Lăm trong yak năm hăm đon lui, rŏ lăng đei lơ bơngai kư̆m pơ̆k huŏng. Kư̆m đei pơm kơ lu bơ̆n ưh kơ kĕ jei na đei mơlâu, đei lu tơdrong yoch pơm kơ lu bơ̆n mơlâu păng tơchĕng khan ưh pă trŏ bơih wă yak năm kiơ̆ Kră Yang. Mă lei dah ưh kơ kĕ jei hăm trŏ kơ tuch luch kơ đon lui lu bơ̆n ưh? Dah noh jơ̆ trŏ kơ lu bơ̆n lăng ming, tơbral, păng pă minh ‘măng dơ̆ng hlôi mơn kơ đei pơklaih đơ̆ng Kră Yang?

Năr ‘nâu, ‘năr 03/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Tina M. Hunt kơ̆l ‘bai TƠDRONG ‘MÊM ĐƠ̆NG RŎNG DÔM LU TƠDRONG PƠ̆K HUŎNG.

“Lê̆ bơ̆n pơm yoch khŏm khŏm kư̆m bưh wă kơ ‘Bok Kei-Dei ‘mêm kơ bơ̆n rai hloh kơ noh, ưh ôh hŏ. Yua kơ bơ̆n bơngai dang lĕ kơ lôch boih, liơ gơh pơm yoch dơ̆ng?” (Rôm 6:1b-2)

Klo akăn nhi đei lăng hơdai gah pơjei chaih ‘bŏng lŏng. Yua kơ juăt kơ jang hơdai lăm tơdrong jang, inh lăng rah pơjei ‘bŏng lŏng jang rah hăm kơmăi tinh. Mă tơpă, inh kơnhăm tơ tơdrong jang lơ hloh, na tơdrong pơjei ‘bŏng lŏng lăng ‘bôh hăl ‘biơ̆.

Klo inh ‘bôh thoi noh na pơma hơnul hăm inh, mă lei kơplah noh inh ưh kơ băt sư wă pơma tơdrong kiơ. Na kơplah pơma dơ nuh gah tơdrong pơjei chaih ‘bŏng lŏng noh pơtrơp dơ̆ng tơ gŭm nhi ‘bôh ‘bai pơhrăm gah bơhngol đei yua tơpă.
Lăm tơdrong chaih ‘bŏng lŏng, tơdah bơngai pơjei teh ưh kơ ‘bơm na pơdơh hloi ‘bơ̆t kơnao noh. Ưh kơ sĭ pơdơh hloi đĭ jơ pơjei noh. Lu sư rai lĕch đơ̆ng cham noh pơdơh đĕch, mơ̆ng bơngai bơtho tơ’bôh, hmet ming chơchă tơdrong pơjei, na răp gô wă mơ̆t tơ cham pơjei noh dơ̆ng.

Tơdrong arih lăm đon lui lu bơ̆n kư̆m thoi noh.

Lăm jơ sŏng sa mă tuch luch, Pêtrôs đei tơ’bôh sư jơ̆ bơngai tơpăt hăm Yang Yêsu. Sư pơma khan: “Mă đe wă pơlôch, inh hơdai păng Ih, inh kư̆m kuă kơ sơngah ôh”(Mathiơ 26:35). Mă lei Yang Yêsu đei pơma khan lê̆ adrol sư gô sơngah tơpêng wơ̆t kơplah leng gong. Păng trŏ kơ thoi noh, Pêtrôs ưh kơ đei kĕ jei.

Mă lei, Kră Yang huay kơ achăng lê̆ sư. Đơ̆ng rŏng kơ iung arih đơ̆ng lôch, Yang Yêsu năm chă tơ’bơ̆p Pêtrôs. Kră Yang ăn kơ sư hơmet ming. Tơpêng wơ̆t Pêtrôs sơngah kơ Kră Yang na kư̆m tơpêng ‘măng Kră Yang jet sư: “Ih hăm ‘mêm kơ Inh?” Rim wơ̆t thoi noh, Kră Yang pơjao kơ sư tơdrong jang rong kon triu ăn kơ Sư.
Yôhan 21:15-17 chih thoi âu:

Lu sư achăng sa boih na Yêsu jet Simôn Pêtrôs thoi âu: “Ơ Simôn kon Yôhan, ih hăm ‘mêm kơ Inh hloh kơ lu buăl ih âu ‘mêm kơ Inh?” Pêtrôs drơ̆ng: “Ơ Kră Yang, Ih băt mơ̆n inh ‘mêm kơ Ih.” Yêsu khan kơ sư: “Lei ih rong kon triu Inh.” Yêsu jet Pêtrôs ‘măng mă ‘bar: “Ơ Simôn, kon Yôhan, ih hăm ‘mêm kơ Inh?” Pêtrôs drơ̆ng: “Tơpă, ơ Kră Yang, Ih băt mơ̆n inh ‘mêm kơ Ih.” Yêsu khan kơ sư: “Lei ih rong triu Inh.” Yêsu jet truh pêng ‘măng khan: “Ơ Simôn, kon Yôhan, ih hăm ‘mêm kơ Inh? Thoi noh Pêtrôs jing sơ’ngon kơlih kơ Yêsu jet sư pêng ‘măng boih, na Pêtrôs khan: “Ơ Kră Yang, Ih băt tôm tơdrong, tơdrong inh ‘mêm kơ Ih, Ih băt mơ̆n.” Yêsu khan kơ sư: Lei ih rong triu Inh.”

