Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Ƀing ta hlăk mưn găn tơlơi hơk mơak klă tum amăng Khua Yang mơ̆, ƀôdah hlăk dŏ hơdip hrŏm tơlơi tơnap tap amăng tơlơi hơdip anai? Wơt kơ ƀing mơnuih kơtang ăt hơmâo mơ̆n mơnit mông hơtah hơtai, du ai. Tơl ƀing ta luă gŭ nao ƀơi anăp Khua Yang, ƀing ta či mưn găn tơlơi hơk mơak laih anŭn tơlơi hơdip rơbeh blai amăng Khua Yang.

Hrơi anai, lơ 04/02/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Martha Noebel tui hăng akŏ tơlơi hrăm HƠDIP RƠBEH BLAI TƠDƠI KƠ HƠDÔM TƠLƠI PƠČAH

Hơmâo sa wơ̆t, kâo hơmư̆ khua pô pơtô James Robison ngă gơ̆ng jơlan kơ tơlơi hơdip ñu. Ñu ruai glăi tơlơi hơdip gleh glan amăng tơlơi hơdip so hơđăp, yua kơ amĭ ama ñu ƀu djơ̆ mơnuih huĭ pơpŭ kơ Ơi Adai ôh. Ƀing gơñu hơmâo brơi hrơi mông thŭn dŏ čơđai anŭn jing hĭ anih atâo djai. Samơ̆ bơni kơ Khua Yang, tơdơi kơ anŭn hơmâo sa boh sang anŏ hơmâo tŭ mă rong ñu laih anŭn pơtô ñu đuaĭ tui Khua Yang.
Ñu ngă gơ̆ng jơlan tui anai, tơdang ñu mă bruă ngă khua pô pơtô, tơlơi hơdip ñu bŏ hăng tơlơi hil, tơlơi rŭng răng laih anŭn tơlơi hưp ham gah asar. Tơl pran jua ñu thâo luă gŭ ƀơi anăp Khua Yang, ñu čơdơ̆ng kơsem ƀuh tơlơi mơak sĭt hrŏm hăng sang anŏ laih anŭn bruă ñu.

Kâo dŏ kơtuă biă mă tơdang hơmư̆ ñu ngă gơ̆ng jơlan kơ tơlơi anai. Tơlơi hưp ham gah asar? Khua pơtô hiam klă anai ăt hơmâo tơlơi hưp ham gah asar mơ̆n hă, laih anŭn đơđa kiăng pơdjai glaĭ kơ ñu pô? Hiưm thâo hơmâo tơlơi anai lĕ? Laih anŭn kâo ăt pơmĭn nao kơ ƀing ră ruai Tơlơi Pơthâo Hiam pơkŏn ăt bưp tơlơi lông lăng kar kaĭ mơ̆n. Kâo ƀuh ƀu amuñ ôh tơdang jing hĭ pô grơ̆ng dŏ tơ̆ng krah ƀing mơnuih lu. Tơlơi tơnap tơdang ră ruai Tơlơi Pơthâo Hiam ƀơi mơnuih lu, hơdră jơlan lu biă mă, pơblih anih nanao, abih bang leng kơ tơlơi lông lăng prŏng kơ mơnuih mă bruă Khua Yang.

Giơ̆ng kơ anŭn, kâo čơdơ̆ng pơmĭn tơlơi hơgĕt hơmâo pha brơi kơ ñu tơlơi hơdip mơak. Tơlơi tơdu laih anŭn kơnuih gah asar hơmâo găn ñu dưi mưn găn tơlơi rơngai hlom ƀom amăng Yang Krist. Anăm hluh hual ôh, ñu jing sa čô mơnuih huĭ pơpŭ kơ Khua Yang. Ñu jing Ding Kơna Ơi Adai hlăk mă bruă hăng tơlơi hur har. Samơ̆ ñu ăt bưp lu tơlơi tơnap tap kơnơ̆ng kơ Khua Yang đôč dưi djru ñu. Ñu hơmâo dưi hĭ laih tơdang luă gŭ tŭ mă tơlơi khăp klă tum laih anŭn tŭ mă tơlơi pap Ơi Adai.

Ƀu hơmâo hlơi kiăng bưp tơlơi tơnap amăng tơlơi hơdip ôh, samơ̆ tơdah ƀu kơnang kơ Khua Yang, amuñ biă mă ƀing ta či rơbuh. Hơdơr bĕ hlơi ƀing ta jing. Ƀing ta jing mơnuih tơdu, tui anŭn nanao djă kơjăp bĕ Pô dưi djru ƀing ta.

Hnal tuč, brơi bĕ Boh Pơhiăp Khua Yang amăng hră Rôm 15:13 alum pơđur kơ ƀing ta:

“Rơkâo kơ Ơi Adai, jing phŭn kơ tơlơi čang rơmang, pơbă ƀing gih hăng abih tơlơi hơ̆k mơak laih anŭn tơlơi rơnŭk rơnua amăng tơlơi đaŏ, kiăng kơ mơ̆ng tơlơi dưi mơyang Yang Bơngăt Hiam ƀing gih dưi hơmâo tơlơi čang rơmang rơbeh blai!”

Rơkâo ƀing ta pioh mông iâu laĭ hrŏm hơbĭt
Ơ Khua Yang, bruă gŭn găn amăng tơlơi hơdip anai ngă kơ kâo rơngiă tơlơi hơk mơak sĭt, wơr bit hĭ Pô nanao wai lăng laih anŭn čem rong kâo. Kâo pơyơr tơlơi hơdip kâo kơ Khua Yang, rơkâo Khua Yang wai lăng laih anŭn čem rong kâo, brơi kơ kâo thâo mưn găn tơlơi mơyun hiam sĭt amăng Ih. Kâo iâu laĭ hăng anăn Khua Yang Yêsu Krist. Amen.

Ơ abih bang ayŏng amai adơi khăp hơeng, ƀing ta hlăk mưn găn tơlơi hơk mơak klă tum amăng Khua Yang mơ̆, ƀôdah hlăk dŏ rŭng răng amăng tơlơi tơnap tap ƀing ta? Đup gưt bĕ kơ Khua Yang hăng pran jua luă gŭ kiăng kơ dưi tŭ mă tơlơi rơnuk rơnua sĭt klă tum amăng Khua Yang. Rơkâo Khua Yang pơplih tơlơi hơdip ƀing ta jing nil pơčrang rup Yang Krist laih anŭn tơlơi khăp yom pơphăn Khua Yang. Djă kơjăp bĕ tơlơi ƀing ta kơñăm kiăng kơ dưi pơgiơ̆ng hĭ tơlơi pơplong, laih anŭn nanao djă kơjăp plă tơngan tơlơi khăp Pô Pơklaih ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.