Đei dôm kơ nao lăm tơdrong arih mă khan lu bơ̆n đei adrin lơ tơpă, tôm tơdrong nhen kơ thoi oei ưh kơ tơplih. Lei lăi thoi kơplah ih chang gô mĭnh jơ năr ‘nao lăm tơdrong jang, athei krao khan kơ minh tơdrong gĭt kăl mă lei ưh tim mă đei tơl nơ̆r. Dôm kơplah thoi noh, lu bơ̆n ‘bônh dêh kơ bơ̆l hăl. Lu bơ̆n ngăl tơchĕng khan kơplah Kră Yang bơ̆jang, tơdrong arih yua kơ thoi noh na ‘lơ̆ng hloh. Mă lei dah tơdrong ‘noh tim mă truh lei thoi yơ? Dah tôm tơdrong oei đêl thoi so, lei lu bơ̆n hăm tôm mah tơnăp wă pơtrơp yak năm hăm Kră Yang ưh?

Năr ‘nâu, ‘năr 08/05/2026, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jessica Teed kơ̆l ‘bai KƠPLAH TƠDRONG ARIH ƯH TAM MĂ TƠPLIH.

“’Bok Kei-Dei jô̆ đĭ-đăng kơ lu sư đei đon lui kơjăp, mă-lei kơplah lu sư oei tơ teh sơ̆, lu sư ưh tam mă đei tơdrong ‘Bok Kei-Dei pơkă ôh.” (Hêbrơ 11:39)

Inh đơ̆ng đei mĭnh kơnao jơ năr arih păng bơ̆jang tơ mĭnh pơlei tih nai. Adrol kơ năm, inh hơmĕng khan tôm tơdrong gô tơproh ‘lơ̆ng, khan kơdih lăp kăl yak kiơ̆ tơdrong chông anhăk đơ̆ng Kră Yang lei rok trong yak tơ anăp gô tơproh ‘lơ̆ng. Mă lei tơpă đei pha ra.

‘Noh jơ̆ minh lăm dôm kơnao pơmat tat dêh. Inh mơn ‘bôh bơ̆l hăl, ‘blŏk kơ hnam păng lơ wơ̆t ưh kơ hlôh tơdrong kiơ đei truh. Tôm tơdrong ưh kơ lei lăi thoi inh đei tơchĕng. Tơdrong jang inh hiơ̆k bơngơ̆t păng athei đei lơ jơhngơ̆m pran. Inh nhen thoi ưh kơ đei jơ năr pơdơh. Tơdrong pơm buăl juăt ‘nao jing anat, păng inh kŭm ưh kơ gơh tơ’bưh pơgơ̆p hăm Khŭl Bơngai Lui yua kơ jơ bơ̆jang lơ tơdrong.
Inh mơn ‘bôh mĭnh adrô̆ păng lăp ‘maih brŏk tơ hnam. Lơ wơ̆t inh krao khan păng apinh Kră Yang yua kơ liơ tôm tơdrong ưh kơ thoi inh tơchĕng. Inh lui khan Kră Yang đei tơdrong kiơ noh ‘măn ăn kơ inh, mă khan kơplah ‘noh inh ưh kơ gơh hlôh đĭ. Păng inh đei tơlĕch pơdrơ̆ng ưh kơ đei ‘bônh, khan inh gô oei ‘bơ̆t doh păng pơtrơp lui gơnang anih tơdrong bơtho tơ’bôh đơ̆ng Kră Yang.

Hloh kơ jĭt sơnăm đơ̆ng rŏng, kơplah lăng đêl, inh ‘bôh băt ‘noh jơ̆ mĭnh tơdrong pơdrơ̆ng trŏ lăp. Inh đei gơh hŏk iŏk lui gơnang kơ Kră Yang lơ hloh. Dah năr ‘noh inh wơ̆t brŏk tơ pơlei hnam, rŏ lăng tơdrong arih inh dang ei đei pha ra tơpă. Gĭt kăl hloh, inh rŏ lăng đei achăng dôm tơdrong Kră Yang wă bơtho inh lăm dôm kơ khei ‘năr pơmat tat ‘noh.

Hlôi mơn đei ‘nâu pơm kơ inh ‘blŏk truh kơ Jôsep lăm Sơ̆p Hla Bơar Nơ̆r ‘Bok Kei-Dei. Kơplah Jôsep lăm hnam phak, sư ưh kơ đei dŏng pơklaih hloi. Tơplơ̆ dơ̆ng, tơdrong arih sư đei kơplah jing kơnê̆ hloh. Mă lei tơdrong trŏ kơ kơnhăm jơ̆ Nơ̆r ‘Bok Kei-Dei đei kơnhăm khan “Kră Yang tơgŭm Jôsep” păng “tơ ‘bôh jơhngơ̆m ‘mêm” kơ sư.

