Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas muaj zaum twg koj pom txoj kev hlub uas koj tseg rau lwm tus nws tsuag zuj zus raws lub caijnyoog mus lawm? Puas muaj zaum twg koj ua poob koj lub siab hlub Vajtswv puag thaum pib lawm? Tib neeg txoj kev xav yooj yim hloov pauv tiamsis Tswv Yexus txoj kev hlub ib txhis nws yeej yuav nyob mus li tsis hloov pauv.

Hnub no, yog hnub 26/02/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gordon Robertson dhau ntawm Zaj kawm TXOJ KEV HLUB NYOB MUS IB TXHIS

“Nej yuav tsum hlub lwm tus ib yam li Yexus Khetos hlub peb, thiab nws muab nws txojsia los theej peb lub txhoj . Qhov ntawd zoo ib yam li tej tshuaj tsw qab uas luag muab fij rau Vajtswv thiab yog yam uas Vajtswv porn zoo yuav”. (Efexaus 5:2)

Nyob hauv Mathais 24: 12-13, Tswv Yexus txhawb kom peb yuav tau ua siab ntev hlub Vajtswv txawm yog yuav ntsib lub caijnyoog txomnyem.
“Thaum tej kev phem huam loj heev, sawvdaws yuav tsis txawj sib hlub lawm. Tiamsis tus uas ua siab ntev mus txog hnub kawg, tus ntawd yuav dim”

Tswv Yexus hais ntxiv nyob hauv nqe 14 tias: “Thaum muaj neeg mus qhia Txojmoo Zoo uas hais txog Ntuj Ceebtsheej mus thoob qab ntuj thiab ua timkhawv rau txhua haivneeg paub lawm, ces thaum ntawd twb yuav txog lub sijhawm kawg”

Yog ib tug ntseeg Vajtswv, peb tau cob haujlwm qhia Txojmoo Zoo rau txhua lub tebchaws, txhua haiv neeg thiab peb yuav ua tes haujlwm ntawd los ntawm lub siab hlub Vajtswv. Tiamsis vim li cas peb txoj kev hlub ho tsuag? Nyob rau lub caijnyoog muaj kev ywj pheej thiab peb tsis raug tsimtxom ces muaj ib txhia neeg lawv khiav deb Vajtswv thiab tso tseg txoj kev hlub uas tau muab pub rau Vajtswv. Tiamsis txawm yuav nyob rau tiam twg los Vajtswv xav kom peb qhia txog Vajtswv lub tebchaws rau txhua haiv neeg dhau los ntawm qhia Vajtswv txoj kev hlub ntawd dhau los ntawm lo lus hais thiab peb tej haujlwm ua.

Tseeb tiag, Vajtswv txojlus nyob hauv Kalatias 6:9 txhawb peb tias: “Yog li ntawd, peb tsis txhob nkees ua tej haujlwm zoo; yog peb pheej ua tsis tso tseg, muaj ib hnub peb yeej yuav tau sau xwb”

Raws li nqe Vajluskub no, peb yuav tau ua siab ntev ua haujlwm zoo thaum txog lub sijhawm peb yuav tau sau. Yog li yuav ua li cas peb thiaj tuav tau lub siab hlub Vajtswv? Vajtswv txojlus nyob hauv 1 Yauhas 4:8 qhia rau peb paub tias Vajtswv yog kev hlub. Dhau ntawm Yauhas 3:16 sau tias: “Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis”

Yog li yuav tau tshem tej kev xav tsis yog uas koj tab tom coj raws li txoj kev qub vim ntshai, nyob ib leeg thiab tsis muaj txaus peev xwm. Vajtswv txojlus nyob hauv Vajluskub qhia rau peb paub tias yeej tsis muaj ib yam dabtsi tav tau Vajtswv txoj kev hlub uas muab tseg pub rau peb.

