Lăm tơdrong arih hrei ‘nâu, lu bơ̆n juăt kơ ‘bôh minh tơdrong thoi âu: tơdah bơ̆n wă kơ đei tơdrong ‘lơ̆ng dah wă kơ hloh ‘biơ̆ dơ̆ng minh tơdrong jang kiơ, kon bơngai kăl kơ hŏk pơhrăm păng chă wei răk dôm lu tơdrong hlôh wao. Đơ̆ng tơdrong hlôh wao, tơdrong hŏk pơhrăm bơ̆jang tơpă, tôm tơdrong noh kăl kơ bơ̆n yua lơ jơ năr păng đĭ jơhngơ̆m wă hŏk pơhrăm. Ưh kơ đei minh tơdrong ‘lơ̆ng ayơ mă kơjăp ling-lang mă ưh kơ đơ̆ng pre hơmet đơ̆ng adrol. Mă-lei, kơplah lăng tơ tơdrong arih gah bơhngol, lu bơ̆n đei rơih iŏk ăn kơ tơdrong hơmet đơ̆ng adrol noh đơ̆ng kơdih thoi yơ? Tơdrong Kră Yang wă kơ rim ‘nu bơngai lui kơ Sư ưh kơ sĭ wă kơ lu bơ̆n pơm gah ‘ngoaih đĕch, mă Sư wă kơ tơdrong arih bơ̆n rai keh đang ‘lơ̆ng hloh. Wă kơ đei yua kơ Kră Yang, đei minh tơdrong kăl wă kơ lu bơ̆n băt.

Năr ‘nâu, năr 13/09/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai ĐEI HƠMET ADROL WĂ KƠ KEH ĐANG ‘LƠ̆NG.

“Kơplah ‘bar sơnăm sư bơtho tơ hnam trưng ei, na đĭ-đăng bơngai oei tơ dêh char Asi mă bơngai Juđê mă lu bơngai nai, kư̆m kơtơ̆ng tơdrong Kră Yang Yêsu mơ̆n.” (Tơdrong Jang 19:10)

“Mă-lei lu mơ’nah ưh kơ chu lui. Na lu sư pơma kơnê̆ gah tơdrong Kră Yang Yêsu ‘bơ̆t anăp lu bơngai akŭm. Na Pôl đơ̆ng lu sư năm akŭm tơ nai. Lu bơngai lui kư̆m akŭm kiơ̆ Pôl mơ̆n. Na rim năr sư bơtho păng pơjah tơ hnam trưng Tiranơ. Kơplah ‘bar sơnăm sư bơtho tơ hnam trưng ei, na đĭ-đăng bơngai oei tơ dêh char Asi mă bơngai Juđê mă lu bơngai nai, kư̆m kơtơ̆ng tơdrong Kră Yang Yêsu mơ̆n.” (Tơdrong Jang 19:9-10)

“Hnam Trưng Năr Tơpơh noh kiơ hă mĕ?”, “Năm hŏk Hnam Trưng Năr Tơpơh hă?”, “Hơpơi kơ kơ inh đei tep thim tŏsĕt dơ̆ng lăm pơge Năr Tơpơh…” Noh jơ̆ dôm tơdrong inh juăt kơ tơchĕng kơplah inh pơtơm năm hŏk lăm Hnam Trưng Năr Tơpơh tơ Hnam Akŭm. Inh ưh pă ‘blŏk đei ‘maih hŏk Nơ̆r ‘Bok Kei-Dei dah ưh. Inh kư̆ ‘blŏk kơ rim pơge Năr Tơpơh, inh kăl kơ năm tơ anih hŏk.

Inh ‘blŏk kơ kô Hạnh, bơngai mă pơnam adrin bơtho Nơ̆r Kră Yang kơ lăm khŭl Hơ’lơ̆p lu nhôn. Dôm kơ năr hŏk noh lăng hmă đĕch. Lu nhôn năm tơ anih pơhrăm, pơih sơ̆p hla bơar hơri kơkuh, hơri hơdai minh ‘bai ư-ang kơ Kră Yang, na pơtơm hŏk Nơ̆r ‘Bok Kei-Dei. Ưh kơ đei brŏ reh, ưh kơ đei micro, kư̆m ưh kơ đei man hinh pơdah. Mă-lei, lăm jơhngơ̆m inh bơnê kơ Kră Yang, yua kơ đơ̆ng hŏk pơhrăm lăm Năr Tơpơh noh, inh hăm lu ‘nhŏng oh nai đei lui kơjăp păng chu yom, tơpăt bơ̆jang kơ Kră Yang truh tơ hrei ‘nâu, mă khan lu nhôn đei yak năm tơ lu anih phara dih băl.

