05.05 Amăn Jơ Krao Khan Rim Năr: TƠ’BƯH HĂM TƠM TƠDRONG ARIH TƠPĂ

Tơdrong ră roi păng tơdrong pơgơ̆p lăm teh đak rai ‘lơ̆ng păng hrĕnh, kon bơngai bơ̆n dang ei rai ‘bônh wă ma nuh dih băl hăm kơ măi. Mălei dah ‘măn lơ jơ năr păng jơhngơ̆m pran wă pơgơ̆p băl tơ lăm kơmăi, lei hăm trŏ lu bơ̆n tơpă pơgơ̆p băl ưh? Hơdrol kơ đĭ đăng, bơ̆n hăm tơ’bưh ‘lơ̆ng rŏ hăm Kră Yang dah ưh? Lăm tơdrong arih lơ tơdrong hrăt hrot, hăm đei layơ lu bơ̆n tuk lê̆ tơm tơdrong arih tơpă?

Năr ‘nâu, ‘năr 05/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Nina Keegan kơ̆l ‘bai TƠ’BƯH HĂM TƠM TƠDRONG ARIH TƠPĂ

“Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm ‘long, iĕm thoi lĕ kơ dơng, tơ’bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai ‘noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh.” (Yôhan 15:5)

Lu bơ̆n oei arih lăm teh đak lơ tơdrong hrăt hrot, minh năr đei lơ tơdrong tơdă. Wă kơ druh kiơ̆ tam, lu bơ̆n kăl kơ yua kơmăi wă wei jơ năr păng pơkeh tơdrong jang keh ‘lơ̆ng.

Kiơ̆ tơdrong juăt, đĭ tôm tơmam kăl kơ đei điê̆n na sư gơh bơ̆jang, điê̆n thoăi mă khan ‘lơ̆ng rŏ dang yơ sư kŭm ưh kơ yua dah tơmo đĭ. Kơmăi tinh mă khan pran dang yơ kŭm ưh gơh jang dah ưh kơ đei điê̆n. Bơ̆n juăt kơ yua kơmăi lăm tơdrong arih bơ̆n rim năr. Mălei kơplah bơ̆n kơnhăm kơ tơdrong “tơ’bưh” noh, lu bơ̆n hiơt kơ tơdrong arih bơhngol bơ̆n, hăm băt bơhngol bơ̆n tơ’bưh hăm tơm tơdrong arih tơpă noh jơ̆ ‘Bok Kei-Dei dah ưh.

Kră Yang Yêsu khan: “Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm ‘long, iĕm thoi lĕ kơ dơng, tơ’bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai ‘noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh.” (Yôhan 15:5). Rup tơm hơmu jing juăt lăm tơdrong juăt bơngai Isarael. Lăm chăl ‘nâu, Kră Yang Yêsu yua rup juăt wă roi tơdrong tơ’bưh Kră Yang Yêsu, ‘Bok Kei-Dei păng jơ̆ng ‘bang. Kră Yang Yêsu tơm ‘long hơmu tơpă, ‘Bok Kei-Dei bơngai pơtăm, lu bơ̆n jơ̆ dơng hơmu.

Kiơ̆ tơdrong juăt, dơng ưh kơ gơh arih kơdih, bluh hla dah đei plei dah sư ưh kơ klep tơ tơm. Yua kơ sư ưh kơ đei rơh, kơdih ưh kơ gơh trip iŏk tơmam đơ̆ng lăm teh. Tôm tơdrong arih sư đơ̆ng tơm ngăl.

Tơdrong arih bơ̆n kư̆m thoi noh. Lu bơ̆n oei arih, hŏk pơhrăm, jang rim năr. Mălei dah ưh kơ “lăm Kră Yang”, ưh kơ tơ’bưh hăm Sư, bơ̆n ưh kơ gơh iŏk tơm tơdrong arih tơpă đơ̆ng Sư.

Kơplah Kră Yang khan: “Dah ưh kơ đei Inh, iĕm ưh kơ gơh pơm kiơ ôh”. Tơdrong noh wă khan lu bơ̆n ưh kơ gơh jang dah đei minh tơdrong kiơ lăm chăl arih bơ̆n. Dah ưh kơ đei Sư, bơ̆n oei gơh jang mălei tơdrong noh ưh kơ đei yua ling lang, păng lu bơ̆n kư̆m ưh kơ arih kiơ̆ thoi Kră Yang wă.

Tơpă, bơ̆n ‘mônh kơ hiơ̆k gah kơmăi. Kơmăi ưh kơ đei glăi, mălei dah sư iŏk đĭ jơ năr păng tơdrong kơnhăm lu bơ̆n, jing “yŏng” lu bơ̆n, tơdrong noh kăl kơ bơ̆n tơchĕng lăng. Hăm đei layơ bơ̆n yua điên thoăi truh kơ bơ̆n hiơt kơ Kră Yang? Hăm đei layơ internet pơm kơ bơ̆n ưh pă rơhing chă Kră Yang? Rim năr bơ̆n ‘măn lơ jơ phŭt chă lăng tơdrong đe roi, pơchơt, chă tơdrong kiơ̆ kơ chăl dang ei…ưh kơ băt jơ năr hlôi hrĕnh tĕnh.

