Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Halloween yim hnub yim dhau los ua ib lub caij lom zem muaj thoob hauv lub qab ntuj no. Yog ib tug ntseeg Vajtswv, peb twb tau ceeb toom ntau zaug tias lub caij lom zem no nws muaj lub hauv paus pib ntau los ntawm dab ntxwsnyoog los thiab cov ntseeg Vajtswv tsis zoo mus koom. Yog li cov ntseeg Vajtswv yuav ua li cas thaum uas tej menyuam nyob ntawm zej zog khob qhov rooj thov qe thaj? Puas yog peb muab qhov rooj kaw kiag thiab nkaum twj ywm rau hauv tsev?

Hnub no, yog hnub 31/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Barbara Latta dhau ntawm zaj kawm TUS NTSEEG VAJTSWV THIAB LUB CAIJ HALLOWEEN

Kuv xyaum ua li txhua haiv neeg ua. Kuv ua li ntawd saib puas yuav pab tau qee leej rov los ua neeg tshiab. (1 Kauleethaus 9:22b)

Nyob rau lub sijhawm hli 10 yuav xaus tsis yog tias tsuas zoo nkauj los ntawm tej fuab cua lub caij nplooj ntoo zeeg tiamsis tseem tshuav ntau yam khoom siv zoo los tsab zam rau  Halloween uas luag muag rau ntawm tej tsev muag khoom thiab ib ncig ntawm tej tsev neeg. Niaj hnub nim no, lub caij no dhau los muaj txhua qhov ua rau coob tug lawv tsis xav txog lub hauv paus pib li cas, lossis qhov uas muaj nyob hauv lub koob tsheej no yog “Trick or treat”. Txhais tias “pub thaj lossis raug hem”. 

Raws li tsab xov xwm History.com ntau xyoo dhau los, thaum sau qoob loo yuav tas, cov neeg Xen-tơ xav tias dab ntxwsnyoog yuav rov los rau hauv lub ntiajteb thiab rhuav tshem tej qoob loo. Yog li, yog xav kom raws tau dab ntxwsnyoog khiav, cov txiv neeb tau tsab zam thiab rauv taws kom cig hlob hlob. Ntim zaub mov muab tso nraum zoov yog tseg cia ua rau kom tej ntsujplig dab ntawd lub siab nqig, zam kom tsis pub lawv rhuav tshem. Thiab txij ntawd muaj qhov haujlwm “pub thaj lossis raug hem” dhau los muaj txhua qhov li niaj hnub no. 

Tom qab ntawd, tus xibhwb Txiv Plig Gregory III (731-741) tau xaiv hnub 1 hli 11 yog hnub ua kev cai nco txog cov neeg dawbhuv nco txog cov neeg uas tau tuag rau txoj kev ntseeg. Yog li hmo ua ntej hnub ntawd kuj tau  caiv zoo heev li ib hmo dawbhuv thiab. Yog li cov ntseeg Vajtswv tej lub koob tsheej kuj muaj ib txhia cuam tshuam txog lwm txoj kev ntseeg tej koob tsheej, thiab hnub 31/10 kuj zoo ib yam li ntawd. 

Yog ib tug ntseeg Vajtswv yuav tsum nco ntsoov tias peb tau hu los kom ua lub teeb ci rau ntiajteb tsaus ntuj nti no tsis yog ho mus kawm ua raws li lawv txoj kev tsaus ntuj. Yog li, thaum neeg ntiajteb ua kev noj haus lub koob tsheej koom dab ntxwsnyoog no peb yuav tsum tau ua txawv mus. 

Muaj tej pawg ntseeg, cov ntseeg Vajtswv xaiv tsis koom lub koob tsheej no, xaiv kev kaw qhov rooj zoo, ua twj ywm thiab tsis ua ib yam dab tsi. Ntawm no tej zaug yuav yog ib txoj hau kev zoo yog tias koj tab tom ua neej nyob rau txoj kev coj noj coj ua uas lub koob tsheej Halloween no tseem tsis tau huam vam heev thiab lub nroog uas koj nyob kuj tsis muaj txoj kev koom noj koom haus ua ke rau lub koob tsheej Halloween no. 