Đơ̆ng rŏng kơ noh, kơplah inh năm tơ minh Hnam Akŭm nai tih hloh păng lơ bơngai hloh, mă inh ‘bôh lơ bơngai adruh tơdăm ưh kơ năm hŏk Hnam Trưng Năr Tơpơh. Ưh kơ truh pơđăm ‘nu bơngai năm hŏk. Kư̆m đei jơhngơ̆m inh rơdu, păng lơ wơ̆t inh achăng lê̆ jơ kăl dêh noh. Mă-lei đơ̆ng rŏng kơ noh, Kră Yang đei bơ̆jang lăm jơhngơ̆m lơ bơngai adruh tơdăm lăm Hnam Akŭm. Lu sư pơtơm năm hŏk Trưng Năr Tơpơh rai lơ, truh tơ anih hnam so hrăt hrŏt, na lu nhôn kăl kơ tơplih năm tơ minh anih tơ hnam plơ̆ng să, păng rơhơi ‘biơ̆.

Mă-lei, ưh kơ rim anih tơdrong ‘maih hŏk Nơ̆r Kră Yang mă đei ling-lang kiơ̆ thoi noh ôh. Đei lu anih hŏk Nơ̆r ‘Bok Kei-Dei tŏsĕt bơngai tơpă, păng kư̆m đơ̆ng tơdrong noh tơ’bôh ăn kơ bơ̆n băt jơhngơ̆m ‘maih wă kơ Nơ̆r Kră Yang lăm bơ̆n oei rơdu dêh. Rŏ lăng đơ̆ng rŏng minh giĕng jang sa gleh lap, rim ‘nu bơngai kăl kơ pơdơh. Yua kơ thoi noh, tơdrong rơih iŏk pêng-jĭt phŭt rim năr wă pơhrăm Nơ̆r ‘Bok Kei-Dei, dah năm hŏk Nơ̆r ‘Bok Kei-Dei, rŏ lăng jing minh tơdrong gleh kơ lu bơ̆n. Lu bơ̆n juăt kơ ‘bôh akâu kơdih hrăt hrot kơ tơdrong jang păng gleh lap.

Mă-lei, kơplah bơ̆n pơih lăm Sơ̆p hla bơar Tơdrong Jang, tơdrong hơ’mon tơ hnam trưng Tiranơ tơ’bôh ăn kơ bơ̆n minh tơdrong lăng phara gah tơdrong rơih iŏk Nơ̆r Kră Yang jing tơdrong kăl hloh, kư̆m thoi Tơdrong Jang 19:8-10 đei chih.
Tơ Pơlei Êphêsô, adrol sơ̆ dang kơ ‘bar-rơbâu sơnăm, lăm trong ră roi Tơdrong ‘Nao ‘Lơ̆ng tăl mă pêng đơ̆ng ‘bok Pôl, sư pơtơm tơdrong jang hăm bơtho lăm hnam akŭm bơngai Juđê lăm pêng khei. Pôl rơih iŏk hnam akŭm wă bơtho hơdrol, yua kơ tơ noh đei lu bơngai Juđê păng lu bơngai nai mă hli yom kơ ‘Bok Kei-Dei, lu sư sơ̆ đei băt kơ Sơ̆p hla bơar Nơ̆r ‘Bok Kei-Dei gah Tơdrong Pơgơ̆p Pah So. Yua kơ thoi noh, anih ei jing anih trŏ tơpă sư wă ră roi gah Yang Yêsu. Mă-lei, Pôl tơ’bơ̆p tơdrong tơplơ̆ kơplah sư bơtho tơ hnam akŭm. Lu mơ’nah ưh kơ chu lui păng pơma kơnê̆ kơ tơdrong Kră Yang Yêsu. Mă Pôl ưh kơ rơdu ôh, sư klah song lu bơngai lui kiơ̆ sư păng bơtho tơ hnam trưng Tiranơ. Hnam trưng âu jơ̆ anih hŏk đơ̆ng minh ‘nu bơngai Grĕk pơjing anăn sư Tiranơ. Kiơ̆ tơdrong juăt kơ plah noh, lu hnam trưng juăt kơ pơhrăm gah pơge. Yua kơ thoi noh, lơ bơngai hơgei tơchĕng khan rŏ lăng Pôl yua jơ pơdơh năr dơ̆ng na bơtho lu bơngai lui tơ noh.

