‘Mêm kơkuh kơ đĭ đăng, lu bơngai kon mă oei hơwơ̆l lăm chăl arih, păng lu bơngai mĕ mă oei thĕng hreh pơyơ̆r tơdrong arih. Hăm đei layơ ih dơ̆ng lăng tơpang ti hơkĕ hơkong mĕ ih, tơdah mă thar ‘bôh lu akar dŭng ‘nhĕo đĭ tơ kơpal muh măt noh? Tŏk bŏk lu anat anot gah jên tơmam por sŏng hơbĕn ao hrŭk, mơ’nah lu bơ̆n lăng tơdrong ‘bôh mĕ oei hơdai thoi lĕ kơ minh tơdrong hmă đĕch. Lu bơ̆n ‘bônh kơ pơma nơ̆r bơnê kơ bơngai ‘nguaih, mă lei “ ‘măn” dêh ‘bơ̆r hiĕk kơ bơngai drŏ-kăn mă pơjing tơdrong arih lu bơ̆n. Đĕi lu bơngai chĕp tơdrong ơh sơ’ngon yua kơ “ ‘maih bơnê ră mă lei mĕ ưh pă đei bơih”, păng đei lơ bơngai mĕ oei mơn sơ’ngon adrô̆ lăm hnam oei kơdih-kâu yua kơ lu kon hơ’lơ̆p ưh kơ ‘blŏk hiơ̆k. Pơgê ‘nâu, lu bơ̆n wang hơdai ‘măn jơ tơchĕng hơdai wă ‘blŏk kơ tơdrong ‘mêm mĕ tih tin, wă kơ tơ ‘blŏk kơ jơhngơ̆m bơ̆n kơdih khan: “Mĕ jơ̆ tơdrong pŭn hiôk tih hloh mă Kră Yang đei ăn kơ bơ̆n.

Năr ‘nâu, ‘năr 09/05/2026, tơdrong tơdă Amăn Jơ Krao Khan Rim Năr apinh wơ̆n đĭ đăng bơngai mơ̆ng wang tơchĕng pơwao hơdai Nơ̆r Kră Yang hăm bơngai chih Cathy Irvin kơ̆l ‘bai MĔ – JƠ̆ TƠMAM GĬT LĂM TƠDRONG ARIH RIM NĂR

“Athei chu yom kơ mĕ ‘bă ih, wă kơ ih gơh arih sot tơ kơpal teh mă Kră Yang ‘Bok Kei-Dei đei ăn.” (Lĕch Đơ̆ng Êyiptơ 12:20)

Hăm đei tơdrong ‘mêm ayơ tơ ala teh âu mă gơh pơting păng tơdrong ‘mêm bơngai mĕ? Kơplah tơchĕng pơnhen gah tơdrong pơyơ̆r mă bơngai mĕ ăn kơ lu kon hơ’lơ̆p sư, hăm đei hlak hla bơ-ar ayơ chih mă tôm mah, tơdah mă kăl kơ plĕnh kok hmông ‘mơ̆i kĕ jô̆ tôm?

Mĕ pơyơ̆r pơđĭ: jơ năr, tơdrong tep, păng lơ mơ’nah dôm kơ jơ sŏng sa ưh kơ tôm mah. Dôm kơ djoh đak măt lĕch ro adrô̆, dôm pơgê iung kuăng kơchăng wă hơmet pơ’lơ̆ng dôm tơmam kăl yua lăm hnam dơnŏ. Đơ̆ng awih awăn lăm hnam, hiơ̆k kơ tơdrong jang, truh kơ por sŏng ‘nhot sa rim năr… ling lang kơ mĕ ngăl bơ̆jang. Mă loi jơ̆ lu bơngai yă, lu yă kră, mă khan sơnăm đĭ kră, jơhngơ̆m ưh pă kĕ ră mălei oei ling lang bơwei lu kon sâu hăm jơhngơ̆m ‘mêm ưh kơ kăl kơ đei apah, ưh kơ mơn kơ anat anot. Mĭnh năr pơm mĕ dang lĕ kơ bơ̆jang ưh kơ đei layơ tôch.
Tơdrong kiơ pơm ăn bơngai mĕ jing ‘lơ̆ng păng gĭt thoi noh? Inh lui ngeh tơpă, Kră Yang dan lăm jơhngơ̆m bơngai drŏkăn lu “tơdrong ‘lơ̆ng” phara hloh. Sư ăn kơ mĕ tơdrong pran kơtang wă chô̆ akŭm đĭ dôm tơdrong jang anat lăm ‘bar jĭt puăn jơ kơđeh kơđoch mă ưh kơ đei bơngai bu nai gơh pơm kĕ. Sư ăn kơ mĕ tơdrong kĕ ĕnh wă gơh chu pŭ hơdai dôm kơ tơdrong pơmat, ơh sơ’ngon kơ dôm tơdrong jĭ jăn gah sĕch akar tơdah mă jĭ jăn lăm jơhngơ̆m lu kon hơ’lơ̆p. Noh jơ̆ jơhngơ̆m ‘mêm mơnat đơ̆ng ‘Bok Soi Tơm, Tơ’Ngla ‘mêm mơnat dôm tơdrong rơdu rơmơ̆n lu bơ̆n.