Lăm tơdrong pơchơt pơjei băl, đei pơma khan “bơngai tơm lăm tơdrong pơjei”, wă khan bơngai kăl dêh lăm khŭl noh. Kư̆m thoi noh, Kră Yang ăn kơ Pêtrôs đơ̆ng bơngai hơngah kơ Sư jing minh ‘nu bơngai tơm kơ lăm Khŭl bơngai lui blŭng a. Tơdrong noh ưh kơ đei đơ̆ng tơdrong gơh hơgei kơdih Pêtrôs mă đơ̆ng tơdrong ‘mêm mơnat ‘Bok Kei-Dei. Ưh kơ adrô̆ Pêtrôs, sơ̆p hla bơar ‘Bok Kei-Dei đei ăn kơ lu bơ̆n băt lơ bơngai đei pơ̆k huŏng na Kră Yang dŏng pơklaih.

Môis đei pơm yoch pơlôch bơngai đơ̆ng jơhngơ̆m sư blĕk, mă lei Kră Yang rơih iŏk sư wă chông anhăk kon pơlei Isơrael năm tơ anih teh đei pơkă ăn.

Pôl jơ̆ đơ̆ng minh ‘nu bơngai rôp phak Bơngai lui, mă lei đei tơplih jing minh ‘nu bơngai pơjing Hnam Akŭm.

‘Bok Kei-Dei rơih iŏk păng yua lu bơngai ưh kơ lơ̆ng tôm wă kơnhăm bơ̆jang tơdrong jang đei khŏm khŏm đơ̆ng Sư.

Lu bơ̆n băt kơ tơdrong ‘mêm mơnat păng pơklaih đơ̆ng Kră Yang jơ̆ tơmam apah, mă lei wă kơ đei tơmam apah athei pơm ‘mơ̆i. ‘Bok Pêtrôs nhơ̆m ơh ol sơ’ngon kơplah mơn băt kơ sơngah kơ Kră Yang, na đơ̆ng rŏng kơ noh sư tơbral, sơng iŏk tơdrong dŏng pơklaih na jing minh ‘nu bơngai rong triu kơ Kră Yang. Yua kơ thoi noh, lu bơ̆n ‘bôh tơdrong tơbral năm hơdai hăm jơhngơ̆m adrin ‘maih wă tơplih.
Lu bơ̆n pơm yoch bơih na pơtă khan yua kơ đơ̆ng “sĕch akar rơdu tơrăn” nă pơtrơp dơ̆ng pơhơi jơhngơ̆m hăm tơdrong yoch. ‘Bok Pôl đei pơma khan: “Lê̆ bơ̆n pơm yoch khŏm khŏm kư̆m bưh wă kơ ‘Bok Kei-Dei ‘mêm kơ bơ̆n rai hloh kơ noh, ưh ôh hŏ. Yua kơ bơ̆n bơngai dang lĕ kơ lôch boih, liơ gơh pơm yoch dơ̆ng?” (Rôm 6:1b-2)

Lu bơ̆n đei tơdrong ‘mêm mơnat dang ei noh đơ̆ng Yang Yêsu dŏng pơklaih pŭ iŏk tơdrong gleh glăn pơmat tat tơ kơpal ‘long pơglang, yua kơ thoi noh lu bơ̆n “lơ liơ kư̆ kơ arih lăm tơdrong yoch?”

‘Nĕ ăn đơ̆ng tơdrong pơ̆k huŏng pơm kơ ih achăng lê̆ tơdrong pơjei lăm bơhngol, na athei iung bĕ, tơbral păng yak năm tơ anăp. Yang Yêsu jơ̆ Tơ’ngla ‘mêm mơnat, pơklaih, păng jơ̆ minh ‘nu “bơngai bơtho pơjuăt” gah bơhngol ăn lơ lu bơ̆n lăm trong pơjei gah bơhngol âu.

Apĭnh đĭ đăng krao khan hơdai: Kơkuh kơ Kră Yang ‘mă ‘mêm. Kon bơnê kơ Ih yua kơ Ih huay kơ achăng lê̆ kon kơplah kon rơdu dah pơ̆k huŏng, mă lei lăm Ih kon đei chă ‘bôh tơdrong pơlung păng pơklaih. Apinh tơgŭm kon huay kơ kơdŭn tơrŏng lăm đon lui rim wơ̆t kon pơm yoch, kon gơnang kơ tơdrong ‘mêm Ih, wă kơ Ih ‘bơ̆ hơmet jing bơngai Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đei tơdrong yoch kiơ pơm kơ ih ataih đơ̆ng Kră Yang? Đei tơdrong yoch kiơ pơm kơ ih tơchĕng Kră Yang ưh kơ mơnat kơ ih? Ưh kơ đei tơdrong pơ̆k huŏng ayơ mă Kră Yang ưh kơ dui ih iung. Năr ‘nâu, athei năm tơ Kră Yang hăm jơhngơ̆m băt kơ tơbral, apinh Kră Yang pơklaih thoi đêl păng pơm kơ tơdrong arih gah bơhngol ih jing ‘nao. Athei bơnê kơ Kră Yang yua kơ tơdrong ‘mêm păng tơdrong huay kơ jô̆ yo Sư oei ling lang rơkah rơkai lăm chăl arih ih.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.