Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Yog cov neeg hlub Vajtswv, peb yeej xav kom yus lub Pawg Ntseeg muaj ib lub tuamtsev zoo los pehawm Vajtswv. Ntawm no yog ib txoj kev xav yog. Tiamsis kuj tsis txhob hnov qab tias peb cov ntseeg txhua tus lub siab kuj yog lub tuamtsev Vajtswv nyob. Yog li, dhau ntawm koom tes ua lub tuamtsev ntawm sab nqaij tawv, peb kuj yuav tau tshua txog yus lub siab no.

Hnub no, yog hnub 19/04/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Daphne Delay dhau ntawm lub npe VAJTSWV LUB TUAM TSEV

Nej yog cov pobzeb uas Vajtswv xav muab los ua lub tuamtsev ntawm sab ntsujplig, yog li ntawd nej cia li los cuag Vajtswv. Nej yog cov pov thawj uas dawbhuv uas ua haujlwm hauv lub tuamtsev, tej haujlwm uas nej ua haum Vajtswv siab, rau qhov nej yog cov uas ntseeg Yexus Khetos (I Petus 2:5).

Xyoo 1999, kuv tus txiv tau Vajtswv txib mus saib xyuas ib Pawg Ntseeg me nyob rau Seminole, ib cheeb tsam muaj kwv yees li 6000 tus tib neeg nyob rau lub xeev Texas. Thaum ntawd wb tsis tau paub meej zoo txog lub homphiaj Vajtswv npaj rau wb, tiamsis wb yeej ntseeg tias Vajtswv muaj cuab kav ua tej yam loj, zoo kawg nkaus nyob rau tej thaj chaw me, tsis muaj qab tsi zoo no.

Ua Vajtswv dejnum tau 20 xyoo dhau los nyob rau thaj chaw ntawd, kuv xav hais tias qhov tseem ceeb tshajplaws uas wb kawm tau yog txoj kev yuav tsim tsa, ua ntej yog tsim tsa tib neeg thiab tom qab ntawd mam ua tuam tsev rau Vajtswv.

Kuv nco thaum peb thawj zaug ua tau lub tuam tsev tshiab, tsis muaj ib yam ab tsi uas peb yuav hais tau tias yog yus li. Tag rho txhua yam yog Vajtswv koob hmoov, puav leej yog tej haujlwm Vajtswv ua tshuav peb tsuas yog ib tug tswv saib xyuas zoo rau Vajtswv xwb.

Feem Vajluskub nyob 2 Samuyees 7:1-3 sau txog kev sib tham ua ke ntawm vajntxwv Daviv thiab tus cevlus Nathas txog ua lub tuamtsev rau Vajtswv:

“Vajntxwv Daviv nyob ruaj khov hauv nws lub loog, thiab tus Tswv tsomkwm tsis pub yeebncuab ua phem rau nws. Vajntxwv hais rau Nathas tus uas cev Vajtswv lus hais tias, “Koj saib, kuv nyob hauv lub tsev uas muab ntoo ciab ua, tiamsis Vajtswv lub Phijxab nyob hauv lub tsev ntaub xwb”. Nathas teb hais tias, Koj yuav ua dabtsi koj cia li ua, rau qhov tus Tswv nrog nraim koj.”

Nyob rau tiam ntawd, Vajtswv tshwm rau lawv pom dhua ntawm lub phijxab. Qhov no ua rau Daviv tsis txaus siab vim nws nyob rau tej tsev zoo kawg nkaus tshuav Vajtswv lub phijxab ho tso rau hauv tsev ntaub xwb.

Feem kuv xav tshajplaws nyob rau hauv no yog feem Vajtswv teb. Vajtswv nthuav qhia rau tus cevlus Nathas, yog “ Kuv puas tau yuam kom ib tug twg ua lub tsev rau Kuv lawm tau?” muab ua lwm lo lus hais, Vajtswv txaus siab thaum tshwm dhau ntawm lub Phijxab thiab Vajtswv tsis xav kom tau lwm yam ntxiv. Vim li cas? Vim tsuas yog Vajtswv thiaj ua rau tib neeg nyob xwb, tib neeg yuav ua tsis tau rau Vajtswv nyob.

