Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Muaj tej lub sijhawm peb xav tias yus twb npaj txhij rau txhua yam lawm, tiamsis thaum kawg ho tsis zoo li txoj kev npaj tseg. Lub neej tsis yog thaum twg twb tau raws li peb lub siab nyiam, yuav muaj tej yam ua rau peb xav tsis thoob, muaj kev txomnyem thiab kev sim siab tshwm tuaj. Tej lub sijhawm zoo li ntawd, yam uas peb ua tau yog tuav Vajtswv txhais tes thiab cia Vajtswv ua tus coj peb.

Hnub no, yog hnub 06/03/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm THAUM TXHUA YAM TSIS ZOO LI PEB CIA SIAB

“Nej tsis txhob poob siab, yog nej cia siab nej yeej yuav tau nqi zog ntau” (Henplais 10:35)

Kuv twb ntsib dhau ib tag kis qaug zog zis. Thaum nyuam qhuav kaj ntug txoog, kuv yuav tau xa kuv tus ntxhais thiab tus ntxhais xeeb mus rau tom tshav dav hlau thaum 5 teev. Ntawm no yog ib zaum mus muaj teeb meem tiamsis kuj muaj yam zoo luag.

Thaum nyuam qhuav mus txog tom tshav dav hlau, kuv tus ntxhais xeeb ntog rau hauv pem tem thaum uas nws cab nws lub hnab va-li. Txuas ntxiv thaum uas tab tom muab khoom nqa mus tso kuv ho dawm ua cov kav hlau thaiv vau tas. Tas kuv tus ntxhais hais tias peb nqa khoom mus tso yuam kev tsis yog chaw lawm thiab yuav tau hloov mus rau lwm thaj chaw. Kuv tus ntxhais nws txaj muag heev thaum uas nrog kuv thiab tus ntxhais xeeb mus ua ke tom qab tej teeb meem ntawd tshwmsim.

Thaum no, cov pab ua haujlwm hauv tshav dav hlau muab kuv tus ntxhais xeeb lub hnab coj mus tso cia. Nws cia li quaj, thiab tsis nkag siab tias vim li cas tus yawm no ho muab nws lub hnab vali lawm. Lub hnab no yog tus menyuam lub hnab hauv txoj kev npau suav. Lub hnab liab xiav, yog txhob txwm yuav rau nws nqa mus zaum no. Ntawm no yog nws thawj lub yog li nws tsis xav ua poob. Peb yuav tau hais rau nws tias nws yuav rov qab txais tau nws lub hnab thaum nws mus txog chaw. Tas nws thiaj kam muab nws lub hnab tso rau saum qhov chaw tshuaj thiab peb ntshai tsam nws rov cia li quaj tuaj, hmoov zoo qhov uas nws tseem ntsia pom nws lub hnab nyob sab tim. Peb hais rau nws tias nws mus muab tau nws lub hnab thaum no lawm.

Kuv tuav nkawd ob niam tub tes nqes thiab xa nkawd mus rau tom dav hlau. Muaj ntau yam tshwmsim tuaj tiamsis nyuam qhuav yog 6 teev sawv ntxov xwb! Tomqab uas tawm hauv tshav dav hlau los, kuv mus yuav ib qhov khoom hauv chaw muag khoom tas kuv mus ua haujlwm. Kuv mus txog tom chaw ua haujlwm thaum 7 teev 15 feeb sawv ntxov. Xav tias twb tas ib hnub lawm tiamsis ho nyuam qhuav yog hnub tshiab xwb.

