Nùs dòn tòm pah rài ngai do gơlơh be sơlơ ngai sơlơ pơt lơhơ. Ală cau cơnđòa mut ală bơta gơtòmklac bơh ală git kơrhia, tài bơh òs mòng bơh bơta gơs di ya hala ò di ya, òs mòng bơh jơnau hơ gọi mơ bơh ală bơta cùn bồ òs mòng. Mơya jơnau đơs ò tŭ lơi là broă òhềt git ò – gơ añ mư jơh bơta tiang pơnrơ mơ nùs nhờm dô nă cau di. Mơ dilah jơnau hơ pơgon ală cau poăc să do gen găm dờng màng behơ̆, gen tơ’ai lah ală jơnau hơ pơgon Yang Dong Jesu di – Bơtau òhềt tŭ lơi ò lơh jat jơnau ho pơgon dô dơ̆ lơi tòm pah rài lis kon mơnùs di?

Ngai do, ngai 22/09/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Maria Schleicher dê bơh Tơnggume GƠNOĂR PRÀN JƠNAU HO PƠGON DÊ

“Bơh jơh ală jơnau ho pơgon Yàng Tom Trồ dê, bulah oă kung la di lơm tòm Kơnràñ, gen tàng bơh Kơnràñ mơ bol he đơs “Amen” nàng bơh bol he mơ Yàng Tom Trồ geh gơklŏ.” (II Kôrintô 1:20)

Gơs dô bơta ăñ pơnđơl òs prap gar tòm broă he kis mơ broă lơh gơwèt mơ tơl nă cau : hơ̆ la prap jơnau ho pơgon.

Neh hơ lik sân bay nàng wă rò cau gơp bơyô la ăñ rơp gơs mat tòmtọh tŭ jơ. Kơnòm di ăñ rcang phăn sa tòm tŭ yò bơdơng sa, băñ kơlôi sơnơng tài bơh ală bơta rơp geh rơndăp niăm! Càng ăñ sền gar ală cau kơnòm nàng lik bơdih dô êt, ăñ rơp gơs mat tơn tŭ he càng!

Là cau chi sră, ăñ òs sền dờng màng gơnoăr pràn jơnau cih. Gơs dô bơta ăñ òs tơngkah he: “Jơnau đơs gơs gơnoăr pràn.” Tŭ lơi neh hơ dô bơta lơi, ăñ jơh nùs koñ ngăn lơh wil tơl. Ăñ prap ngăn jơnau ho tài bơh koñ gơlik gơs dô nă cau dòn kơnòm he ngăn. Tŭ ăñ lơh nền bơta lơi là sŏng, he dòn kơnòm ngăn lah ăñ neh rọh oă ngăn tŭ jơ jòi wă lọh hala crap wơl bơh bơta git lăm be òs! Cau lơi kơnòm broă lơi, ăñ koñ ngăn bŏl khai kơ̆ nùs dòn lah bơta cùn bồ ăñ ji là jơnau ho pơgon dòn kơnòm ngăn – gơs dô êt bơta he ò gơtui lơh.

Tòm Luka 7: 1 – 10, bŏl he gơs tìp dô bơta yăl tơnggit bơh bơta dòn dô nă cau dô rhiang ling Rô ma. Cau dĭ mơ ồng jơh nùs koñ gơboh kòp mòr chơt. Gen behơ̆, ồng neh kơnòm ală cau kwang kra làng bŏl Juda – ală cau gơs tiang pơnrơ sŏng tòm mpồl cau – tus lòt dăn Yang Jesu tus sơm cau dĭ hơ̆.

Gen Yang Jesu lòt băl mơ bŏl khai tus di hiu cau at dô rhiang ling. Mơya, lài mơ tŭ Kơnrẵn tus di tiah, cau at dô rhiang ling sôr oh mi bơyô lòt kơp Kơnrẵn mơ đơs lah ồng ò khin dơñ ồng là cau dipăl geh Yang mut tòm hìu. Ồng đơs lah: “Ơ Yàng, añ ò khin lơh pơnjê Kơnràñ, bơh añ ò di pal nàng Kơnràñ mut tòm hìu añ, gen tàng añ kung kơlôi lah să tòm añ ò di pal nàng tus hơ Kơnràñ. Mơya dan Kơnràñ đơs dô jơnau, gen cau dĭ gơna añ jê rơp geh bòi. Bơh añ kung ơm hơđơm gơnoar cau ndai dê, kung gơs ală cau ling ơm hơđơm gơnoar añ jê. Añ sồr cau do: ‘Lòt tĕ,’ gen khai lòt; sồr cau ne: ‘Tus tĕ,’ gen khai tus; mơ sồr cau dĭ gơna añ: ‘Lơh tĕ broă do,’ gen khai lơh.” (Luka 7:6-8)

Cau at dô rhiang ling dòn nền cê lah mìng càng Yang Jesu đơs dô jơnau gen rơp gơlik gơs di ngăn. Ồng wă lọh gơnap gơnoăr Kơnrẵn di mơ dòn kơnòm wil tơl gơnap gơnoăr tòm jơnau đơs Kơnrẵn di. Ồng git lah mìng Yang ai gơnoăr sôr, cau dĭhe di rơp geh sơmbòi. Gơwèt mơ ồng, Jơnau lơi geh lik bơh di bơr Kơnrẵn gen rơp gơlik gơs di ngăn. Bơta dòn cau at dô rhiang ling lơh cơng lah ò gơs dô bơta lơi rơp kơryan jơnau đơs Yang Jesu di geh gơlik gơs di ngăn.

