Dôm tơdrong jang đei pơjing blŭng a đơ̆ng hơnă. Mĭnh pôm hnam mă ‘lơ̆ng truh dang yơ, mă lei dah man pơjing kơpal hơnă teh ưh kơ kơdăng lei kŭm ‘bônh kơ păk pơchah kơplah tơ’bơ̆p ‘mi hơbŭt. Kŭm thoi noh, Khŭl Bơngai Lui gơh wơ̆ pran lăm lơ tơdrong, mă lei dah hơnă ưh kơ kơjăp lei ưh đei yua tơpă. Tơplơ̆ dơ̆ng, dah Khŭl Bơngai Lui đei pơjing đơ̆ng hơnă kơjăp jơ̆ kơdih Yang Yêsu, lei mă tơdrong pơlong lăng đei tih dang yơ, Khŭl Bơngai Lui oei kơjăp păng pơtrơp pơchrang kơ Kră Yang.

Năr ‘nâu, ‘năr 02/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Aaron Little kơ̆l ‘bai HƠNĂ KƠJĂP KƠ HNAM AKŬM.

“Sư pơgơ̆r đĭ-đăng lu bơngai lui, kư̆m thoi kơ̆l bơ̆n pơgơ̆r lăm akâu bơ̆n mơ̆n. Sư gơh pơm kơ lu bơngai lui arih ‘nao; Sư iung arih đơ̆ng lôch hơdrol kơ đe, Sư pơgơ̆r dôm lu bơngai iung arih đơ̆ng lôch. Thoi noh na lăp pôm Sư đĕch boih tih hloh kơ đĭ-đăng tơdrong nai.” (Kôlôssê 1:18)

Inh đei hơdai hăm Hnam Akŭm hloh kơ 45 sơnăm kơplah đơ̆ng năr lui kơ Kră Yang. Lăm trong yak năm ‘noh, inh đei ‘bôh lơ tơdrong tơplih. Inh đei wơ̆ ‘lŏ hơdai hăm dôm kơ brŏ re hơri ư-ang juăt đơ̆ng chăl 80-90, na rai ‘bôh tơdrong wơ̆ pran kơtang đơ̆ng lu khul reh brŏ Bơngai Lui dang ei. Păng lăm dôm sơnăm ‘nâu, Hnam Akŭm đei kơnhăm yua đơ̆ng điên thoăi păng roi tơbăt đơ̆ng kơmăi thoi mĭnh tơdrong kăl kơ đei.

Hnam dơnŏ inh đơ̆ng hơkŭm hơdai tơ mĭnh Hnam Akŭm đei bơngai lui păng tơdrong pơgơ̆r lăp ai, anih tơl tơwih đĭ đăng lu tơdrong kăl yua kơ bơhngol đơ̆ng lu nhôn. ‘Bơ̆t doh đei tơdrong akŭm kơkuh arih, tơdrong bơtho trŏ hăm Nơ̆r ‘Bok Kei-Dei, păng lơ jơ năr wă bơ̆jang. Khei năr đơ̆ng rŏng, lu nhôn pơdrơ̆ng năm tơ mĭnh Hnam Akŭm ‘nao pơjing păng jing hơdai hloh. Anih noh, dôm lu bơngai pơgơ̆r đei jơhngơ̆m gơh hơgei, Hnam Akŭm oei ‘lơ̆p ‘nâu rim năr rai wơ̆ pran hloh. Dôm lu bơngai năm ngôi đei gơh mơn ‘bôh tơdrong pha ra. Tơdrong pơjing kơ tơdrong pha ra rŏ lăng ‘bơ̆t tơdrong gơh găt păng jê̆ hơdai đơ̆ng lu bơngai lui. Inh lui khan Kră Yang oei bơ̆jang dôm kơ tơdrong ‘nao plơ̆ng lăm Hnam Akŭm, păng gơh hơdai lăm tơdrong bơ̆jang ‘noh jơ̆ mĭnh tơdrong chơt hiôk tih. Mă lei mĭnh tơdrong kơnê̆ blư truh.

Lu nhôn đei krao wơ̆n năm hơdai mĭnh tơdrong hŏk hôp gĭt kăl, lăp lăm 15 phŭt, lu nhôn đei tơbăt khan ‘bok bơtho wei lăng anih đei pơdơh tơdrong jang ưh kơ tam băt adrol. Ưh kơ năm lăm hơđăl kơ tơdrong, mă lei tơdrong ‘noh pơm kơ inh hlĭch hlăch tơpă. Dôm kơ tơdrong pơgơ̆p juăt thar ưh pă đei thoi adrol, păng mơn đei hơđơ̆ng mă inh đơ̆ng đei nhen thoi pơchah. Mơn lăm jơhngơ̆m hiong răm ‘noh tih hloh kơ dôm tơdrong kiơ inh tơchĕng.

