Txij li thaum yug los, peb tib neeg yeej ib txwm raug ib txoj saw kev txhaum thiab kev tuag khi peb qhov muag ntsia tsis pom. Peb raug tej kev txhawj ntshai tsuam nyhav, los ntawm tej uas ua yuam kev, tej yam ua rau peb khiav deb Vajtswv. Tiamsis thaum kawg Yexus Khetos tau los. Nws los rhuav tshem txoj saw hlau ntawd, txiav tu nrho txhua lub voj hluas tau khi peb cia. Nws them tus nqi los ntawm Nws txojsia saum Ntoo Khaub Lig kom pauv txoj kev ywj pheej muaj nqis rau peb.

Hnub no, yog hnub 26/04/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dina Sleiman dhau ntawm Zaj kawm NRHIAV TAU KEV YWJ PHEEJ

“Nimno tus uas nrog Yexus Khetos koom ib txojsia, tus ntawd yuav tsis raug txiav txim. Rau qhov Vaj Ntsujplig tus uas coj peb los nrog Yexus Khetos koom ib txojsia twb tso peb dim ntawm txoj kev txhaum thiab txoj kev tuag lawm.” (Loos 8:1-2).

Twb muaj zaug, kuv tseg sijhawm li ib lub hli ntau los kawm nrhiav ntu Vajluskub muaj hwjchim nyob hauv Loos tshooj 8. Muaj tej hnub kuv nyeem tas nrho ib tshooj, muaj tej hnub tsuas nyeem ib nrab, thiab tej zaug tsuas nyeem ob peb nqe xwb. Kuv xav mus xav los, txog rau thaum tej lus ntawd nws ciaj sia hauv kuv. Hnub no, kuv xav qhia rau koj txog qee yam ntawm ob nqe thawj, nrog tej kev xav nws ntws los rau hauv kuv lub hlwb.

Loos 8:1-2 sau tias: “Nimno tus uas nrog Yexus Khetos koom ib txojsia, tus ntawd yuav tsis raug txiav txim. Rau qhov Vaj Ntsujplig tus uas coj peb los nrog Yexus Khetos koom ib txojsia twb tso peb dim ntawm txoj kev txhaum thiab txoj kev tuag lawm.”

“Tsis raug txiav txim” ntawm no muaj lub ntsiab li cas? Ntawd yog lub caijnyoog uas raug khi cia “ntawm txojcai kev txhaum thiab kev tuag” txij thaum tib neeg poj koob yawm txwv ua txhaum los. Peb poob rau hauv txoj kev tswj hwm ntawm txojcai no – ib txojcai muab peb khi nrog txoj kev txhaum thiab thawb peb khiav deb tus uas tsim peb los. Ntawd yog txoj kev cais tawm ntawm Leej Txiv saum ntuj mus ib txhis, yog ib qhov uas kev txhaum coj los.

Tiamsis thaum Tswv Yexus los thiab tuag saum Ntoo Khaub Lig, txhua qhov nuj nqi ntawm peb tej kev txhaum puav leej tau zam tas. Thaum txais yuav qhov khoom plig Vajtswv pub, peb tau nrog Leej Txiv rov qab sib haum xeeb. Peb tsis yog cov uas raug txoj saw kev txhaum khi lossis raug Xatas muab khi lawm, tiamsis dhau los ua Vajtswv tus menyuam uas Vajtswv hlub. Vajtswv txojlus hais tias peb yog haiv neeg dawbhuv, yog cov pov thawj hlob, yog cov tau hu los ua Yexus Khetos cov thwjtim nyob rau hauv lub ntiajteb tsaus ntuj nti no (1 Petus 2:9).

Kuv paub tias kuv tau ua neej ntau xyoo nyob qab tswj hwm ntawm “kev txhaum txojcai” txawm yog thaum uas kuv twb ntseeg Vajtswv lawm. Tshuav koj ne zoo li cas? Koj puas muaj zaum twg pom tias yus tab tom raug khi los ntawm txoj hlua? Ntawd tsis yog Vajtswv lub homphiaj tseg rau koj. Yexus Khetos ua tiav tes haujlwm cawm peb dim ntawm lub nra nyhav ntawd. Kom peb tsis ua neej hauv qhov tsaus ntuj ntxiv.

Yog li yuav ua li cas kom peb thiaj dim hauv qhov tsaus ntuj ntawd? Peb yuav tau nyob hauv Yexus Khetos. Tswv Yexus yog qhov kaj rau lub ntiajteb, thiab Nws nyob hauv peb, Nws ci Nws qhov pom kev dhau ntawm peb. Nws muaj txaus lub hwjchim los rhuav tshem qhov tsaus. Thaum peb nyob hauv Vajtswv kev tshwm ntsej muag, qhov tsaus yuav ploj zuj zus mus. Thaum peb lees Nws lub npe thiab nthuav tawm Nws tej lus, qhov tsaus yuav sawv tsis taus khov kho.

