Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Xyoo laus dhau mus nrog ntau txoj kev zoo siab nyuaj siab los muaj. Hla mus rau xyoo tshiab, Vajtswv qhib dua lwm daim ntawv tshiab hauv peb lub neej tso ntawm peb qhov muag. Vajtswv caw peb nkag los rau hauv ib txoj kev tshiab nrog ntau yam tshiab, nrog tej lub sijhawm zoo tshiab ua rau peb xav tsis txog, thiab tej txujci tshiab tab tom tos peb. Txawm yog paub tias yuav muaj ntau yam sim peb txoj kev ntseeg tiamsis cia siab tias nyob ntawm Vajtswv yuav yog lub hauv paus txhawb zog loj rau peb txhua tus.

Hnub no, yog hnub 12/02/2024, kuj yog hnub siab 3 tsiab peb caug, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm TXAIS TOS XYOO TSHIAB

“Tus uas nrog Yexus Khetos koom ib txojsia, tus ntawd yog neeg tshiab. Nws lttb neej qub twb dua lawm nimno nws muaj lub neej tshiab.” (2 Kauleethaus 5:17)

Txhua xyoo uas xyoo tshiab los yuav txog, peb rov qab muaj ntau txoj kev xav sib txawv, Muaj tus ces zoo siab vim ntawm no yog lub sijhawm zoo rau lawv ua yam tshiab thiab muaj kev cia siab rau yam tshiab. Muaj tus ces luag taus vim tej kev txomnyem kev ua tsis tiav rau lub xyoo laus tau dhau mus lawm. Tiamsis kuj muaj tus txhawj vim tsis paub tias xyoo tshiab no yuav muaj dabtsi los, tsis paub puas txawv xyoo qub lossis tsis txawv.

Kuv cov phooj ywg thiab cov ua haujlwm nrog kuv ua ke lawv kub siab lug tos kom xyoo laus dhau mus thiab xyoo tshiab pib, vim xyoo dhau los muaj kev txomnyem heev. Kuv kuj hmov tshua txog lawv. Tom qab ib xyoos muaj ntau yam txawv txav: ua tiav yam ub yam no, zoo siab nrog nyuaj siab thiab tag kev cia siab sib tov xyaw ntxaws ua ke, kuv twb npaj txhij rau ib qhov pib dua tshiab lawm.

Tig rov qab mus saib ib xyoos dhau los, kuv twb ua tau ntau lub homphiaj nyob hauv txoj kev tswj kuv tus kheej kom muaj dag zog zoo ntawm sab nqaij tawv thiab khiav tas ib ncua kev sib tw khiav kev deb. Kuv nyob ze Vajtswv dua dhau los ntawm txoj kev kawm Vajluskub thiab pehawm Vajtswv. Kuv kuj saj tau txoj kev nyuaj siab thaum uas pom tej phooj ywg tso ntiajteb tseg. Ntawm no yog ib xyoo uas kuv yeej hnov qab tsis tau li.

Thaum uas hloov pauv daim caij nyoog xyoo tas los rau ib daim caij nyoog tshiab, kuv pom tias ntawm no yog ib lub sijhawm tshiab tseg rau tus kheej, thaum uas pib dua tshiab rau kuv tej kev npaj tshiab. Xyoo tshiab yog lub cim ntawm txoj kev loj hlob nyob hauv lub neej. Thaum xav txog xyoo 2023 dhau los, kuv nco txog ib nqe Vajluskub uas hais txog tej yam qub yuav dhau mus zam chaw rau tej yam tshiab.
“Tus uas nrog Yexus Khetos koom ib txojsia, tus ntawd yog neeg tshiab. Nws lttb neej qub twb dua lawm nimno nws muaj lub neej tshiab.” (2 Kauleethaus 5:17).