“Yàng Jesu kơno ală jơnau hơ̆, gen ai lơh krơi bơh khai, mơ wơlke đơs mơ mpồl làng bol lòt jat Kơnràñ lah: “Añ đơs mơ bol mê, bulah tòm làng bol Israel Añ kung òhềt gŏ bơta dòn dờng be do.” Ală cau neh geh sồr lòt rê hìu, gŏ cau dĭ gơna neh bòi rau.” (Luka 7: 9-10)

Gơwèt mơ Yang Jesu, kòp jơnau đơs geh Gơnap gơnoăr wil tơl. Jơnau Kơnrẵn đơs rơp geh gơlik gơs ngăn. Gen behơ̆, bŏl he rơp dòn kơnòm wil tơl lah ală jơnau lơi Kơnrẵn đơs gen rơp gơlik gơs di ngăn. Kŭng be, tŭ sền II Kôrintô 5: 17 la cau lơi ơm tòm Bơtau Krist gen geh crơng gơs pa lơm, he rơp kơ̆ nùs dòn lah: “Ală bơta yau neh roh rau, do ală bơta gơlik gơs pa lơm.”

Tŭ Yang Jesu bơtọ bŏl he băñ kơlôi rcang bơh ală phăn càng ngùi tơm rài kis tài bơh Yang Tom Trồ rơp rcang, gen jơnau Yang di tòmtọh ngăn la behơ̆ (Mathiơ 6:31-33)

Ngăn behơ̆, ală jơnau hơ pơgon Yang Tom Trồ di găm gơlik gơs di ngăn tom tòm Bơtau Krist, be II Kôrintô 1: 20 neh đơs nền lah:

“Bơh jơh ală jơnau ho pơgon Yàng Tom Trồ dê, bulah oă kung la di lơm tòm Kơnràñ, gen tàng bơh Kơnràñ mơ bol he đơs “Amen” nàng bơh bol he mơ Yàng Tom Trồ geh gơklŏ.”

He gơs găm bŏl glăr sơl? Yang Jesu hơ ai pà bơta rlô bŏl cau lơi ĭn tus hơ Kơnrẵn (Mathiơ 11:28)

He rơp hur hir bơta kis găm sum sum sơl? Yang Dong Jesu hơ ai bơta kis găm sum sum cau lơi ĭn don dòp Kơnrẵn. Kơnrẵn kung hơ pơgon lah rơp ri wơl nàng cèng bŏl he ĭn ri ơm băl mơ Kơnrẵn sum sum (Jang 14: 14, 14: 2-3)

He kơlôi la ơm is dô nă sơl? Yang Dong Jesu neh hơ ai Bơtau Pơndòm pơniang là Yang Hwing Gọh, Bơtau rơp sum sum ơm băl mơ yò đo ală cau gơri hơ Yang (Jang 14:16-17,26)

Ală jơnau Yang Dong Jesu đơs găm nền cê mơ dòn sŏng, găm la “Gơs” mơ “Amen”! Jơnau Kơnrẵn hơ, Kơnrẵn rơp lơh wil tơl. Jơnau Kơnrẵn đơs, Kơnrẵn rơp lơh tòmtọh. Gen behơ̆, bŏl he rơp gơs dòn kơnòm wil tơl di Kơnrẵn, tài bơh ală jơnau Yang Dong Jesu di òs kwơ màng wil tơl.

Dan jà bol he dô nùs bal tòm bơta hòi dan: Khoai Bơtau Jesu, ưnngai Yang tài bơh Kơnrẵn òs dòn sŏng gơwèt mơ ală jơnau Kơnrẵn neh ho. Ưnngai Kơnrẵn neh ai pà kọn ĭn ală jơnau hơ kwơ màng tồ gơn kơnòm tŭ kọn kis digul dunnia do. Dăn dŏng kọn sol pơnđăng wơl bơta dòn sŏng Kơnrẵn di bơh rài kis kọn kòp ngai. Dăn bơtọ kọn òs kis tòmtọh gơwèt mơ jơnau he neh hơ, tồ ală cau gut dăr git lah kọn la kọn sau Yang. Kon jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, tơnơ̆ ală ngai guh mù tòm rài kis, bŏl he đal git ală bơta rơp rọh, mìng gơs Jơnau Yang găm sum sum. Tŭ gùng dà rài do bềng tơl bơta gơlơnggơr mơ ală jơnau ho pơgon kọn mơnùs ò di tŭ lơi kŭng prap kơ̆ wil tơl, bŏl he òs rơp jòi bàn bơta kơ̆ cê tòm jơnau ho pơgon Kơnrẵn di. Bơta lơi Kơnrẵn neh ho, Kơnrẵn rơp lơh gơlik gơs nền cê ngăn. Tài behơ̆, dăn Yang dŏng bŏl he git dòn kơnòm Kơnrẵn oă rlau kòp ngai tai, mơ kŭng gơlik gơs ală cau kis dòn sŏng mơ dòn kơnòm dipăl digul dunnia do – be broă gen Kơnrẵn neh koñ gơboh mơ prap wil tơl jơnau ho pơgon gơwèt mơ bŏl he jơl tus lồi dut.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.