Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Txoj kev ntseeg peb muaj nyob rau ntawm Vajtswv yuav hloov tsis tau lub caijnyoog uas peb tab tom ntsib tiamsis yuav ua rau peb pom txog peb tus kheej raws li Vajtswv lub qhov muag pom, kom nkag siab tias Vajtswv muaj homphiaj zoo rau peb. 

Hnub no, yog hnub 19/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Daphne Delay dhau ntawm zaj kawm KEV NTSEEG NYOB NTAWM VAJTSWV QHOV MUAG

Tus uas ua siab ntev nyiaj tej kev nyuaj siab, tus ntawd yuav tau nyob kaj siab lug. Rau qhov thaum nws tiv dhau tej kev sim siab ntawd lawm, nws yuav tau txojsia uas Vajtswv coglus tseg lawm hais tias Vajtswv yuav muab rau tus uas hlub Vajtswv. (Yakaunpaus 1:12). 

Saib pom yog ib feem tseem ceeb nyob rau hauv txoj kev ntseeg. Kuv xav hais tias, kom koj txoj kev ntseeg ruaj khov, koj yuav tau hloov koj txoj kev ntsia. 

Cia li saib qhov piv txwv no: sim xav txog ib tug ntsaum tab tom nkag ntawm ntus kev. Raws li tus ntsaum ntsia mas txoj kev tseem tshuav ntev heev. Tiamsis thaum no koj xam tias koj tab tom nyob saum kev saib tus ntsaum. Thaum koj ntsia, koj yuav ntsia pom yav dhau los, tamsim no, thiab lub neej tom ntej ntawm tus ntsaum. Yuav tsi khwv rau peb paub tias tus ntsaum nws pib qhov twg, tamsim no nyob qhov twg thiab tab tom mus rau qhov twg. Ntau zaug koj muaj cuab kav muab ib daim txiv qab zib pov rau  hauv kev kom ib me ntsis thiab tus ntsaum yuav nrhiav pom. Txawm yog tus ntsaum tsis paub tias tom ntej muaj dab tsi los koj ntsia pom txhua yam. 

Qhov no kuj zoo ib yam li txhua yam hauv peb lub neej tau Vajtswv ntsia pom. Vajtswv ntsia pom koj lub neej yav dhau los, tamsim no thiab tom ntej - tag nrho Vajtswv tib txhij ntsia pom. Vajtswv paub tej uas Vajtswv twb npaj rau koj uas koj yeej tseem ntsia tsis tau pom. Twb yog vim li no peb thiaj cheem tsum muaj kev ntseeg los ntseeg Vajtswv thiab Nws txojlus txawm yog txhua yam yuav zoo li cas nyob rau lub sijhawm no. 

Peb yuav txhais tau nqe Vajluskub nyob rau Yakaunpaus 1:12 li no, “Yog koj txoj kev ntseeg yeej tseem ruaj khov, txawm yog tej kev txomnyem hauv lub neej yuav vij puas ncig koj, koj yuav tau saj Vajtswv tej koob hmoov suav tsis txheeb li” 

Ntsia yog nthuav qhia txog txoj kev xav, kev xaiv, thaj chaw ntawm ib tug neeg. Thaum koj thiab kuv peb ntsia rau hauv Vajtswv txojlus thiab ntseeg Vajtswv tej lus raws li Vajtswv ntsia pom tsis yog peb ntsia pom ces txhua yam tshwm sim nws yeej tsis txaus ntshai. Tseeb tiag, yog kom ntsia tau li ntawd koj yuav tsum muaj kev ntseeg. 

Thiab ntawd txawm tsis yog tej uas tus sau phau Henplais hais lov? 

“Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhovmuag tsis pom.” (Henplais 11:1). 

Tus ntsaum ntsia tsis pom tej uas nyob rau tom ntej tab tom tos nws, tiamsis nws pheej mus rau yav tom ntej nrog nws txoj kev ntseeg. Thaum peb xaiv ntseeg tias Vajtswv yog tus zoo kawg nkaus thiab Vajtswv yeej hlub tshua txog peb, peb yuav ruaj siab tiv dhau tej kev txomnyem hauv lub neej. 

Kev ntseeg pab daws  tej uas peb qhov muag ntsia tsis pom. Muaj ib phau txhais Vajluskub txhais Henplais 11:1 li no: “Kev ntseeg yog tuav rawv tej uas yus cia siab thiab ruaj siab rau tej uas yus tsis tau pom.  Tuav rawv txhais tias paub, nkag siab zoo thiab muaj kev tab pov khov kho. 

Thaum tus ntsaum nrhiav pom daim txiv, kuv xav tias nws yuav hu nkauj “haleluyas” tshuav koj thiab kuv tsuas luag xwb, vim twb paub tias daim txiv ntawd twb tos tus ntsaum los lawm ntev. 

Vajtswv yuav luag ntxhi thaum pom peb ntseeg siab rau Nws.

Thov caw nrog kuv peb thov Vajtswv ua ke: Tus Tswv, thaum uas tej kev txomnyem, kev sim siab thiab tej uas yuav tav txoj hau kev pheej tshwm tuaj nyob rau hauv kuv lub neej, thov pab kom kuv ruaj siab rau Koj, tuav kom ruaj tias yam uas zoo Koj tseg rau kuv tab tom tos kuv nyob rau tom hauv ntej. Kuv thov hauv Tswv Yexus Khetos lub npe. Amees.

Cov kwv tij txhua tus, ntseeg tias koj yuav tau txhawb zog dhau ntawm zaj kawm hnub no kom koj muaj kev ntseeg txawm yog lub caijnyoog tamsim no yuav zoo li cas. Yuav tau tuav kom ruaj Vajtswv tej lus cog tseg tias Vajtswv tab tom tos koj tom hauv ntej. Yog li, yuav tau vam khom Vajtswv lub zog thiab mus rau tom ntej hauv koj lub neej ntawm sab ntsujplig.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.