Mă lei, lăm dôm năr đơ̆ng rŏng kơ noh, mĭnh tơdrong hlĭch chrơp đei truh. Đei dôm kơ tơdrong pơgơ̆p lăp jơ̆ dơh ‘bơ̆t anih pơma dơnuh lăm inh păng lu ‘nhŏng ŏh lăm Hnam Akŭm ‘nâu đei jing jrŭ să hloh. Lu nhôn klah asong dôm tơdrong ơh sơ’ngon păng pơlung dih băl yak tơ anăp. Đei dôm kơ bơngai adrol inh lăp juăt gah ‘nguaih dang ei đei jing dôm bơngai buăl juăt tơpă. Adrol ki, lu nhôn ngăl pơma gah tơdrong mĭnh jơhngơ̆m lăm Hnam Akŭm thoi mĭnh tơdrong pơwao hlôh, mă lei dang ei lu nhôn tơpă ‘nao wă hlôi mơn đei tơdrong ‘noh kiơ̆ trong mă ưh kơ đei bu tơchĕng.

Yua kơ đơ̆ng tơdrong kơnê̆ truh na trong Nơ̆r ‘Bok Kei-Dei lăm Kôlôssê 1:18 jing arih lăm inh hloh kơ layơ: “Sư pơgơ̆r đĭ-đăng lu bơngai lui, kư̆m thoi kơ̆l bơ̆n pơgơ̆r lăm akâu bơ̆n mơ̆n. Sư gơh pơm kơ lu bơngai lui arih ‘nao; Sư iung arih đơ̆ng lôch hơdrol kơ đe, Sư pơgơ̆r dôm lu bơngai iung arih đơ̆ng lôch. Thoi noh na lăp pôm Sư đĕch boih tih hloh kơ đĭ-đăng tơdrong nai.”

‘Bok Pôl chih tơdrong ‘nâu kơ Khŭl Bơngai Lui Kôlôssê kơplah sư oei hơdai tơ anih noh. Khŭl Bơngai Lui kơplah noh oei tơ’bơ̆p hăm dôm tơdrong bơtho ưh kơ trŏ đơ̆ng bơngai bơtho hơlĕnh, pơm tơjruh lê̆ tơdrong pơgơ̆r păng anih mĭnh Sư đĕch đơ̆ng Yang Yêsu. ‘Bok Pôl đei pơkăm khan Yang Yêsu jơ̆ anih tơm kơ tôm tơdrong, đơ̆ng tơdrong pơjing, tơdrong dŏng pơklaih, Khŭl Bơngai Lui păng kơdih chăl arih rim ‘nu bơngai lui. Yua kơ Yang Yêsu jơ̆ kơ̆l pơgơ̆r Khŭl Bơngai Lui, na Sư gơh bơwei Khŭl Bơngai Lui hlôi kơ dôm jơ năr pơmat tat hloh.

Trŏ lăp, ‘Bok Kei-Dei ăn kơ dôm tơdrong tơsŭl tơwŏk đei truh wă sŭt rơgoh Khŭl Bơngai Lui. Kơplah mĭnh khŭl dah tơdrong jang đei pơchah, kơplah dôm lu bơngai pơgơ̆r dah bơngai bơ̆jang đei pơ̆k huŏng lăm đon lui, tơdrong oei đei jơ̆ kiơ? Jơ̆ tơdrong kơdŭn dah tơdrong yak năm tơ anăp lăm đon lui?

Jơ̆ rim tơmam lăm mĭnh akâu jăn đơ̆ng ‘Bok Krist, rim ‘nu lu bơ̆n kăl kơ bơwei jơhngơ̆m bơ̆n tơnăp kơplah dơ̆ng tŏk bŏk dôm kơ tơdrong pơlong lăng dah đĭ đăng dôm tơdrong kiơ oei blah Khŭl Bơngai Lui. Kơthơ Hêbrơ athei: “….. yua kơ Sư wă ăn kơ bơ̆n oei tơ minh pôm teh đak mă ưh kơ gơh pơchah răm. Bơ̆n athei kơkuh kơ Sư kiơ̆ thoi Sư lăp đon. Bơ̆n athei băt hli chu kơ Sư mă tơpă, hli kơ bơ̆n pơm ưh kơ trŏ thoi Sư lăp đon,” (Hêbrơ 12:28)

Kơthơ Hêbrơ athei lu bơ̆n kăl đei ‘bar tơdrong tơ’bôh.

