Mĭnh lăm dôm kơ tơdrong juăt đơ̆ng bơngai Viêt Nam jơ̆ lơ jơhnơr arih hơdai lăm minh pôm hnam. Lăm tơdrong ‘mêm mơnat păng dŏng tơgŭm dih băl ‘noh, lu tơdrong arih gĭt kăl đei chĕp ba đơ̆ng chăl ‘nâu truh tơ chăl nai. Hăm lu hnam dơnŏ lui yom kơ Kră Yang, tơdrong bơtho tơ’bôh kơ chăl hơ‘lơ̆p băt păng hlôh kơ Kră Yang ưh kơ sĭ lăp jơ̆ tơdrong jang kăl đơ̆ng mĕ ‘bă, mă jơ̆ tơdrong hơdai băl đơ̆ng rim kơ bơngai lăm hnam dơnŏ. Đơ̆ng tơdrong bơtho tơ’bôh đơ̆ng Kră Yang, hnam dơnŏ jing anih wei rong đon lui păng pơjing hơnă bơhngol kơ chăl đơ̆ng rŏng. ‘Noh jơ̆ tơmam apah ‘lơ̆ng rŏ đơ̆ng Kră Yang.

Năr ‘nâu, ‘năr 06/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao Nơ̆r Kră Yang kơ̆l ‘bai TƠMAM APAH ĐƠ̆NG ‘BOK KEI-DEI.

“Inh băt kơ ih lui kơjăp tơpă, kư̆m lei-lăi thoi yă ih Lôih păng mĕ ih Eunik lui sơ̆ mơ̆n. Na dang ei inh băt kơ ih lui kơjăp thoi sư sơ̆ tơpă.” (II Timôthê 1:5)

Rim giĕng mĭnh wơ̆t, pêng ‘nu nhôn đei ôn pơ’lơ̆ng Sơ̆p Hla Bơar Nơ̆r ‘Bok Kei-Dei lăm kơdŭng iĕ, rôp băl ti yak năm tơ hnam mŏ. Hnam iĕ tơnŏ đơ̆ng mŏ oh mŏ, hơdai hăm mĕ sư, đei jing juăt dêh hăm lu nhôn. Mưh lăp dôm kơ jơ pơhrăm Nơ̆r ‘Bok Kei-Dei păng pơma dơnuh hơdai dih băl ‘bơ̆t ala hơdah ŭnh neon đei pơgăn đơ̆ng yă gah mĕ sư. Kơplah đei kăl kơ mĭnh kơ chŏk đak, yă lăp krao re jơwa: “Hăm đei bơngai bu tơ’ngoaih noh ưh?” hăm nơ̆r pơma re đơ̆ng bơngai Quang Nam, đei anat kơ hlôh hăm inh. Păng nă ei layơ kŭm ‘bôh hloi, pơ‘lơ̆ng păng hơdar: “Lu iĕm kư̆ kơ pơhrăm Nơ̆r ‘Bok Kei-Dei ă, lê̆ kơ mĕ hiơ̆k kơ yă.”

Đei dôm wơ̆t truh hrôih, lăp mĭnh ‘nu inh lăm hnam thĕng hreh, mơ̆ng kơtơ̆ng yă hơnơ̆ng kơ pơma kiơ ‘noh lăm mĭnh kơplah jơ kŭm đei đunh. Na blư thar inh kơtơ̆ng yă krao anăn mŏ, krao hloi anăn mĕ mŏ na ‘net ‘net ‘bôh băt yă oei krao lơ anăn ‘nhŏng oh lăm hnam. ‘Bơ̆t anăp ‘bar pah măt pơih să thoi kơ ‘nao chă lăng, kŭm ‘nao wă hlĭch hlăch anat kơ hlôh đơ̆ng inh, mŏ lăng inh păng đei hiĕk: “Yă krao khan tơgŭm kơ kon sâu lăm hnam rim năr thoi noh.”

Inh đei hlĭch tơpă păng hơ iă, kŭm đei hơpơi wă: rŏ kơ kơdih kŭm đei mĭnh ‘nu bơngai yă thoi noh. Păng dang ei, hơ’mon lăm Sơ̆p Hla Bơar Nơ̆r ‘Bok Kei-Dei gah hnam dơnŏ mĕ kon Lôih păng Eunik hơdai wei rong Timôthê đei chông inh wơ̆t brŏk dôm kơ jơ phŭt tơnŏ lăm hnam đê̆ nă, hơdai hăm mĕ păng lu kon hơ’lơ̆p. Anih mă đon lui đei rei pơtăm đơ̆ng dôm lu bơngai drŏkăn: bơngai yă păng bơngai mĕ. ‘Noh jơ̆ đon lui mă ‘bok Pôl đei tơ’bôh lăm hla ar kơthơ gơih kơ Timôthê, bơngai bơ̆jang hơdai sư lăm đon lui. “Inh băt kơ ih lui kơjăp tơpă, kư̆m lei-lăi thoi yă ih Lôih păng mĕ ih Eunik lui sơ̆ mơ̆n. Na dang ei inh băt kơ ih lui kơjăp thoi sư sơ̆ tơpă.” (II Timôthê 1:5)