Tiamsis vim paub tias Daviv muaj lub siab tig mus rau Vajtswv, xav ua ib qhov chaw zoo dua kom Vajtswv tshwm rau ntawd. Yog li Vajtswv thiaj hais tias Vajtswv tso cai rau Daviv tus tub ua lub tuamtsev ntawd rau Nws. Vajtswv kuj cog lus rau Daviv tias, “Koj yuav muaj xeeb ntxwv huamvam coob, thiab Kuv yuav pub koj lub tebchaws nyob ruaj khov mus ibtxhis, Koj tus nom yuav tsis poob mus ib sim neej li.” (nqe 16)

Niajhnub nim no, Vajtswv yeej tseem tab tom ua tuam tsev rau Nws, tiamsis ntawd tsis yog lub tuam tsev muab ntoo, pob zeb ua tiamsis yog koj thiab kuv peb yog kiag Vajtswv lub tuamtsev.

“Nej cia li los cuag peb tus Tswv uas miaj sia nyob, Nws yog lub pobzeb uas neeg muab povtseg, rau qhov lawv hais tias lub ntawd tsis muaj nqis, tiamsis Vajtswv xaiv lub ntawd, rau qhov Vajtswv pom hais tias lub ntawd yog lub uas muaj nqis heev. Nej yog cov pobzeb uas Vajtswv xav muab los ua lub tuamtsev ntawm sab ntsujplig, yog li ntawd nej cia li los cuag Vajtswv. Nej yog cov pov thawj uas dawbhuv uas ua haujlwm hauv lub tuamtsev, tej haujlwm uas nej ua haum Vajtswv siab, rau qhov nej yog cov uas ntseeg Yexus Khetos” (I Petus 2:4-5).

Pobzeb, ntoo txawm yog yuav zoo ruaj khov npaum twg los yeej yuav raug rhuav tshem thiab puastshuaj. Tiamsis tshuav peb yog cov tuamtsev ntawm sab ntsujpig yuav tau nrog tus Tswv nyob mus ib txhis. Yog li peb muaj nqis tshaj txhua yam hauv lub ntiajteb no uas tau tib neeg tsim los. Tib neeg tau ua tau ntau lub tuamtsev kawg, tej chaw nco txog, tej tsev zoo los qhuas Vajtswv tiamsis yeej tsis muaj ib yam muaj nqis tshaj li lub siab uas Vajtswv xaiv nyob rau hauv.

“Nej tsis paub hais tias nej lub cev yog Vaj Ntsujplig tus Dawbhuv uas Vajtswv muab pub rau nej lub tuamtsev no los? Nws nyob hauv nej lub siab, nej yog tus tswv uas kav nej lub cev, tiamsis Vajtswv yog tus tswv uas kav nej lub cev. (I Kauleethaus 6:19).

Thaum koj ua zoo tu lub tuamtsev ntawm sab ntsujplig ntawd, txhais tias koj lub siab muaj nqis tshaj txhua yam nyob sab nrauv, ces Vajtswv yog tus hnag hmo, hnub no thiab mus ib txhis yeej tsis hloov, kuj yuav tuav Nws kev cog lus nrog koj ib yam li tau cog lus rau Daviv, ntawd yog Vajtswv yuav ua rau kom koj tsev neeg thiab koj lub neej ruaj khov mus li.

Thov caw nrog kuv peb thov Vajtswv ua ke: Vajtswv kuv xav kom muaj lub siab zoo Daviv lub, xav kom ua ib lub tuamtsev kom tsimnyog rau Koj lub npe. Thov pab rau kom kuv lub siab yuav yog ib lub siab dawbhuv, txhawb nqa Vajtswv Koj. Kuv thov hauv Yexus Khetos lub npe. Amees.

Cov kwv tij txhua tus, Vajtswv yog tus vajntxwv ntawm txhua tus vajntxwv, tus Vajtswv ntawm txhua tus vajtswv, tswj tag rho ib puas tsav yam thiab tsis muaj ib thaj chaw twg zoo tsim nyog ua qhov chaw rau Nws nyob. Tiamsis Vajtswv ho zoo siab nyob rau hauv koj lub siab. Ntseeg tias tej no yuav ntuas koj kom nkag siab tias Vajtswv suav koj muaj nqis heev npaum cas. Thiab kuj yog ceebtoom rau kom koj tuav tau koj lub siab dawbhuv, hwm taus yog qhov tsimnyog cia rau Vajtswv nyob.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.