Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Thaum hais txog Tswv Yexus yog tus Tswv yug zoo, hnov yog ib lub npe uas coob leej ntau tug ntseeg tswv Yexus twb paub zoo los ntev lawm. Tus Tswv yug Nws pab yaj. Tus Tswv yug paub Nws pab yaj, hlub nws pab yaj thiab muab Nws txoj sia los txhiv Nws pab yaj. 

Hnub no, yog hnub 06/12/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Terry Meeuwsen dhau ntawm Zaj kawm YEXUS KHETOS LUB NPE: TUS TSWV YUG ZOO

“Tus Tswv yog tus tsomkwm kuv, kuv muaj txhua yam txaus.  Nws cia kuv so hauv lub tshav uas muaj zaub mos nyoos ntsuab xiab thiab coj kuv mus rau ntawm lub pasdej ntshiab uas nyob ntsiag to” (Ntawv Nkauj 23:1-2).

Nyob rau hauv Tswv Yexus ntau lub npe, muaj ib lub npe uas ua rau kuv hnov kaj siab lug yog “Tus Tswv Yug Zoo”. Lo lus no zoo kawg li puas yog? Tus Tswv Yug Zoo. Kuv xav txog Ntawv Nkauj 23: 

“Tus Tswv yog tus tsomkwm kuv, kuv muaj txhua yam txaus.  Nws cia kuv so hauv lub tshav uas muaj zaub mos nyoos ntsuab xiab thiab coj kuv mus rau ntawm lub pasdej ntshiab uas nyob ntsiag to” (Ntawv Nkauj 23:1-2). 

Nqe Vajluskub hauv phoo Ntawv Nkauj no kos ib daim duab nyob rau hauv kuv lub hlwb txog ib tug Tswv Yug zoo tiag tiag. Tus Tswv yug zoo paub zoo Nws pab yaj. Tus Tswv yug zoo saib xyuas Nws pab yaj. Tus yug nws yuav muab txhua yam rau cov yaj thaum yaj cheem tsum kom muaj zog thiab kaj siab – pub rau yaj noj haus, tiv thaiv yaj, thiab saib nws pab yaj. 

Thaum hais txog kev yug yaj, kuv txawm cia li xav txog zaj xwm txheej nyob rau hauv Vajluskub, tham txog muaj ib tug tswv yug yaj nws muaj ib puas tus yaj. Thiab yog ib tug hauv npoj poob lawm, tus tswv yug yaj yuav ua li cas? Tus tswv yug yuav tso cuaj caum cuaj tug tseg thiab mus nrhiav tus uas ploj lawm. Qhov no ua rau kuv pom txog Tswv Yexus kwv cov yaj uas yuam kev lawm saum Nws lub xub pwg, coj tus yaj ploj lawm rov los rau hauv pab yaj, rov los rau ntawm thaj chaw muaj zaub mos ntsuab xiab thiab dej huv tshiab si. Rov los rau ntawm thaj chaw tau txais koob hmoov. 

Qhov no txhawb zog heev! Txawm yog peb kiag lossis peb tej neeg txheeb ze tab tom yuam kev, ces tso siab tau tias tus Tswv Yug Zoo tab tom nrhiav peb. Tswv Yexus tsis yog tsuas yog tus uas hlub peb tus ntsujplig xwb – Nws tseem yog tus uas coj peb lub siab thiab. Thaum peb mus yuam kev ntawm txoj kev ncaj lawm, Tswv Yexus yuav los cuag peb thiab maj mam hais rau peb tias: “Mus txoj kev no. Kuv yuav cia koj noj zaub rau ntawm hav zaub mos nyoos. Coj koj mus rau ntawm qhov dej ntshiab ntshiab. Thiab kuv yuav yog tus saib xyuas Koj sab ntsujplig. 

Tswv Yexus yog tus Tswv Yug Zoo.

Thov caw nrog kuv peb thov Vajtswv ua ke

Tswv Yexus! Kuv ua Koj tsaug uas Koj tau los yug thiab tuag theej kuv lub txhoj uas yog tus menyuam yaj yuam kev hauv koj lub tsev. Ua Vajtswv Koj tsaug vim Koj hlub, Koj nkag siab thiab saib xyuas kuv txhua hnub. Thov Vajtswv Koj pub rau kom kuv muaj lub siab mloog lus, mloog raws li tus Tswv yug zoo hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij, Tswv Yexus – yog tus Tswv yug zoo tau muab Nws tus kheej mus nrhiav peb – kom coj cov yaj uas yuam kev lawm rov qab los rau hauv Leej Txiv tsev. Koob tsheej xyoo no, thov kom txhua tus uas yog Vajtswv li yuav saj tau txoj kev kaj siab tiag suav tsis txheeb thaum peb tau nyob tso siab lug hauv Vajtswv txhais tes yog tus uas niaj hnub saib xyuas Nws pab yaj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.