Lăm ‘bar sơnăm, ‘bok Pôl bơtho pơhrăm lu bơngai lui na lu sư lui kơjăp păng năm roi tơbăt gah Kră Yang, truh tơ “đĭ-đăng bơngai oei tơ dêh char Asi mă bơngai Juđê mă lu bơngai nai, kư̆m kơtơ̆ng tơdrong Kră Yang Yêsu mơ̆n.” Ưh kơ sĭ minh ‘bar ‘nu bơngai đei kơtơ̆ng Nơ̆r Kră Yang ôh, mă jơ̆ đĭ-đăng. Pơlei tih âu tơ’bôh ăn kơ bơ̆n băt khan kơplah minh ‘nu bơngai đei bơtho pơhrăm păng pre hơmet hăm Nơ̆r Kră Yang, tơdrong arih sư gô tơplih, na sư gơh năm ră roi Nơ̆r Kră Yang kơ lu bơngai oei tăp dăr kơ sư. Kơplah tơ’bơ̆p lu bơngai “ưh kơ chu lui” păng “pơma kơnê̆ gah tơdrong Kră Yang Yêsu”, Pôl hăm lu bơngai lui ưh kơ kơdŭn tơ rŏng, mă lu sư tơplih tơdrong bơ̆jang păng ‘Bok Kei-Dei tuh ăn pŭn hiôk kơ tơdrong jang lu sư. Yua kơ thoi noh, bơ̆n ‘bôh tơdrong bơtho hŏk pơhrăm kơ bơngai lui ưh kơ đei hơgăt, mă rai wơ̆ ‘lŏ yua kơ đơ̆ng tơdrong ‘lơ̆ng tơpăt păng adrin bơtho ră roi tơdrong ‘lơ̆ng tơpăt.

Kơplah lăng tơ tơdrong hơ’mon tơ hnam trưng Tiranơ, lu bơ̆n ‘bôh adrol gah tơdrong bơtho hŏk pơhrăm bơngai lui. Noh jơ̆ tơdrong kơnhăm bơtho bơngai lui Nơ̆r Kră Yang lăm Hnam Akŭm thoi kơ “hnam trưng Tiranơ” hrei ‘nâu. Noh jơ̆ lu anih mă pơnam adrin bơtho Nơ̆r Kră Yang kơ lu bơngai lui. Mă ưh kơ đei pơtôch ‘bơ̆t doh đĕch, Lăm Pơhrăm Nơ̆r ‘Bok Kei-Dei Noh jơ̆ hơmet ăn kơ lu bơngai lui kơ Yang Yêsu Krist, wă kơ lu sư huay kơ oei lăm puăn pah tơnăr Hnam Akŭm, mă đei tơdrong arih lăm bơhngol păng đei pran kơtang đơ̆ng Yang Bơhngol ‘Lơ̆ng wă lĕch năm ră roi tơbăt gah Kră Yang. Na lu sư minh jơhngơ̆m lăm tơdrong jang kơnhăm kơ “đĭ-đăng … đei kơtơ̆ng tơdrong Kră Yang Yêsu”, jơ̆ lăm teh đak hrei ‘nâu mă ‘bĕnh kơ tơdrong rŭng răng păng tơdrong arih kon bơngai rai kơnê̆.
Yua kơ Năr Hŏk Pơhrăm Khŭl Bơngai Lui, rim ‘nu lu bơ̆n đei krao wơ̆n lăng ming chu hŏk pơhrăm păng bơtho ră roi Nơ̆r Kră Yang. Bơngai bơtho Nơ̆r Kră Yang rŏ lăng jơ̆ thây kô lăm Hnam Trưng Năr Tơpơh, bơngai wei-lăng hŏk Nơ̆r ‘Bok Kei-Dei, mĕ ‘bă lăm hnam dơnŏ… Lu bơ̆n athei lăng tơ kơmĭl ‘bok Pôl tơ hnam trưng Tiranơ. Sư yua jơ năr, ưh kơ yua kơ tơdrong ‘lơ̆ng dah tơdrong kơnê̆, mă pơnam adrin bơtho lu bơngai lui kơ Kră Yang rim năr. Bơ̆jang lăm Hŏk Pơhrăm Khŭl Bơngai Lui kư̆m kăl kơ tơdrong ‘lơ̆ng tơpăt păng pơnam adrin thoi noh. Mă khan lăm dôm lu năr hŏk Nơ̆r ‘Bok Kei-Dei dah jơ akŭm kơkuh lăm hnam dơnŏ lăng hmă đĕch, tam mă ‘bôh hloi đei yua, mă lei athei lui ngeh kơ noh jơ̆ dôm lu găr adrĕch Nơ̆r Kră Yang mă oei rĕi ăn kơ lu chăl đơ̆ng rŏng.