Mĕ jang gleh glăn măng năr mălei ưh kơ hơnhŏ iŏk tơmam apah lăm ala teh âu. Thoi noh bơih, lăm Năr ‘Blŏk Hơdơ̆r Kơ Mĕ, rim ‘nu lu bơ̆n jơ̆ bơngai mă krôp gom hăm đak krong ‘mêm mơnat păng jơhngơ̆m pơyơ̆r noh, athei tơ’bôh bĕ tơdrong bơnê đơ̆ng đĭ jơhngơ̆m: “Ơ mĕ, kon bơnê kơ ih yua kơ dôm tơdrong ih đei pơm păng oei pơyơ̆r đĭ kơ lu kon.”

Mă khan lu ‘bĕng sa ‘băt ‘lơ̆ng, lu pơkao hơdrih ‘brĕo, mĭnh hlak kơthơ chih pơ’lơ̆ng tơdah tơmam sŏng sa hơmet pơ’nhŏ… dôm lu tơdrong noh ưh kơ kĕ tơ’bĕnh đĭ dôm tơdrong đơ̆ng mĕ pơjao ăn ôh. Mălei noh jơ̆ “Jơhngơ̆m”, jơ̆ tơdrong tơbang wă kơ mĕ băt lu kon ưh kơ đei layơ hiơt kơ mĕ, păng ling lang pơyom bơnê. ‘Nâu jơ̆ kơplah wă pơma khan: “Ơ mĕ, ih jơ̆ tơmam gĭt mă Kră Yang pơjao ăn kơ chăl arih kon.” Mưh ih pơyom kơ mĕ ih, Kră Yang gô lăp đon kơ ih, yua kơ ih đei ‘mêm pơyom kơ tơmam pơjing gĭt găl Sư.

Hăm đei bu gơh pơting hăm tơdrong ‘mêm mĕ? Teh đak âu ưh kơ đei bu ‘nguaih kơ tơdrong ‘mêm ‘bă – mălei noh jơ̆ tơdrong hơ’mon phara. Lăp mĭnh tơdrong ‘mêm Kră Yang đĕch gơh jing tơmam pơtŏ trŏ hloh wă pơting, yua kơ Sư đei ăn Kon Pôm Sư lôch tang lu bơ̆n.

Băt lăm năr phĕt ‘nâu, ih oei mơn sơ’ngon adrô̆ yua kơ mĕ ih đĭ wih tơ Kră Yang bơih, tơdah mă ih oei chang gô wă jing minh ‘nu bơngai mĕ. Tơdah thoi ei, apinh ih rôp ti minh ‘nu mŏ oh, minh ‘nu buăl, athei chă minh ‘nu bơngai ayơ wă klah asong tơdrong chơt hiôk noh mă phara hloh. Tơdah mă ih jơ̆ minh ‘nu bơngai mĕ oei arih adrô̆ yua kơ kon hơ’lơ̆p oei tơ anih ataih, athei ‘blŏk bĕ: Kră Yang ‘mêm kơ ih, păng Sư ling lang oei hơdai ih. Ih ưh kơ đei layơ minh drô̆ ôh.

