Tũ jơ rgơi lơh jrô ndơp bơta dòn, mơya kung rgơi lơh siar roh nus nhơm dilah bol he ò kah rngal. Sơlơ lòt jõỡm Yang, bol he sơlơ buôn lơi bơta ơs mơng lơh roh nus duh rngòt dỡ sơnrơp. Bol he kah mơ nus ală bơta rơndap duh khoai tòm Hiu Jum Goh, chai rgơi ală bơta lơh lòt tom rai kis Cau Don Krist, mơya hũi tũ lơm pah hor dà mat cun gơltăng ơn rai kis he Yang in. bơta ơs mơng lơh ală bơta lơngai bol he dơp geh gơlik gơs bơta dipal pal gơs, ai bơta kỡn gơboh bơh sơnrơp ngêt ngai. Bol he at bồ rai kis he mơ oă bơta git lam mơ bơta khin cha, mơya hũi lah ală bơta he gơs ngai do la sơntơm bơh bơta nđac Yang Dong Jesus.

Ngai do, ngai 24/09/2026, Bơta Hôi dăn Kơp Ngai dăn ja ală ồng mò oh mi bơtê bal Jơnau Yang kơnơm dê bơta dong kơl Ben Ledgeh bơh tơnggumê KAH WƠL NGAI SƠNRƠP.

“Ngai do bol mê neh yal tơlik lah Jehôwa Yàng Tom Trồ bol mê dê mơ bol mê rơp lòt jat tòm ală gùng dà Kơnràñ dê, mơ bol mê rơp prap gàr lơh jat ală bơta lơh nền mơ ală bơta boh lam Kơnràñ dê, mơ bol mê rơp dòn bơr Kơnràñ.” (Yal Wơl Bơta Boh Lăm 26:17)

Ăn kỡn ngăn ăt rơndeh. Gơs dô bơta khat bơboh krơi is tũ rgơi lòt ngai rlau mơ kơldăng rlau gơwet mơ pràn he dê. Bulah la ăt rơndeh tus tiah kă brô nàng roat phăn kung lơh ẵn in gơboh gơbai! Jõ jõ, ăn kơlôi tus ală tũ lòt kơnhơl jơh hiu nhă dê tòm ngài tỡ nỡ: bol he rơp lòt jat gùng lơi, geh sền gõ ală tiah lơi mơ rơp cih bơntơl tai nđờ cây số tòm sră lòt gùng he dê.

Mơya, digul jơh ală bơta hỡ, gơs dô nơm kirsơnre ăn gơlơh ò tũ lơi kah tus: ngai he geh ai sră gơs gơnoăr ăt rdeh. Hơ la dô nơm ngai dơng mang. Ăn găm kah ngai hỡ he neh rơm nus mơ kơrhia ngăn ò git nđờ tòm tũ ăt rdeh ri hiu tòm ngai dơng mang hỡ.

Đơs ngăn la ăn ò hoan gơs tũ kơlôi tus ngai ăn dơp sră ai gơnoăr hỡ, mơ ya dilah ò gơs ngài hỡ gen ngai dô ăn neh ò khin cha nàng khat gơboh ăt is rơndeh. Ngai lik klơng, ngai tơmbau hala kơp ală ngai dơng mang lơi tòm rai kis kung ndrơm behỡ sơl. Hỡ kung la ală tũ lơmpah dipal kah, mơ pal lòt găn bol gơ gen tang bol he rgơi sơntơm cơnđòa tòm dô nơm gùng lòt pa. Bulah behỡ, sơnăm kơnhai lòt găn, ít cau găm wet tus hala nggui kah wơl ngai dơng mang hỡ. Bol gơ ming la dô nơm sơntơm dô nơm gùng pa di lơm.

Bulah behỡ, jõ jõ ơm dơh wơl mơ wơlke lăng wơl tiah sơntơm hỡ la dô bơta pal cang ngăn.

Pal đơs lah, tũ do ăn ò găm ăt rondeh tai be ală ngai sơnrơp pa geh sră ai gơnoăr. Ăn găm sùm kơrhia tơnỡ ơnih ăt rơndeh, mơya neh khin cha mơ ai lơh gơboh rlau. Ăn ò găm rơmsă rngòt tai kơp dỡ kup tòm ơnih ăt rơndeh be lai or, mơ bơta git làm jat sơnăm kơnhai kung dong ăn lơh lòt mhăr rlau tòm ală bơta gơlik gơs. Bulah behỡ, kung bơh neh mơng ir mơ broă ăt rơndeh mơ gơs dỡ ăn gơlơh khin ir. Gơs dỡ ăn ò găm wet tus tai ală bơta gut dar, gơs dỡ gen lơi bồ dơngoh he kol ò kơlôi sơnưng. Kơp tũ behỡ, ăn kah wơl ngai geh sră ai gơnoăr: ăt rơndeh rgơi ceng wơl ală bơta chò hơp mơ bơta khat gơboh, mơya hỡ kung la dô gơnoăr broă dơng ngăn, õ gơs tũ lơi sền nggờc.

