Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Lub ntsiab ntawm lub koob tsheej yog ib tug  menyuam tau yug los. Tus menyuam ntawd tau yug los tseem ceeb heev vim Nws yog tus menyuam dawbhuv. Yog li tus menyuam ntawd yog leej twg thiab muab dab tsi sib txuas txog peb lub neej? 

Hnub no, yog hnub 25/12/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kenneth W. Osbeck dhau ntawm zaj kawm TUS ME NYUAM NO YOG LEEJ TWG?

Thaum tsaus ntuj ntsiag to, cov tub yug yaj tau cov tim tswv tshwm los thiab qhia txoj xov zoo txog ib tug neeg tseem ceeb tau yug los: “Nej yuav pom ib tug menyuam mos qhwv khaubncaws pw hauv lub dab zaub, qhov ntawd yog lub cim uas qhia hais tias, tus ntawd yog tus uas kuv hais… Lawv ceev nrooj mus rau hauv lub nroog, lawv pom Malis thiab Yauxej, thiab pom tus menyuam pw hauv ib lub dabzaub.” (Lukas 2:12,16). 

“What Child Is This” (lus hmoob: Tus Menyuam no yog leej twg?) tsis yog tsuas yog ib lub npe ntawm ib zaj nkauj uas tau tib neeg nyiam heev xwb tiamsis kuj yog lo lus nug uas cov tib neeg tshwm ntsej muag thaum tus menyuam ntawd yug los lawv tau nug. Peb yeej xav tau txog lub sijhawm thaum uas cov neeg tshwm ntsej muag ntawd ib leeg tig mus nug ib leeg thaum uas lawv saib ntsoov rau hauv lub dab zaub. Lawv yuav hnov khwv heev thaum uas nkag siab tias tus menyuam tab tom pw rau hauv lub dab zaub tsw qias ntawd tseeb tiag yog tus Mexiyas uas twb tau cog lus yuav pub rau lawv puag thaum ub los lawm. Thiab dhau ntau tiam, tib neeg yeej tseem rov qab xav txog lo lus nug “Tus Yexus no tseeb tiag yog leej twg – yuav ua li cas Nws ho yog Vajtswv thiab Nws ho yog tib neeg tib si thiab?” Lo lus teb tsuas tau Vaj Leej Txiv saum ntuj nthuav qhia rau tus neeg uas muaj kev ntseeg paub xwb. 

Muaj ib tug neeg tau sau tawm cov lus zoo heev li no: 

Nws yog cov mov uas cawm txoj sia, Nws twb pib ua Nws tes haujlwm los ntawm kev yoo tshaib. Nws yog cov dej uas cawm txoj sia, yog Tus uas xaus Nws tes haujlwm hauv ntiajteb no los ntawm txoj kev nqhis dej. Txawm yog kuj tshaib, kuj nqhis thaum uas Nws hnav tib neeg cev nqaij los Nws ua txujci muab mov faib rau cov neeg coob coob tau noj dhau ntawm Nws yog tus Vajtswv uas tsim ib puas tsav yam. Nws kuj nkees qaug zog, tiamsis Nws yog peb qhov chaw so. Nws thov Vajtswv tiamsis Nws kuj yog tus yuav mloog tej lus thov. Nws raug luag muab muag 30 lub nyiaj tiamsis Nws txhiv tag nrho tib neeg ntiajteb. Nws zoo li tus yaj luag coj mus tua, tiamsis Nws kuj yog tus Tswv yug zoo thiab. Nws tuag tiamsis Nws txoj kev tuag tau rhuav tshem kev tuag tawm. 

Yog li tus menyuam no yog leej twg? Lo lus teb rau lo lus nug ntawd tau hais txog nyob rau hauv nqe tshooj zoo kawg nkaus li, ntawd yog: “Yog tus Vajntxwv ntawm txhua tus vajntxwv”. 