Blŭng a 39:20-23b chih: “Na rôp hloi Jôsep tah hloi lăm hnam phak, tơ anih mă phak lu bơngai pơm yoch hăm ‘bok pơtao. Thoi noh Jôsep oei lăm hnam phak. Kră Yang tơgŭm Jôsep păng ‘mêm kơ sư ưh kơ tơplih, ăn yŏng wei-lăng hnam bơnă oei ‘mêm kơ sư. Yŏng hnam phak jao đĭ-đăng lu bơnă kơ Jôsep, ưh kơ đei tơdrong jang kiơ mă ưh kơ đơ̆ng Jôsep ăn ‘mơ̆i. Yŏng wei hnam phak ưh pă đei jang kiơ boih, lê̆ kơ Jôsep ngăl, yua kơ Kră Yang tơgŭm sư, mă tôm tơdrong jang kiơ đơ̆ng sư pơm tă kơ jing ngăl.”

Lu bơ̆n đei tơchĕng khan dah Kră Yang oei hơdai, tôm tơdrong gô jing ‘bônh hloh. Mă lei hơ’mon đơ̆ng Jôsep tơ’bôh mĭnh tơdrong tơpă đei pha: tơdrong oei hơdai đơ̆ng Kră Yang ưh kơ trŏ layơ kŭm tơplih tơdrong arih hloi, mă lei ling lang tơplih tơdrong lu bơ̆n dơ̆ng kơjăp lăm tơdrong arih ‘noh. Tơdrong oei hơdai đơ̆ng Kră Yang ưh kơ yua kơ đơ̆ng lăm tơdrong arih thoi yơ. ‘Bok Kei-Dei oei hơdai Jôsep lăm hnam phak, hăm đơ̆ng rŏng kơ sư lĕch đơ̆ng hnam phak. Sư oei bơ̆jang kơplah tôm tơdrong thoi đei pơmat tat, ưh kơ trŏ lăp kơplah tơdrong arih tơproh ‘lơ̆ng.

Jôsep đei hlôi tơ’bơ̆p lơ tơdrong ưh kơ tơpăt: đei kơdih ‘nhŏng oh blơ̆, đei tĕch pơm bơngai đĭch, na đei jô̆ jâu păng tah hnam phak. Mă lei, sư oei pơtrơp tơnăp păng lui gơnang kơ ‘Bok Kei-Dei yua kơ sư lui lăm tơdrong oei hơdai đơ̆ng Kră Yang. Tuch luch, ‘Bok Kei-Dei yua Jôsep wă dŏng pơklaih lơ bơngai nai.

Trŏ lăp, lu bơ̆n tơchĕng khan kĕ chơ̆n lăm đon lui gô ba truh tơ minh tơdrong đei yua ‘lơ̆ng rŏ kiơ̆ kơ lu bơ̆n chang gô. Mă lei Nơ̆r ‘Bok Kei-Dei bơtho khan kĕ chơ̆n adrol hloh jơ̆ tơnăp hăm Kră Yang lăm tôm tơdrong arih, mă khan kơplah lu bơ̆n ưh tim mă ‘bôh Sư bơ̆jang. Đon lui ưh kơ trŏ jơ̆ ‘bôh ‘mơ̆i na lui, mă lei jơ̆ lui mă kơplah ưh tim mă ‘bôh.

Tơpă, kơplah lăng lăm Hêbrơ 11, lu bơ̆n ‘bôh khan dôm lu bơngai kĕ jei lăm đon lui ưh kơ sĭ lăp hlôi mơn đei kĕ jei, mă lei kŭm đei tơ’bơ̆p lơ tơdrong truh:

“Lu sư đei đon lui tơpă, na lu sư kĕ blah iŏk lơ teh đak noh nai. Lu sư bơngai pơgơ̆r tơpăt ling-lang, lu sư ‘bôh tơpă boih tơdrong ‘Bok Kei-Dei pơkă wă ăn kơ lu sư noh. Lăm lu sư kư̆m đei gơh pơŏm ‘bơ̆r kiĕk. Mă đe tah sư tơ lăm pla ŭnh tih, ŭnh huay kơ sa sư ôh. Đe wă koh pơlôch sư tơpă boih, mă-lei đei ‘Bok Kei-Dei tơdŏng. Hơdrol lu sư tơrăn, đơ̆ng rŏng lu sư jing pran, blah pơpuh tŭk lu linh dêh đe mă ayăt kơ lu sư.” (Hêbrơ 11:33-34)

