Lăm tơdrong arih dang ei, lu bơ̆n ngăl đei adrin wă jing minh ‘nu bơngai đei hơtŭt ‘bơm, jang tih păng gơh pơgơ̆r tôm tơdrong. Mă lei, đei layơ dơ̆ng ‘bơ̆t anăp tơdrong tih krưp đơ̆ng dôm tơmam lăm teh đak dah dôm tơdrong truh hlĭch chrơp, lu bơ̆n ‘nao wă ‘bôh băt khan kơdih iĕ ioch păng đei hơgăt. Trŏ lăm dôm jơ năr thoi noh, lu bơ̆n gơh hlôi mơn đei hơđăl hloh gah ‘Bok Kei-Dei, jơ̆ Tơ’ngla Tih Hloh, Tơ’ngla băt hơđăl tôm tơdrong păng pơgơ̆r lăm tôm kơ anih.

Năr ‘nâu, ‘năr 04/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Dr. Paul J. Palma kơ̆l ‘bai IŎK JƠHNGƠ̆M ĐON ALA ‘BƠ̆T ANĂP KRĂ YANG TIH HLOH.

“Đơ̆ng rŏng kơ lep sa đĭ ‘nhĕt lăm teh boih, inh khan: Ơ Kră Yang, inh apinh Ih mơnat ăn! Liơ Jakôp gơh kĕ arih? Yua kơ sư tŏ sĕt păng tơrăn dêh.” (Amôt 7:2)

Kơplah yak năm lăm thŏng nan yak tơter đak glung Niagara, lu nhôn thar mơn ‘bôh kơdih iĕ ioch tơpă. Thŏng nan kơjung dang 27 met, chơ ‘bĕnh dôm hrĕng ‘nu bơngai tơmoi, kiơ̆ kơ đak glung ro, păng đei blư hlĭch, ‘bơ̆t anăp lu nhôn ‘bôh anih tih krưp đơ̆ng đak kơtah Niagara. Lu nhôn đei klơ̆p gom yua kơ đơ̆ng dôm tŭk hơmơ̆l đak. Kial đơ̆ng đak kơtah dơhlu pran truh kơ inh đei rôp kơjăp hnam dơnŏ kơdih wă kơ huay kơ đei bu tơ sĕr pơ̆k tơ hơnă thŏng nan hơiuh. Jơ kơplah ‘blŏk dêh hloh jơ̆ kơplah thŏng nan wơ̆t dơ̆ng, pơih ‘bôh đĭ rup đak kơtah Horseshoe, jơ̆ đak kơtah tih hloh lăm pêng tŏ đak kơtah, mĭnh anih rup pơm kơ bu ‘bơ̆t doh kŭm đei hlĭch hlăch.

Hlôi đơ̆ng mơn đei noh, inh ‘bôh băt khan ‘bôh kơdih “iĕ ioch” ưh kơ trŏ jơ̆ tơdrong kơnê̆. Tơplơ̆ dơ̆ng, sư gơh tơgŭm lu bơ̆n lăng trŏ anih đơ̆ng kơdih ‘bơ̆t anăp Tơ’ngla Pơjing.

Dah thoi kon bơngai mơn ‘bôh iĕ ioch ‘bơ̆t tơdrong tih hloh đơ̆ng anih bri kông, na ‘bok khan lê̆ adrol Amôt đei mơn ‘bôh iĕ ioch kơplah tơ’bơ̆p hăm trŏ tơdrong tih hloh păng tơpăt đơ̆ng ‘Bok Kei-Dei. Kơplah sư lăng ‘bôh rup tơ’bôh ăn gah tơdrong sek tơlang mă ‘Bok Kei-Dei tơ’bôh lăm kon pơlei Isơrael, sư băt ‘bôh tơdrong rơdu păng ưh pă băt pơm thoi yơ đơ̆ng kon pơlei ‘bơ̆t anăp Sư.