Cov ntsiab lus ntawm zaj nkauj no tau William C. Dix, sau, yog ib tug kws sau nkauj uas muaj ntau zaj kauj tau tib neeg coob tug paub. Thaum uas tseem yog ib tug neeg muag cov ntawv pov hwm mob nkees (bảo hiểm) nyob ntawm Glasgow, Scotland, nws txawm cia li raug ib tug mob kho tsis tau thaum nyuam qhuav muaj 29 xyoo. Dix yuav tau pw twj ywm rau saum txaj ib lub sijhawm ntev heev thiab nyob ib leeg ntev heev txog rau thaum yawg hu Vajtswv thiab “ntsib Nws nyob rau hauv ib txoj kev tshiab thiab tseeb tiag tiag” – ib yam li cov lus yawg tau ua tim khawv. Los ntawm tej uas Dix ntsib dhau ntawm sab ntsujplig no, yawg tau tsim tau ntau zaj nkauj zoo thiab muaj ntsiab lus tob heev, thiab muaj zaj nkauj koob tsheej uas peb tab tom hais txog ntawm no thiab. Cov ntsiab lus ntawm zaj nkauj no tau rho ntawm ib zaj lus paj huam txog koob tsheej Yexus yug ntev muaj npe tias “The Manger Throne” (Txhais tias: Lub zwm txwv kub hauv dab zaub nyuj”) tau William Dix sau kwv yees li xyoo 1865. Cov suab taub muab los ntawm cov neeg Askiv li los. 

Cov ntsiab lus txhais ua lus hmoob ntawm zaj nkauj nyob hauv lus Askiv muaj npe tias “Tus menyuam Vaj” muaj lub ntsiab li no: 

1/ Yog leej twg tus menyuam tab tom tau niam puag ntawm tes nrog cov hnub qub ci thaum tsaus ntuj. 

Cov lus seev hu tawm ntawm ncauj, cov timtswv ceeb tsheej nrog cov tub yug yaj ua tib zoo xav. 

Twb yog Vaj Leej Tub tau yug los rau hauv Npeleehees, hmo txias zias. 

Cia li maj nroos muab daim pam sov fij rau Nws rau hmo txias zias ntawd. 

2/ Vajtswv txoj kev hlub loj kawg nkaus tsis paub yuav muab dab tsi los pub kom thiaj pauj tau. 

Vim li cas ho tig khiav mus tsis saib tus Tswv yuav mus qhov twg. 

Cua tuaj txias zias lub caij ntuj no tiamsis tus Tswv tau yug los rau hmo txias zias. 

Cia li maj nroos muab daim pam sov fij rau Nws rau hmo txias zias ntawd. 

Nqe tshooj: 

Yog tus vajntxwv ntawm txhua tus vajntxwv tiamsis vim yog hlub peb Nws thiaj los yug rau hauv thaj chaw no. 

Ib hmo ntsiag to tus Tswv tau yug los rau saum cov khaub nyab rau ib hmo ntuj no txias zias. 

Tsa suab hlo hu nkauj qhuas Vajtswv nyob txhua qhov, yuav muab Nws cov ntshav fij rau txhua tus kom txhua qhov tau txais kev kaj siab.

Thov caw nrog kuv peb thov Vajtswv ua ke: Qhuas Tswv Yexus Khetos, tus Vajntxwv ntawm txhua tus vajntxwv, tus Tswv ntawm lub ntuj thiab lub ntiajteb no, tau los rau hauv lub ntiajteb no zoo li ib tug menyuam mos tau 2000 xyoo dhau los tuag theej, txhiv cov neeg uas yuam kev. Peb qhuas Koj lub npe yog lub npe zoo dua txhua lub npe, tus uas tsimnyog tau pehawm yog Yexus, tus menyuam vaj tau los yug. Amees. 

Cov kwv tij txhua tus nyob rau hnub uas ua koob tsheej Yexus yug, cia li los cuag Vajtswv los ntawm lub siab pehawm Nws. Ntsia rau lub dab zaub nyuj thiab xav txog tias Vajtswv tau hlub koj npaum li cas. Thiab teb koj lo lus nug loj “tus menyuam no yog leej twg?”

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.