Gơs dô bơta kơlôi tồn la gơsơlơ̆ mơ ya la jơnau di ngăn: sơlơ prap oă, kon mơnùs sơlơ rọh bơta rĭng lơngai. Sơlơ sơmbat kơ̆, gen bŏl he sơlơ rngòt rọh wơl. Nisơna, bŏl he rơp sơntom sền ală bơta bơh was – sơnoa dunnia, kơr ală bơta bơh măt sền gŏ mơ tê he geh bư. Gơs dơ̆ bŏl he kŭng ò git ngùi ală was hơ̆ nàng cahrña nùs koñ gơboh Yang ală ọh mi he di. Mơya, lơgar Yang Tom Trồ lơh jat dô bơta rnoas pha is. Phăn ơn gen niăm nùs Yang hơ̆ la dô nơm hwing nùs dòn kơnòm sŏng ngăn mơ duh rngòt Yang.

Ngai do, ngai 06/10/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Lina Johnson dê bơh Tơnggume RÀNG TƠLIK BƠTA DÒN BƠH BROĂ LƠH

“Bơta dòn ò gơs broă lơh kung chơt behơ̆ sơl.” (Jakơ 2:26)

“Yàng Jesu pò mat, gŏ ală cau pas ơn phan tòm đam jàr, kung gŏ dô nă cau ùr bơnrau rƀah ne ơn bàr su trà. Kơnràñ đơs lah: “Añ đơs ngan mơ bol mê, cau ùr bơnrau rƀah do neh ơn oă rlau mơ jơh ală cau ne. Bơh jơh ală cau ne ai phan tơngkah tơngkañ bol khai dê mơ ơn tòm hơ̆, ai cau ùr rƀah siơ̆u siar do neh ơn jơh phan khai gơs, la phan ròng siam să khai.” (Luka 21:1-4)

Ô krơi ngăn tŭ geh Yang Jesu prơ behơ̆, Gen dô ngai ne bŏl he kŭng rơp kơno jơnau Yang đơs behơ̆ sơl?

Nđợ năm lài or, tòm tŭ họi dăn, dô jơnau lùp kư̆ ntas tòm nùs ăñ : “ Kon gơs dòn kơnòm Añ sơl? Ăñ đơs òm “Khoai Yang, Kơnrẵn git lọh”

Tŭ hơ̆, hiu nhă bŏl he găm kis tòm bọn dờng oă cau lọt wăñ. Ăñ geh lơh broă he koñ gơboh, Yang kŭng òs rcang wil tơl ală bơta păl càng, gen rài kis òs rĭng lơngai ngăn mơ ăñ gơlơh be hừh nùs. Mơya jơnau lùp hơ̆ kư̆ ntas tòm nùs ăñ: He gơs ngăn la dòn kơnòm Yang ơ? Gen ăñ rơp be cau ur pơnrau ne, rcang sir ơn Kơnrẵn in jơh ală bơta he găm gơs ơ?

Gen dô êt ngai tơnơ̆, bơta dòn hơ̆ sơntom geh lòng. Gơs ală tŭ tơngai hiu nhă ăñ păl kis ĭng tòm ơdŭ ơpah bic, păl kơnòm tus ală mpồl rơndăp dŏng kòl mơ tìp oă kalke bơh jền priă. Mơya, jơh dơ̆ do tus dơ̆ ndai, Yang Tom Trồ găm dòn sŏng rcang ală bơta bŏl he càng. Kòp dơ̆ Yang dŏng lơh ăñ ĭn bơtơl bơta dòn là: Yang Tom Trồ òs sum dipăl nàng bŏl he ơn bơta dòn wil tơl di Kơnrẵn.

Broă Yang sền gŏ ò di là khà jền dô it lơm mò pơnrau di ò, mơya la bơta dòn dờng tòm nùs mò. Mò dòn lah tŭ jơh nùs ơn Yang Tom Trồ ĭn ală bơta he gơs, Kơnrẵn rơp dòn sŏng rcang ală bơta mò koñ càng. Ngăn la dô bơta dòn niăm krơi ngăn! Do là dô nơm broă lơh niăm nùs Yang Tom Trồ!