Tiamsis, muaj tej tus ntseeg Vajtswv lawv ho ua neej nyob rau thaj chaw uas txhua txhua tsev neeg puav leej npaj ua lub koob tsheej Halloween, txhua txhua tus puav leej noj zoo siab rau lub hnub Halloween ntawd, thaum ntawd koj yuav tau ua li cas? Piv txwv li txhua tus menyuam yaus nyob hauv lub zos koj nyob puav leej khob txhua lub qhov rooj thov qe thaj, thiab thaum los txog koj lub, lawv hnov koj kaw qhov rooj nrov npag. Yog li tomqab dhau hnub Hallowen lawv yuav xav li cas txog koj thiab koj tsev neeg? Yuav ua li cas kom koj nthuav qhia tau tias yus yog qhov kaj rau tej neeg ib ncig thaum uas koj coj tus cwjpwm tsis zoo, ua yeeb ncuab, txiav txim rau lwm tus? 

Tseeb tiag coj li cas thaum txog lub caij Halloween tseem nyob rau ntawm ntau txoj kev coj noj coj ua thiab cheeb tsam koj tab tom ua neej nyob. Kuv paub muaj qee lub pawg ntseeg siv hmo ntawd los npaj ua lub kevcai nco txog lub caij sau qoob loo, ib lub koob tsheej nyob hauv Vajluskub kom tsim muaj txoj kev ua si rau tej menyuam yaus, tsis yog tsuas tsim rau lawv thaj chaw ua si tiamsis tseem yog lub sijhawm zoo cia lawv caw lawv tej phooj ywg tuaj rau hauv tuam tsev. Pauv qhov uas lawv hloov ua tej dab ntxwsnyoog mus hem lwm tus, cov pawg ntseeg no lawv ua yeeb yam txog tej zaj xwm txheej nyob hauv Vajluskub kom tshaj txojmoo zoo rau cov menyuam yaus.  Ntawd kuj yog qhov tseeb ntawm “lub koob tsheej sau qoob loo” uas Tswv Yexus hais rau cov thwjtim nyob hauv Yauhas 4:35. 

“Tiamsis Kuv qhia rau nej hais tias nej cia li tsa qhov muag saib tej teb; nplej twb siav heev zoo hlais lawm.” 

Lwm txoj kev xaiv uas cov tsev neeg ntseeg Vajtswv lawv ua yog npaj ib pluas noj hauv tsev, npaj muaj tej kev ua si thiab muaj khoom plig tib si. Tom qab koom kev ua si tas, tseg rau cov menyuam lawv noj thaj saib ib zaj movies uas nyob hauv Vajluskub. 

Qhov tseem ceeb yog thov Vajtswv pub rau koj muaj txoj kev txawj ntse thiab kev hlub tseg rau txhua tus, tshwj xeeb yog tej menyuam yaus. Siv zog muab yam tsis zoo pauv mus ua yam zoo tshaj tawm qhov tseeb cawm dim li Pau lus tau ua: “Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab.” (1 Kauleethaus 9:22b). 

Cia Vaj Ntsujlig ua tus coj koj kev hauv koj tej kev xaiv, kom hauv txhua txoj kev txiav txim siab koj yuav txais tau Vajtswv txoj kev kaj siab lug. 

“Nej cov uas Yexus Khetos hu los koom ua ib lub cev, nej yuav tsum cia Yexus Khetos txoj kev ncaj ncees coj nej lub neej. Nej yuav tsum niaj hnub ua Vajtswv tsaug” (Kaulauxais 3:15).

 Thov caw nrog kuv peb thov Vajtswv ua ke: Tus Tswv, thov pub rau kom kuv muaj kev txawj ntse coj kom yog nyob rau hnub no, kom tsis koom rau ntiajteb txoj kev tsaus ntuj tiamsis nthuav qhia qhov kaj yog qhov tseeb rau coob tug tshwj xeeb yog cov menyuam yaus. Kuv thov hauv Tswv Yexus Khetos lub npe. Amees.

Cov kwv tij, ntseeg tias zaj kawm hnub no yuav tawm tau tej lub tswv yim zoo tseg rau koj txawj xaiv thiab txiav txim siab yog nyob rau thaj chaw koj tab tom nyob. Txawm koj yuav xaiv li cas los, ntseeg tias koj lub siab yuav kaj siab lug hauv Vajtswv ua tus coj kev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.