Amôt sư bơngai đơ̆ng dêh char Juđê gah gơal mă lei đei Kră Yang yua wă bơ̆jang tơdrong jang kơ dêh char Isơrael gah Hơlĕch. Chăl ‘nâu, teh đak đei mơdrŏng gah mŭk tơmam mă lei rơdu tơrăn dêh gah jơhngơ̆m đon păng tơdrong arih gah bơhngol. Kon pơlei arih lăm tơdrong pơ ang, kơkuh kơ rup yang, pơgŏ pơđep bơngai dơnuh hin păng ‘bĕnh blai tơdrong ưh kơ tơpăt. Gah ‘nguaih lu sư oei bơwei tơdrong akŭm kơkuh mă lei lăm jơhngơ̆m đei ataih đơ̆ng ‘Bok Kei-Dei. Lăm chăl 7 sơ̆p hla ar Amôt, ‘Bok Kei-Dei ăn kơ Amôt ‘bôh lep sa đĭ ‘nhĕt lăm teh boih. ‘Bơ̆t anăp tơdrong ‘noh, sư đei krao apinh: “Ơ Kră Yang, inh apinh Ih mơnat ăn! Liơ Jakôp gơh kĕ arih? Yua kơ sư tŏ sĕt păng tơrăn dêh.” (Amôt 7:2).

Amôt hlôh khan, mă khan kon pơlei đei rơnŭk rơnoa păng mơdrŏng truh dang yơ, mă lei ‘bơ̆t anăp Kră Yang, lu sư oei ưh kơ gơh pơm thoi yơ dah ưh kơ đei tơdrong mơnat ăn đơ̆ng Kră Yang. Yua kơ thoi noh, sư đei krao khan tơgŭm kơ kon pơlei, krao apinh tơdrong mơnat ăn đơ̆ng Kră Yang, yua kơ sư lui anih tơdrong iơ̆m dim gơh găt đơ̆ng ‘Bok Kei-Dei. Lăm jơhngơ̆m ‘mêm mơnat đơ̆ng Kră Yang, Sư đei pơdơh tơdrong kơnê̆ truh. Tơdrong ‘noh ưh kơ trŏ jơ̆ tơdrong sek tơlang gô ưh pă đei truh bơih, mă lei tơ’bôh khan kơplah kon bơngai krao apinh hăm jơhngơ̆m chu iŏk đon ala, Kră Yang oei tơ’bôh jơhngơ̆m ‘mêm mơnat đơ̆ng Sư.

Đei lơ wơ̆t Amôt krao apinh anăn “Yang Yêhôwa”- “Anăn Sư jơ̆ ‘Bok Kei-Dei tih hloh” yua kơ sư băt kơ tơdrong mơsêh mơyang păng ư-ang kơ ‘Bok Kei-Dei. Sư băt khan Kră Yang jơ̆ Tơ’ngla đei dŏng pơklaih kon pơlei Isơrael rơngei đơ̆ng pơm đĭch, chông anhăk lu sư hlôi kơ char glă păng ăn kĕ jei lăm dôm tơdrong tơblah. Trŏ đơ̆ng tơdrong ‘bôh băt ‘noh pơm kơ sư ưh kơ hli tơrơ, mă lei sư băt lui gơ nang păng krao apinh Kră Yang.

Lăm năr ‘nâu, lu bơ̆n kŭm gơh huŏng lăm dôm anih pơm kơ bơ̆n mơn ‘bôh iĕ ioch, rŏ lăng jơ̆ ‘bơ̆t anăp dôm tơdrong pŭ trăp, ưh kơ kĕ jei dah tơdrong đơ̆ng kơdih bơ̆n. Mă lei tơdrong gĭt kăl jơ̆ mơn đei iĕ ioch ‘noh truh đơ̆ng yơ?

