Ih tam đei layơ pơtŏ lăng trong yak năm kơdih hăm Kră Yang ưh? Na ih yak năm kiơ̆ Kră Yang tơpă dah năm kơleng lăng Sư đĕch. Hăm đei layơ lu bơ̆n năm tơ hnam akŭm, hơri ‘bai hơri ư ang kơ ‘Bok Kei-Dei, mơ̆ng ‘bai bơtho, mă lei gô tơ’bơ̆p kial hơbŭt huơ̆r gah phe ‘ba jên tơmam, dôm lu pơchah pơchek lăm tơdrong pơgơ̆p, dah tơdrong sơ’ngon krôp gom, lu bơ̆n mơn kơdih oei ataih đơ̆ng Kră Yang. Tơdrong chhŭr nuih tih hloh noh jơ̆ sơ’ngon mơn kơdih jơ̆ minh ‘nu “bơngai” dơ̆ng lăng dêh char Sư đơ̆ng ataih mă ưh kơ kiơ̆ Sư.

Năr ‘nâu, ‘năr 01/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai NĂM KƠLENG LĂNG DAH NĂM KIƠ̆?

“Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist.” (Philip 3:8)

Thoi kơ Yang Yêsu năm truh tơ anih ayơ noh, khŭl bơngai tơpôl lơ kư̆m dai năm truh tơ noh- đơ̆ng lăm pơlei tih, truh tơ pơlei iĕ, đơ̆ng kơ pal kông truh tơ lăm anih pơlei pơla tih dah hnam akŭm tơpôl. Rŏ lăng, đĭ đăng lu sư druh kiơ̆ Kră Yang wă ‘maih lăng ‘bôh tơdrong mơsêh păng hơmet pơklaih tơdrong jĭ jăn. Kư̆m đei bơngai chơchă yua kơ tam mă băt dôm lu nơ̆r bơtho plơ̆ng ‘nao. Lu khŭl nai mơn kơ hiôk hơ iă dôm tơdrong gơh hơgei Sư pơma gah khôi juăt păng dôm tơdrong khan lê̆ adrol.

Mă lei, Kơplah rơbâu ‘nu bơngai kiơ̆ Sư rim năr, đei tŏ sĕt đĕch bơngai pơkă pơkăm tơpă “hơdai” Yang Yêsu. Đei tŏ sĕt bơngai pơhrăm păng Sư tŭk lê̆ tơdrong arih so, weh đơ̆ng hnam dơnŏ, bôl buăl, tŭk lê̆ hnam oei păng tơdrong jang, tŭk lê̆ tơdrong arih kơdih yua kơ đe nai. Tuch luch, đei minh khŭl tŏ sĕt bơngai, lu bơngai lăng hmă đĕch pơih jơhngơ̆m tŭk lê̆ tôm tơdrong kơdih đei, yua kơ jơhngơ̆m đon chang hơmĕng kơ lăm tơdrong arih ling lang ning mônh.

Năr ‘nâu, ih hăm inh kư̆m gô rơih iŏk minh tơdrong. Rŏ lăng lu bơ̆n “năm kơleng lăng” Kră Yang dah “năm kiơ̆” Sư. Lu bơ̆n rơih iŏk dơ̆ng lăng đơ̆ng ataih nhen thoi lu bơngai lăng pơm pơdah rup, dah rơih iŏk dơ̆ng ‘bơ̆t cheng Sư, mơn tôm kơ đei pel dan ti, mơ̆ng dui jơhngơ̆m păng lăng ‘bôh tơdrong ‘mêm mơnat lăm măt Sư. Lu bơ̆n oei tơnoh păng Sư krao khan hăm ‘Bă, păng kơplah Sư đei tơ’bơ̆p tơdrong pơhlŭ lăm teh đak. Rŏ lăng lu bơ̆n băt kơ Sư rơđah hloh: nhen thoi bơngai buăl, minh nu bơngai ‘nhŏng, jơ̆ tơ‘ngla dŏng pơklaih chăl arih bơ̆n.

Kơplah drơ̆ng iŏk yak năm hơdai Yang Yêsu, lu bơ̆n ưh kơ dơ̆ng lăng ngôi đĕch bơih. Lu bơ̆n oei lăm Kră Yang păng Sư oei lăm bơ̆n. Dôm tơdrong Sư pơm đei hơtŭt ‘bơm tơdrong arih lu bơ̆n, păng dôm lu tơdrong lu bơ̆n pơm kư̆m atŭt ‘bơm Sư. Kư̆m đei pơma thoi âu, lu bơ̆n oei tôi ‘long ăt hơdai hăm Sư. Ưh kơ đei ataih păng ưh kơ đei tơklah dih băl bơih, yua kơ lu bơ̆n oei arih hơdai. Lu bơ̆n hăm Sư jơ̆ minh lăm ‘Bă.

Ling lang đei minh tơdrong gô pŭ iŏk tơdrong gleh glăn kơplah kiơ̆ Yang Yêsu Krist, mă lei kư̆m ling lang đei tơdrong pŭn hiôk đei hơdai. Lu bơ̆n ngăl hưch wă lăng dôm lu tơdrong ‘maih tơplih gô jing bơngai lui mă hiơt lê̆ tôm tơdrong đei dan ăn bơih. Lu bơ̆n ngăl kơ nhăm lăng tơ tôm tơdrong pơmat tat, tơdrong gleh glăn, dôm lu tơdrong klai gar păm dôm tơdrong hiơ̆k bơngơ̆t. Tơplih kơ tơdrong ‘noh, lu bơ̆n kăl kơ nhăm kơ minh tơdrong đei ăn bơih.

