Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Halloween gơs gơtha la ngai wèr nàng jòng ro cà ràk mơ bơta do sơlo ngai sơlo gơlik gơs geh dòp rò mơ pò ơnàng làm jơh dunnia. La cau dòn Yàng, bol he neh geh bơto tơngkah oă ngan lah ngai wèr do gơs bồ dà bơh ală broă lơh gơkwă tus cà ràk mơ cau dòn Yàng ò rgơi gơs mat bal. Behơ̆ gen, Cau Dòn Yàng rơp lơh bơta lơi tòm tŭ ală cau kơnom cau gơpƀòn dê teh mpồng dan kẹo taih? Ngan la bol he rơp til mpồng wơl mơ pồn ndơp tòm hìu sơl? 

Ngai do, ngai 31/10/2021 bơta Hòi Dan Kòp Ngai dan jà ồng mò oh mi bơtê bal jơnau Yàng dê konòm dê bơta dong kòl mò Barbara Latta dê bơh tơnggume HALLOWEEN MƠ BROĂ LƠH CAU DÒN YÀNG DÊ

añ gơlik gơs jơh ală bơta tơl nă cau in nàng dong klàs dô êt cau, ò kòp la tòm ală bơta lơi. (1 Kôrinhtô 9:22b)

Pah tơngai lồi kơnhai 10 ò di mìng hàng mơnĕ bơh ală dà bơnga bơkào kơnhai jrùh dê mơ gam hàng mơnĕ bơh oă ngăn phan bơka ngai Halloween in mơ cau ơn tac tòm ală tiah tac phan kung be tòm oă hìu nhă. Ngai do, ngai wèr do neh gơlik gơs tòm kòp bă tiah tian gơs ò gơs oă cau ơn nùs tồr kơlôi tus tòm bồ dà gơ dê, hala ñchi bơh tai broă lơh tòm ngai wèr do dê geh sơnđan la “ Trick or Treat”, jơnau gơtha la “pà kẹo hala kòl bơrcek”.

Jat sră History.com gen oă rbô nam lài, di dê lồi kơnhai tơrgòm prap, cau Xentơ kơlôi lah cà ràk rơp tus wơl tòm plai ù mơ phà kơñau phan tam. Nàng bơtrơh tơlik gơ, ală cau bơjơu juh proh neh bơka phan soh mơ chu ồs dờng. Prềng phan sa geh ơn bơdìh mpồng nàng rpồt rpa ală bồc, tồ gơ in ò phà kơñau. Mơ bơh hơ̆ broă lơh “pà kẹo hala kòl bơrcek” gơlik gơs làm jơh be ngai do.

Tơnơ̆ hơ̆, Giáo hoàng Gregory III (731-741) neh lơh nền sac ngai 1 kơnhai 11 la ngai Wèr Kah Ală Cau Goh nàng kah tus ală cau sàng goh neh chơt bơh gùng duh khoai. Gen tàng, mang lài hơ̆ kung geh prap be la dô mang krơi is. Be ală ngai pơjum dờng ndai Cau dòn Yàng dê kung gơs dô êt ngai gơkwă tus mơ ngai wèr cau bơdìh dê, gen ngai 31/10 kung behơ̆. 

La cau dòn Yàng, pal kah tĕ lah bol he geh hòi sac nàng lơh bơta àng dunnia klam jơngo do in, ò di la bơtê jat ală bơta klam jơngo dunnia dê. Behơ̆, tòm tŭ cau dunnia sa chò hòp ngai wèr cà ràk dê gen bol he pal lơh pha is.

Gơs ală Hìu Jum Goh, ală cau dòn Yàng sac rwah wèt ngkòi mơ ngai wèr do, sac rwah nùs nhơm til mpồng, ơm mŏ mŏ mơ ò lơh dô bơta lơi. Hơ̆ digơlan la dô broă lơh tòm toh dilah bol he kis tòm dô lơgar gơs bơta òs mòng gơwèt mơ Halloween òhềt gơs mat lam bă tiah mơ ƀòn dờng tiah bol he kis kung ò gơs broă lơh nàng sa chò hòp ngai Halloween lơi ò.