Dah sư truh đơ̆ng tơdrong pơgŏ pơđep, pơting dah mơlŏu plơ̆m, lei ‘noh ưh kơ trŏ jơ̆ tơdrong Kră Yang wă. Mă lei dah ‘noh truh đơ̆ng tơdrong lu bơ̆n ‘bôh băt tơdrong ‘lơ̆ng rơgoh tih hloh đơ̆ng ‘Bok Kei-Dei, kŭm thoi tơdrong đei hơgăt păng tơdrong yoch đơ̆ng kơdih kâu, lei ‘noh jơ̆ mĭnh tơdrong gĭt kăl. Yua kơ trŏ ‘bơ̆t anih ‘noh, lu bơ̆n pơhrăm iŏk tơdrong jơhngơ̆m iŏk đon ala păng lui gơnang anih Sư.

“Thoi noh na bơ̆n athei chu ala kơ ‘Bok Kei-Dei ngăl yua kơ Sư Yang, Sư mơsêh; na trŏ năr Yêsu Krist jur ning-mônh Sư gô pôk pơư iĕm.” (I Pêtrôs 5:6)

Băt kơ ‘Bok Kei-Dei ‘lơ̆ng rơgoh păng tơpăt ba ăn tơdrong pơlung kơ lu bơ̆n, mă lei kŭm hơdai tơ’blŏk kơ lu bơ̆n kăl kơ arih mĭnh chăl arih lui yom kơ Sư. Kơplah ‘bôh băt kơdih iĕ ioch ‘bơ̆t anăp Sư, lu bơ̆n ưh kơ kăl adrin pơgơ̆r tôm tơdrong, mă lei pơhrăm băt lui gơnang kơ Sư lăm rim jơ năr.

Dah tơdrong yoch dah anih pơm kơ tơdrong tơ anăp lu bơ̆n jing măng mu, lu bơ̆n gơh ‘blŏk truh kơ rup ‘bok Amôt, jơ̆ bơngai ‘bôh băt tơdrong rơdu tơrăn đơ̆ng kon bơngai păng dan tơdrong lui ngeh lăm tơdrong mơnat ăn đơ̆ng ‘Bok Kei-Dei. Sư jơ̆ Tơ’ngla lăng ‘bôh jơhngơ̆m pơchah păng iŏk jơhnơ̆m đon ala, gô huay kơ jô̆ yo kơ bơngai bu tơbral.

Apĭnh đĭ đăng krao khan hơdai: Kơkuh kơ Kră Yang, ‘bơ̆t anăp tơdrong tih hloh păng rơgoh ‘lơ̆ng Ih, kon ‘bôh băt kơdih iĕ ioch tơpă păng đei hơgăt. Apinh Kră Yang huay kơ jô̆ yo yua kơ dôm kơplah kon pơang, hiơt lê̆ anih đơ̆ng kơdih ‘bơ̆t anăp Ih. Apinh tơgŭm kon ‘bôh băt Ih jơ̆ Tơ’ngla tih hloh kơ đĭ đăng, ăn kơ chăl arih kon ling lang gơnang kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ih hăm đei băt tơpă kơ ‘Bok Kei-Dei jơ̆ Tơ’ngla tih hloh kơ đĭ đăng păng ih kăl kơ tơdrong mơnat ăn đơ̆ng Sư wă kơ gơh arih tôm mah rim năr lăm teh đak ‘nâu ưh? Athei apinh Kră Yang tơgŭm ih hlôi mơn đei tơdrong oei hơdai jê̆ đơ̆ng Kră Yang, wă kơ lăm tôm tơdrong ih arih Sư lăp đon. Rim năr, athei pơjuăt krao khan hăm chu iŏk đon ala thoi ‘bok khan lê̆ adrol Amôt, drơ̆ng iŏk tơdrong rơdu tơrăn păng đei hơgăt đơ̆ng akâu jăn, kŭm thoi đơ̆ng khŭl tơpôl đon lui đơ̆ng bơ̆n, krao apinh Kră Yang tơplih păng ăn tơdrong tơbral kơ dôm lu bơngai tăp dăr kơ bơ̆n. Hơpơi kơ ih rai gơh wơ̆ pran lăm tơdrong ‘bôh băt Kră Yang kơplah yak năm lăm tơdrong tơpă ‘nâu.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.