Hơdrol hloh, lu bơ̆n đei tơdrong arih ling lang, minh tơdrong arih kơjăp tơ anăp đơ̆ng rŏng kơ đei tơdrong arih lăm teh đak ‘nâu. Tơ anăp dơ̆ng, tơdrong ‘mêm mơnat păng huay kơ jô̆ yo đơ̆ng Kră Yang ling lang jơ̆ tơdrong kơjăp ăn kơ lu bơ̆n, mă khan năr ‘nâu đei tơdrong thoi yơ. Ưh kơ thoi noh đĕch, Sư đei pơjing tơdrong tơdă ‘lơ̆ng tôm ăn kơ ih, na kư̆m ling lang oei hơdai ih lăm tôm tơdrong tơblah tơdrong kơnê̆ dah đei tơdrong pơlong lăng. Lu bơ̆n kư̆m hơđơ̆ng yua kơ tơdrong pơgơ̆r đơ̆ng Kră Yang krôp gom tôm tơdrong, ưh kơ đei tơdrong kiơ ‘nguaih kơ tơdrong bơwei păng hlôh băt Kră Yang. Hloh kơ noh dơ̆ng, sư ăn kơ bơ̆n đei jơhngơ̆m pran đơ̆ng Sư. Na truh tơ tuch luch, tơdrong Kră Yang bơwei lu bơ̆n đơ̆ng đe ayăt, bơwei jơ̆ng lu bơ̆n ling lang dơ̆ng kơjăp.

Lu bơ̆n kăl kơ tơdrong kiơ dơ̆ng wă mơn băt: kơplah bơ̆jang kơ Kră Yang, dôm lu tơdrong lu bơ̆n đei tih hloh kơ dôm lu tơdrong lu bơ̆n hiong? Truh tơ tơdrong lôch lu bơ̆n Kră Yang kư̆m gô tơplih jing tơdrong ‘lơ̆ng. Tôm tơdrong truh, mă pơm gah ‘nguaih khan “‘lơ̆ng” dah “kơnê̆”, kư̆m kơnhăm kơ tơdrong arih tơ anăp ưh kơ gah tơdrong yoch đei hlôi bơih.

Jơhngơ̆m lu bơ̆n dan lăm tôm tơdrong kiơ đei lăm Kră Yang păng dôm lu tơdrong oei chang gô tơ anăp. Thoi kơ ‘bok Pôl gơih kơthơ ăn kơ bơngai lui tơ pơlei Philip, lu bơ̆n lăng tôm tơdrong kiơ đe khan yua, inh lăng ưh pă yua boih “yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh”. Tôm tơdrong lu bơ̆n achăng lê̆ jơ ‘nâu gô ăn pơthim ăn rai lơ hloh tơ pơlei ‘lơ̆ng. Tơdrong pơting pơtŏ đơ̆ng ‘Bok Kei-Dei ling lang grê pah lu bơ̆n yua kơ tơdrong ‘mêm đơ̆ng Kră Yang. Lu bơ̆n ưh kơ đei la yơ răm ôh, păng Sư kư̆m huay kơ lê̆ lu bơ̆n kơ ‘bah ôh.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, kon pơyơ̆r kơ Ih nơ̆r bơnê yua kơ Ih dŏng pơklaih kon păng krao iŏk kon yak năm lăm tơdrong pơgơ̆p hăm Ih. Apinh huay kơ jô̆ yo kơ kon tơdah ki sơ̆, kon năm tơ Ih nhen thoi bơngai kơleng lăng mă ưh kơ hơdai tơpă. Kră Yang ơi, kơplah oei gleh glăn păng hiơ̆k bơngơ̆t lăm tơdrong arih, apinh tơgŭm kon băt kơ Ih oei hơdai. Apinh tơgŭm kon huay kơ lăng dôm lu tơdrong hiong răm, mă lăng tơ lăm tơdrong mơdrŏng ‘mêm mơnat đơ̆ng Ih. Apinh tơgŭm kon đei đon lui kơ jăp păng hơđơ̆ng yak năm kiơ̆ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘nĕ ăn kơdih akâu ling lang jơ̆ minh ‘nu bơngai dơ̆ng tơ ‘nguaih tơdrong ‘mêm mơnat. Kră Yang oei dơ̆ng ‘bơ̆t doh, chang gô ih dan tơpang ti ih tơ tơpang ti Sư, wă yak năm hăm Sư hlôi đơ̆ng thŭng thong tơdrong lôch kư̆m truh tơ anih ư ang. Rŏ lăng năr ‘nâu ih oei hli tơrơ dôm lu tơdrong kăl kơ achăng lê̆, na athei ‘blŏk thoi âu, kăl kơ achăng lê̆ dôm lu tơdrong lăm teh đak na tơpang ti lu bơ̆n gô sơng iŏk mŭk tơmam đơ̆ng pơlei ‘lơ̆ng. Nĕ kơ ngĭl ngŭl, yua kơ rim jơ phŭt lu bơ̆n arih ataih đơ̆ng Kră Yang lu bơ̆n tơhiong lê̆ tơdrong gĭt kăl lăm tơdrong arih. Athei apinh Kră Yang lăm kơplah jơ ‘nâu: “Kră Yang ơi, kon ưh kơ ‘maih wă lăp năm kơleng lăng Ih đĕch. Kon ‘maih wă kiơ̆ Ih, ‘maih wă yak hơdai Ih đơ̆ng năr ‘nâu truh tơ ning mônh.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.