Puas tau muaj zaum twg koj ntsib dhau ib tag kis twg sawv ntxov zoo li no? Vajtswv kuj tsa suab luag peb. Peb xav tias peb twb npaj txhij mus rau tom tshav dav hlau. Tiamsis koj puas paub, muaj tej yam peb yeej tsis paub ua ntej. Yeej tsis muaj neeg xav hais tias peb yuav tau hais qhia rau kuv tus ntxhais paub tias vim li cas lawv ho nqa nws lub hnab vali mus. Peb xav tias tus menyuam twb npaj txhij rau nws txoj kev yuav mus zaum no, tiamsis peb ho hnov qab qee yam. Peb yeej tsis xav txog qhov uas lawv yuav qhia paub txog txoj kev yuav mus. Nws yuav tau ntseeg peb, ntseeg lub dav hlau, ntseeg tus tsav thiab ntseeg cov neeg uas nws tsis tau paub dua. Zoo ib qhov uas tseem muaj nws niam nrog nws nyob ib sab, thiab nws niam yuav coj nws mus kom txog qhov chaw. Tus menyuam thaum no nws tsuas paub ntseeg nws niam thiab tuav nws niam tes kom ruaj ruaj xwb.

Tshuav peb ne peb yuav ntseeg leej twg? Peb puas ntseeg Vajtswv? Kuv tau ceeb toom thaum uas xav txog kuv tus ntxhais xeeb qhov teeb meem. Thaum uas txhua yam tsis tshwmsim raws li siab xav, peb yuav tau tuav Vajtswv txhais tes kom ruaj ruaj, Vajtswv yuav pab peb tiv dhau!
Ib yam li Vajtswv txojlus ntau zaug tau hu kom peb yuav tau ntseeg Nws:
“Tus Tswv, txhua tus uas paub koj , lawv yeej cia siab rau koj; koj yeej tsis muab ib tug twg uas los cuag koj tso tseg li.” (Ntawv Nkauj 9:10).

“Kuv haivneeg, nej yuav tsum cia siab rau Vajtswv txhua lub sijhawm. Qhia nej lub siab rau nws, rau qhov nws yog peb lub chaw cawm siav” (Ntawv Nkauj 62:8).
“Nej tsis txhob poob siab, yog nej cia siab nej yeej yuav tau nqi zog ntau” (Henplais 10:35).

“Tus Tswv tsomkwm thiab tiv thaiv kuv, kuv cia siab rau nws xwb. Nws pab kuv thiab ua rau kuv zoo siab kawg nkaus li, kuv thiaj zoo siab hu nkauj qhuas nws” (Ntawv Nkauj 28:7).

Hmo ntawd, kuv tus ntxhais hu xov tooj qhia tias nkawd ob niam tub mus txog chaw lawm. Kuv tus ntxhais xeeb luag ntxhi thaum uas nws tau pom tus nas Mickey! Nws tau mus txog chaw raws li peb tej lus tau cog tseg. Zoo siab kawg thaum uas ntseeg siab rau tej neeg txheeb ze thiab ntseeg peb tus Vajtswv. Vajtswv yuav tsis muaj ib zaum twg ua rau peb tag kev cia siab.

Thov caw nrog kuv peb thov Vajtswv ua ke.
Tus Tswv, lub neej no muaj ntau zaug tsis tshwmsim raws li peb xav, tiamsis ua Vajtswv tsaug vim kuv ntseeg siab rau Koj. Ua Koj tsaug vim koj nrog nraim kuv thiab tiv thaiv kuv. Nyob rau hauv txhua txoj kev uas ntsib kev txomnyem, kuv thov tuav Leej Txiv tes kom ruaj thiaj yuav coj kuv mus txog rau ntawm qhov chaw tso siab. Kuv thov hauv Tswv Yexus Khetos lub npe. Amees.

Cov kwv tij txhua tus, nyob hauv txoj kev ua neej no tej zaug yuav muaj tej lub sijhawm ua rau peb tag kev cia siab, qaug zog thiab ua xyem xyav vim muaj qee yam tsis tshwmsim raws li peb siab xav. Nyob rau tej lub sijhawm zoo li ntawd, ntseeg tias peb yuav tsis tso tseg tiamsis ntseeg Vajtswv tuav Vajtswv tes. Vajtswv yuav nrog nraim peb nyob, pab peb thiab coj peb mus txog chaw tso siab lug.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.