Tòm rài kis, oă dớ bol he kơ-no cau đơs: “lời té an in git bơyê mê dê là cau lơi, gen an rơp đơs mê in git mê la cau bè lơi”. Jơnau đơs do ràng tơlik dồ bơta hớ la ală cau bol he lơh yô rơp lơh he đòm jat tòm nùs kơlôi, broă ờs lơh mơ rài kis cau hớ dê. La cau dờn Yàng, bol he pal dờp git lah jơh ală cau he lơh yô sùm rgơi tup bư tus dê rài kis kung bè bơta dờn he dê. Gen bè hớ, bơta dờng màng hớ là bol he rơp sac gơlik gơs cau lơi tòm ală cau mơ he lơh yô.

Ngai do, 23/09/2026, rơndap bơta hòi dăn kòp ngai hòi jà ồng mọ oh mi kơ-lôi sơ-nơng Jơnau Yàng bơh tơnggume PRAP NÙS KLÀS BƠTA IƠH

“Ngan, ò gơs cau lơi be Ahap, la cau neh tac să nàng lơh bơta iơh di đap Yàng Jehôwa, mơ khai kòl chồl bơtrut bơh bau ùr khai la Jesebel.” (‭‭I Ală Bơtau‬ ‭21‬:‭25‬)

Ngai an gam dềt, gơs dồ broă an kah sùm. Tòm àng drim ngai Rlô, me bàp an guh gơn nàng rcang lòt pơjum. Me an soh ào dài, bạp an soh ào sơmi bò, mơ kơt cavat dồ bă mo mó. Mơya gơs dồ broă an in sền nền hớ la bàp an mờng ngui dồ nơm mơnà nàng bong dê só lơh gơ in song mơ niam. ờ git bè lơi, an kờn ngan đòm jat bàp an dê. Gen bè hớ an ai dà nàng bong dê só lơyah an dê, nàng đòm jat bàp an dê.

Tu kah wơl broă hớ, an dòp git kon dềt mhar ngan đòm jat ală cau gùt dar. Mơya ờ di mìng kon dềt sùm lơh bơta do. Oă cau tòm bol he gơkòl đòm jat bơh ală cau he lời oă jơ tơngai ơm rềp. dồ nă cau git kơrhia kung rgơi ờ git kơrhia tai tú ơm rềp cau bè hớ. dồ nă cau dờn song rgơi blac pơrlồm tú ơm rềp cau blac pơrlồm. dilah ală cau gùt dar rgơi tom gơl rài kis he dê, gen bol khai kung rgơi tomgơl tus dê bơta dờn bol he sơl.

Bơta do kung di ngan tòm bơta tom bau sơl. Bơta tom bau la bơta bơrkoat dê gùl bar nă cau, mơya kung la bar nă cau krơi is, nùs kơlôi is, pơnah kis krơi is, bơta dờn kung krơi is. Cau bơyô he dê rgơi chồl bơtrut he kờn Yàng oă rlau, mơya kung rgơi lơh bơta dờn he dê huc ngềt rlau dilah bol he ờ drơng kơp mơ prap gar he tòm Yàng.

Sră Goh sơnio bol he in sền gó dồ bơta tombau mơ cồng nha bơta iơh dờng ngan, hớ là digul bơtau Ahap mơ mò Jêsaben.

Ahap la bơtau dớ 7 tòm lơgar Israel đah đang. ồng at bồ tòm 22 nam. Ahap la dồ nă cau bơtau gơs gơnoar dờng mơya “lơh bơta iơh di đap Yàng Jehôwa rlau mơ jơh ală cau lài mơ khai.” (1 Ală Bơtau 16:30). Tòm pah rài at bồ, Ahap neh sền gó gơnap gơnoar Yàng Tòm Trồ dê bơh ồng Eli mơ kơno ală jơnau lah pơrhơng bơh Yàng, mơya ồng kứ sac rài kis bơsac, ờ ai lơh krơi mơ gùng dà Yàng Tòm Trồ dê.
Bau ùr ồng dê la mò Jesaben. La kon ùr bơtau Siđôn dê. Bơta tom bau do neh lơh oă ngan bơta ờ niam tus dê bơta dờn hơđang làng bol Israel. Jesaben duh khoai rùp rak Baal, gen ờ ai lơh krơi tú mò hòi jà bơta duh khoai rùp rak. Mò kung neh ting jat mơ tonchơt oă ală cau gơnoar hwơr Yàng Tòm Trồ dê, mơ jòi pơnah nàng tơn chơt ală cau tom dră dê mò.