Mơya, gơs ală cau Dòn Yàng kis digùl tiah mơ kòp hìu nhă lơi kung sa chò hòp ngai Halloween, cau lơi kung sa chò hòp wă rò ngai Halloween, tŭ hơ̆ bol he pal lơh mbe lơi taih? Be la gơs ală cau kơnom tòm tiah bol he kis teh mpồng kòp hìu nhă nàng dan kẹo, gen tŭ tus hìu nhă bol he dê, mpôl kơnòm kơno ntas til mpồng grung grung. Dilah behơ̆ gen tơnơ̆ mơ ngai Halloween neh lòt gan, bol khai rơp kơlôi mbe lơi bơh bol he mơ hìu nhă bol he dê taih? Lơh mbe lơi nàng bol he rgơi ràng tơlik he la “bơta àng” ală cau gùtdar in tòm tŭ ràng tơlik nus nhơm hat hal, sòtơm mơ cahrña behơ̆ taih?

Mơya ràng tơlik nus nhơm mbe lơi gơ wèt mơ ngai Halloween gen jat bơh ală bơta òs mòng tòm lơgar hơ̆ mơ jat bơta gơlik gơs bơh sơnròp tòm tiah bol he kis. Añ git gơs dô êt Hìu Jum Goh ngui mang hơ̆ nàng lơh ngai pơjum Kơnhai Toès, dô ngai pơjum tòm Sră Goh dê nàng bơtào gơs dô bă tiah cau kơnom in pơjum, ò mìng bơtào gơs cau kơnom in gơs dô bă tiah niam nàng kơnhơl chò hòp, mơ gam la tŭ lơmpah nàng ală cau kơnom rgơi hòi jà gơp bơyô he dê tus hìu jum. Bañ  bơka phan soh mơ să jan đòm lơh cà ràk lòt pơhìn cau gùtdar, ală Hìu Jum Goh do lơh ală broă lơh tềl bơh tòm Sră Goh nàng yal tơlik Jơnau Niam ală cau kơnom dềt in. Hơ̆ kung la nus nhơm tomtoh ngan “Kơnhai Toès” dê mơ Yàng Jesu neh đơs mơ ală cau bơtê tòm sră Jang 4:35 lah, “Do, Añ đơs mơ bol mê: ‘Pò tĕ mat mơ tơnggòr sền ƀlàng sre neh dum, di di kơnhai toès rau”

 Dô bơta sac rwah ndai geh ală hìu nhă cau Dòn Yàng neh lơh la yò dô bơta ngui sa dềt tòm hìu, bơtào gơs ală bơta kơnhơl mơ rcang bal ală phan ƀàn pơnjat. Tơnơ̆ mơ neh sir kơnhơl, gen ai cau kơnom in sa ƀañ kẹo ndang, mơ sền lơma ndang, lơma hơ̆ jat be bơta yal yau  Sră Goh dê. 

Bơta dờng màng la hòi dan tĕ mơ Yàng, dan Yàng ai bol he in bơta jak chài mơ bơta kòñ gơboh gơwèt mơ cau gùtdar, đơs is la gơwèt mơ ală cau kơnom. Pơnđơl tĕ tơlik bơta sơrbơng roh gơlik gơs tŭ lơmpah nàng cèng bơta dong klas be nus nhơm cau gơnoar bơto dờng Pol dê: ““añ gơlik gơs jơh ală bơta tơl nă cau in nàng dong klàs dô êt cau, ò kòp la tòm ală bơta lơi.” (1 Kôrinhtô 9:22b)

Lòi tĕ Yàng Hwềng Goh tề lam bol he tòm ală bơta sac rwah he dê, nàng tòm ală bơta lơh nền, bol he rgơi dòp geh bơta lơngap lơngai Yàng Tom Trồ dê. 

“Lòi tĕ bơta lơngap lơngai Bơtau Krist dê at bồ tòm nùs oh mi, la bơta lơngap lơngai mơ oh mi neh geh hòi tus tòm dô nơm să jan; kung gơs tĕ nùs ưnngài.” ( Kôlôse 3:15)

 Dan jà bol he dô nùs bal tòm bơta hòi dan: Khoai Yàng, dan ai kòn in gơs bơta jak chài nàng gơs ală bơta dòp rò tòm toh tòm ngai Halloween do, tồ ò gơs pơ nah tòm bơta klam jơngo dunnia dê mơya rgơi ràng tơlik bơta àng jơnau song dê oă cau in, rlau jơh la ală cau kơnom in. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, kơp kòñ bơta bơtê ngai do rơp ai bol he in ală bơta sơnnio tòm toh nàng bol he sac rwah mơ lơh nền, jat be bơta lơh lòt dê tiah mơ bol he kis. Bulah bol he lơh nền mbe lơi, gen dan nùs bol he dê geh lơngai lơngò tòm bơta tề lam Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.