Lăm măt lăng ‘Bok Kei-Dei, mĭnh ‘nu bơngai drŏkăn gĭt kăl tơpă. Ih đei tơdrong gĭt păng jơhngơ̆m ‘lơ̆ng tơpă. Apinh Kră Yang bơnê pơ-ư dôm lu tơdrong pơmat mă ih tuh ăn kơ bơngai nai, mă loi dôm tơdrong mă ih wang tơgŭm lăm tơdrong jang lăm Hnam Kră Yang.

Păng rim ‘nu lu bơ̆n athei răk bĕ Nơ̆r Kră Yang khan:

“Athei chu yom kơ mĕ ‘bă ih, wă kơ ih gơh arih sot tơ kơpal teh mă Kră Yang ‘Bok Kei-Dei đei ăn.” (Lĕch Đơ̆ng Êyiptơ 12:20)

“Hơpơi kơ Kră Yang ‘mong ăn kơ ih dôm tơdrong ‘lơ̆ng ih đei pơm, ih gô năm kơ’nơp ala pơnăr Kră Yang ‘Bok Kei-Dei đe Isơrael.” (Rut 2:12)

Apĭnh đĭ đăng krao khan hơdai: Kơkuh kơ ‘Bă mă ‘bĕnh tơdrong ‘mêm. Ih jơ̆ tơm rơh dôm tơdrong ‘mêm. Năr ‘nâu kon năm ‘bơ̆t anih pơtao ‘lơ̆ng rŏ Ih wă pơyơ̆r nơ̆r hơri bơnê yua kơ Ih đei ăn kơ kon đei minh ‘nu mĕ lăm chăl arih. Kon apinh Ih mơnat ăn kơ dôm wơ̆t jơhngơ̆m kon ưh kơ băt hiơ̆k, dôm lu nơ̆r pơma kơnê̆ trăp kon pơma ăn kơ bơngai drŏkăn mă chu pŭ dôm tơdrong pơmat ăn kơ kon. Apinh Ih tuh thim jơhngơ̆m pran ‘nao ăn kơ lu mĕ mă oei lap, pơlung jơhngơ̆m lu bơngai mĕ mă oei ơh sơ’ngon adrô̆, păng tuh ăn tơdrong chơ̆n hơđơ̆ng mă hloh kơ tơdrong hlôh băt ăn kơ bu mă oei ‘blŏk kơ mĕ mă đĭ hiong bơih. Apinh ăn kơ kon gơh băt ‘mêm pơyom, wei lăng păng ‘mêm kơ mĕ thoi lĕ Ih ‘mêm kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, tơdah tơdrong pơyơ̆r mĕ bơ̆n chông anhăk ba bơ̆n truh tơ tơdrong ‘lơ̆ng ‘Bok Dŏng Pơklaih Yêsu tơ ala teh âu: minh tơdrong ‘mêm pơjao ưh kơ kăl kơ pơdrŏu tơwih. Jơ̆ lu bơngai sơng iŏk tơdrong ‘lơ̆ng bơih, apinh arih trŏ kơ tơdrong ‘lơ̆ng noh. Athei tơ’bôh tơdrong ‘mêm păng băt bơnê kơ mĕ. ‘Nĕ kơ gô mĕ đĭ yak ataih ‘mơ̆i na hmach kơ dôm lu nơ̆r ưh kơ tam pơma. Dôm lu tơmam kăp jên kư̆m ưh kơ tơplih kơ tơdrong tơ’bôh hăm đĭ jơhngơ̆m. Tơdah năr ‘nâu ih oei đei mĕ, noh jơ̆ tơdrong pŭn tih tơpă. Tơdah mĕ ih wih tơ Kră Yang bơih, athei pơtrơp bĕ tơdrong lui păng tơdrong ‘mêm mă sư đei pơjing ăn bơih. Athei ‘blŏk bĕ, rim tơdrong iĕ ih pơm ưh kơ sĭ pơm tơnŏ ăn kơ jơhngơ̆m mĕ đĕch, mălei noh jơ̆ tơmam pơyơ̆r mă ‘Bok Kei-Dei lăp đon. Sư pơyom tơdrong tơnăp tơnen lu bơngai mĕ, păng Sư dai sơkat pŭn hiôk ăn kơ lu bơngai mă băt gĭt-yom “tơmam gĭt” mă Sư pơjao ăn.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.