Gơs tú lơi he gơtơmut tòm tiah ờ gơs cau kah he tai, tiah ờ gơs cau kơno, ờ gơs cau dờp git mơ kung ờ gơs cau rgơi sền gó ală bơta kalke jrô ndơp tòm nùs he dê taih? Lòt gan bơta bòl glar là gùng lòt kalke ngan, mơya tú bơta bòl glar gơtơntus di di tú dồ nă cau kong oă bơta moat jrùng, bơta bòl glar sơlơ kơnjớ oă rlau tai. Hớ kung là bơta bòl glar mơ mò Aga neh lòt gan tòm tú mò gam bun, dồ nă mò cơnđoà lòt is dê gùl blàng bràs. Mơya kung tềng tiah ngềt ngơt hớ, Aga neh tìp Yàng Tòm Trồ bơtau git jơh ală bơta mơ kah kơlôi mò.

Ngai do, 30/09/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume YÀNG TÒM TRỒ SỀN GŎ AÑ

“Cau ùr sơnđan Yàng Jehôwa neh đơs mơ khai la “Yàng Tom Trồ sền gŏ,” bơh khai neh đơs lah: “Ngan tềng do ò di añ neh gŏ Bơtau sền gŏ añ sơl ơ?”” (Sơnròp Gơlik Gơs 16:13)

“Mơya cau gơnrơh Yàng Jehôwa dê gŏ khai ơm rềp dê gah croh dà tòm ƀlàng ngềt ngơt, dà croh tòm gùng lòt hơ Sur, gen lùp lah: “Ơ Agar, dĭ ùr Sarai, mbơh đah ai tus? Mơ ntềng đah ai rơp lòt taih?” Cau ùr ho lah: “Añ dô bơh di mat Sarai, cau tòm añ.” Cau gơnrơh Yàng Jehôwa sồr khai lah: “Ai rê wơl tĕ mơ cau tòm ai dê mơ dòn duh khai.” Cau gơnrơh Yàng Jehôwa dê đơs tai lah: “Añ rơp bơtơl oă jơi bơtiàn ai in; bol khai rơp gơlik gơs oă tian gơs cau ò jai kòp.”…Cau ùr sơnđan Yàng Jehôwa neh đơs mơ khai la “Yàng Tom Trồ sền gŏ,” bơh khai neh đơs lah: “Ngan tềng do ò di añ neh gŏ Bơtau sền gŏ añ sơl ơ?”” (Sơnròp Gơlik Gơs 16:7-10, 13)

Sră Sơn Ròp tap 16 pờ dồ nơm rùp sơnia kalke ngan dê gùl hìu nhă ồng Apram dê. Tơnớ 10 nam kơp gơn jơnau hơ gơs dồ nă kon mơ ờ gó, mò Sarai neh roh bơta nùs ơt ơl. Mò jòi jat pơnah cau dunnia dê: ai mò Aga, cau dí ur Ejiptơ dê, tus ơm bal mơ bau klau nàng kơp gơn gơs dồ nă kon. Apram, tòm jơ fuk lơbơn nùs mơ ờ lơh sir gơnoar cau at bồ đah hwềng hìu nhă, ồng neh đòm jat. Tú neh git bun kon tơnhoa ồng Apram in, broă mơ mò cau tờm ờ rgơi lơh, nùs jòng să tòm mò Aga gơlik dờng, mò sơntờm sền ơsơp dê mò Sarai. Pơrlơ wơl, mò Sarai sơntờm lơh oă bơta ờ niam tus dê mò Aga, chồl cau ùr dí do tus bơta lơh nền hớ là ntoat dô.

Sền dồ bă song ngan jat Sră Goh, ờ gơs cau lơi la ờ gơs glài. Kòp nă gơs is bơta gơplơ he dê, mơ lơh jat đah poăc să he dê. Aga ờ di la dồ nă cau ur wil tơl, mò neh tơm wơl bơh bơta lơh tìs mò dê. Gơkòl bơtrơh, mò koar kơldul bung ntoat dô tòm gùng lòt tus đah Ejito. Tềng tiah ngềt ngơt, duh trơàl, mò ờ tơl pràn đah poăc să kung mơ hwềng nùs sơl, rngòt rngơt ờ git bè lơi tòm ală ngai rơp tus.
Mơya, tềng tiah hiòng dà ngềt ngơt tòm blàng bràs hớ, nùs nđàc sơnghit Yàng Tòm Trồ dê neh ràng tơlik. Cau gơnrơh Yàng Jêhôva tơlik mat mơ đơs lah: Ơ Agar, dĭ ùr Sarai, mbơh đah ai tus? Mơ ntềng đah ai rơp lòt taih?

He ơn nùs tồr nàng kơno iat jơnau hòi jà hớ! Digul dunnia mìng sền mò là cau dí, hala dồ nơm phan nàng deh kòn, Yàng Tòm Trồ git sơnđan mò dê! Yàng ờ sền mơ mat cahrna hala sền ờ sơp, mơya sền bơh mat git bơta bòl glar jê sồt mò dê.