Jơ̆ rim ‘nu bơngai lui, bơ̆n hăm oei gĭt kăl kơ tơdrong hŏk Nơ̆r Kră Yang ưh? Kư̆m đei, ưh kơ sĭ lu bơ̆n hrăt hrot kơ tơdrong jang dah ưh kơ gơh hơmet jơ năr, mă yua kơ lu bơ̆n ưh tam kơ krăng kơchăng achăng lê̆ tơdrong pơhiôk akâu kơdih dah hơlah kơ kơdih wă lăng Nơ̆r Kră Yang hăm jơhngơ̆m tơpă. Lu bơ̆n rŏ lăng yua lơ jơ kơ điê̆n thoăi, mă hmach kơ minh ‘bar phŭt wă ‘me rong đon lui kơ dih.
Mă khan bơngai bơtho dah bơngai hŏk Nơ̆r Kră Yang, rim ‘nu lu bơ̆n kư̆m hơmĕng kơ lui kơjăp păng rai wơ̆ ‘lơ̆ lăm đon lui. Tơdrong rai wơ̆ ‘lơ̆ lăm đon lui ưh kơ truh lăm minh măng đĕch ôh, mă jơ̆ đơ̆ng lơ năr lơ khei bơ̆n wei rong lăm Nơ̆r Kră Yang bơtho, hăm lăm hŏk ‘Nơ̆r ‘Bok Kei-Dei đơ̆ng kơdih păng hơdai hăm lu ‘nhŏng oh lăm khŭl bơngai lui. Ih hăm wă ăn kơ Nơ̆r Kră Yang hơmet ăn kơ ih, wă bơ̆jang kơ Kră Yang păng đei yua rơkah rơkai hloh ăn kơ dêh char Sư ưh?

Apĭnh đĭ đăng krao khan hơdai: Kơkuh kơ Kră Yang mă ‘mêm, apinh Ih ăn kơ kon đei jơhngơ̆m rơhing păng pơnam pơwao lăng Nơ̆r Ih rim năr. Apinh Ih tơgŭm kon ưh kơ sĭ mơ̆ng Nơ̆r Ih đĕch, mă băt pơm kiơ̆ Nơ̆r Ih lăm tơdrong arih păng ră roi Nơ̆r Ih kơ lu bơngai oei tăp dăr kơ kon. Yua kơ kon lui ngeh, kơplah Nơ̆r Ih đei ră roi, lơ tơdrong arih gô đei tơplih, đei yua lơ hloh ăn kơ Hnam Akŭm, tơ pơlei păng dêh char kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, yua kơ Năr Hŏk Pơhrăm Khŭl Bơngai Lui năr ‘nâu, hơpơi kơ tơdrong arih lu bơ̆n đei hơmet ăn wă kơ đei yua rai lơ hloh kơ Kră Yang. Athei rim ‘nu lu bơ̆n pơkăm akâu kơdih rơih iŏk jơ năr wă hŏk pơhrăm Nơ̆r Kră Yang kơdih lăm rim năr, păng chu yom, tơpăt năm hŏk dôm lu lăm pơhrăm Nơ̆r ‘Bok Kei-Dei tơ Hnam Akŭm mă anih ih oei. Mă-lei, ‘nĕ kơ hŏk wă chă tơdrong hlôh băt gah Sơ̆p hla bơar ‘Bok Kei-Dei đĕch. Athei hŏk hăm jơhngơ̆m rơhing wă apinh Kră Yang tơplĭh păng yua ih kơ tơdrong jang Sư. Na tơdrong arih ih gơh pơchrang hơdah Nơ̆r Kră Yang păng tơ’bôh dôm tơdrong ‘lơ̆ng kiơ̆ Yang Yêsu Krist, ba tơdrong chang hơmĕng păng tơplĭh truh tơ lu kon pơlei pơla păng lu bơngai oei tăp dăr ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.