Tơdah bơ̆n chă Kră Yang hăm tơdrong rơhing thoi noh lei gô đei tơdrong kiơ? Tơdah bơ̆n ‘măn kơ Kră Yang hơdrol hloh thoi bơ̆n ‘măn kơ điên thoăi lei bơ̆n gô đei tơdrong kiơ? Tơdrong arih lu bơ̆n gô pha. Lu bơ̆n gô mơn minh tơdrong arih ‘bĕnh blai kơ tơdrong arih păng đei yua đơ̆ng tơ’bưh hăm Kră Yang. Nhen thoi tơ’bla hơmu klep kơ tơm.

Mălei, lơ wơ̆t lu bơ̆n tam mă tơ’bưh tơklep hăm Kră Yang. Tơdrong pơgăn tih hloh noh đơ̆ng bơhngol lu bơ̆n. Kơplah minh ‘nu đei jơhngơ̆m ataih đơ̆ng Kră Yang, anat dêh lu sư wă tơblah hăm tơdrong alah dah rơdu kơdih akâu wă ‘măn jơ kơ Kră Yang. Lăm tŏk bŏk lơ tơdrong rơih iŏk păng tơdrong chơt ala teh âu, lu bơ̆n hăm rơih iŏk pơtơm năr plơ̆ng hăm nơ̆r ‘Bok Kei-Dei păng krao khan dah ưh? Nơ̆r Kră Yang pơtho: “Thoi noh na iĕm athei ăn kơ Sư pơgơ̆r iĕm, hăm adrin pơm ‘lơ̆ng thoi Sư wă, noh kăl hloh kơ dôm tơdrong nai; pơm thoi noh na Sư gô ăn kơ iĕm tôm tơmam iĕm kăl yua”.(Mathiơ 6: 33)

Tơdah lu bơ̆n lăng pơhơi dah tŭk lê̆ jơphŭt tơ’bưh hăm Kră Yang rim năr, lei thoi yơ bơ̆n wă chang hơmĕng ‘bĕnh blai Yang Bơhngol ‘Lơ̆ng? Thoi yơ bơ̆n mơn tuh đak rơmă wă bơ̆jang kơ Kră Yang, dah chăt rơh pơm hơnă lăm Sư?

Yua kơ thoi noh, pơtơm năr plơ̆ng rim năr athei tơ’bưh hăm Kră Yang. Athei chă ‘Bok Kei Dei păng tơdrong tơpăt sư adrol hloh, adrol kơ tôm tơdrong tơdă, tơdrong jang dah hiơ̆k bơngơ̆t lăm minh năr. Athei kơ kuh păng hli yom kơ Sư rim năr, lăm kơplah hiôk, kơplah tơblah pơjĕi, lăm tơdrong rơih iĕ tih, păng kơplah đei tơdrong pơhlŭ mă bơ̆n tơ’bơ̆p rim năr.

“Chă bĕ Kră Yang kơplah bơ̆n oei gơh tơ’bơ̆p; krao khan bĕ kơplah Sư oei jê̆!” (Êsai 55:6)

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ kon gơh năm jê̆ Ih, păng la yơ kư̆m gơh krao apĭnh Ih. Mălei ơ Kră Yang, pĭnh Ih huay kơ jô̆ yo yua kơ kon lơ wơ̆t tŭk lê̆ jơ phŭt tơ’bưh hăm Ih, pơm kơ đon lui kon jing dơnuh hin, pơngot păng ưh kơ đei yua kơ Ih. Apĭnh Ih tơgŭm kon rim năr tơ’bưh tơklep hăm Ih, nhen thoi dơng hơmu tơklep hăm tơm, wă kơ kon sơng iŏk tơdrong arih đơ̆ng Ih, păng ră roi tơdrong arih đơ̆ng Ih ăn kơ bơngai jum dăr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơ’bưh hăm tơm tơdrong arih tơpă noh jơ̆ kơplah ih oei lăm tơdrong tơ’bưh arih hăm Kră Yang wă sơng iŏk tơdrong tơplih ăn kơ tơdrong arih bơhngol kơdih, wă kơ tơdrong arih ih jing chu yom păng đei yua hloh. Năr nâu, kơmăi, điê̆n thoăi, dah tôm tơdrong nai hăm dui ih ataih tơdrong arih Kră Yang dah ưh? Athei tơbral tôm tơdrong rơdu păng tơdrong yoch ih, apĭnh Kră Yang huay kơ jô̆ yo păng pơkăm tơdrong arih tơ’bưh hăm Kră Yang đơ̆ng năr ‘nâu. Apĭnh ih ling lang tơnăp lăm jơ phŭt chă Kră Yang rim năr wă kơ mơn tơdrong arih pran kơtang păng đei yua kơ Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.