Krơi is, bơta kờn gơboh Yàng dê ờ di mìng ơm mơ cau mè lơm, mơya kung wèt sền tus dê kon dêt tòm kơndul mò dê sơl. Kon dêt do là cồng nha bơh bơta lơh tis kon mơnus dê, mơya dê đap mat Bơtau Crơng , bơta kis kon do ờ di là dồ bơta nisơna, Yàng sền gó kon dềt do, kờn gơboh khai mơ sồr mò sơnđan mat kon la Ichmaen, gơtha la “Yàng Tòm Trồ kơno iat”. Yàng hơ lah rơp ai lơngai tus dê jơi bơtiàn kon dềt do. Kờp tú hòi mat kon, Aga sùm kah lah jơnau rac dan mò dê digul blàng bràs neh geh Yàng kơno iat.

Tòm bơta chò hòp mơ nùs ừn ngài mò Aga neh jrau dờng: EL Roi – “Yàng Tòm Trồ sền gó an”. Cau ur dí neh dờp git Yàng Tòm Trồ lơh tiah ro ran gơlik gơs tiah gơn kơnòm, bơtơl bơta pràn mò in nàng rê wơl tòm bơta sền gar Kơnràn dê.

Ală broă mò Aga neh lòt gan ờ di mìng ơm wơl tòm pang sră yau, mơ ya an kung neh sền gó tòm rài do. An neh sền gó dồ nă kon ur gam kơnòm să ngan mơya neh gơdùh tòm broă: neh bun ờ di jat nùs kờn, tus bơh bơta kờn gơboh dồ nă cau ờ di, mơ cèng tus oă bơta kalke ngan. Tú tìp ală bơta hớ, bơta rngòt rngơt bơh ală cau cahrna, cau ùr do kung neh gơkòl oă ngan ală bơta ờ niam tòm tú khai gam bun. Tòm ală broă bè hớ, ờ siớu cau neh kơlôi tus broă hớ la tơn chơt kon he dê tú gam tòm kơldul.

An bơtoah ngan tú git mò gơnoar sơnơm Nữ Hằng, cau mò bơt bơtào mơ at bồ mpồl Duh Broă Sền Gar Bơta Kis bơh kơnhai 8/2005. Bơh gơnoar broă tomboh bơr, chồt bơtrut mơ yò đơ ală cau ur bun gơs nus kờn tơn chơt kon hala cau ur gơkòl bơta kalke, ờ geh tiah gơn kơnòm, gơnoả broă do neh gơlik gơs tiah dong kòl, pà ai tiah ơm tiah bic, rang sir ală gar sơnơm mơ lòt bal mơ ală cau mẹ jơl tus dê ngai bol khai deh kon. Sền gó mpồng bơta kờn gơboh pờ dờng nàng dờp rò ală cau ur bun dê gùl ală ngai bòl glar, mơ sền gó ală kon dềt geh dong tă lài mơ tú bol khai deh, nùs an bềng bơta ừn ngài. An dờp git do ờ di mìng la dồ broă wèt tus tòm dunnia mơ do kung la pơnah mơ Yàng Tòm Trồ lơh broă tòm rài kis. Yàng ngui ală nus nhơm dờng bè dồ nơm tê cơ Yàng dê nàng dong kờl, yò đơ mơ pà bơta gơn kơnòm tus dê ală cau lơh mẹ bal mơ kon dềt, kung bè pơnah Yàng neh sền gó mò Aga mơ kon dềt Ichmael tòm kơldul mò dê.

Dờp git Bơtau El Roi la cơng tàng bol he in ngai do. Bulah he gơtơ mut tòm bơta kalke bơh broă nisơna, hala ală tú he gơtup tìs, kah té lah Yàng sùm sền gó he. Yàng sùm dờp git ală dà mat hor, sền gó ală jê sồt mơ ală bơta tìs he dê, nàng kờn gơboh, yò đơ, mơ pờ he in mpồng bơta nđàc tus dê rài kis he.

Dan jà bol he dô nùs bal tòm bơta hòi dan: Khoai Yàng kờn gơboh, kon ừn ngài Yàng tài bơh Yàng là El Roi – Bơtau sùm sền gó, kơno iat mơ sền dờng màng kòp rài kis. Digul bơta gơlòng mơ bơta tìs kon mơnus dê, ừn ngài Yàng bơh Yàng ờ sang lòi mơ ya sùm pờ tê dờng ơnàng nàng yò đơ bol kon. Dan pà ai kon in bơta dờn kơ cê tú tìp bơta gơlòng, mơ kung dan ơn tòm nùs kon bơta kờn gơboh Yàng dê, nàng kon git tom pà, yò đơ ală cau mè ờ geh tiah gơn kơnòm mơ sền gar ală kon dềt pa deh gùt dar kon dê. Kon jơh nùs hòi dan, ai sơn đan Yàng Jêsu Krist, Amen.

Ơ ală ồng mọ oh mi kờn gơboh, tú jê sồt hala tú gơkòl tòm bơta kalke ờ di là he gơkòl Yàng sang lòi. Ban lòi bơta ơm is hala bơta rngot bơh broă tis he dê lơh he in ờ khin cơnđoà pơnjat tai. Tú he pờ nùs, dơn kơnòm dê nùs nđàc Yàng dê mơ dờn nền lah Yàng sùm kah kơlôi tus dê he, Yàng rơp bơtơl pràn mơ pờ dồ nơm gùng pa he in. khin cha ntào, cơnđoà pơnjat tai tài bơh Yàng sùm sền gó mơ tề lam he tus ală bơta niam rlau jơh jat nùs kờn Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.