Mơya, bol he dờp git lah bulah mò Jesaben chồl chao, Ahap kung pal kong cồng nha bơh ală bơta mơ ồng sac rwah. Sră Goh cih: “Ngan, ò gơs cau lơi be Ahap, la cau neh tac să nàng lơh bơta iơh di đap Yàng Jehôwa, mơ khai kòl chồl bơtrut bơh bau ùr khai la Jesebel. Khai neh lơh bơta cù kìr rlau jơh tòm tŭ lòt jat ală rùp ràk, be cau Amôrit neh lơh, la làng bol mơ Yàng Jehôwa neh bơtrơh tơlik di đap làng bol Israel” (1 Ală Bơtau 21:25-26)

Sèng Sră Goh do sơnio bol he in sền gó bar jơnau song. Jesabel ngan neh lơh ờ niam tus dê Ahap. Mò chồl bơtrut ồng lơh broă iơh mơ cù kìr dê đap mat Yàng. Mơya Sră Goh kung đơs loh làng lah ồng Ahap “la cau neh tac să nàng lơh bơta iơh.” loh làng ngan ồng gơs gơnoar nàng sac, mơya ồng neh sác bơta ờ dờn bơr.
Bè hớ, dilah ờ gơs mò Jesabel, Ahap gơlik gơs cau iơh sơl ơ? bol he ờ git nền sèng hơ wơl. Sră Goh bơto bol he in git la mò Jesabel neh lơh nùs ờ dờn bơr tòm nùs ồng Ahap dê gơlik loh làng rlau tai.

Bơta do lơh an in kơlôi tus bơta ờ dờn bơr tòm đah hwềng. tú kis tòm tiah ròng siam tồi glài, dilah bol he ờ prap gar să he tòm bơta duh rngòt Yàng, bol he rơp mhar nàng dồ nùs tòm bơta tồi glài, rơp lòi dồ đah bơta tơngkah Yàng Hwềng Goh dê, tơnớ rơp sền bơta tìs là bơta ờs mờng, mơ rngòt rlau tai hớ la bol he ờ dờp git rài kis he la mbè lơi tai. hớ la tú bol he sơlơ tac să tờm he lơh bơta iơh dê đap mat Yàng. cồng nha lời wơl là hwềng soàn sơlơ ngai gơhuc mơ gơplơ tòm ală bơta tồi glài.

Jơnau yal bơh ồng Ahap kung sơnio he in git cồng nha tồi glài dê ờ ơm wơl mơ să tòm ồng. bơta duh khoai rùp rak mơ ờ dờn bơr ồng dê neh lơh tus tòm cau Israel. he rgơi sền gó, tombau sùm lơh oă bơta tus hơđang oh kon, hìu nhă mơ jơi bơtiàn pơnjat bol he dê. bè hớ, tú dờp git bơta do, he pal swì is rài kis he mơ nùs nhơm he dê dê đap mat Yàng. ală cau mơ he ơm rềp gam hoài cèng he rềp mơ Yàng rlau tai sơl ơ? he gam tuh wơl bơta lơbơn lơnio he dê là tài bơh dồ nă cau ndai sơl ơ? digul rbô rhiang bơta sac rwah tòm rài kis do, he gam sac lòt jat gùng dà Yàng, bulah pal phi ală bơta sơl ơ? bulah kiau ma bè lơi, bol he pal sùm kah jơnau do: “Prap gàr tĕ nùs kòn dê dô bă kơrhia rlau jơh, Bơh ală croh dà bơta kis gơlik bơh di gơ.” (Jơnau Pơnđik 4:23)

Dan jà bol he dô nùs bal tòm bơta hòi dan: Khoai Yàng, dan sền gar nùs nhơm kon sùm song ring dê đap mat Yàng. tòm tiah mơ Yàng ơn kon kung bè tòm ală cau mơ kon tìp, dan dong kon git kơrmap gar, ờ lơh bơta tồi glài mơya lơh nền ràng tơlik bơta kờn gơboh mơ bơta sàng goh Yàng dê. dan jơh ală cau gùt dar kon dê geh hoài cèng tus mơ Yàng rềp rlau tai bơh rài kis kon dê. kon jơh nùs hòi dăn, ai sơnđan Yàng Jêsus Krist, Amen.

Ơ ală ồng mọ oh mi kờn gơboh, kòp tú he gơplớ tòm rài kis đah hwềng, ban đơs tài bơh taih kiau ma hala tài bơh cau ndai. mơya lài ngan, pal sền swì song tòm nùs nhơm mơ dờp cồng nha bơh ală bơta sac rwah he dê. tú neh lơh sir broă tòm dơlam nùs, he pal càng lơh niam wơl ală cau he tomklac mơ tiah he ơm kiau ma. dilah tiah lơi hala cau lơi lơh he in kis ờ sàng goh, ròng siam tồi glài, he kơnòm bơta nđàc Yàng nàng tom gơl wơl mơ sang lòi jơh. bulah mbè lơi, kung pal cèng bơta niam lơgar Yàng dê tus mơ ală cau kiau ma he dê sơntòm bơh ngai do.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.