Paulus sau nyob hauv Efexaus 2:4-5 tias: “Tiamsis Vajtswv hlub peb kawg nkaus li. Peb tsis mloog Vajtswv lus thiab peb zoo li cov neeg uas tuag lawm los Vajtswv tseem pub peb rov muaj txojsia ib yam li Vajtswv tau tsa Yexus Khetos sawv hauv qhov tuag rov qab los. Vajtswv hlub nej kawg li, Vajtswv thiaj li cawm kom nej dim”

Yog koj hnov tias yuav tau tso tseg lossis txhawj ces cia li muab tej kev xav tsis zoo ntawd fij rau Vajtswv thiab ua lub neej nyob hauv Vajtswv txoj kev tswjhwm.

Tsis tas li Paulus tseem sau ntxiv nyob hauv Efexaus 3:17-19 tias: “Thiab kuv thov Yexus Khetos los nyob hauv nej lub siab. Kuv thov Vajtswv pab kom nej muab siab npuab Vajtswv ib yam li tsob ntoo uas tej cag ntsia av tob tob thiab kom nej puv npo txojkev hlub. Kom nej thiab Vajtswv haivneeg txhua tus muaj cuabkav totaub hais tias Yexus Khetos txojkev hlub dav li cas, ntev li cas, siab li cas thiab tob li cas. Thiab kom nej paub Vajtswv txojkev hlub uas tsis muaj leejtwg paub txog, nej thiaj yuav paub tej uas Vajtswv ua txhij txhua”

Txoj kev hlub tsis yog tsuas yog Vajtswv tus cwjpwm xwb tiamsis tseem yog Vajtswv tus yamntxwv. Vajtswv nchuav Nws txoj kev hlub rau hauv peb lub siab.

Tsis tas li ntawd, Vajtswv txoj kev hlub nyob mus ib txhis, tsis paub kawg thiab tsis muaj hnub hloov pauv thiab tsis puas tsuaj. Tseeb tiag, Vajtswv txoj kev hlub loj kawg nkaus tseg rau txhua tus txawm yog cov neeg uas koj ntxub. Txawm lawv yuav zoo li cas lo Vajtswv yeej los thiab zoo siab tuag theej rau lawv.
Vajtswv txojlus nyob hauv Efexaus 5:2 txhawb peb yuav tau mus hauv txoj kev hlub ib yam li Yexus Khetos tau hlub peb: “Nej yuav tsum hlub lwm tus ib yam li Yexus Khetos hlub peb, thiab nws muab nws txojsia los theej peb lub txhoj . Qhov ntawd zoo ib yam li tej tshuaj tsw qab uas luag muab fij rau Vajtswv thiab yog yam uas Vajtswv porn zoo yuav”.

Thov caw nrog kuv peb thov Vajtswv ua ke.
Ua Vajtswv tsaug vim txoj kev hlub ib txhis uas koj tseg rau kuv. Thov Vajtswv zam txim rau kuv vim muaj ntau zaug kuv qaug zog kuv ua poob kuv txoj kev hlub koj thaum pib uas koj tseg rau kuv. Thov Vajtswv pab kom kuv yuav nthuav tawm lub siab hlub koj dhau los ntawm kuv lub neej. Thov Vajtswv pab kom kuv muaj lub siab tawv qhia txoj kev hlub loj tsis hloov pauv thiab tsis muaj hnub hloov rau cov neeg uas paub txog koj lub npe. Kuv thov hauv Tswv Yexus Khetos lub npe. Amees.

Cov kwv tij txhua tus, Tswv Yexus hlub koj thiab Vajtswv txoj kev hlub tseg rau peb yeej nyob mus ib txhis. Cia li mus nrog txoj kev hlub thiab thov Vajtswv ntxiv zog rau koj kom koj tiv dhau tej lub caijnyoog muaj kev txomnyem nyob hauv lub neej no. Ruaj siab rau tej haujlwm thiab qhia Txojmoo Zoo rau lwm haiv neeg uas tsis tau paub txog Vajtswv txoj kev hlub loj kawg nkaus.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.