Mă khan lu sư gơh “ kĕ blah iŏk lơ teh đak noh nai” dah “gơh pơŏm ‘bơ̆r kiĕk”, mă lei lu sư kŭm “ đe che bơle kơ sư, teh sư păng sơnguĕt tơlei, chô̆ sư păng tơlei glang mam, tah sư tơ lăm hnam phak, mă-lei sư kư̆m ưh kơ chu lê̆ ‘Bok Kei-Dei. Lu mơ’nah đe klơ̆m sư păng tơmo, mơ’nah đe ot kơtĕch akâu sư păng juơ, mơ’nah đe koh pơlôch păng đao. Lu mơ’nah jơ̆l kơ dơnuh hin chă hrŭk hrăi ao pơm păng akar triu, akar bơbe. Lu sư dơnuh tơpă mă-lei đe oei areh kơ lu sư, pơm kơnê̆ kơ lu sư ‘mơ̆i. Jô̆ gah tơdrong pơm ‘lơ̆ng tơpăt, lu sư ‘lơ̆ng hloh kơ đĭ-đăng bơngai ala teh, pă rŏ kơ lu sư oei tơ teh âu, mă-lei lu sư oei oăi tơ tơmăn glă, tơ kông krang hang nak, tơ gơp tơmo. (trong 36-38)

Tơdrong hơdai đơ̆ng đĭ đăng bơngai kĕ jei đon lui jơ̆ tơdrong lui gơnang kơ ‘Bok Kei-Dei, ăn kơ lu sư gơh kĕ chơ̆n lăm tôm tơdrong arih. Yua kơ thoi noh, mă khan kơplah ih oei lăm dôm kơ năr pơmat tat, kơplah ưh kơ ‘bôh hơđăl rok trong tơ anăp, ih oei gơh pơtrơp yak yua kơ đơ̆ng tơdrong lui gơnang kơ Sư. Rŏ lăng tơdrong Kră Yang oei bơ̆jang adrol hloh jơ̆ bơtho ih ‘bôh băt tơdrong oei hơdai đơ̆ng Sư, ưh kơ sĭ tơplih tơdrong arih hloi. Păng trŏ anih ‘noh, lui gơnang kơ Kră Yang ưh pă jơ̆ bơtho đĕch, mă lei jơ̆ tơdrong trŏ kơ ih gô hlôi mơn đei.

Apĭnh đĭ đăng krao khan hơdai: Kơkuh kơ Kră Yang, Ih pơkă khan tơdrong tơdă păng tơdrong Ih wă lăm tơdrong arih kon ling lang jơ̆ tơdrong tơdă ‘lơ̆ng tơpăt. Yua kơ thoi noh, apinh tơgŭm kon ling lang ‘bôh băt tơdrong ‘lơ̆ng rŏ păng tơpăt đơ̆ng Ih rim năr, mă lăm kơplah tơproh ‘lơ̆ng dah kơplah pơmat tat. Apinh tơgŭm kon băt lui gơnang păng chu yom kơ Ih tôm mah, mă khan rim anih ayơ Ih đei dan ăn kơ kon, păng yak năm hăm jơhngơ̆m hiôk hian lăm tơdrong chông anhăk đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ih hăm đei oei lăm dôm kơ năr pơmat tat ưh? Dôm kơ gleh hrat, hiơ̆k bơngơ̆t noh pơm kơ ih gleh lap thoi yơ? Nơ̆r Kră Yang năr ‘nâu pơlung ih athei pơtrơp tơnăp păng lui gơnang kơ Sư mă khan tơdrong arih ưh tim mă tơplih. Lăm jơhngơ̆m ih oei đei dôm tơdrong ưh kơ hơđơ̆ng dah pŭ trăp ayơ, athei pơjao đĭ đăng ăn kơ Kră Yang, yua kơ băt Sư hlôh rơđah tôm tơdrong ih oei tơ’bơ̆p. Athei krao apinh tơdrong bơtho tơ’bôh đơ̆ng Sư ăn kơ ih gơh yak hlôi kơ dôm pơmat tat păng ‘bôh băt tơdrong kơnhăm păng tơdrong wă ‘lơ̆ng tơpăt đơ̆ng Kră Yang lăm dôm kơ tơdrong pơlong lăng noh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.