Tơnỡ mơ oă sơnăm lòt tòm blang bras ngềt ngơt, lang bol Israel lồi dut kung ntao diđap Tiah Hơ Ai. Ming găm dô cơnđòa tai, bol khai rơp geh kis tòm ală bòn mơ bol khai ò bơt mon mơ dơp lèng ală phăn tùc tăm mơ bol khai ò tùc tăm. Mơya lai mơ tũ cờđòa mut tòm tiah hỡ, Môise neh lăm lang bol tus tòm dô nơm bơta pơjum mang ryũ nàng lơh nên wơl bơta hơbal mơ Yàng Tòm Trồ. Lôi bơta pơjum hỡ, ồng đơs:

“Ngai do Jehôwa Yàng Tom Trồ bol mê dê ai jơnau sồr bol mê lơh jat ală bơta lơh nền mơ ală bơta boh lam; jơh nùs jơh hwềng soàn kơrhia prap gàr lơh jat tĕ ală bơta hơ̆. Ngai do bol mê neh yal tơlik lah Jehôwa Yàng Tom Trồ bol mê dê mơ bol mê rơp lòt jat tòm ală gùng dà Kơnràñ dê, mơ bol mê rơp prap gàr lơh jat ală bơta lơh nền mơ ală bơta boh lam Kơnràñ dê, mơ bol mê rơp dòn bơr Kơnràñ.” (Yal Wơl Bơta Boh Lăm 26:16-17)

Tơnỡ mơ bơta pơjum hỡ, digơlăn lang bol Israel neh cơnđòa lòt mơ Yàng mơ dô nơm nus nhơm jơh nus git kơrhia mơ tơryang tơryông. Bulah behỡ, jat tũ jơ, bol khai rhơi rhơi ngai bơh Kơnrãn. Bol khai lơi nus bol khai hwoai bal mơ ală bơta ndai mơ hũi bơta hơbal neh bơtao mơ Yàng Tòm Trồ. behỡ gen, Kơnrãn neh sôr ală cau gơnoăr hwơr tus nàng hôi bol khai ri wơl, tơngkah bol khai kah wơl lah ming dô nă Yàng Jêhowa là Yàng Tòm Trồ bol khai dê.

Ngai do, kơnơm Yàng Dong Jêsus, bol he kung găm cơnđòa lòt tòm gùng wêt lăm tus bơta kis, mơ dơp lèng dô nơm rai kis pa tòm bơta dong twoai Kơnrãn dê. Bol he geh chò hơp dơp lèng bơta khat gơboh mơ bơta kỡn gơboh Yàng Tòm Trồ dê- mơ sơlơ cơnđòa lòt mơ Kơnrãn, bơta hỡ sơlơ gơlik jrô rlau tai. Bol he ngai do sơlơ mơng mơ bơta tề lăm Yàng Hwềng Goh dê, khin cha rlau tũ tus mơ Yàng tòm bơta hôi dăn mơ lơh cơng bơh Kơnrãn, ò găm kơlôi rcăng tai be dỡ sơnrơp lah: “ ngăn he găm gơs lòt tòm toh gùng hala ò?”

Mơya dilah gơs dỡ bol he gơlik gơs ò kơlôi sơnưng, ò wet tus hala ò găm git he càng lòt tiah lơi, gen Cau Gơnoăr Bơto Dơng Pol tơng kah bol he lah ri wơl tẽ mơ jơnau yăl tơlik bơta dòn dỡ sơnrơp:

“Tòmlơh tĕ bơta tòmlơh niam bơta dòn dê; sơmbat kơ̆ di bơta kis gam sùm sùm, bơh mê neh geh hòi sac tus hơ bơta hơ̆, mơ kung bơh hơ̆ mơ mê neh yal tơlik bơta yal tơlik niam di đap oă cau lơh cơng.” (I Timôthe 6:12)

Ală jơnau cơng hỡ găm lòt bal mơ bol he tòm gùng lòt jat Yàng, Mơ tũ rai kis bol he gơlik gơs dô jơnau cơng, rơp gơs oă cau ri wơl mơ Kơnrãn mơ kung lòt bal tòm gùng lòt bơta dòn.

Dan jà bol he dô nùs bal tòm bơta hòi dan: Khoai Yàng, kòn ưnngai Kơnrãn bơh bơta dong twoai mơ ai kòn in bơta nđàc geh cơnđòa lòt bal mơ Kơnrãn kơp ngai. Dăn toh glài kon in bơh oă dỡ kòn lơi ală bơta kơlôi rcăng, giga broă lơh rai kis dê lơh nus he ò wet tus, ò găm đềt mêr mơ Yàng be dỡ sơnrơp. Dă Yàng Hwềng Goh tơngkah kòn sùm kah tus jơnau hơbal he neh bơtao mơ Kơnrãn, nàng kòn pơnjat cơnđòa lòt tòm bơta dòn duh mơ gơn kơnơm. Dăn bơntơl pràn kòn in nàng prăp kỡ bơta dòn, tơmlơh tòm bơta tơm lơh niam mơ kis dô rai kis niam nus Kơnrãn. Kòn jơh nus hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh,, digul dô nơm dunnia bềng ală bơta buôn lơh bol he in ò wet tus tai, bơta lơh bol he càng rlau jơh la bơdơh wơl nàng kah bơh ală ngai sơnrơp he tus mơ Yàng. Să tòm tũ hỡ, bol he rơp kah wơl he neh hơ bơta lơi mơ Kơnrãn mơ nchĩ bơh tai he lơh nền cơnđòa lòt jat Kơnrãn. Gùng lòt jat Yàng Dong Jêsus ò di tũ lơi kung buôn lòt, mơ ya hỡ la gùng lăm tus bơta kis, bềng liu bơta nđàc, ring lơngai mơ bơta kỡn gơboh Yàng Tòm TRồ dê. Dilah ngai do oh mi gơlơh be he ò găm wet tus tai hala lòt tis nrah, gen kah wơl tẽ ală ngai sơnrơp he tus mơ Yàng. Kah wơl tẽ ală jơnau hơbal neh bơtao mơ Kơnrãn mơ rê wơl hơ bơta kỡn gơboh dỡ sơnrơp. Yàng găm ơm bal, rcăng sir grơng dơ, tề lăm mơ bơntơl pràn nàng oh mi pơnjat cơnđòa lòt kỡ win tòm bơta dòn.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.