Lăm chăl arih, đei tơdrong pơm lăng nhen thoi iĕ đĕch mă ‘bônh kơ pơm kơ lu bơ̆n pă đei kơ chơ̆n jơhngơ̆m. Đei nơ̆r pơma blĕk, măt lăng ưh kơ hiôk, dah hlôh ưh kơ trŏ kơ bơngai nai. Dôm lu tơdrong noh đei ling lang na ngeh kơ hmă đĕch. Mă lei lăm jrŭ, noh kư̆m jơ̆ lu bơ̆n oei tơ’bơ̆p tơdrong tơblah gah bơhngol măt lăng ưh kơ ‘bôh, tơ anih lăm jơhngơ̆m, tơchĕng păng đon lui lu bơ̆n đei pơlong lăng. Lei lu bơ̆n kăl kơ hơmet tơdrong kiơ wă kơ dơ̆ng kơ jăp păng khan trŏ kơ dôm tơdrong thoi noh?

Năr ‘nâu, ‘năr 07/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Beth Patch kơ̆l ‘bai CHĔP IŎK TƠMAM TƠBLAH ĐƠ̆NG KRĂ YANG.

“Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” (Êphêsô 6:12)

“Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu. Thoi noh na bơ̆n athei gơnang kơ ‘Bok Kei-Dei tơgŭm bơ̆n lăm tôm tơdrong, wă kơ bơ̆n đei jơhngơ̆m pran huay kơ hiong răm kơplah bơ̆n đei tơdrong tơblah hăm yang kơnê̆. Bơ̆n athei adrin pơjăng pơjăr dĭng truh năr tôch.” (Êphêsô 6:12-13)

Lăm năr ‘noh, inh năm răt tơmam tơ anih tĕch tơmam. Kơplah oei lăm gre tơ anih ming gre, inh đei tơ’bơ̆p bơngai drŏ nglo khĕnh hơwĕng. Sư dơ hlâu ti, hil ôr pơret. Inh ưh kơ đei kơtơ̆ng sư pơma kiơ yua kơ tang bơih kơmil ‘măng gre. Ưh kơ wă tơdrong rai tih hloh, inh lĕch hloi đơ̆ng anih ming gre noh na wơ̆r gre năm răt tơmam tơ anih nai. Inh lăng tơ lăm kơ mĭl gre, inh oei ‘bôh sư dơ̆ng ‘bơ̆t doh, oei ‘bôh sư blĕk đĕch yua kơ inh kuă kơ mơ̆ng nơ̆r sư pơma blĕk noh.

Inh bơnê kơ kơ Kră Yang yua kơ Sư bơwei inh weh đơ̆ng nơ̆r pơma pơjah dih băl ưh kơ yua kiơ. Ti inh chĕp kơjăp ‘long wơ̆r gre, jơhngơ̆m đon inh oei hơwơ̆l hơwang. Rŏ lăng sư wă kơ anih ‘bơ̆t inh ming gre? Dah sư hơwơ̆l kơ inh hăm bơngai nai?

Mălei kơplah năm ataih ‘biơ̆ tŏ sĕt, đei tơdrong kiơ noh tơ’blŏk kơ inh tơdrong pơjah dih băl ‘nâu ‘bih kơ adrô̆ inh hăm bơngai drŏ nglo noh đech ôh. Nơ̆r ‘Bok Kei-Dei đei chih: “Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, sư kư̆m pran mơ̆n, sư kư̆m oei tơ kơpal plĕnh ti mă tơ anih nai; sư pơgơ̆r lu bơngai oei tơ ala teh âu, lu bơngai mă oei lăm măng mu.” ( Êphêsô 6:12)

Đơ̆ng lăng lăm tơdrong noh, inh ưh pă adrin chơchă nơ̆r tơl bơih. Bơngai drŏ nglo noh rŏ lăng đei tơdrong ưh kơ hiôk lăm năr noh, dah đei tơdrong gleh glăn pơm kơ sư thoi noh. Lăm tơdrong arih, tơ’bơ̆p tơdrong thoi âu ưh kơ tŏ sĕt ôh.
‘Bok Pôl pơma khan lu bơ̆n đei tơ’bơ̆p tơdrong tih hloh, jơ̆ tơ’bơ̆p tơdrong kơnê̆ tơlăm rơwơ̆ng măng mu ‘nâu. Dôm tơdrong lu bơ̆n lăng ‘bôh, đơ̆ng kon bơngai, tơdrong arih dah tơdrong tơhil dih băl, noh jơ̆ păh ‘nguaih đĕch. Đơ̆ng rŏng kơ noh jơ̆ tơdrong tơblah gah bơhngol gô truh, gô ‘bơm kơ lăm tơdrong tơchĕng păng pơm đơ̆ng kon bơngai.

