Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Tòm dô bơta rơndap đơs chò, gơs dô nơm chò gơs tơnggume la “Kis Yàng Jesu in” geh đơs tòm ơdŭ thu âm. Tồn lah dô nơm chò ƀă liă, mơya tòm tŭ Jơnau Yàng geh đơs, neh gơs ală rài kis geh tòmgơl, mơ sơlo krơi is rlau tòm tŭ jơnau đơs chò hơ̆ geh kơno lam bă tiah, hòi jà oă cau tus mơ Yàng Jesu.

Ngai do, ngai 23/11/2021, bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Craig von Buseck dê bơh tơnggume KIS YÀNG JESU IN.

Jơnau đơs Añ jê kung behơ̆ sơl, gơ neh lik bơh di bơr Añ, gen rơp ò rê wơl gòi, mơya rơp lơh gơlik gơs tơnggume broă Añ rơndap, mơ lơh wil tơl broă mơ Añ neh jào. (Êsai 55:11)

Pa do bol hi neh thu âm dô album pa mơ ală cau at bồ jà bol hi lơh video dô êt sap đơs chò tòm bơta rơndap. Dùl tòm ală chò la "Live For Jesus" (jơnau gơtha la “Kis Yàng Jesu in”) mơ oh ùr añ jê la cau đơs chò hơ̆ neh đơs bô bă niam ngan. Sèng đơs wơl chò do dê cih be do:

Añ kòn kis Yàng Jesu in

Jơh rài kis añ kis Yàng in.

Añ kòn tòmpà bơta kòñ gơboh Yàng dê

Nàng dunnia đal git bơta kòñ gơboh Yàng dê.

Ngai hơ̆ tòm ơdŭ thu âm, bol hi lam jơh tơl nă cau tus hơ Yàng Jesu tòm tŭ bi Al là cau at bồ lùp bol hi digùl ală bơta rơndap tòm bơta đơs chò. Bol hi tòm pà he neh git làm bơta kòñ gơboh Yàng mbe lơi gan dê bơta gơtòmklac is kòp nă dê mơ Yàng Jesu ò di la dô nơm gùng duh khoai ro rañ đah bơdih lơm.

Ngai tơnơ̆, bi Al lòt tòm gùng ndang đơs chò ndang. Mìng la ală jơnau ntas chò dê lơm taibơh bi Al ò kah dô êt lơi bơh jơnau đơs chò dê. Bi Al mut tòm ngân hàng mơ ntào jat khà. Bơta ntas chò sùm ơm tòm bồ bi dê, bi lùp is lah, “Sơnđan chò do la nchi taih?”. Bi Al lơh sir broă mơ rê lik hơ bơdìh. Lồi dut gen jơnau chò hơ̆ dê neh tus tòm bồ bi Al dê tòm tŭ lơi kung ò git mơ bi sơntòm đơs jơnau đơs chò hơ̆ dê.

Añ kòn kis Yàng Jesu in

Jơh rài kis añ kis Yàng in.

Añ kòn tòmpà bơta kòñ gơboh Yàng dê

Nàng dunnia đal git bơta kòñ gơboh Yàng dê.

Nisơna bi kah rngal wơl. Tòm tŭ iat ală jơnau bơh bơr sơndôi he dê đơs, bi neh mơp dơl. “Añ ơdoh bơta lơi hơ̆ taih?” - bi đơs dờng. Oă cau lòt gan tềng hơ̆ sền nề nền dê bi. Mơ ñŏ dô bă ò niam nùs, bi pơnđơl tă sang jơnau đơs chò lik bơh bồ he gan dê bơta kơlôi tus dô nơm bơta đơs chò tiơng pơnro ndai. 

Bi Al rê wơl hơ hìu lơh đài mơ pơnđơl tă tơlik jơnau đơs chò hơ̆ bơh bồ dơngoh. Bi iat điện thoại nơ sơntòm rơndap mpồl lơh ntas kơñi bơh ală ơdŭ hùc dà cè tòm kơnhwàl nàng rcang lơh ntas kơñi ngai tơnơ̆ in. Mơya bi ò rgơi hŭi mpồl đơs chò bol hi dê bal mơ jơnau đơs chò. 

Êt kơnhai tơnơ̆, bi Al lơh nền dô bơta pơrlòng đơs chò ai ală mpồl lơh ntas kơñê tòm kơnhwàl in. Bol he lòng kơlôi sơnơng sền, chò lơi bơh mpồl bol hi dê neh geh sac rwah taih?