Thaum uas peb yog Yexus Khetos tug, peb tsis ua lub neej zoo li tus cwjpwm qub ntxiv, tiamsis peb rov qab tau yug dua tshiab, hloov pauv dua tshiab kom loj hlob muaj txoj kev sib txuas ua ke nrog Vajtswv. Ntawm no yog ib ncua kev hloov pauv tsis tseg. Txhais tias peb tsis yog tsuas tau hloov dua tshiab thaum uas thawj zaug txais yuav Nws xwb, tiamsis tseem yuav niaj hnub hloov pauv thaum peb nrog tus Tswv mus ua ke txhua hnub. Zoo li lwm txoj kev sib raug zoo, peb txoj kev sib raug zoo ua ke nrog Yexus yuav tau tu kom zoo kom loj hlob.

Thaum xav txog 2 Kauleethaus 5:17, kuv xav txog lo lus uas ib txwm siv. “Xyoo tshiab, neeg tshiab”. Peb yeej ib txwm hais lo lus no tiamsis peb ho daig cia rau ntawm tej cwjpwm qub thiab ua tsis tiav lub homphiaj hloov pauv dua tshiab.

Tiamsis Vajluskub ntuas kom peb yuav tau rov qab pib dua thiab ruaj siab, vim peb yog Yexus Khetos tug. Dhau los ntawm txoj kev cia Vajtswv hloov pauv peb lub hlwb, peb lub siab thiab peb tus ntsujplig, peb yuav pom tias feem twg yuav tau hloov pauv nyob hauv yus lub neej, thiab muaj lub siab tawv nrog Nws mus.

Nyob hauv Yaxayas 43:18-19 sau tias: “Tiamsis tus Tswv hais tias, “Tsis txhob nco txog tej xwmtxheej uas twb dhau los lawm lossis tsis txhob xav txog tej xwm ntawd li. Kuv tabtom ua yam tshiab; nimno yam ntawd twb tshwm tuaj lawm, nej tsis porn yam ntawd li los? Kuv yuav ua ib txojkev mus phua plhawv hauv tej nras mojsab qhua, thiab muaj dej txhawv ntws nto hauv tej tiaj suabpuam.”

Txawm yog xyoo dhau los ua rau peb tag kev cia siab ntau yam, khuv xim vim tej homphiaj tseem ua tsis tau tiav, los xyoo tshiab los thiab Vajtswv yuav ua tej yam tshiab. Txawm yog peb yuav zoo siab lossis txhawj los, tus Tswv ntawm txoj kev cia siab yuav nrog koj txais tos xyoo tshiab. Tuav txoj kev ntseeg kom ruaj, cia siab rau xyoo tshiab no thiab caw Vajtswv ua tej yam tshiab nyob rau hauv peb lub neej.

Thov caw nrog kuv peb thov Vajtswv ua ke.
Tus Tswv thov coj kuv txoj hau kev xyoo tshiab no nrog txoj kev ntseeg thiab kev cia siab rau tej yam tshiab uas koj yuav ua. Thov kom kuv tau Vajtswv ua tus coj kev thaum npaj homphiaj, teem caij nyoog, thiab yuav nrhiav Vajtswv kom lub neej loj hlob txhua hnub. Nyob hauv xyoo tshiab no, thov hloov pauv kuv dua tshiab kom kuv ua lub neej raws li Vajtswv lub siab nyiam. Kuv thov hauv Tswv Yexus Khetos lub npe. Amees.

Cov kwv tij txhua tus, xyoo laus twb dhau lawm. Xyoo tshiab rov los txog. Vajtswv pub rau peb muaj dua ib lub sijhawm tshiab los ua neej, los hlub thiab ua dejnum pub rau Nws. Cia li ua Vajtswv tsaug rau tej yam zoo uas Vajtswv tau ua pub rau peb xyoo dhau los, thiab ntseeg rau tej yam tshiab uas Vajtswv yuav ua pub rau peb rau xyoo tshiab. Vajtswv yuav nyob rawv ntawm peb ib sab, coj peb thiab ntxiv koob hmoov rau peb. Thov kom peb sawv daws koom txais xyoo tshiab nrog txoj kev zoo siab, kev cia siab thiab lub siab nco tshav ntuj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.