Lăm hnam dơnŏ pêng jơhnơr arih lăm đon lui, chĕp ba ăn đon lui. Inh tơchĕng pơwao, lăm hnam iĕ ioch noh, tơpă Nơ̆r Kră Yang đei răk, pel ‘bơm, chih jơ̆p anih, tơ kơpal ‘long tơpơng hnam, kơpal ‘măng, thoi ‘bok Môis đei bơtho ăn. Păng Nơ̆r ‘Bok Kei-Dei đei ‘bok Môis bơtho tơpă đei ưh kơ achăng yă Lôih.

“Lu iĕm athei chih răk lăm jơhngơ̆m lu nơ̆r mă inh đei bơtho lu iĕm năr âu. Athei adrin bơtho ăn dôm tơdrong noh kơ lu kon iĕm păng bơtho tơdrong âu kơplah sư oei lăm hnam, dah oei năm rok trong, dah wă tep, dah iung đơ̆ng tep.” (Bơtho Khôi Juăt 6: 6-7)

Hơdai hăm tơdrong bơtho ăn Nơ̆r Kră Yang hăm lơ trong, đon lui tơpă hăm Nơ̆r Kră Yang đei tơ’bôh lăm tơdrong pơgơ̆p mĕ kon yă Lôih hăm Eunik tơpă đei mĭnh pah ưh kơ iĕ lăm tơdrong pơjing tơdrong arih lui yom anih Timôthê, ‘net ‘net pơjing tơdrong ‘mêm pơyơ̆r đơ̆ng sư ‘măn ăn kơ Kră Yang.

Tơdrong Jang 16:1,3 tơbăt ‘bă kơ Timôthê jơ̆ bơngai Grĕk na mĕ sư jơ̆ mĭnh ‘nu bơngai drŏkăn Juđa lui yom kơ Kră Yang. Tơdrong iŏk ŭnh om hăm klo bơngai Grĕk ưh kơ đei pơgăn Eunik arih pran kơtang păng tơnăp hăm Kră Yang Yêhôwa sư, đon lui mă duch đơ̆ng đei bơtho păng rei pơtăm đơ̆ng mĕ sư yă Lôih. Hăm teh đak dang ei, đei lơ wơ̆t tơ’bơ̆p hăm tơdrong bơtho kon hơ‘lơ̆p jơ̆ mĭnh ‘nu bơngai mĕ hơdro, dah klo akăn ưh kơ hơdai đei đon lui, dah ưh kơ đĭ jơhngơ̆m arih lăm đon lui. Mă khan lăm dôm hnam dơnŏ đon lui tôm mah kŭm đei dôm kơnao lu bơ̆n mơn ‘bôh mĭnh adrô̆ lăm tơdrong jang bơtho kon bơ̆n lăm đon lui. Mă lei Kră Yang ưh kơ layơ ataih đơ̆ng lu bơ̆n. Thoi Yang Yêsu đei khan: “Inh ưh kơ tŭk iĕm thoi kon mơti ôh. Inh gô jur tơ iĕm dơ̆ng.” (Yôhan 14:18) Athei hơdai Eunik chô̆ kơjăp đon lui lăm Yang Yêsu, arih tơnăp hăm Nơ̆r Sư, chông anhăk kon hơ’lơ̆p bơ̆n tôm mah pơtrơp dơ̆ng tơdrong wă ‘lơ̆ng tơpăt păng lăp đon đơ̆ng ‘Bok Kei-Dei ‘măn ăn kơ kon hơ’lơ̆p. “To, kon hơ’lơ̆p jơ̆ tơmam đơ̆ng Kră Yang ăn; Hơ’lơ̆p đơ̆ng blu pôih jơ̆ tơmam apah,” (Hơriso 127:3).