Mălei, tơdrong ‘nâu ưh kơ sĭ lu bơ̆n ưh kơ drơ̆ng iŏk kơ đei adrin đơ̆ng kơdih dah lăng dôm tơdrong pơm ưh kơ trŏ. Tơplơ̆ dơ̆ng, kơplah hloh kơ tơdrong tơblah gah bơhngol, lu bơ̆n kăl kơ pơ’lơ̆ng hloh hăm jơhngơ̆m kơdih akâu, tơdah ưh, lu bơ̆n ‘bônh kơ pơ̆k huŏng lăm jơhngơ̆m khĕnh hơwĕng, chhŭr nuih dah pơm plơ̆.
Yua kơ thoi noh ‘bok Pôl athei lu bơ̆n: “Thoi noh na bơ̆n athei gơnang kơ ‘Bok Kei-Dei tơgŭm bơ̆n lăm tôm tơdrong, wă kơ bơ̆n đei jơhngơ̆m pran huay kơ hiong răm kơplah bơ̆n đei tơdrong tơblah hăm yang kơnê̆. Bơ̆n athei adrin pơjăng pơjăr dĭng truh năr tôch.” (trong 13)

Tơmam tơblah đơ̆ng ‘Bok Kei-Dei noh jơ̆ tơdrong tơpă tơpăt, tơdrong hiôk hian, đei đon lui, tơdrong dŏng pơklaih păng Nơ̆r Kră Yang. ‘Nâu jơ̆ tơdrong lu bơ̆n kăl kơ “chĕp răk” rim năr, đơ̆ng lăm tơdrong tơchĕng, rơih iŏk păng pơm hloi. Lu bơ̆n kăl kơ chĕp iŏk tơmam tơblah đơ̆ng Kră Yang lăm năr hiôk hian dah lăm “năr đei tơdrong kơnê̆ truh”. “Năr đei tơdrong kơnê̆ truh” noh jơ̆ jơ lu bơ̆n gô tơ’bơ̆p tơdrong ayăt dih băl, ưh kơ dang ăi, ơh sơ’ngon, tơdrong pơlong lăng dah pơhlŭ lăm tơdrong arih đon lui.

Kơplah đei hơmet tôm tơmam ăn kơ wă tơ’blah, na đei kơ lu bơ̆n noh jơ̆ “dơ̆ng kơjăp”. Kơplah teh đak đei tơdrong truh, tơdrong dơ̆ng kơjăp lăm Kră Yang kăl dêh tơpă. Dơ̆ng kơjăp lăm Kră Yang noh jơ̆ bơwei đon lui, bơwei jơhngơ̆m păng đon tơchĕng kơdih ‘bơ̆t anăp tơdrong pơhlŭ pơlung păng tơdrong pơlong lăng lăm teh đak ‘nâu.

Lu bơ̆n ưh kơ adrô̆ lăm tơdrong tơblah ‘nâu, ‘Bok Kei-Dei đei ăn kơ lu bơ̆n tơmam tơblah kăl tơpă wă kơ dơ̆ng kơjăp. Tơdrong kăl noh jơ̆ lu bơ̆n kăl kơ iŏk tơmam tơblah đơ̆ng Kră Yang na tơblah. Kơplah đei hơmet tôm bơih, lu bơ̆n gô kĕ jei mă đei tơdrong tơblah tih dah iĕ, na chĕp ba tơdrong kĕ jei ăn kơ Kră Yang lu bơ̆n.

Apĭnh đĭ đăng krao khan hơdai: Kơkuh kơ Kră Yang, apinh tơgŭm kon dan jơhngơ̆m păng đon tơchĕng kon tơ Ih lăm rim tơdrong tơblah. Apinh tơgŭm kon ling lang hrŭk iŏk ao mam đơ̆ng Ih noh jơ̆ tơdrong tơpă tơpăt, tơdrong hiôk hian, đei đon lui, tơdrong dŏng pơklaih, păng Nơ̆r Arih ling lang đơ̆ng Ih wă tơblah. Kon lui ngeh kon gô yak năm lăm tơdrong kĕ jei đơ̆ng Ih đei hơmet ăn, na rim năr rai wơ̆ ‘lŏ lăm đon lui păng tơdrong ‘mêm đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ih hăm đei mơn kăl kơ hơmet hăm tơmam tơblah đơ̆ng Kră Yang wă kơ dơ̆ng kơjăp lăm tơdrong tơblah gah bơhngol ưh? Athei apinh Kră Yang tơgŭm ih iŏk hrŭk ao tơpă tơpăt, yak năm lăm tơdrong ‘lơ̆ng tơpăt, păng bơwei jơhngơ̆m đon lui kơ Kră Yang lăm rim năr. Kơplah tơ’bơ̆p tơdrong pơjah pơjăng dih băl dah tơhil dih băl lăm tơdrong arih rim năr, athei tơ’bôh jơhngơ̆m ‘Bok Krist đơ̆ng lăm nơ̆r pơma, tơ’bôh tơdrong pơm hăm ‘mêm mơnat, păng krao khan tơgŭm dih băl lơ hloh ăn kơ lu bơngai jum dăr kơ bơ̆n. Yua kơ oei lăm kơplah tơblah ‘nĕ kơ pơhơi, na kăl kơ krao apinh Kră Yang ăn kơ bơ̆n đei tơdrong arih kơ chăng kơ krao khan, wă kơ ih mơn băt kơ đei ayăt păng gô dơ̆ng kơjăp.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.