“Behơ̆, bơta àng bol mê dê pơnđàng tĕ di đap ală cau, nàng bol khai in gŏ ală broă niam bol mê dê, mơ jòng ro Bèp bol mê ơm hơđang trồ.” (Mathiơ 5:16)

Gen behơ̆, broă lơh niăm gơtha bal mơ bơta dòn sơl? Ò di. Mơya bơta dòn ngăn òs gơlik gơs bơta koñ gơboh, mơ bơta koñ gơboh hơ̆ rơp geh ràng tơlik bơh ală broă niăm. Yang Jesu đơs tòm Jang 14:15 “Dilah bol mê kòñ gơboh di Añ, gen rơp prap gàr ală bơta sồr lam Añ jê.” Sơlơ đal git bơta koñ gơboh Yang gơwèt mơ he, bŏl he sơlơ koñ gơboh mơ dòn kơnòm Kơnrẵn rlau tai. Bơh nùs koñ gơboh hơ̆ chồl bơtrut bŏl he kis dòn bơr, lơh broă niăm mơ gơlik gơs ală cau lòt bơtọ yăl, nàng bơh rài kis he, oă cau kŭng geh tề lăm tus hơ Yang.

Mơya gen, Yang Tom Trồ rơp koñ gơboh ăñ oă rlau tai dilah ăñ lơh oă broă niăm rlau sơl? Ò di behơ̆ ò. Bơta koñ gơboh Kơnrẵn ai bŏl he ĭn ò pơndròm gơwèt mơ ală broă he lơh, mơya sơntom bơh să tòm Kơnrẵn là Bơtau koñ gơboh mơ dòn sŏng Kơnrẵn di. Bŏl he ò tŭ lơi rơp lơh broă lơi tồ dipăl dòp geh bơta koñ gơboh hơ̆, kŭng ò di bơta lơi rơp lơh Kơnrẵn ĭn jơh koñ gơboh bŏl he. Rlau mơ hơ̆, be Rô ma đơs lọh lang, ò gơs bơta lơi rơp cah is bŏl he lik bơh bơta koñ gơboh Yang Tom Trồ di tòm Yang Krist Jesu.

Broă lơh niăm ò tŭ lơi dŏng bŏl he, kŭng ò lơh Yang Tom Trồ koñ gơboh hala niăm nùs bơh bŏl he rlau. Bơta lơh niăm nùs Kơnrẵn hơ̆ la dô bơta dòn sŏng ngăn.

Bơh bơta koñ gơboh ò tòmgơl Yang Tom Trồ di neh bơtọ ăñ ĭn git là ăñ rơp gơs dòn kơnòm wil tơl di Kơnrẵn, ò di bơh ăñ dipăl, mơya bơh Kơnrẵn òs dòn sŏng gơwèt mơ jơnau ho pơgon Kơnrẵn di.

Gen behơ̆, Jakơ koñ đơs jơnau lơi tŭ ồng cih: “Bơta dòn ò gơs broă lơh kung chơt behơ̆ sơl.” (Jakơ 2:26)?

Ăñ dòn Jakơ koñ ràng tơlik lah cau ndai mìng rơp sền gŏ bơta dòn bŏl he di tŭ bơta dòn hơ̆ geh ràng tơlik bơh broă lơh. Tòm jơnau yăl tơnggit bơh mò pơnro, bŏl he đal git bơta dòn mò di tài bơh mò neh ơn Yang Tom Trồ ĭn jơh ală bơta mò neh gơs.

Digơlan he neh git Yang mơ duh rngòt Yang oă năm. Dilah behơ̆, ưnngai Yang tĕ. Mơya he neh gơs dòn kơnòm Kơnrẵn ngăn tom tòm ală bơta sơl? Ăñ ò lơh nền ala he koñ lơh broă niăm lơi. Hơ̆ la bơta kòp nă păl jòi jat nùs koñ Yang Tom Trồ gơwèt mơ să tom he di.