Jơ năr hlôi thĕng hreh. Mŏ ŏh lu nhôn rim ‘nu rim anih, bơngai oei ‘bơ̆t doh, bơngai weh đơ̆ng pơlei chă năm jang tơ lơ anih lăm teh đak hơdai hăm hnam dơnŏ iĕ kơdih. Rim tơdrong roi tơbăt gah tơdrong lôch đơ̆ng yă mŏ, na truh kơ mĕ sư, tơdrong pơm kơ jơhngơ̆m inh đei ‘blŏk gah hnam iĕ noh sơ̆, anih pêng jơhnơr hơdai tơnăp ‘mêm yom kơ Kră Yang. ‘Blŏk truh kơ mŏ hăm rim Nơ̆r Kră Yang chih răk lăm đon tơchĕng. ‘Blŏk truh kơ nă hăm muh măt iơ̆m dim, nơ̆r pơma hơdar, rơngơp kơplah pơ’lơ̆ng bơtho tơ’bôh, bơtho lu nhôn hơtŭk ‘bum ăn kơ khŭl hơri sa. Păng ‘blŏk hloh jơ̆ nơ̆r krao khan đơ̆ng yă. Tơdrong hlĭch chrơp lăm nơ̆r krao khan đơ̆ng yă mŏ năr ‘noh jơ̆ năr ‘nâu lu ‘nhŏng mŏ lăm hnam dơnŏ nă đĭ đăng oei ‘măn jơ năr bơ̆jang kơ Kră Yang, đơ̆ng rim kơ anih lăm teh đak Viêt Nam mă ‘mêm dĭng truh kơ dêh ‘ngoaih, tơnăp ba ăn tơdrong ‘mêm dŏng pơklaih đơ̆ng ‘Bok Kei-Dei truh kơ lơ bơngai. Thoi ‘bar tŏ hnam dơnŏ bơngai drŏkăn Lôih păng Eunik lăp đei Sơ̆p Hla Bơar Nơ̆r ‘Bok Kei-Dei tơ’blŏk anăn lăp mĭnh ‘măng đĕch, mă lei đon lui tơnăp đơ̆ng lu sư ‘bơ̆t anih ‘Bok Kei-Dei arih ling lang đei hơtŭt ‘bơm truh tơ lơ chăl đơ̆ng Timôthê hăm dôm kơ tơdrong chă năm bơtho hơdai hăm ‘bok Pôl.

Hăm inh, dôm tơdrong kiơ pơhrăm iŏk đơ̆ng hnam dơnŏ nă hơdai hăm lu ‘nhŏng mŏ lui yom kơ Kră Yang lăm hnam iĕ ‘năr noh, păng kơplah tơm măt ‘bôh jơhnơr mă pêng, sau se yă, pơtrơp tơnăp ‘mêm yom kơ Kră Yang păng bơ̆jang kơ Sư, ‘noh ling lang jơ̆ jơhngơ̆m pran ăn kơ inh tơnăp krao khan păng bơtho kơ kon hơ’lơ̆p arih đĭ jơhngơ̆m, đĭ đon tơchĕng, đĭ jơhngơ̆m pran lui yom kơ ‘Bok Kei-Dei arih ling lang.

“Păng bơ̆n ‘nĕ hiơt krao khan kơ ‘Bok Kei-Dei, wă kơ bơ̆n hưch hanh kơ tơdrong krao khan ling-lang, gô mơ̆ng kơ Yang Bơhngol ‘Lơ̆ng wă kơ bơ̆n krao khan tơdrong kiơ,” (Êphêsô 6:18a)

Apĭnh đĭ đăng krao khan hơdai: Kơkuh kơ ‘Bok Kei-Dei, bơnê kơ Kră Yang đei dan ăn lu nhôn lăm hnam dơnŏ kơdih. Bơnê kơ Kră Yang đei lui gơnang pơjao tơdrong jang wei bơtho kon sau kơ lu nhôn. Hơpơi ‘Bă pơthim ăn jơhngơ̆m pran wă kơ lu nhôn đei jơhngơ̆m krao kran kơjăp, păng ăn kơ lu nhôn gơh hlôi mơn đei tơdrong chu yom Ih, tơnăp chông ba kon sau kơdih yak lăm tơdrong tơdă hiôk hian păng rơnŭk rơnoa mă Ih đei ‘măn ăn adrol.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă khan oei lăm dôm tơdrong jang kiơ lăm hnam dơnŏ iĕ dah tih bơ̆n kơdih, hơ’mon hnam dơnŏ ‘bar ‘nu bơngai drŏkăn Lôih păng Eunik mă ‘Bok Kei-Dei ăn đei chih răk lăm Sơ̆p Hla Bơar Nơ̆r ‘Bok Kei-Dei jơ̆ tơdrong tơbăt đơ̆ng Sư ‘măn ăn kơ ih păng inh. Athei gĭt kơ tơdrong bơtho kon hơ’lơ̆p bơ̆n thoi tơmam apah đơ̆ng ‘Bok Kei-Dei, păng pơ̆n nuih ră roi tơdrong jang thoi bơngai đei ‘Bok Kei-Dei lui gơnang pơjao ăn tơdrong jang rei tơdrong juăt arih lui yom. Ưh kơ layơ jơ̆ klui hăm ‘Bok Kei-Dei. Mă khan jơ phŭt ‘nâu, athei pơkă pơkăm hăm ‘Bok Kei-Dei arih hăm đon lui tơpăt tơpă, bơtho ăn kơ lu jơhnơr lăm adrĕch adrŭng mă Kră Yang đei dan ăn kơ ih hơdai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.