Lub hwjchim hloov dua tshiab hauv Nws tab tom ua haujlwm hauv peb lub neej!
Saum Ntoo Khaub Lig, Yexus Khetos kov yeej yeebncuab. Xatas tsis muaj hwjchim thiab kev tuag raug puas tshuaj. Vajluskub sau tias Yexus Khetos twb ris txoj kev foom tsis zoo hloov peb chaw, kom peb dim txoj kevcai txoj kev teem txim. Nws kuj muab tus yaum sij hauv Nws lub tebchaws rau peb (Kalatias 3:13, Mathais 16:19).

Yog Vajtswv ib tug menyuam, thiab yog Vajtswv ib tug tub txib, peb tau pub lub hwjchim tshiab. Tiamsis yeej tseem muaj ntau zaug peb ua tsis tau, peb qaug zog, lossis ntau zaug peb pom tias yus yog tus swb. Ntawd yog lub sijhawm peb yuav tau sawv kom khov kho, hnav Vajtswv tej cuab yeej los tawm tsam yeebncuab (Efexaus 6:10). Peb yuav tau hliv Vajtswv txojlus kom puv nkaus hauv lub siab – tsis yog cia kom peb sawv khov kho rau yeebncuab tej xib xub tua tuaj tiamsis yog kom peb muaj lub siab tawv tawm mus qhia Vajtswv lub tebchaws.

Thiab ntawm no thiaj yog yam uas zoo tshaj plaws! Vaj Ntsujplig, txojsia nyob hauv Yexus Khetos tshuab los rau hauv peb tus ntsujplig zoo li ib nthwv cua loj, ntsawj tej yam tsis zoo tawm. Koj puas pom li ntawd? Koj puas hnov cov cua ntawd laj ntxiag hauv yus lub neej?

Cia li qi qhov muag ib pliag thiab xam txog lub caijnyoog no. Cia li xav txog cov fuab dub tab tom voob nkaus koj lub neej. Hu nws lub npe. Tas saib saib – Vaj Ntsujplig cov cua uas muaj sia tab tom ntsawj tuaj qhov twg, ntsawj tej fuab dub ntawd mus, ua rau koj rov qab muaj tej fuab cua zoo dua.

Thaum no peb tab tom tau txais kev ywj pheej tiag! Peb tsis raug khi rau yav dhau los, tsis ua neej nyob nrog lub nra nyhav thaum nyuam qhuav yug los, tsis ua qhev rau kev txhaum thiab kev tuag ntxiv lawm. Peb tau nyob hauv Yexus Khetos, tau ua neej rau Yexus Khetos, tau txais kev cawmdim thiab Vajtswv kev hlub – tau ua pa los ntawm tej fuab cua zoo.

Thov caw nrog kuv peb thov Vajtswv ua ke
Leej Txiv saum ntuj, kuv ua Koj tsaug vim Koj txoj kev cawmdim thiab kev ywj pheej uas koj tau muab pub rau kuv nyob hauv Yexus Khetos. Twb muaj lub sijhawm kuv yuam kev, ua neej nrog txoj kev ntshai thiab muaj lub nra nyhav tsuam kuv, tiamsis koj tau los, tso kuv dim txhua txoj hlua khi thiab pub txojsia tshiab rau kuv hauv koj txoj kev hlub. Thov pab kom kuv mus hauv qhov pom kev thiab mus hauv koj txoj kev hlub, tsis cia qhov tsaus uas yog kev txhaum khi kuv ntxiv. Thov Vaj Ntsujplig ua tus coj kuv txhua hnub, kom kuv ua lub neej tiag tsimnyog rau txoj kev ywj pheej uas koj tau muab pub rau kuv. Kuv thov hauv Tswv Yexus Khetos lub npe. Amees.

Cov kwv tij txhua tus, vim li cas koj ho tsis so ib mentsis, xyab koj txhais tes, ua pa thiab txais yuav txoj kev ywj pheej uas Vajtswv pub rau koj? Cia Vaj Ntsujplig tshem tej kev txhawj, lub nra nyhav uas koj tab tom ris. Nco ntsoov tias koj tsis raug khi los ntawm tej kev txhaum lub neej dhau los, tsis ua lub neej ua qhev ntxiv lawm. Koj twb tau hu tawm hauv qhov tsaus ntuj los rau qhov pom kev. Txoj kev ywj pheej uas Tswv Yexus tau them rau koj los ntawm Nws txojsia.

Kom peb tau txais kev ywj pheej mus nyob ze Vajtswv, tau ywj pheej hauv txoj kev sib raug zoo ua ke nrog Nws, tau ywj pheej ua Nws haujlwm, tau ywj pheej ua tej haujlwm zoo uas Vajtswv twb npaj tseg rau peb. Txoj kev ywj pheej ntawd muaj nqis tsis yog tseg rau peb muaj cai ywj pheej ua txhaum lossis ywj pheej ua raws li yus lub siab nyiam. Yog li, txij li hnub no mus, peb yuav tau ua lub neej ywj pheej nyob hauv Yexus Khetos txoj kev hlub pub rau peb!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.