Mơya, ăñ koñ chồl bơtrut he, kŭng be să tom ăñ lah: họi dăn tĕ mơ Yang Tom Trồ ràng tơlik he ĭn git lơh mbe lơi tồ dòn kơnòm Kơnrẵn oă rlau, gen khin cha lơh jat bơta Kơnrẵn sôr. Digơlan Yang họi jà he gơjrañ săng glài mơ yăl tơlik bơta tồi glài. Digơlan Kơnrẵn chồl bơtrut he ơn phăn mơna, hala dòn bơr Kơnrẵn tòm broă lơh lơi tòm rài kis di. Bulah Kơnrẵn tề lăm he lơh bơta lơi, dòn kơnòm tĕ bơta rơndăp Kơnrẵn di òs là niăm ngăn. Jơh nùs dòn kơnòm tĕ nùs koñ hơ̆, mơ he rơp git lăm bơta koñ gơboh kŭng be bơta dòn di Kơnrẵn sơlơ ngai sơlơ geh dờng.

Yang Tom Trồ òs sum sền he. Kŭng be Yang Jesu nẹ jọng ro cau mò pơnro hơ̆, Kơnrẵn chò nùs wèt sền mơ jọng ro ală cau ơn bơta dòn wil tơl di Kơnrẵn.

Ăñ dòn la bơta kơp koñ kòp nă bŏl he di la dô ngai ne geh Jơnau Yang đơs be tòm Mathiơ 25:21:

“Ơ cau dĭ lơbơn niam mơ dòn song ne, niam ngan;”

Dan jà bol he dô nùs bal tòm bơta hòi dan: Khoai Yang Jesu koñ gơboh, ưnngai Kơnrẵn tài bơh Kơnrẵn ò wèt sền đah bơdih hala ală bơta lơi kon gơs. Dăn tọh glài tài bơh oă dơ̆ kon neh prap bơta kơlôi rcang, bơta rngòt rngơt, mơ ală bơta rcang lài he di dờng rlau nùs dòn kơnòm di Kơnrẵn. Gơs ală tŭ kọn sơmbat kơ̆ ală bơta kon găm gơs mơ hŭi hwơr ală bơta hơ̆ gơri jơh mơ Yang. Dăn bơtọ kọn gơs dô bơta dòn dềt rhền be dô nă cau mò pơnro lài or, khin cha ơn jơhbơta Kơnrẵn ĭn he gơs mơ jơh nùs dòn la Kơnrẵn rơp ò tŭ lơi lòi kon. Dăn ai rài kis kọn kòp ngai geh ràng tơlik nùs koñ gơboh Yang bơh bơta dòn bơr mơ ală broă lơh niăm nùs Kơnrẵn. Kọn jơh nùs họi dăn, ai sơnđăn Yang Jesu Krist, Amen

Ơ ală ồng mọ ọh mi koñ gơboh, Yang Jesu ò wèt sền bơta kas màng phăn bàn geh ơn hala ală broă lơh dờng mìng đah bơdih lơm, mơya Kơnrẵn sền gŏ bơta dòn mơ hwing nùs dòn kơnòm wil tơl di Yang Tom Trồ. Digơlan ngai do he găm kơlôi rcang diđap bơta siơ̆u siar, hala ò koñ lơh tài bơh kơlôi bơta he gơs dềt ir. Mơya kah tĕ lah, tŭ he ơn Yang ĭn bơta he gơs nùs nhờm dòn kơnòm, Kơnrẵn sền gŏ hwing nùs koñ gơboh mơ bơta dòn he di tơn. Kơp koñ kòp ngai lòt găn, he mơ ăñ gen geh dờng tòm bơta dòn kơnòm mơ phi jào di Yang, tồ jơh rài kis bŏl he gơlik gơs jơnau jọng ro sơnđăn sàng gọh Kơnrẵn di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.