Mă mĭnh, “athei băt bơnê”. Băt bơnê yua kơ lu bơ̆n gah minh pôm teh đak ling lang, ưh kơ đei tơdrong kiơ gơh pơrăm.

Mă ‘bar, athei “ băt hli chu kơ Sư mă tơpă, hli kơ bơ̆n pơm ưh kơ trŏ thoi Sư lăp đon,” tơm jơ̆ bơ̆jang kơ Kră Yang ưh kơ trŏ yua kơ pơ ang akâu kơdih dah wă tơ’bôh akâu jăn. Đei lơ Bơngai Lui đei kơdŭn tơ rŏng lăm tơdrong bơ̆jang kơplah tơ’bơ̆p dôm tơdrong chrih pơma, tơhil băl dah tơdrong pơlong lăng, rŏ lăng yua kơ lơ wơ̆t lu bơ̆n ưh tim mă “hli chu kơ Sư mă tơpă” na bơ̆jang kơ Kră Yang, dah kơnhăm đơ̆ng lu bơ̆n ưh kơ trŏ wă pơm “Sư lăp đon”.

Tơdrong tơpă ‘nâu pơlung tơiung lu bơ̆n ưh kơ sĭ lăm dôm kơ jơ năr pơmat tat Khŭl Bơngai Lui, na kŭm ăn kơ dôm lu bơngai bu oei tơ’bơ̆p hăm dôm tơdrong pơlong lăng đơ̆ng tơdrong arih. Dah ih pơchah răm, ơh sơ’ngon, dah mơn ‘bôh hiong tơdrong kơnhăm, athei ling lang ‘blŏk Yang Yêsu Krist, Tơ’ngla jing kơ̆l kơ đĭ đăng tôm tơmam, oei oei hơdai păng pơgơ̆r. Sư trŏ jơ̆ tơmo kơjăp kơ Khŭl Bơngai Lui hlôi kơ rim chăl păng ăn kơ rim ‘nu kơdih kâu lu bơ̆n.

Apĭnh đĭ đăng krao khan hơdai: Kơkuh kơ Yang Yêsu jơ̆ hơnă kơjăp kơ Hnam Akŭm păng kơ chăl arih kon. Tŏk bŏk lăm kơplah tôm tơdrong jum dăr kon đei tơsŭl tơwŏk, apinh tơ ‘blŏk kơ kon ‘blŏk khan kon gah minh pôm teh đak mă ưh kơ gơh pơchah răm. Yua kơ thoi noh, apinh Kră Yang tơgŭm kon ưh kơ hli tơrơ na đĭ jơhngơ̆m bơ̆jang kơ Ih pơ̆n nuih. Apinh yua chăl arih kon jơ̆ tơmam chông ba ăn tơdrong mĭnh jơhngơ̆m păng pơjing tơiung kơ akâu jăn Ih.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah Khŭl Bơngai Lui lăm tơdrong pơlong lăng, Kră Yang oei jơ̆ kơ̆l. Kơplah kon bơngai tơplih, dah bơngai pơgơ̆r pơ̆k huŏng, Kră Yang oei ưh kơ đei tơplih. Păng mă khan kơplah kơdih ih mơn ‘bôh hiong trong kơnhăm, Sư oei oei bơwei pơgơ̆r tôm tơdrong. Yua kơ Yang Yêsu jơ̆ kơ̆l, na lu bơ̆n gơh kơjăp khan ưh kơ đei tơdrong kiơ hloh kơ tơdrong Sư pơgơ̆r. Na athei, athei pơtrơp arih tơnăp, bơwei jơhngơ̆m băt bơnê wă bơ̆jang kơ Kră Yang wă kơ Sư lăp đon. Yua băt khan lăm tôm tơdrong tơplih kơ Khŭl Bơngai Lui dah lăm kơdih chăl arih ih, Kră Yang oei oei chông anhăk lu bơ̆n păng yua dôm tơdrong tơplih ‘noh wă pơm kơ đon lui lu bơ̆n jing wơ̆ ‘lŏ păng kơjăp hloh rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.