆ng nơ̆r re keng shofar thoi ‘nơ̆r tơ-iung bơ̆n đơ̆ng tep gah bơhngol, tơgŭm bơ̆n băt kơ bơ̆n mơn kơ yak wơ̆l jrok ataih đơ̆ng Kră Yang, păng krao bơ̆n wih brŏk tơ trong tơdrong ‘mêm mơnat đơ̆ng Sư. Lăm Sachari 1:3 đei chih khan:

“Kră Yang Tih Hloh khan: ‘Wih tơ Inh bĕ, na Inh gô wih tơ lu iĕm dơ̆ng, Kră Yang Tih Hloh khan thoi noh.”

Thoi lăm Yakơ 4:8 tưk tơiung bơ̆n năm jê̆ ‘Bok Kei-Dei, Sachari 1:3 kư̆m krao bơ̆n wih tơ Sư mơ̆n. Kơplah bơ̆n pơm yoch dah pơ̆k huŏng, bơ̆n juăt kơ chă weh ataih đơ̆ng ‘Bok Kei-Dei, mă khan ưh kơ đei bu gơh ôn hlơp kơ Kră Yang. Kơplah bơ̆n đei tơdrong sơ’ngon dah jơhngơ̆m rơdu yua kơ dôm tơdrong hlôi truh lăm tơdrong arih, lơ bơngai jô̆ jŏk kơ Kră Yang dah rai weh ataih đơ̆ng Sư. Jơ̆ tơdrong ‘bĕnh kơ mơlâu, sơ’ngon, hil, pơchah pơchek dah jơhngơ̆m rơdu pơm kơ bơ̆n ‘bônh kơ weh ataih đơ̆ng Kră Yang. Mă-lei jơ̆ đơ̆ng kơplah thoi noh bơ̆n kăl kơ năm jê̆ Sư hloh. Yua kơ đei Sư oei hơdai, lu bơ̆n gô đei jơhngơ̆m pran ‘nao, hiôk-hian păng pơdơh wă yak năm lăm tơdrong pơlong lăng lăm tơdrong arih.

‘Ngoaih kơ tơdrong tơchĕng pơwao păng tơbral, Rosh Hashanah kư̆m jơ̆ khei năr lu bơngai Juđê hiôk chơt kơ sơnăm ‘nao hăm tơdrong chang hơmĕng tơ tơdrong tơpăt đơ̆ng ‘Bok Kei-Dei. Tơdrong juăt kơ hơkat pŭn hiôk dih băl lăm sơnăm hiôk chơt, păng tơdrong sŏng sa kiơ̆ tơdrong juăt so, tôm tơdrong noh tơ’blŏk kơ lu bơ̆n dôm nơ̆r pơkă ‘lơ̆ng đơ̆ng Sư. Lu bơ̆n đei lui kơjăp, yua kơ bơ̆n băt kơ ‘Bok Kei-Dei ling-lang ‘lơ̆ng tơpăt lăm tôm tơdrong. Sư jơ̆ Tơ’ngla pơgơ̆r tôm tơdrong, păng tơdrong Sư tơdă đơ̆ng gô jing trŏ ‘lơ̆ng, hloh kơ dôm tơdrong bơ̆n đei dah gô tơ’bơ̆p tơ anăp. Kơplah bơ̆n yak năm hơdai hăm ‘Bok Kei-Dei, lu bơ̆n gô mơn kơ hiôk chơt đơ̆ng tơdrong ‘mêm mơnat Sư păng arih hăm tơdrong chang hơmĕng, mă đei tơdrong pơlong lăng noh kư̆m jơ̆ minh lăm lu tơdrong hŏk pơhrăm ‘lơ̆ng mă Năr giĕng hlôm keng Rosh Hashanah đei tơ’blŏk kơ bơ̆n.

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon, Kon bơnê kơ Ih, mă khan kon rơdu tơrăn păng lơ wơ̆t pơ̆k huŏng, kon ôn weh ataih đơ̆ng Ih yua kơ mơlâu păng hli, mă Ih ling-lang chang gô kon wih tơ Ih. Apinh Ih chông ba kon năm jê̆ tơ Ih rim năr. Apinh ăn kơ kon đei mơn tơdrong hiôk-hian đei Ih oei hơdai, wă kơ kon băt ưh kơ đei minh tơdrong yoch kiơ tih hloh kơ tơdrong ‘mêm mơnat Ih, păng ưh kơ đei minh tơdrong kiơ gơh pơgăn tơdrong ‘mêm Ih ăn kơ kon. Apinh Ih ăn kơ kon đei pơ̆n nuih wă kơ ling lang năm jê̆ Ih, lui kơjăp kơ Ih păng ‘lơ̆ng tơpăt kiơ̆ Ih rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ưh kơ băt năr ‘nâu ih đei tơdrong kiơ dah oei tơ’bơ̆p hăm tơdrong kiơ, mă hơpơi kơ ih rơih iŏk năm jê̆ ‘Bok Kei-Dei. Hơpơi kơ ih ling-lang ‘blŏk dôm nơ̆r Sư pơkă, rai đei mơn kơ Sư tih hloh păng lui kơjăp kơ tơdrong ‘lơ̆ng tơpăt đơ̆ng Sư ăn kơ tơdrong arih ih. Apinh Kră Yang ăn kơ ih pran kơtang weh đơ̆ng dôm lu tơdrong oei pơm kơ ih sơ’ngon dah dui ih weh ataih đơ̆ng Sư, păng tơgŭm ih yak năm lăm tơdrong chang hơmĕng kơ dôm nơ̆r Sư pơkă. Apinh Kră Yang ăn kơ ih minh năr plơ̆ng hiôk-hian păng ‘bĕnh kơ tơdrong pŭn hiôk.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.