Tòm tŭ tiah lơh broă tơlik rùp sồr sac rwah dô êt chò nàng pơyoa tus Liên Xô be la dô pơnah nàng tòmklac bal, kơlôi sơnơng tĕ, bi Al neh sac rwah ală video lơi taih? Tơnơ̆ hơ̆, bi đơs mơ bol hi lah ală video chò Cau Dòn Yàng bol hi dê neh geh pơnđàng hơđang ală tivi Liên Xô dê tòm oă kơnhai.

Dô nam lòt gan mơ nisơna añ tìp wơl bi Al dê tiah trung tâm thương mại. Bi gam soh ào sơmi mơ ndau sơgơn gơs bi òs ndau. Mơya nus nhơm bi Al dê neh tòm gơl tơnơ̆ mơ tŭ lồi dut bol he tòmbơh bơr bal mơ gơp.

Bi Al đơs “Añ gam lơh gah ntas kơñê, mơ nđò kơnhai do añ neh lòt hìu jum”.

Tòm jơh rài kis añ, Yàng neh sơnnio añ in sền gŏ ală broă kis wañ lah Jơnau Yàng gơs gơnap gơnoar ngan. “Bơh jơnau Yàng Tom Trồ dê la jơnau kis, ƀă tàm, sồt rlau mơ đào bàr đah mat, srơp bluh tian gơs cah is hwềng soàn,hwềng nùs, kồ mơ khu, sền sơwì bơta kơlôi sơnơng mơ bơta lơh nền tòm nùs.” 

(Hebrơ 4:12).

Bol he gơs dô jơnau hơ crih crài ngan bơh Yàng Tom Trồ bơh broă tòm pà Jơnau Niam tòm Esai 55:11 “Jơnau đơs Añ jê kung behơ̆ sơl, gơ neh lik bơh di bơr Añ, gen rơp ò rê wơl gòi, mơya rơp lơh gơlik gơs tơnggume broă Añ rơndap, mơ lơh wil tơl broă mơ Añ neh jào.” (Êsai 55:11)

Broă bol he dê ò di la tòm pơndang bal mơ cau ndai hala pơnđơl tò să lah he di mơ cau ndai tìs. Bol he mìng la ală cau  cèng jơnau yaltơnggit, cèng Jơnau Niam tus ală cau gơkòl tòm bơta tôì glài bol khai dê in. Să tòm Yàng Hwềng Goh rơp lơh Jơnau Yàng in gơlik gơs bềng gơnap gơnoar, lam oă cau tus mơ Yàng Jesu.

Be dô nă cau lơh suơn mình rgơi sih gar sơn tềl he dê tòm ù, bol he mìng rgơi tòm pà ală bơta lơi neh geh tòm pà mơ bol he. Yàng Tom Trồ lơh dà mìu in gơdùh, ai bơta àng mơ bơta bơkah tòm ù nàng gar sơntềl gơhòn, gơlik dô bơta kis pa.

Bol he neh ngui tŭ lơmpah mơ Yàng Tom Trồ ai bol he in nàng sih gar sơntềl Jơnau Yàng dê hala ò? Bol he gam ngui bơta chài rgơi he dê nàng sền gŏ Lơgar Yàng Tom Trồ geh tus hơđang ù do hala ò?

Bol he gam kis Yàng Jesu in sơl?

Jat be bơta añ git gen bi Al mơ hìu nhă khai dê gam gơs mat mơ Hìu Jum Goh tòm kơnhwàl hơ̆. Digơlan gơs dô nă bi Al ndai tòm rài kis bol he dê, gam kơp gơn nàng iat dô bơta đơs chò niam. Bol he dòn bơr Yàng mơ đơs sèng đơs chò hơ̆-hala tòmpà gơ-hala ò? Digơlan be tòm bơta gơlik gơs mơ añ, cau mơ bol he tòmpà  kung rgơi pơnjat pơyoa jơnau niam tus lam dunnia do in kơno!

Dan jà bol he dô nùs bal tòm bơta hòi dan: Khoai Yàng Jesu, kòn kòñ kis Yàng in. dan ai kòn in nùs khin cha mơ sơnnio kòn in gŏ ală tŭ lơmpah nàng rgơi đơs chò mơ đơs bơh Yàng ală cau gùtdar in. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bol he ò git cau lơi rơp dòn dòp mơ cau lơi rơp pơndang sang Jơnau Niam mơ bol he tòmpà, mơya khin cha tĕ, ngui tĕ tŭ lơmpah nàng ală cau mơ Yàng cèng tus tòm rài kis bol he dê đal git bơta kòñ gơboh mơ nùs kòñ Yàng Tom Trồ dê ai bol khai in. Gơs sơnđan cau lơi dê gơ tus tòm bồ dơngoh bol he dê tŭ do sơl? Dilah gơs, rcang sir tĕ. Dilah òhềt, pơnjat tĕ tòm bơta hòi dan.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.